الحلقة 106 :
فلاش باك :
قاعد فالجاردان ...نتكيف ... البارح كنت نخمم اني نروحلها و نفهم كلشي .. خذيت النومرو متاع اكا العميل ... و خبرتوا يراقبها ..متوحشها برشا ...لحظاتنا كيف كيف هي الي مخليتني .. نخمم فيها كل مرة ... نحس اللي فما لغز ورا هاذ الشي الكل ... تعدا نهار عادي كيفوا كيف غيروا ...غدوة باش نرجع نشد خدمتي .. اللي صار و متوقعتوش انوا يطلع أمير المالكي هو طبيبها النفسي .. الغدوة بعدها فقت على فوطو متاعو و متاعها... يبوس فيها ... ركبلي العصب .. للمرة التالية نطلع غالط ... فتخمامي لهاذ الدرجة .. عايشة حياتها عاللخر و انا نخمم فيها ... تي تعميت من حبها هكا ... لدرجة سيرين اللي كنت نعشق فيها .. تي اصلا مطيشها جملة ...بستها و ما حكات شي ... لتوا ما فسرتلها والو ... تي فوق اللي عاشتوا زدت انا ظلمتها ..باز توا لازم نمشي فحياتي القدام ... و اذاكا اللي صار ... رحت طول خبرتها ...تعرس بيا النهار اللي بعدوا ... صح كنت نتوجع خاطرني خذيت قرار بعقلي ...اول مرة نخلي قلبي بعيد على قرار يخص حياتي كيف هكا ...حتى سيرين وقت خبرتها تصدمت اما فرحت ... وعدتها قبل 3 سنين و توا جا الوقت باش نوفي بالوعد متاعي ... قاعدين على التابل متاع العقد الكل يغزرولنا ... هزيت يدي نصحح العقد ..متردد قلبي واجعني .. حاس بلي اللي نعمل فيه باش يكلفني برشا .. صححت العقد و غزرتلها فرحانة عاللخر ...حطت يدها على يدي و تبسمتلي ... قمنا شطحنا شوي .. بعدها جبدت روحي نحس بالخنقة ... باقي نغني .. متوقعتش اني نهز راسي و نلقاها بعد الفترة هاذي الكل ... احساس مخلط بين فرحة اني شفتها ...و حقد عاللي عملتوا ... احساس يقولي اخطفها و روح و احساس يقولي فيق من غفوتك ... حكيت معاها اكاكا ... كل كلمة حكيتها كانت توجعني باز كثر منها ... أخيب حاجة انك تحكي هدرة موش من قلبك تحب تلوم و تعيط ... حتى للوكذب ... بعد ما باستني ردتني بخطوات للتالي ... وقت كنا كيف كيف ... آخر مرة عنقتني فيها .. اول ليلة بيناتنا ... هبالنا كيف كيف ... كلشي جا في راسي .. و طلعت هدرتها صح ..اكبر عقاب عملتوا انو تكون قريبة ليا ...يختفي كبريائي غشي ... وكلشي يروح ... تفكيري الكل في انها معايا ... وقت بعدت اكاكا ... حسيت اني خسرتها .. اكا الغزرة اللي ريتها ...عمري و اكا الغزرة الي خلاتني نتلفتت و نشوف سيرين تبكي ..و نتعداها من غير مانخمم مرتين ...الحب ...الحب اقل واش يتقال عليه ضعف من نوع جامي صرالي ... حتى وقت حبيت سيرين .. مصراتليش هكا .. حسيت بشي مني نقص كي راحت ..خرجت البرا ملقيتهاش ..ريت الباب متاع كرهبة مفتوح اكيد متاعها ... جريت دوب ما وصلت ريت المفاتح مطيشين فلرض ..حليت الباب ...لقيت تيليفونها يصوني ... أمير اللي يطلب فيها ...طاح مني النص ...يعني تخطفت !!! ...غزرت للكرسي للي مقابل فيه مريول بيض ..لحت يدي هزيتوا..ضربت في خشمي البارفان متاعي ... مريولي هذا اللي خليتوا فوق السرير ...الغصة و الغش اللي فيا طفاو ..، نزلوا زوج دموع ... هزيت يدي مسحتهم ...لثاني مرة نبكي على جالها..ركبت الكرهبة ...لازم نلقاها قبل ما يعملولها شي ...مستحيل نسمح يصيرلها شي .. نسوق بالفيتاس اصلا البلاصة .. هاذي معزولة فيها كان القلاع و الفيلات ..حبست وقت ريت كرهبة مراكية بعيد .. ووقدامها رجال ظاهر عساسين ..اما موش اي عساسين ظاهر رجال مافيا ... بعدت شوي و ركيت الكرهبة في بلاصة متبانش ..باقي نتسلل لين ريت كرهبة معديا ..ريقلت السلاح في يدي ...ريت فيها ماريا المالكي!!!... موش هي جدة اليف ششتعمل هوني ... تأكدت اللي فما ملعوب كبير هوني .. هديت عالرجال اللي غديكا ..كانوا في 8 .. باقي نتسلل لين دخلت للفيلا .. ظلمة برشا ..جيت باش نتعدى ...طيحت الفاز رجعت بخطوة للتالي .. تخبيت ورا الشوكة ...سمعت حس واحد كي نازل و يريڨل فالفرد .. هزيت الفرد متاعي .. دوب ما تعدى هديت عليه ...حطيت الفرد على راسو ..و جبدتوا من التالي .. دوب ما ريتوا تفآجأت ...مراااد ....
⏩⏩⏩⏩⏩⏩⏩⏩⏩⏩⏩⏩⏩⏩⏩⏩⏩⏩⏩⏩⏩
#خطوة_نحو_الجحيم
#يسرى_أمجوج
أنت تقرأ
خطوة نحو الجحيم 4 (باللهجة التونسية)
Acciónاليوم ..... تعداو برشا حوايج ... وين جامي توقعت نوصل هوني .. ولا تكون حياتي كيف هكا ... صح نحب المغامرات من صغرتي ..أما مغامرة كيف هكا متوقعتهاش ... خاسرة و لا رابحة ...ظالمة ولا مظلومة .. مليحة ولا خايبة ..منعرش بالضبط واش كنت ... يقولوا اللي الح...
