ثم إن بعد الصبر جنة 💙

الفصل السابع عشر

حور وهى تصفعه صفعة قوية: انت معندكش قلب وانسان انانى ومعندكش احساس..
محمود بغضب: حور مش من حقك تحكمى عليا كده وبعدين المشروع مهم لينا كلنا ومين هيشتغل مكانه..
حور بعصبية: انا هشتغل مكانه وانت متدخلش فى امور عمالى تانى ولو فكرت بس مجرد تفكير انك تيجي على حد فيهم هيكون خلاصك على ايدى يامحمود انت فاهم!
وتركته وهو الشر يتطاير من عينيه...
محمود.: استني بس اخلص من الزفت عمر ده وبعدين ابقى شوفى مين هياخدك من ايدي ياحور هخليكي تندمى على كل قلم أديتهولى وهخليكي تحبينى هتشوفى.....
ذهبت حور لكى تعمل مع العمال..
احد العمال: حضرتك بتعملي ايه يابشمهندسة
حور: هشتغل مكان عم حسين عشان اخد اجازه
احدالعمال:طيب انا كمان عايز اجازة يابشمهندسة
حور: وحضرتك هتاخد اجازة ليه بقي ان شاءالله يامحمد!
محمد: تعبان حضرتك عايز استريح شوى
حور: لما نخلص المشروع تبقى تاخد اجازة براحتك يامحمد دلوقتي عايزين نشتغل ونبطل دلع..
محمد: واشمعنا عم حسين خد اجازة ولا هو اللى تعبان واحنا بنتدلع!
حور بعصبية: عم حسين اخد اجازة عشان بنته بتعمل عملية ومحتجاه جنبها وكان رافض يروح عشان الشغل وانا اللى اديته اجازه....اى حد فيكم هيفكر يعدل عليا او ياخد قرارات هو مش قدها هيندم اوى...واى حد عايز يستريح اظن مكانه فى الشركة هنا ملهوش لازمه ويتفضل من دلوقتي....وانت يااستاذ محمد بص لنفسك وبطل تبص لغيرك...واتفضلوا كل واحد يشوف شغله...
العمال يتهامسون...
_ اول مره اشوف بنت كده.
_ شايف العدل ياابنى دى بتشتغل زينا بالظبط ويمكن احسن كمان!
_ دى بتعاقب نفسها اكتر مننا.
_ والله يابخت البشمهندس عمر بيها انا لو عندى واحده زيها كده والله ماهسيبها غير وهى فرحانه.
_ بس بطلوا كلام احسن تسمعنا وتنفخنا كلنا يااخويا..
محمود ذهب الى عمر...
محمود: عمر...ياعمر.
عمر:خير يامحمود فى ايه.
محمود: مفيش كنت بسألك بس هى حور غيرت شغلها ولا ايه!
عمر: غيرت شغلها ازاى مش فاهم
محمود: مفيش اصل ادت لواحد من العمال اجازة واشتغلت مكانه والعمال معجبين بيها اوى وبشغلها قولت اسألك لتكون بقت من العمال ولا حاجه...
عمر بغضب: انت بتقول ايه انت اكيد اتجننت!
محمود: لو مش مصدقنى بص عليها أهى هناك أهى...
نظر  عمر الى حور فذهب إليها مسرعا وهو غاضب...
عمر بغضب: بتعملي ايه ياهانم!
حور بهدوء:ايه ياعمر فى ايه بشتغل زى الناس..
عمر بعصبية:وهو ده شغلك حضرتك ياهانم وسط الرجاله عجبك اوى الشغل هنا..
حور بعصبية: انت ازاى تسمح لنفسك تتكلم معايا كده...انا وسط رجاله اه بس انا بميت راجل لو تعرف يعني..
عمر بصوت عالى: اتكلم معاكي زى ماانا عايز ومفيش شغل هنا واتفضلى روحى على البيت حالا..
حور بعصبية: وانت بتأمرنى بصفتك إيه ان شاءالله
عمر بغضب: بصفتى زوجك ياهانم ولازم تسمعي كلامي..
حور بصوت عالى: وده مش يديك الحق تكلمني بالطريقة دى انا مبعملش حاجه ولا عيب ولا حرام..
عن اذنك يابشمهندس...
وتركته حور وهى فى قمة غضبها منه وكانت تفتح باب السيارة فأوقفها عمر...
عمر باسف: حور انا اسف متزعليش منى انا بس اتضايقت لما شوفتك بالمنظر ده
حور ببرود: ماله منظرى شوفتني عملت ايه غلط..
عمر: حور انا...
قاطعته حور: من فضلك يابشمهندس عمر متحاولش تتكلم معايا تاني عشان هيكون فى رد فعل هتزعلك اوى...
وصعدت الى السيارة وذهبت إلى المنزل وظلت تبكي  حتى نامت واستيقظت قبل قدوم عمر بنص ساعة تقريباً...
جلست فى غرفة التليفزيون وشاهدت أحد افلام الكرتون.....
جاء عمر: السلام عليكم..
حور لم تنظر له: وعليكم السلام..
جلس بجانبها ولم تعطيه أى اهتمام...
عمر: انتى لسه زعلانه منى ياجنتى
حور: عن أذنك انا هدخل أغير هدومى وهنزل أزور ماما وبابا...لو مكنتش هتمانع حضرتك يعني..
عمر: حبيبتي همانع ليه بس مقدرش امنعك عن اهلك..
حور: طيب كويس الحمدلله ان حضرتك تكرمت عليا وهتخلينى اشوفهم..
عمر: ياحبيبتي ايه الكلام ده بس ده انا عيونى ليكي..
قاطعته حور.: طيب عن اذنك هلبس وهمشي..
تركته حور نادما عما فعله معها وكانت تبكي فى غرفتها ولكنها نظرت فى المرآه وقالت: بتعيطى ليه! ايه اتصدمتى فيه هو كمان، تستاهلي حد قالك تثقى فيه انتى ايه مبتتعلميش كل اللى يدخل حياتك ويضحك عليكى بكلمتين هتثقى فيه..
_ بس هو غير حسيت عيونه كانت صادقة كلامه طالع فعلا من قلبه ف وثقت فيه
=واحساسك طلع غلط شوفتى قولتلك كلهم مصطفى ابو حجر!
_ طيب والعمل دلوقتي
=امسحي دموعك ومتبقيش عاملة زى الهبلة وتبقى ضعيفة قدامه انتى قوية بنفسك...متتكلميش معاه خليه يعرف قيمتك يلا قومى واضحكى وهزرى مع كله إلا هو فاهمة!
_ هو اللى زعلنى يبقى لاظم يتعاقب!
مسحت حور دموعها وخرجت من الغرفة...
عمر يفتح باب الشقة...
حور: اشكرك كنت هعرف افتحه لوحدي على فكره..
عمر: عارف..بس انا جاي معاكي..
حور: مقدرش امنع حضرتك اعمل اللى حضرتك عاوزه.
عمر: ايه كمية حضرتك دى
حور: وهو ده الكلام اللى بينا حضرتك...وياريت تركب فى عربية حضرتك عشان انا هروح لوحدي.
عمر: بتهزرى صح.
حور ببرود: لا بتكلم بجد..عن اذنك.
عمر ذهب خلفها:انتى مش بتكلمينى وزعلانه حقك بس هنروح كل واحد لوحده ياحبيبتي مينفعش اهلك يقولوا ايه.
حور: متقلقش مش هقولهم أنك زعلتنى..ولا احرجتنى قدام عمالى...ولا انك بتعاملنى كطفلة...ولا انك بتشك فيا...ولا انك خلفت وعدك وزعلتنى وخليتنى اعيط بسببك لا خالص نبقى نشوف اى كدبه نقولها متقلقش مبعرفش اوحش فى صورة حد..
عمر بأسف: حور انا أسف والله وحقك عليا!
حور ذهبت ولم تعطيه اى اهتمام وبعد ان صعدت الى السيارة...
حور: ياريت تروح بعربيتك منعا للمشاكل حضرتك عن أذنك...
فى سيارة حور كانت تتحدث مع نفسها وتنظر إلى المرآه لترى عمر يذهب خلفها بسيارته...
حور: أخاف أن أكون قد وقعت في حب الشخص الخطأ، أن أكون وبعد كل هذا الجهد الذي بذلته مع نفسي كي التصق به قد اذنبت في حقي وقدمت قلبي لمن يخذله مجددًا.
متبصيش عليه!
لم يتحملك وانتِ في أسوأ حالاتك، لم يتحمل مِزاجيتك او عصبيتك علی أتفه الأمور وأعظمها، لم يتحملك وقت نوبات ضيق التنفس وليالِ الأرق، علام انت مدينه له!
فى سيارة عمر كان ينظر إلى حور:  عارف عينيك بتقول ايه ياحور دلوقتي انتى فاهمه انى خذلتك وبقيت زيهم والله  انا مش زيهم وانا عارف هصالحك ازاى..
"‏والذي يجهل قراءة عينيك، لن يسمع صوت قلبك أبدا، ‏‎ذلك انها مرآة القلب."
وصلوا أخيراً إلى منزل والد حور..
والد حور:  حور حبيبتي وحشتيني اوي يابنتى
حور تقبل على يد والدها: وانت اكتر يابابا والله وحشني اوي..
والدة حور  : بنتى حبيبتي وحشتيني اوي
حور: وانتى اكتر والله ياماما.
والد حور: امال فين عمر..
عمر وقد اتى.: انا اهوو ياعمى..
والد حور: اهلا ياابني اتفضل نورتنا..
بعد ان جلسوا...
والدة حور: كنت هموت من الخوف عليكى والله  يابنتي من ساعة اللى حصل ده..
حور بتوتر وخوف بسبب تذكر الحادث: الحمدلله ياماما حصل خير!
والد حور.: خلاص ملهوش لزوم الكلام ده المهم انها معانا دلوقتي..
والدة حور: اه المهم انها معانا واعمل حسابك ياعمر هتباتوا معانا النهارده اه بنتى وحشتني وعايزة اشبع منها..
حور: لا ياماما مينفعش لازم نروح
عمر وقد وجدها فرصة لكى يصالح حور: لا لا ياحور مينفعش تزعلى ماما هنبات النهارده وبعدين نروح الشغل بكره..
والدة حور.: عمر  عنده حق ياحور بقى كده تزعلينى منك..
حور: مقدرش علي زعلك ياماما حاضر هنبات..
والد حور: قوموا بقى ياام حور جهزوا الغدا انتى وحور وسبينى اتكلم مع عمر شوى...
ذهبت حور ووالدتها الى المطبخ لتحضير الطعام وبقى عمر ووالد حور يتحدثون..
والد حور.: عمر عامل ايه مع حور..
عمر: الحمدلله ياعمى كل حاجه تمام ربنا يحفظها ليا..
والد حور: اوعى تكون مزعلها!
عمر: مقدرش ياعمى هو بس فى شوية مشاكل في الشغل وهنحلها بأذن الله..
والد حور: ربنا معاكم ياابنى.... مش ناويين تفرحوا قلبى قريب بقى.
عمر: عينينا ليك ياحاج..
والد حور: عايز احفاد عايز افرح كده واشوف عيالكم..
عمر بحزن: ان شاءالله ياعمى ادعيلنا بس
والد حور: فى حاجه ولا ايه ياابنى قلقتنى..
عمر: مفيش ياعمى بس انت عارف حور دماغها ناشفة كل لما تيجي تميل لازم ترجع تانى مليون حاجة بعدانى عنها مش عارف ليه..
والد حور: قولتلك ياعمر هتتعب معاها انت عارف اللى شافته مش قليل بردو.. بس انا شايف انها قربت يعني..
عمر  : مش فاهم ياعمى قصدك ايه
والد حور.: هى وقعت في حبك خلاص قرب منها وخليك تنح يااخى اتلحلح..
عمر بفرحه: ياسلام ياعمى ده انت تؤمر هتلاقى العيال عندك من الصبح..
والد حور بضحك.: ربنا يهدي حالكم ياابنى ويسعدكم يارب
فى المطبخ...
والدة حور: حور!
حور: نعم ياماما..
والدة حور: عامله ايه مع جوزك..
حور.: عملت بطاطس وزر وفراخ..
والدة حور: انتى ناوية تموتينى صح
حور. بعد الشر عليكي بس ياماما ليه كده
والدة حور: نسيت انك غبية.. باختصار كده مفيش عيال جاية فى الطريق..
حور: عيال ايه بس ياماما.. انا عايزة اخلص المشروع بتاعى..
والدة حور بعصبية: عليكى وعلى ام المشروع بتاعك..
حور: ايه ياماما اهدى فى ايه..
والدة حور: حور يابنتي حرام عليكي اللى بتعمليه فى عمر ده.. استناكى كام سنة واتحرم منك كام مره وبردو عافر ووصل ليكى ومحاولش يغضب ربنا فيكي ويوم ماتبقى حلاله تحرميه من حقوقه الشرعيه حرام عليكي يابنتي والله عمر ميستاهلش كل ده... ده بحبك اوي والله.. اديله فرصة ياحور قربى منه متخافيش عمر يستاهل انك تحبيه وميستاهلش كل التعب ده..
حور: يعني اعمل ايه ياماما.
والدة حور: انا قولتلك اللى عندى والدور والباقى عليكى انتى عمر مقصرش معاكى فى حاجه ف متقصريش ف ابسط حقوقه يابنتى...
وتركتها وذهبت لتضع الطعام على السفرة..
بعد تجهيز الطعام..
والدة حور: يلا ياحاج الاكل جاهز... قوم ياعمر اغسل ايدك وحور هتجيب الفوطة وجايه..
أتت حور بالمنشفة وكانت تنتظر عمر لينتهى من غسل يديه..
عمر: نسيت اقولك حاجه مهمه قبل ماننزل..
حور: ايه هى
عمر: كنتى زى القمر على فكرة..
حور: على أساس انى دلوقتي وحشة يعني.
عمر: لا والله بقيتى أحلى بعد دقيقة كمان هتبقى أحلى من اللى قبلها..
حور بخجل: طيب خلص بقي عشان الأكل هيبرد..
عمر: وحشتيني!
حور: انا هروح هأكل انا بقى عشان واقعة من الجامعه..
عمر: نسيت ان الكلام الحلو بيعملك هبوط..
وفى أثناء تناولهم للغداء..
عمر: بحبك!
حور: أحم أحم أحم أحم..
عمر: حبيبتي سلامتك خدى اشربى مياه..
بعد ان انتهت من شرب الماء..
عمر: صحة وهنا على قلبك ياروحي
حور: طيب هقوم أنام انا بقى...
والدة حور: متقعدى معانا شوى يابنتى
حور: معلش ياماما تعبت من الطريق وكده..
والد حور يغمز لوالدة حور: سبيهم يستريحوا ياام حور..
عمر.: هقوم انا كمان بقى مراتى متعرفش تنام من غيرى...
بعد ان دخلت حور الغرفة جاء بعدها عمر..
حور: ايه مش تخبط..
عمر وهو يغلق الباب: ايه اخبط وانا داخل اوضة مراتى..
حور: وانت هتعمل ايه هنا اصلا يلا نام برا..
عمر جلس على السرير: معلش والله حماتى هتضربنى وهتقولى ادخل نام فى حضن مراتك يرضيكي مش اسمع كلامها طب والله عيب عليا..
حور: طيب وسع كده ونام باحترام فاهم!
عمر يبتعد بعض الشئ: حاضر..
بعد ان نامت حور وكانت تعطى لعمر ظهرها.. فاتى عمر واحتضنها من الخلف..
حور: انت بتعمل ايه بقول نام باحترام..
عمر يقبل خدها: ماانا نايم باحترام اهووو.
حور: لا لا اوعى تكون فاكر اني هصالحك لا انسي انا زعلانه منك بجد..
عمر بهدوء: حبيبتي بقى قلبك ابيض وبعدين انا والله كنت خايف عليكي مش عايزك تتعبى مبحبش اشوف فيكي حاجه وحشه وبعدين كفاية عليكى شغلك فى الشمس هنا وهنا وكمان هتشتغلى مع العمال.
حور بحزن: بس انت زعلتنى اوى ولما اتعصبت عليا خليت قلبة حزين 😔
عمر بحب:
ثم أنكِ برغم ما فيكِ من حُزن تبدينَ جميلة، جميلة رغمًا عن كُل شئ، جميلة وبصرف النظر عن أي شئ، فكُل جميلٌ دونكِ ينقُص، وكُل جميلٌ ناقصٌ بكِ يكمُل، جميلة قلبًا وقالب كما لو أنَّ الطُهر بكِ وعليكِ وفيكِ غالب، هذا يا سيدتي ما نراهُ مِن جمالٍ في حُزنك، فماذا لو تبسَّمتِ لنا! هذا ما يبدو لنا من وجهكِ الوضَّاء، فكيف لو وصلَ بنا الأمر أن نتمعَّن بقلبك!؟ أقسمُ لكِ أنه لا يسعنا حينها إلاَّ أن نشُكر الذي أرادَ بنا خيرًا حينَ سواكِ جميلة :))
حور بأبتسامة: مش هتعرف تتضحك عليا بكلمتين على فكره..
عمر هامسا بحب: بحبك اووووى ياجنتى..
حور: هى كلمة واحدة كفاية...
~~~~~يتبع
نهاية الفصل السابع عشر
#ثم_إن_بعد_الصبر_جنة
#بقلمي_هدى_محمود