خطايا وغفران || باللهجة العراقية

"إعادة إحياء ذكرى الزواج" Chpt 1

*الروايـة مُقتبسه مـن قِصة حقيقية.

#خطايا_وغفران
#للكاتبة_زهراء_شلتاغة
_ _ _ _ _ _ _ _ _ _ _ _ _ _ _ _ _
الخامِس من مايو عامَ ٢٠١١ .

في صالةِ البيت ، المزينة بالنفاخات والشرايط الملونة والمزخرفة والرسومات الجميلة ، چانوا الجهال ديزينون الطبلة بالشرايط ويرتبون الأكلات والحلويات والعصاير.. ، بمناسبة الإحتفال بذكرى زواج والديهم ورة ميرجعون من أشغالهم ، وأكثرهم تعباً بالشغل چانت سارة ، چانت تريد تكتب إسم والديها"خالد ونور" على الكيكة بخط مرتب لكونها الخطاطة مال العائلة ،

الفرحة تعُمهم كُلياً والبسمة مرتسمة على وجوههم وماتفارقهم ، فمضت ٢٥ سنة وهمة مزوجين وماتفارقوا لحد هاي اللحظة وأستمروا بزواجهم السعيد مثل ماچانوا يشوفون ، أو حسب ماچانوا يعتقدون .

صارت الساعـة ٢:١٧ الظهر .

نبهتهم سارة وصاحت لأخوانها ؛

_صار الوكت راح يجون أهلي ، ومثل ما إتفقنة كل واحد يختلة بمكان ومن يجون للصالة ويفتحون الضوة نطفر كل إحنة ونصيح"عيد زواج سعيد" مرة وحدة ، إتفقنا ؟ .

هزلها الكُل راسهم بـنعم ماعدا زين رد عليها ؛
_وإنتوا حيل مصدگين سوالف المسلسلات وتردون تعبروهن على أهلنة وبالذات أبوية ؟ بطرانين إنتوا هواية .

رد علية حُسام بسرعة ؛
_نچب وبطل تبيع نكد علينة ماعاجبك روح إطلع برة .

غضب زين من حچايتة وصاح بي ؛
_لاتغلط وإحترم نفسك ترة آني أكبر منك .. رادت تصير عركة بين الإخوان ، سمعهم أخوهم الأكبر هِشام ، چان بالمطبخ يحضر أستكانات الچاي لأن أبوهم ميشرب مشروبات غير الچاي ، عاف المطبخ وراح على صوت العركة وكفخ زين وحسام ورزلهم ؛

_يعني حتى بعد دقيقتين من جيتهم قررتوا تستغلوها بالعرك بيانتكم ؟ شنو ضراير إنتوا ؟ ، كافي لغوة وكل واحد يختل بمكان علما أحضر الچاي بقى شوي ويجون أهلي .

سمعوا الكلام وراح كل واحد بمكان بالصالة وختل ، وزين خِتل من ورة خشمة وگالب وجهـه .

راح هُشام للمطبخ حط الچاي عالنار وإنتظر يتهدر الچاي ، چان يضحك على إخوتة والعركات التصير بيهم ، يعجبة لمن يتعاركون ويجي يكفخهم ويسكتهم بإعتبارة الأكبر بينهم ، وفي واقعِ الأمر هشام يحب أخوانة كلهم وبشخصياتهم الطفولية والمعقدة .

هو الأخ الأكبر بينهم طالب طب مرحلة ثانية ، من بعدة زين أصغر منة بـ١١ صف رابع علمي ، زين شخصيتة سلبية وطايشة ومغرور وأناني رغم هذا عندة إيمان بوجود جانب طيب وحساس بي ، وهالجانب بسبب أمة فزين متعلق بأمه أشد التعلق .