خطايا وغفران || باللهجة العراقية

"إنجذاب عاطفي" Chpt 41

#خطايا_وغفران
#للكاتبة_زهراء_شلتاغة

بهالأثناء طلعت نوال من الغرفة تريد تروح للحمام ولگفتهم لخالد ونور وهيَ تطلع من الحمام وواحد ييوزع إبتسامات للثاني ، بحركة خافته راحت وختلت ورة الباب وبقت تسترق النظر عليهم ، شافنت نور لافة الخاولي على راسها وتبتسم لخالد الي بدوره يبادلها بالإبتسامات وبقت تلطم على خدودها وتملخ بشعرها وهمة يتقدمون للداخل .

رجعت ركض للغرفة شمرت روحها على الفراش وصوت ضحكاتهم وتسامرهم يزرف طبلة أذنها وتحس بالقرف منهم ، بقى هالموقف يحز بكلبها وماخلاها تشوف النوم والأفكار السودة تتغلل بروحها وتاكلها .. لازم تلكى حل لهالمصيبة ماعايزة مشاكل وهي وراها بنات بعدهن مامزوجات وتوكع سمعةإبن نادية بروسهم .

____________________________

إجة الصبح .

جانت نادية واكفة عالطباخ دتحضر الريوك وفجأة حست بضربة قوية جتها على كتفها ، إنصدمت وإلتفتت لوراها شافتها نوال وهي تخنزرلها بعيونها المسعورة بنيران الغضب ، إتفاجأت وسألتها بريبة ؛

_ها خية شبيج شمالج تكفخين بالناس من الصباحيات .

همست إلها نوال بحدة وعصبية وشبثت إيدها على كتفها بقوة ؛

_نادية اني بعد ما أكدر أسكت على هالوضع مال إبنج وبت أخوج ووجودهم بهالبيت جوة سكف واحد إذا ماتتلاحكيلهم وتشوفين حل والله العظيم أسولف هالسالفة لعمام إبنج أخليهم يتخذون تدابير ماتعجبج .

لطمت نادية على خدها وسالتها بريبة وتوتر ؛

_ولج يمعودة هاي شصاير ليش هيج تحجين وسالفة شنو تقصدين بيها ؟ ترة خالد يعامل نور معاملة الأخت وماعندة نية عليها ليش هيج تحجين ؟ .

_تحجين صدك لو تشاقين عايفتلج بنية شابة صايرتلي مرة كدام إبنج جنه زلمة وحيل مفطون وتردين مايصير بينهم شي أدري لعد والشيطان وين يولي عنه ؟ ثم تعالي شعدها نور تالي اليل طلعة من الحمام تتمضحك كدام إبنج ويرجعون لغرفهم تالي وكت خير ! .

شددت نوال على آخر كلامها بينما بقت نادية تدك وتلطم على صدرها وتستغفر وتستغيث ، أردفت نوال ؛

_إذا ماعرفتي شصار بينهم بذيج الليلة لو راح الوكت وصارت بينهم فضيحة لاتلومين إلا إهمالج وإستهتارج ولاتكعدين تتبجبجين على إبنج بعدين وتصيرين حنينة ؟ روحي هسة عرفي شصار بيهم كبل ماروح ولاتحاولين تجذبين علي لو تتسترين سمعتيني ؟ .

أومأت إلها نادية والدمعة بطرف عينها، جانت خايفة من الفضيحة وخايفةبسببها تنحرم منه لو يدمر مستقبلة وية نور إلي أعتبرتها الوجه الثاني للشيطان .

خلصن نسوان الحموين الريوك ودزتهن نوال للغرفة بحجة التمدد حتى من تروح نور للمطبخ تحاسبها نادية .