رواية نِسمهه ✨ _ "كاملة" ❤

14

رواية #نسمهه_14✨ كتابة : ميرا ياسر 🌸

لايك قبل ماتقرو هي 🙄 بش ماتقولوش نسينا وندمجنا والدسكة هاديك 😂

متابعة ممتعة ❤

الحلقة الرابعة عشر ❤🍃

نسمة .. صباح الخير
صهيب.. صباح النور
نسمة.. طالع ؟
صهيب.. اي تبي حاجة ؟
نسمة.. بتعطل ؟
صهيب.. والله ع حسب ، شن تبي عطلت
نسمة.. كنت نبي ،، لو فاضي يعني بعدين .. نمشي نزور اهلي .. عادي ترفعني ؟
صهيب......
نسمة.. كان مش فاضي عادي توا نمشي مع سيرين وسامح هما ماشيين اصلا ،
صهيب.. توا نرفعك ، الساعة 6 كويس ؟
نسمة.. اي تمام .. شكرا
صهيب.. العفو ،،

وطلع صهيب ورجعت نسمة الداخل ،،

وصهيب طول الطريق وهوا يفكر ف كلام روان ، وللحظة فجباته فكرة و شعور انه حد مهتم بيه ")

صهيب.. تي خيرني اني ، معقولة كلامها صح ونسمة هدا الي تبي تديره ، بس شن غرضها من هكي !

مع الساعة 5

سهام .. خودي هدا وديري زي ماقتلك
روان.. اوك بس هدا شنو ؟
سهام.. هدا جبته م المستشفى ، نسمة فلمطبخ توا تدير ف قهوة للحاج .. ديريلها اي سبلة ومن غير ماتشوفك حطي منها ف الفنجان قطرتين صغيرات بس روان سمعتي ! قطرتين صغاار متوديناش ف داهية
روان.. بس شن دخل الحاج ! وكان تصيرله حاجة !
سهام.. مش هايصيرله شي بيديرله مغص قوي يقعد شوية ويمشي بعدين لما ينادوني باش نشوفه هانقولهم ان اخر حاجة كلاها ولا شربها كان فيها حاجة ، و كلهم  بيلومو نسمة بعدين
روان.. ي افكارك 😈😂
سهام.. اجري هي

وخشت روان لنسمة فلمطبخ ،

روان.. بس بس الحلو شن يدير  ؛)
نسمة.. ههه شي ،، قهوة زي ماتشوفي
روان.. الله الريحة شكلها تهبل😍 نسومة سهام كانت تدور فيك برا شوفيها شن تبي
نسمة.. الله ؟ به توقفيلي عليها شوية لين نجي ؟
روان.. ايي ادللي ❤

ومشت نسمة و دارت روان الي يندار 🌚

ولما جت  ،،

نسمة.. صحييتي ❤
روان.. سلمكك .. خي خ نمشي اني امي تتصل ، نتلاقو غدوة حبيبتي باي 😙😙
نسمة.. ف امان الله ؛ سلام ❤

ومشت روان ،و صبت نسمة القهوة وكيف بترفعها جتها سماح ،،

سماح.. نسمتي درتي القهوة!!
نسمة.. ايي درتها وتوا بنرفعها
سماح.. حطيتي سكر ؟!
نسمة.. اي علاش ؟
سماح.. ييي ياريتك سالتيني قبل ،، بابا يشرب فيها من غير سكر
نسمة.. الله :/ به خلاص توا نشربها اني و نديرله وحدة تانية
سماح.. اوكيين ❤❤ سامحيني نسيت نقولك 😅
نسمة.. ههههههه تي عادي مدوريش ، اصلا كنت بندير لروحي حتى اني...

ودارت قهوة تانية للحاج ورفعتهاله وخدت قهوتها وركبت تبدل لان صهيب علي جية ...

ومع ال6 خش صهيب للحوش وبدي يضبح ،،