رواية نِسمهه ✨ _ "كاملة" ❤

36

الحلقة السادسة والثلآثون ❤🍃

رن تليفون صهيب وهوا راقد >>

صهيب .. الو ؟
مراد ..مكانش العشم 
صهيب.. هههه او مراد ..سامحني والله التهيت فالشغل ..قولي كيف حالك ؟ وكيف حال الوالد ؟
مراد ..عطاك عمره
صهيب..ياارااجل !! لا حول ولا قوة الا بالله ..البقاء لله عظم الله اجركم ..أمتى صار !!
مراد ..أمس فالليل.. تعب شوية بعدين توفى
صهيب..يا الله .. الدوام لله شد حيلك ..وتبي اي شي اني موجود ...تبي نجيك ؟؟ نحجز اول تذكرة ونجيك ع غادي ..
مراد..لالا حني جايين اصلا ..بنديرو الجنازة غادي لانه نطلب يندفن ف ليبيا قبل مايموت ..كنت نبيك تبعتلي اي حد يجي ياخدنا م المطار بس لان عمامي جايين من بنغازي و مش هايوصلو الا مع المغرب 
صهيب.. تي اما نبعت حد هادي اني توا نجيك .. توصل بالسلامة ان شاء الله
مراد..ماشي تمام .. منور 💙 ...هي خ نمشي نشوف شن وراي نتلاقو بعدين
صهيب ..ماشي تمام ..ف امان الله

ونسمة كانت بجنبه وتسمع ومخلوعه ..

نسمة..شن في ! من مات ؟؟
صهيب ..مراد بوه توفى
نسمة..بالله علييك ! ينارري ..مسكييين ربي يصبره
صهيب.. اي تعرفي شكله خانقاته العبرة من صوته وميبيش يبين .. طول عمره ميحبش حد يلاحظ انه مهموم ولا مضايق 💔💔
نسمة..مسكين
صهيب.. ولي ارقدي انتي اني بنمشي الشركة باش نمشيله المطار من غادي
نسمة .. لالا خلاص بنوض ... الساعة كم ؟
صهيب.. 8
نسمة.. اوك خش الحمام انت مابين ماجهزتلك فطورك
صهيب ..اوك
نسمة..وف الليل تجي ترفعني العزي ؟
صهيب .. تبي تمشي ؟
نسمة..اكيد لازم نمشي مش هدا صاحبك ؟؟ لازم نكونو بجنب عيلته الفترة هيا باش لو احتاجو حاجة
صهيب.. هههه تمام .. ❤

ومشي صهيب الشركة وبعدين حط نسمة ف حوش العزي ومشي هوا و خال مراد باش يجيبو مراد م المطار ،،

صهيب.. اهوا طالع من البوابة ..
خاله .. اي هوا،،

وجي مراد وسلم عليهم و اول ماشاف صهيب شد فيه وقعد يبكي بالعبرة 💔

صهيب.. معليشي يامراد شد حيلك.. هدا قضاء وقدر ارتاح م المرض خلاص 💔 .. قوي روحك خواتك محتاجينك توا ..
خاله.. ربي يصبرك ياوليدي ...

وخدوه هوا والتابوت الي كان فيه بوه ورفعوه للحوش

واستقبلوهم وكلهم يملسو ع التابوت متاعه ويبكو .. كانو 3 بنات و مراد راس ولد

وتاني يوم كان الجنازة دفنوه جنب مرته زي ماوصاهم

وصهيب قعد مع مراد ع قد مايقدر باش يواسيه و يحاول يخفف عليه وكذلك نسمة مع خواته البنات.. وحتى ام صهيب والبنات مشو معاهم

المهم منبيش نكتر عليكم بعد ماتمت ايامات العزي ... صهيب خطم ع مراد بعد ماكمل شغله فلشركة مع العشية باش يشوفه ..

مراد.. اهلين صهيب.. تفضل
صهيب.. لالا مستعجل عندي موعد جيت نشوفك علسريع
مراد.. تي خش ياراجل وقولي شن صاير فلشركة في هلبا حاجات بنسأل عليها
صهيب.. هههه لا الشركة هادي تبي تقعميزة
مراد.. به انت امتى موعدك ؟
صهيب.. شاف للساعة وقاله بعد ساعتين
مراد.. ماشي تمام استناني نبدل ونجي معاك نقعمزو ف اي قهوة ونحكو
صهيب.. تي فوت توا خلي المرحوم يسكر شهر حتى وخمم فالشغل براحتك
مراد.. ضملي فمك ١٠ د ونجي 😑
صهيب.. ماشي 😅