قاعده في الكوفير و البت بتعمل لي في مكياج...و انا متوتره و خايفه ااي لحظه يضربو يقولو عقدو.. سلمي كانت قاعده معاي و طلعت برا بعد مساافه جات داخله بتزغرت.. طوالي قلبي اتقبض و قبلتا عليها بخوف...البت البتمكيج استغربت فيني..
سلمي بفرح:( الف مبروك)
و جات علي حضنتني...و انا بقيت ببكي..
البت:(لالا عليك الله م تبوظي المكياج...الف مبروك بس م تبكي)
سلمي فكتني و مسحت لي دموعي..
سلمي:( يلا تمي مكياجك.. انا ماشه اتم مكياجي برضو)
و طلعت... البت بقت تمكيج فيني و انا سرحانه و قلبي مقبوط شديد.. بقيت بحاول اطمن روحي.. بقيت بتذكر في علي لمن جاني كيف كان ظريف و راقي و كلامو حلو...حاولتا ابعد اعمامي وجوطتهم معاي من تفكيري... بقيت بتذكر في علي بس و بحاول اطمن روحي انو علي كويس و انا حاكون معاهو كويسه...لمن جهزتا و لبستا الفستان عاينتا لنفسي في المرايا كنت حلوه شديد...و الفستان الابيض فيني حلو جدددا... كنت طالعه قمر ...سلمي لمن شافتتي اتخلعت و بقت تكورك بفرح.. علي جا و ضرب لي سلمي ....سلمي وصفت ليهو مكانا جا داخل لمن شافني ابتسم بس و جا علي..
علي:( مبروك ي عروس) و ساقني و طلعنا طوالي...علي ملامحو م قدرتا افسرا.. مبسوط ..زعلان...م فهمتا شي...ركبتا معاهو العربيه و مشينا علي الصاله طول السكه كان ساكت م اتكلم معاي.. لمن وصلنا و نزل ساقني بقي مبتسم... لمن سلمنا علي الناس و قعدنا في الكوشه هو مبتسم.. اعمامي جو مبسوطيين سلمو علينا...نجلاء و رباب جو سلمو و باركو.. امجد و ريم برضو جو سلمو...م كنت بعرفهم عمي عرفني بيهم.. العرس خلص عمي كان حاجز لينا في فندق لمده اسبوعين.. الحمدلله انو م قال نسافر.. وصلنا الفندق دخلتا علي الغرفه و علي طلع بدلتو و شال علبه السيجائر و مشي علي البلكونه... كنت متوتره شديد و خايفه.. ده تاني لقاء بينا انا و علي و انا خلاص بقيت مرتو.. دخلتا الحمام قفلتا الباب و بقيت ببكي... بكيت كتتييير ... حسيت علي حيفتقدني و يجي يسال مني...بس اصلو م جا.. خلصتا البكي و غيرتا و طلعتا لبستا لي توب و صليت.. لمن خلصتا قلتا اشوف علي وين و حينوم وين? لانو لو داير ينوم هنا انا حانوم برا... فتحتا الباب و طلعتا لقيتو قاعد في البلكونه لمن قربتا عليهو لقيتو بتكلم في التلفون...
علي:(والله انا ذاتي م عارف ولا فاهم شي... المواضيع كلها جاطت مع بعض...معليش حبيبتي م تبكي... عارفه اني بحبك انتي و م عندي غيرك.. انتي كل دنيتي و م شايف غيرك اصلا بس خليني اخلص من بت عمي دي..اصبري شويه...انتي عارفه رضا ابوي اسي مهم جدا و حيسهل لي كل حاجه)
اتخلعتا شديد من كلام علي ... صح م كنت خاته انو هو بحبني وله عايزني لدرجه يعرسني.. بس م كنت قايلاهو عرسني عشان رضا ابوهو عليهو.. قايلاهو اقتنع انو ممكن ننفع لبعض.. قبلتا عايزه ارجع غرفتي بسرعه اتضربتا مع الطربيزه و المزهريه الفيها وقعت في الارض علي سمعها و قام مخلوع.. قفل التلفون و جا علي مكشر...
علي:( شنو الموقفك هنا?)
سكتا م قدرتا ارد...علي جا علي و الزعل في وشو.. و مسكني بيدينو من اكتافي..
علي:(بدينا من اسي في الصنيت و الوقوف ورا الباب? امشي اقعدي في غرفتك هناك م داير اشوفك قدامي.. م طايقك انا) و لزاني قربتا اقع... اتخلعتا فيهو شديد.. و مشيت علي غرفتي بسرعه و قفلتا الباب بالمفتاح و قعدتا في الارض ببكي...اتخلعتا في علي شديد و تعاملو معاي.. م كنت متوقعه منو من اول يوم تعاملو معاي كده.. قمتا رقدتا في السرير ببكي لمن نمتا م حسيت ب روحي..
