قاعدين نتغدا انا و ريم...كنت شايله إياد في يدي..
ريم:( كده م حتقدري تاكلي كويس.. ختيهو في الغرفه جوه هو اصلا نايم)
قلتا:(م بقدر الا يبقي قدامي.. لو صحي او م سمعتو... بخاف عليهو..كده انا مرتاحه)
ريم:( طيب في سراير صغيره للعيال.. بتتحرك من مكان لمكان امشي جيبي واحد ليهو)
قلتا:( ااي والله في حاجات كتيره ذي دي ناقصاهو....خلاص المساء نمشي انا و انتي)
ريم:( لالا سوقي علي)
قلتا:( ليه?)
ريم:(كده يختار معاك ل ولدو)
قلتا:( لالا م اظن)
اللحظه ديك جا داخل علي...
علي:(السلام عليكم)
ريم:( و عليكم السلام...ي ريت لو ذكرنا مليون جنيه)
علي:( ليه المليون احسن مني?)
ريم:(لا طبعا معقوله بس ..تعال اكل)
علي جا علي و شال إياد باسو..
علي:( شبعان فطرتا متاخر)
ريم:( طيب...عاين ي علي.. امشو جيبو ل إياد السرير الصغير المتحرك ده...ممكن ينوم فيهو بليل او لمن يكون نايم الظهر تختو هنا في الصاله)
علي:( اوكي ماف مشكله)
ريم:( انا حاوصف ليكم المحل...سوق ريناد و امشو)
علي:( اوكي)
و شال إياد و طلع فوق...
ريم كانت عايزه تقربنا من بعض انا و علي...
سعاد كانت منهاره شديد و بتبكي... و نجلاء مخلوعه و م عارفه تعمل شنو...بس حاضنه سعاد عليها و دموعها نازله...شويه نجلاء اتشجعت و زحت سعاد و مسحت ليها دموعها...
نجلاء:( سعاد.. كدي بسم الله...اهدي شويه و احكي لي عرفتي كيف?)
سعاد احتاجت دقيقتين عشان تهدا و تمسح دموعها...
سعاد:(كنت حاسه بالم في صدري طوالي.. قبل موت لينه.. بس كنت بتجاهلو..شويه ذاد علي ...حكيت ل صحبتي.. قالت لي اامشي افحصي.. مشيت مركز شباب سرطان الثدي و فحصتا.. و اول امبارح النتيجه طلعت..قالو عندي كانسر...و لازم اعمل عمليه استآصال الثدي و بعدها نشوف لو حاخد كيماوي)
نجلاء:( يمكن النتيجه غلط...ليه م عدتي الفحص تاني)
سعاد:( صح...انا متاكده)
نجلاء:(لالا يمكن غلط ... انا بمشي معاك و نعمل فحص تاني... طيب م كلمتي احمد ليه?)
سعاد:( م قادره.. م قادره اقول ليهم)
نجلاء:( لازم يعرفو و يقيفو جمبك...ديل راجلك و اولادك..م عندك غيرهم)
سعاد:(لالا...م دايراهم يعرفو...م دايراهم.. ندي فيها المكفيها و عمر داير يعرس....و احمد.. احمد اصلا م حافرق معاهو كتير)
نجلاء:( لا ي سعاد...منو القال كده.. اولادك بحبوك...و احمد كمان و هو مقلق عليك و طلب مني اجي اشوفك و اعرف مالك)
سعاد:( م فارقه معاهو....انا عارفه...م حافرق في شي)
احمد الوقت داك قاعد في الصاله و مقلق.. شويه جات نجلاء طالعه... احمد طوالي مشي عليها بقلق...
احمد:(اها ي نجلاء...قالت ليك حاجه)
نجلاء بقت تعاين ل احمد...و م قادره تقول ليهو..
قاعدين امجد في الصاله في الشقه الاجرها.. جات طالعه ايناس من المطبخ شايله صينيه شاي ختتها و قعدت جمبو...
امجد:(اها الاكل عجبك?)
ايناس:(حلو شديد.. تسلم يدك ي امجد)
امجد:(كلو عشان خاطر عيونك حبيبتي)
ايناس:( الله يخليك لي حبيبي)
امجد مدا يدو طلع شيك من جيب بنطلونو...
امجد:( كده كفاياا?)
ايناس شالتو بفرح:(ي سلاااااام.. الله يخليك لي حبيبي)
امجد:( و يخليك لي ي رب...كده مبسوطه?)
ايناس:( جدا حبيبي)
امجد:(و انا عايز رضاك و اشوفك مبسوطه كده بس)
ايناس:( ان شاءالله)
امجد بحب ايناس بطريقه م قاعد يتحكم في نفسو فيها..
