علي:(اكلي ي ريم)
ريم:( م قادره )
علي:( طب اطلب ليك حاجه تاني?)
ريم:(لالا شكرا)
علي:(طب ناكل و نطلب التحليه)
ريم:(طيب)
علي اتصلح في القعده و ختي المعلقه..
علي:(عايني ي ريم... معليش اسمحي لي اتكلم معاك.. انتي مش بتعتبريني اخوك الصغير?)
ريم:(اكيد ي علي)
علي:(حتقبلي الكلام مني?)
ريم:(اكيد)
علي:(اول حاجه انا م حادافع عن امجد ابدا...و م تقولي كلامي ده عشان هو اخوي... اول حاجه امجد غلطان...و الغلط راكبو من ساسو ل راسو...و غلط في حقك و حق ولدك ... و م يستاهل تسامحيهو ابدا ولا ترجعي ليهو ولا يستاهل ظفرك.. انتي ست النسوان و تستاهلي البشيلك في راسو شيل)
انا اتخلعتا من كلامو قلتا بزعل:(علي)
علي:( دقيقه ي ريناد... خليني اكمل)
علي:(دي الحاجه الحيقولها ليك ااي زول م بعرفك ولا بعرف امجد... بس لمن نجي بالعقل... ااي زول ي ريم بغلط.. و غلط من غلط يفرق...في غلط بسيط ممكن يتنسي بسرعه...ذي انك تلاقيهو بعاين ل وحده وله شاغل وحده في الشارع...و في غلط الكبير انو تلاقيهو عرس عليك و كده)
ريم:(لو عرس م كنت حازعل.. كان يجي يقول لي عايز اعرس او عرستا...ربنا محلل ليهو تلاته تاني غيري... بس هو خاني.. و مع منو? مع اقرب وحده لي.. ولا راعو للعشره البينا و لا راعو لاي شي... و في نفس الوقت هي العرفتنا علي بعض و هي الرشحتنا لبعض وهي اول وحده فرحت ب عرسنا...فرحت اكتر مني و منو....لو هو كان عاجبها ليه م عرستو? )
علي:(صح.. كل كلامك صح.. بس ي ريم الخيانه دي وارده و ااي زوج ممكن يخون زوجتو...ب انو يحب عليها ساي.. او يخونها او حتي يتزوج عليها... دي كلها خيانات...ارجعي شوفي الاحصائيات حقت الخيانه الزوجيه لو كان من جهه الزوج او الزوجه...حتلاقي نسبه عاليه شديد...بس نص النسبه دي م بتطلقو... برجعو يعيشو مع ازواجهم تاني...صح في حاجات بتكون اتكسرت بينهم و الثقه اتكسرت... بس بحاولو يرجعوها شويه شويه...عشان عيالهم... عشان م يضيعو في الاخر... و في ناس بعد الخيانه بتكون الحب بينهم لسه في...و بحاولو بالحب ده يصلحو الضاع...و في ناس بكتشفو انو هم بحبو الطرف التاني الخانوهو ده...اكتشفو الحاجه دي بعد م الخيانه حصلت او في اخر لحظه بينهم او حتي لمن الطرف التاني اكتشف الخيانه و قرر الانفصال... امجد اكتشف في اخر لحظاتو انو هو بحبك و دايرك و يوم مشي ليها مشي عشان يقطع علاقتو بيها و انو م عايز يخسرك... بس للاسف الحظ م كان في صالحو.. انا عايز مصلحتك م عايزك تتوهي و تتعبي ساي... انتي لسه حياتك مع امجد ممكن تبقي كويسه...ممكن ترجع احسن كتير من ااي وقت تاني... و انتي اكتر وحده عارفه انو انتي و امجد علاقتكم من يوم اتزوجتو م كانت كويسه.. و طوالي مختلفين و عارف امجد طبعو كعب و بقسي عليك كتير...انتي ارجعي ليهو و حاولو ابدو صفحه جديده... جديده بكل شي... جديده بالحب و بالمحبه و الاحترام و الثقه.. انسي كل الفات و اكيد علاقتكم حتنجح...انا متاكد من كده.. وله شنو ي ريناد?)
قلتا بفرح:(اكيد)
ريم سكتت و سرحت بتفكر في كلام علي... و انا عاينتا ل علي و ابتسمتا ليهو بكل فخر ...
علي راقد في السرير و انا نومتا اياد في سريرو..
علي:(ريناد ممكن تجيبي لي مويا قبل م ترقدي)
قلتا:(حاضر)
طلعتا المطبخ جبتا ليهو كبايه مويا اديتها ليهو و قعدتا في السرير جمبو.. كنت بعاين ليهو علي شرب المويا و ختي الكبايه لقاني بعاين ليهو..
علي:(في شنو?)
قلتا:(فخوره بيك)
علي ابتسم:(ليه يعني?)
قلتا:(عشان الكلام القلتو ل ريم.. بالجد حاسه بيها اقتنعت.. كلامك كان فاهم و عاقل لدرجه بعيده.. م كنت قايلاك ممكن تتكلم كده ابدا)
علي ضحك:(ليه يعني? شايفاني م بعرف اتكلم كده?)
قلتا:(لالا معقوله كده... بس اتفاجات شويه)
علي:(طيب.. حاسه انو ريم حتوافق?)
قلتا:(تقريبا كده بديها 50% انها توافق ترجع ليهو)
علي:(ي ريت يااخ.. عارفه امجد جاني و حالتو كعبه شديد و اترجاني اتكلم مع ريم و اخليها توافق ترجع ليهو... طبعا انا م قصرتا معاهو.. شاكلتو و مسحت بيهو الارض و ندمتو علي العملو...اصلي م طمنتو انو ممكن اتكلم مع ريم كده.. قلت ليهو بكل برود بحاول.. و بس)
ضحكتا قلتا:(طلعتا م هين)
علي:(اصلا.. بس حاسي امجد اتادب و اتعلم من الحصل و ندمان شديد...ده الخلاني اتاكد انو حيبقي كويس و يعاملها كويس و م يفكر يخونها تاني ابدا)
قلتا:(ان شاءالله ربنا يهدي سرهم)
علي:(ان شاءالله)
