معتز قاعد في الصاله... جات داخله ايناس من الشغل مكشره..
معتز:( مالك مكشره?)
ايناس قعدت بزهج و رمت الشنطه..
ايناس:(الشغل ذفت يااخ.. دايره اقمشه ضروريه...و فتشتا محلات ببيعو لي باسعار كويسه م لقيت.. و الاسعار كلها نار.. و محتاجه اقمشه ضروري)
معتز:( وين الغرض حق البنك?)
ايناس:( انتهي زمان.. دايره قروش ضروري...و عندي كمان اجراءات حقت المحل و الايجار لازم ادفعهم...اجيب قروش من وين ل ده كلو?)
معتز:(و المشغل م دخل ليك قروش?)
ايناس:(بتجي قروش بسيطه و بتتصرف طوالي.. علي المحل كهربا و نضافه و مرتبات)
معتز:(المشغل ده فاشل و حيضيع ليك قروشك ساي.. احسن تتخلصي منو اسي.. من الاول وريتك...مشروعك ده داير قروش كتيره م سمعتي كلامي و مشيتي شلتي غرض و مشيتي الفي راسك)
ايناس:(بمشي بس داير قروش تاني...معتز سلفني)
معتز:( ي ريت والله لو كان عندي كنت اديتك...بس للاسف م عندي... المهم انا مسافر بعد يومين مصر)
ايناس:(مؤتمر برضو?)
معتز:(ايوا... بقعد يومين و بجي)
ايناس:(و حتخليني جايطه كده براي?)
معتز:(في يدي اعمل ليك شنو?)
ايناس بزعل:(ولا شي)
و شالت شنطتها و دخلت الغرفه بسرعه و قفلت الباب...معتز عاين ليها بكل برود..
علي توقعو كان صح...برضو بضاعتو وصلت المينا و قالو عايزين منو مبلغ كبير شديد... علي راسو جاط و م عرف يعمل شنو.. ضرب لابوهو...ابوهو قال ليهو الباشا بحارب فينا و حيخرب بيتنا.. علي رجع البيت زهجان و دخل قعد في غرفتو.. حضرنا الغداء انا و ريم و دخلتا اناديهو..
قلتا:(علي.. يلا الغدا)
علي:(م عايز)
ركزتا ليهو مكشر.. مشيت عليهو باستغراب:(مالك?)
علي:(ماف شي مشاكل في الشغل)
قلتا:(مشاكل شنو البتخليك مكشر كده?)
علي:(بعدين ي ريناد.. اسي امشي ااكلي مع ريم...بعدين بنتكلم)
قلتا:(تعال اكل طيب و بعدين بتكلم ذي م قلت)
علي:( شبعان.. شبعان)
عاينتا ليهو باستغراب و طلعتا خليتو...
ريم:(وين علي?)
قلتا:( قال شبعان... بياكل بعدين)
و قعدتا اكلتا مع ريم.. بعد الغدا دخلت ليهو قعدتا جمبو..
قلتا:( احكي لي مشاكل شنو الفي الشغل دي?)
علي:(انتي عارفه الباشا هو البمشي لينا بضاعتنا في الجمارك و بندفع مبالغ بسيطه و بتطلع لينا بسهوله.. انا و ابوي م حصل قعدت بضاعتنا في الجمارك كتير... اسي بضاعتنا انا و ابوي الاتنين في الجمارك و قالو دايرين مبالغ خرافيه مننا... شكلو الباشا بحاربنا)
استغربتا:( بحاربكم كيف يعني?)
علي:(شكلو زعلان منك و من الحصل... لانو بقي م برد علي ابوي و ابوي مشي ليهو رفض يقابلو)
اتخلعتا قلتا:(اسي موضوعي انا دخلو ب شغلكم شنو?)
علي:( صح م دخلهم.. بس هو دخلهم مع بعض)
سكتا مسااافه..
قلتا:( و الحل شنو?)
علي:(م عارف...طالبين مبالغ خرافيه.. انا و ابوي م عندنا ولا نص المبلغ.. زمان بعملو لينا تخفيض علي الجمارك و مرات بندفع القروش علي قسطين.. او نديهم شيكات اصلو م كانو بضغطونا او يتمسكو معانا كده لانو عارفننا تبع الباشا و الباشا موصي علينا..اسي قالو نجيب القروش كامله و كاش او ماف قطعه حتطلع....ابوي زعلان شديد و جايط و شغلو حيقيف)
قلتا:(و انتو م عندكم قروش يعني?)
علي:(م عندنا... احنا قروشنا كلها بنجيب بيها بضاعه و لمن نبيعها الارباح بتكون كويسه بس دي مصاريفنا العاديه دي و بنخلي منها حق الجمارك للبضاعه الجايه و حبه قروش كده للحالات الطارئه .. و راس المال بنجيب بيهو البضاعه الجديده ... يعني م عندنا في البنك قروش كتيره نقدر نطلع كل البضاعه دي)
قلتا:( و الحل شنو طيب?)
علي:(م عارف.. بكرا حنمشي الجمارك نشوف نقدر نعمل شنو)
قلتا:(طيب.. ربنا يسهل)
علي كان زهجان م عرفتو زهجان مني وله من الموضوع ذاتو...
