مرت الساعات تقيله و احنا مقلقين م قادرين نقعد...علي بقي ذي المجنون م واعي بس ماشي و جاي قدام غرفه العمليات... شويه طلع الدكتور كلنا جرينا عليهو.. علي خايف م قادر يتكلم..
امجد:( طمنا ي دكتور)
الدكتور:( مبروك جاكم ولد)
علي بصوت مقطع:( و لينه...لينه ي دكتور?)
الدكتور كشر وشو:( اسف...البركه فيكم)
انا و ريم و رباب صرخنا في لحظه وحده.. علي حيلو م شالو الا امجد و الياس مسكو قعدو في الكرسي.. بقينا بنبكي.. علي مصدوم قاعد ربع ساعه م بكي ..شويه غطي وشو و بقي ببكي.. امجد و الياس عملو كل الاجراءات اللازمه و شلنا البيبي الصغير و رجعنا البيت...في لحظات البيت اتملا ب الاهل و الاصحاب.. كل الناس كانو قايلين انا الميته لانو م عارفين انو علي معرس غيري...انا م قعدتا مع الناس كتير... شلتا إياد و قاعده بيهو في الغربه برا و مشيت جبتا ليهو حليب من الصيدليه و بقيت ماسكاهو...بطلع كل شويه اسلم و اعزي الناس و ارجع تاني... علي رجع غرفتو بليل لمن الناس مشو سمعتا صوتو ببكي.. قلبي كان واجعني عليهو و نسيت العملو ممعاي كلو... جات حبوبه من البلد متفاجاه بالبكي و ب مرت علي الظهرت فجاه دي.. لكن م اتكلمت معاي عملت الواجب و قعدت.. قلبي كان واجعني علي لينه شديد...صح م اتعاملتا معاها بس م كرهتها حتي و هي معرسه علي...م كرهتها.. هي عرفتو و حبتو و عرستو.. و انا و علي كنا مغصوبين علي بعض.. و قلبي واجعني علي إياد حيوعي علي الدنيا حيلقي امو ماف.. و انا م معروف اقدر ابقي ليهو ذي امو وله لا...بس م اظن...مهما عملتا م ببقي ليهو ذي امو.. و قلبي كمان واجعني علي علي... مرتو ماتت و خلتو... البت الحارب عشانها الدنيا و امو وابوهو و عرسها ورا كل الناس.. ماتت و خلتو.. الليل كلو بفكر م قدرتا انوم الا الصباح.. نمتا شويه و صحيت ب بكي إياد.. قمتا عملتا ليهو حليب اديتو ليهو و نام خليتو و طلعتا لقيت حبوبه و نجلا۽ قاعدين في الصاله..
قلتا بصوت تعبان:(صباح الخير)
ردو:(صباح النور)
حبوبه:( شكلك تعبان)
قلتا:( م نمتا كويس)
حبوبه:( إياد كان صاحي بليل?)
قلتا:(لالا بلعكس نام... بس انا م قدرتا انوم)
حبوبه:(اشربي كبايه شاي و قهوه بتصحصحي)
قلتا:(ااي) شلتا السيرمس كبيت شاي شربتا و بعدها القهوه... نجلا۽ و حبوبه اتونسو في حاجات كتيره و منها قصه لينه و عياها و كده...بس انا م كان عندي مزاج اتكلم ابدا..لمن خلصتا قمتا مشيت شلتا إياد مسكتو ل ريم.. لبستا لي عبايه و جيت طالعه..
حبوبه:( ماشه وين?)
قلتا:(شقتي اجيب حاجاتي و اجي...اسي بجي م بتاخر)
نجلا۽:( م تتاخري الناس اسي ببدو يجو)
قلتا:( حاضر)
مشيت بسرعه شقتي جبتا حاجاتي المهمه في شنطه و جيت.. فعلا لقيت البيت مليان ناس.. مره يومين تلاته و م بشوف علي الا من بعيد بس م اتكلمنا مع بعض.. البيت فضي و الناس مشو.. علي م سال من إياد ابدا و لا شافو حته... طلعتا من الغرفه سالتا من علي قالو لي في غرفتو فوق.. شلتا إياد و طلعتا ليهو.. دقيت الباب و دخلتا لقتيو راقد م اتلفت علي اصلا... مشيت وقفتا جمبو قلتا ليهو:( علي.. م عايز تشوف إياد?)
علي اخد كم ثانيه و اتلفت علي بسرعه و عاين ل اياد.. كانو كان ناسيهو.. مدا يدينو ب تردد و خايف.. شجعتو ختيت ليهو آياد في يدينو.. علي عاين ليهو في وشو مسااافه و حضنو عليهو و بقي ببكي بصوت عالي...قلبي وجع عليهو شديد و دموعي نزلت..علي حضن إياد شديد عليهو لمن خوفتا عليهو..
قلتا:(علي براحه علي الولد.. م بتحمل)
فكاهو شويه و بقي بعاين ليهو في ملامحو..
قلتا:( علي ده امر ربنا.. انت قوي...لازم تبقي قوي لو م عشانك عشان إياد)
علي م ردا علي.. شويه إياد بقي ببكي..
قلتا:(اديني ليهو اديهو الحليب)
علي:(لا جيبي ليهو هنا...خلي معاي)
قلتا:(طيب) نزلت بعمل في الحليب جات ريم داخله المطبخ..
ريم:( وين إياد)
قلتا:(مع علي فوق)
ريم:( بقي كيف?)
قلتا:(حالتو كعبه...لمن شاف إياد بقي ببكي شديد و حضنو عليهو شديد.. جد بقطع القلب)
ريم:(ربنا يبرد نارو)
قلتا:( اللهم آمين)
اديت علي الرضاعه حقت الحليب و جيت نازله لقيت حبوبه قاعده في غرفه تحت شافتني نادتني...
حبوبه:(ريناد..تعالي)
مشيت ليها قعدتا قصادها..
حبوبه:( انتي ليه دسيتي علي? ليه م كلمتيني انو علي طلع معرس وحده و انتي مشيتي شقتك)
قلتا:(ي حبوبه انا م دايره اقلق بيك...لو كلمتك حتقومي تجيني و تتعبي روحك و انا م دايره اتعبك...انا كويسه.. سلمي كانت بتقعد معاي طوالي)
حبوبه:( كلمتك كم مره م عندنا بت بتعيش براها.. لازم زول كبير معاك)
قلتا:( اسفه ي حبوبه...اسي انا جيت قعدتا هنا و م راجعه تاني)
حبوبه:( اها الوضع الجديد ده راضيه بيهو?)
قلتا:( وضع شنو?)
حبوبه:( انو تربي ولد م ولدك)
قلتا:( إياد م ليهو ذنب...مسكين وعي علي الدنيا لقي روحو يتيم)
حبوبه:(ده قدرو كده...بس ي ريناد عمرك حيضيع .. علي م اظن يفكر فيك بعد مرتو ماتت...محتاج كم سنه عشان بقدر يدخل مرا تاني حياتو و يمكن اصلا م يعاين ليك و يمشي يعرس وحده تانيه...انتي حتقعدي كده? تربي في إياد بس?)
قلتا:(ي حبوبه لينه الله يرحما وصتني عليهو...ده آمانه في رقبتي م حافرض فيهو ابدا...حتي لو اضطريت اعيش كده طول عمري...حتي لو علي مشي عرس غيري.. لازم ابقي قدر الامانه... لينه يوم القيامه بتسالني منها.. اقول ليها شنو? م بقيت قدرها? لالا ي حبوبه...م بقدر والله...م بقدر)
حبوبه م كانت راضيه ب وضعي...بس مع اصراري وافقت..
علي طلع العماره الفيها الشقه الكانت عايشه فيها لينه...وقف قدام باب الشقه م قادر يدخل.. شويه اتشجع فتح الباب و دخل فتح الانوار.. بقي بعاين في الشقه.. مشي براحه بعاين في الشقه و شامي فيها ريحه لينه...بقي بتذكر.. من اول يوم عرس فيهو لينه و دخلو الشقه و كانو مبسوطين... عاين للمطبخ اتذكر لينه واقفه في المطبخ و بتعمل في الاكل و هو جا داخل هظر معاها و شاغلها ... تاني اتذكر قاعد بحضر في كوره و لينه جات شاغلتو و شالت منو الريموت و جرت و هو جرا وراها و شال الريموت و بقو بلعبو مع بعض...تاني اتذكر يوم كان زعلان منها و رجع البيت لقاها عامله ليهو عشاء رومانسي و شموع... تاني اتذكر لمن اول يوم عرفت انها حامل و جات كلمتو و فرحو شديد... اتذكر كل حياتو مع لينه.. دخل غرفه نومهم و فتح الدولاب و شال هدومها حضنها عليهو و بقي ببكي.. رقد في السرير و هو حاضن هدومها...لمن ناام...
كنت مساهره مع إياد ببكي و م عارفه اسكتو كيف...م عندي خبره مع الاطفال و التعامل معاهم... شلتو و بقيت حايمه بيهو في الصاله...ريم صحت ب صوت بكاهو جات طالعه لي..
ريم:( مالو إياد?)
قلتا:(م عارفه والله.. اديتو الحليب)
ريم:(يمكن متضايق من حاجه.. غيرتي ليهو الحفاظ?)
قلتا:( ااي)
ريم:( غريبه مالو طيب?)
قلتا:( م عارفه)
ريم:(جيبيهو)
و شالتو بقي بتهز فيهو و ماشه و جايه..
ريم:( جيبي الرضاعه) اديتها ليها اديتو بقي بشرب شويه و ببكي شويه...تاني سكت شرب الحليب و نام...
ريم:( الحمدلله نام)
قلتا:(الحمدلله)
ريم:(بعد ده نوميهو طوالي...حينوم معاك وله مع ابوهو?)
قلتا:( ابوهو مافيش)
ريم اتخلعت:( مشي وين?)
قلتا:(م عارفه... حانومو جمبي لمن ابوهو يجي لو دايرو بجي يشيلو مني)
ريم:( طيب...يلا امشي نومي طوالي...تعبانه انتي)
قلتا:(طيب)
ريم:( تصبحي علي خير)
قلتا:( و انتي بخير)
ريم دخلت غرفتها...امجد كان نايم في الكنبه.. و هي بتنوم في السرير... رقدت في السرير و عاينت لامجد.. و قالت في نفسها:( كلها ايام و انا حامشي و تنوم في سريرك مرتاح)
رقدتا في الغرفه و نمتا في لحظات... صحيت الصباح كالعاده ب بكي إياد.. حميتو و غيرتا ليهو و شلتو و نزلتا لقيتهم قاعدين في الصاله.. نجلا۽ و حبوبه و سعاد و رباب و ندي و ريم.. صبحتا عليهم.. مسكتا إياد ل رباب و مشيت عملتا ليهو الحليب.. قعدتا معاهم بقيت بشرب في إياد و بشرب انا في الشاي.. شويه جا داخل علي.. قال السلام عليكم و طلع طوالي فوق..
نجلا۽ باستغراب:( علي كان وين?)
قلتا:(شكلو بايت برا...م رجع بليل)
نجلا۽:(سجمي بات وين?)
قلتا:(م عارفه)
سعاد:( خليهو ي نجلا۽ العليهو م هين)
حبوبه:(ربنا يبرد نارو)
كنت مقلقه علي علي شديد.. حبوبه شالت إياد.. طلعتا فوق اشوف علي.. دقيت الباب قال ادخل... دخلتا لقيتو راقد في السرير.. شكلو كان تعبان.. و عيونو حمر..
قلتا:(علي.. داير تاكل)
علي:(لا) م عاين نحيتي اصلا...
قلتا:(علي لازم تاكل.. انت م قعد تاكل)
علي كورك فيني:( ياخ م داير اكل...خليني في حالي ياخ.. مالك و مالي)
اتخلعتا من كوراكو فيني.. طلعتا طوالي و دموعي نزلت... ده جزاي اني خايفه عليهو و شايله همو يتعامل معاي كده.. مسحتا دموعي و قعدتا شويه فوق بعدها نزلت عادي كانو م حصل شي.. بس من يومها قررت م اتكلم معاهو ابدا و م عندي بيهو شغله ياكل م ياكل هو حر...
كان م عندي طريقه اشتغل...امشي الشغل كيف و اخلي اياد مع منو? نجلاء م بتقدر تمسكو...و رباب م فاضيه...قررتا اخلي الشغل.. فعلا صحيت الصباح بدري مسكتا إياد ل ريم و مشيت الشركه قدمتا استقالتي و جيت راجعه...
نتلاقي♥
