رجعت بركشة من العرس على بيتنا في الحلة الجديدة كنت مهدود وتعبان ، رقدت نمت بدون ما اغير هدوم عبدو ، صحيت الصباح تعبان أكتر و مصدع :
- حمادة مالك شكلك تعبان
رديت على هديل أختي الحنينة :
- ماعارف والله ، لكن فتررر غريب
- أقعد ارتاح الليلة ماتمشي الشغل
- مابقدر ياهديل ، عندي شغل مهم
- خلاص أدخل استحمى مسافة أعمل ليك نسكافي
هديل دي ما أختي الصغيرة و بس ، لا هي بعد أمي الله يرحمها بقت لي أم و أخت و بت و صحبة و كل شي ، بخاف عليها و بحبها و مستعد أعمل عشانها أي شي لأنها تستاهل ، بس مشكلتها رافضة العرس كلو كلو و أي عريس يجيها ترفضو و متعباني معاها مع اني حاولت كتيير أقنعها..
أختي التانية اسمها هدى أكبر مني متزوجة و قاعدة مع زوجها في الكويت و بجو من سنة لسنة.... و عندي أخوي أصغر مني اسمو مصطفى ده بيني و بين هديل و شغال في البترول بجي شهر و بسافر شهر ، و ياهو أنا وهديل القاعدين مع أبوي حاج بشير عندو دكان اسبيرات في البيت وطبعا بيتنا فاتح في الشارع الرئيسي....
دخلت استحميت و لبست و طلعت ، ركبت المواصلات و أنا زهجان بسبب العربية المتعطلة و كمان بسبب الصداع الماعارف سببو ، الشركة الشغال فيها في كوبر.. لمن الحافلة دخلت كبري كوبر كان مقفول تماما و الحركة واقفة قالو في حادث.. وقفنا اكتر من ساعة و بعد زهجت طوالي نزلت وقطعت الكبري كلو برجليني و من هناك لقيت نفسي قربت قمت تميت المشوار كلو مع إنو كان طويييل ، وصلت الشركة لقيت مدير المكتب بتاعي منتظرني وعيونو مطيرة شرار و قال لي :
- عارف الساعة كم؟؟
رديت بدون ما أعاين للساعة مع إني لابسها في يدي لكن بس كده غتاتة و ثقالة عشان أسلوبو ده :
- بتكون ٨ ونص تسعة إلا ، مالك في شنو؟؟
- مالي ؟؟؟ يا أستاذ محمد الساعة ٩ ونص
قعدت في المكتب و فتحت الكمبيوتر و أنا متجاهلو ، قام مشى بدون مايسألني عرفتوو إنو جايب لي بلوة لأنو مستحيل يعديها لي سااي كده ، وفعلا ما تمت عشرة دقايق جاني مدير الشركة بنفسو داخل و في يدو ورقات مدبسات في بعض :
- محمد بشير ، ده عقد بتاع شركة سي آند كي للاستيراد والتصدير ، الناس ديل متجرجرين معانا ، عاوزك تمشي ليهم حسي تشوف الحاصل و تجيني بالورق ده مختوم وموقع
- يا أستاذ الناس ديل جرجرتهم كتيرة و الورق ده ليهو شهر
- عليك تقنعهم و تخلصني من البرنامج ده ، و الساعة ١٢ تكون هنا لأنو في اجتماع مهم جدا جدا
ماعرفت أضحك و لا أعمل شنو لأنو الساعة حسي عشرة إلا و الشركة ديك في أمدرمان ، قلت ليهو :
- كيف ١٢ أكون هنا ؟ يعني أمشي أمدرمان و أقعد معاهم و أقنعهم و أرجع في ساعتين إلا ؟؟ مستحيل طبعا و أنا زاتي ماسايق
- ده كلو مابهمني ، داير ورقي جاهز و دايرك انت هنا قبل ١٢
و خت لي الورق و مشى
طبعا ماعندي حل غير أمشي قمت طلعت وركبت لي أمجاد و مشيت أمدرمان دخلت الشركة لقيت المكتب فاضي سألت واحد شكلو زبون قال لي مشو يفطرو ، ماعارف الموظفين ديل مالهم مع الفطور التقول جايبنهم عشان ياكلو و ياريت لو بياكلو في زمن بسيط ديل ممكن يقعدو ساعة...
انتظرت مساافة و بعدها جا واحد و شايل كباية الشاي :
- اتفضل أي خدمة؟
- أنا مندوب من شركة كويك كيور للأدوية ، عندي الإجراء ده داير أخلصو معاكم
شال الورق شافو و قال :
- المعاملة دي عند موظفة اسمها نجوى و حسي هي مافي إلا تنتظرها بعد تجي
قلت و أنا خلاااص وصلت آخري و قفلت معاي لكن ساي ماسك روحي :
- بنتظرها ، بتجي بعد كم يعني؟
ضحك وقال :
- ههههه بعد شهر ، لأنها في إجازة زواج
طوالي انفجرت فيهو :
- شهرررر؟؟ وانتو ماعندكم بديل ؟؟؟ لو موظف مأجز الشغل يتعطل؟؟ و إنتو شغلتكم شنو تاكلو وتشربو في الشاي مش؟ بالله قروشكم البتاخدوها دي حلال؟؟ ياهو الزيكم ديل المودين البلد ورا
بعد اتفشيت طلعت خليتو منطط عيونو ، عاينت للساعة لقيتها ١٢ إلا عشرة ، يعني العشرة دقايق دي لو ركبت طيارة مابصل الشركة و حالف ما أركب أمجاد تاني بس بركب مواصلات ووقت ما أصل أصل...
وقفت في الظلط و مالاقي مواصلات قام اتصل علي صحبي اسمو مبارك :
- محمد ياخي عليك الله محتاج لي ٥٠٠ جنيه ضروري عندك حسي؟
- ااي معاي
- وريني إنت وين بجي أشيلها منك ولآخر الشهر كده برجعها ليك
- يااابركة مابيناتنا و بعدين إنت أصلا طالبني قروش ، ولا نسيت.. عاين إنت لو سايق تعال لي أنا في العرضة أديك القروش ووصلني كوبر
- معاي عبدو و خالد ، حسي بنمر عليك نحن زاتنا مابعيدين
لمن قال معاهو الشلة بصراحة حسدتهم على عطالتهم و لمتهم دي ، وتاني جاتني فكرة أجلي الشغل مرة وحدة ، و كنت جعااان أصلا:
- أسمعني يا مبارك ، إنتو فطرتو؟
- لا لا كنا أصلا ماشين عمر بوش في شارع الأربعين
- بسسس تمام يلا أنا معاكم طوالي
وقفت شوية كده لمن جوني مشينا محل الفتة و أكلنا وشربنا بيبسي و اتونسنا و ضحكنا و نسيت ليك الشغل مرة وحدة ، بعد داك قالو نشرب شاي قمت اتذكرت عربيتي البايتة من أمس في الشارع و أصلا مبارك كان سايق قريز :
- كدي خلو الشاي بالله أرح بحري أسحب العربية متعطلة هناك ، و جنبها في وحدة بتعمل جبنة مظبوووطة
طوالي وافقو و شلنا حبل و ركبنا و ماشين على بحري ، في الطريق عبدو كان راكب ورا جنبي قام قرب مني و همس لي براحة :
- إنت اتكلمت مع ياسمين؟؟
بصراحة خفت على زعلو عشان كده نكرتها :
- ياسمين منوو؟
- محمد ماتستهبل
- بالجد ماعرفتها منو
- خلاص أنسى
حمدت الله إنو مشاها على كده و كمان قلت الحمدلله إني ما اتصلت عليها...
وصلنا بحري مكان ماقسمة بتقعد لقيناها بتلم في كراسيها شكلها بتشطب الضهر و بتجي تاني العصر ، لكن لمن شافتني طوالي رحبت بي :
- أهلا أهلا حبابك وحباب المعاك اتفضلو
و فرتقت لينا الكراسي و مشت ولعت كانونها مخصوووص بعد طفتو.. و عملت لينا الجبنة ، و نحن قعدنا تحت شجرة اتونسنا و شربنا قهوتنا و مشيت ادفع ليها قامت قالت لي بصوت واطي بدون ما أصحابي يسمعو :
- والله ماتدفع قرش ، طلتك براها ترد الروح
الإطراء عجبني و لقيت نفسي بسأل منها :
- إنتي عاملة شنو مع أولادك و أبوك
- الحمدلله كلو من الله كويس
- داير لي يوم قعدة معاك أعرف قصتك كلها ، ولو محتاجة لشي وريني طوالي
وشها اتهلل و قالت :
- راجل ود رجال ، كتر خيرك.. الزمن ده أخوك من دمك ولحمك ما يسأل منك إلا الناس الأصيلة الزيك
بصراحة كلامها حلو مع إني بسمع زيو كتير لكن هي بتقولو بصدق عشان كده أثر فيني ، و من اليومداك بقيت يووومي لازم أمشي ليها أشرب جبنتي عندها و أتونس معاها شوية... و أكتر شي بجذبني و بجيبني ليها هو كلامها و شكرها لي بحس نفسي ملك بالجد.... واستمرينا كده لغاية ما اتعلقت بي و حبتني و اتورطت فيها زي ماحتشوفو....
المهم اليومداك عدى بعد سحبت العربية ووديتها المنطقة و مشيت بيتنا و أخدت لي نومة و صحيت بالمسا اتونست مع كم وحدة شي تلفون و شي واتس....
اليوم البعدو مشيت الشغل لقيت الدنيا مقلوبة مدير الشركة ومدير مكتبي جايطيييين عشان ما جيت راجع أمس ، طبعا و لا عبرتهم و دخلت اشتغلت شغلي عادي... لكن جننوني جن و ردموني شغل لمن ندمت على الفتة الأكلتها مع أصحابي....
.
.
يلا حنواصل الحكاية مع الست ستات ان شاءالله💕😘
.
.
مع تحياتي
رحمات صالح
