اليوم التاني من الصباح بدري قلت لأبوي يلا نرجع الخرطوم ، وهدى جات اتكلمت معاي وداقة جرس قالت لي انت ولاقعدت مع العروس ولاشفتها ، قلت ليها :
- أشوف ليها شنو مش ياها صباح بت عمتي زاتها ؟ يعني حتكون زادت يد ولا زادت رجل
- محمد بطل مساخة و كده عيب عليك
- ولا عيب ولا شي و ناس البلد ماعندهم الحاجات دي ، ويلا عشان أنا ربع ساعة و بدور العربية دي و بمشي.... طلعتي طلعتي ماطلعتي بفوتك طواالي
- بييسس عليك مالك بقيت فقر كده
أها ودعت أعمامي و طلعت و أبوي جا ركب وهو مبسوووط و لا شغال بي ، وهدى ركبت ورا و ساكتة سااااي طول السكة مافتحت خشمها إلا بعد أبوي يسألها عاملة فيها زعلانة مني...
...
..
وصلنا الخرطوم و لقينا هديل منتظرانا بفارغ الصبر و قعدو يتكلمو كتير و يحكو و طبعا الشفع استلمو الموضوع و خالو محمد عريس و ماعريس و أبوي ساكت سااي يعاين و يتبسم ، طبعا حاسي روحو انتصر و أنجز..
في قعدتنا دي تلفوني ضرب لقيتو عبدو بسأل الحصل شنو و بقول حمدالله على السلامة ، اتوقعت إنو هديل تكون أدتو التفاصيل كلها و فعلا لأنو بقى يضحك و يقول لي والله لكن يا دلوكة عمك بشير قدر ليك
اتغظت منو شديييد :
- البضحكك شنو بالله
- ولاشي ، يا فردة ألف مبروك و إن شاءالله تتهنى و....
- عبدو قصر.. داير شنوو
- داير أجي مع أهلي أتقدم و أحدد وقت العرس
- جاي متين؟
- بعد بكرة
- خير ، يلا سلام
- ياشيخنا مالك بتقولها كده زي الما مرحب بي
- عبدو قلنا خير ، مالك تاني
- أوووفففف
زهج و قفل الخط ، و أنا مشيت كلمت هديل قلت ليها كلمي أبوي قامت اتخلعت :
- محمد ؟؟؟؟ كلمو إنت أنا مابقدر
- خلاص ما تكلمي و خليهم بكرة يجو و يلقو أبوي ماعارف... تمام كده؟؟
ماعارف كنت بتنرفز فيهم كده ليه لكن كنت ما طايق روحي ، طلعت من البيت عندي حاجات عملتها و مخصوص كنت بضيع في الوقت عشان أرجع البيت زول نوم بس ، وفعلا رجعت دايخ رقدت نمت و من الصباح طلعت الشغل ، وطبعا لقيت ليك الدنيا مقلوبة المدير على المشرف كيييف أغيب يومين بدون إذن... قلت للمدير :
- يااا دكتور كان عندي ظروف
- ظروف شنو بتخليك ماتكلف نفسك تعتذر حتى
- قلت ليك ظرووف ، ما مجبور أوريك تفاصيل حياتي
المدير اندهش كييف أنا اتجرأ و أتكلم معاهو كده لكن أنا ماكان هاميني شي ، خليتو واااقف في حتتو و قعدت في مكتبي و بديت أشتغل زي الماعملت شي ، بعد عشرة دقايق جاني خطاب فيهو خصم عشرة أيام من الراتب .... شلتو وانا زعلان و مشيت للمدير :
- ده شنو ؟ أغيب يومين تخصم لي عشرة؟؟
- ايوة
- ليه ؟؟
قال وهو بقلدني :
- مامجبور أوريك سبب قراراتي
- يعني ده قرار نهائي صح؟
- أكيد
- يعني ف كل الأحوال أنا مخصوم مني عشرة أيام
- بالضبط
- طيب نتقابل بعد سبعة أياااام
و طلعت خليتوو مخلووع فيني ، طبعا أنا عارفو مايقدر يرفدني لأنو أنا الشغل البعملو لو جاب تلاتة ولا أربعة موظفين ما بسدوهو ، وأنا موفر ليهو زمن و قروش.. وعمري ما استغليت الحتة دي لكن الليلة هو البداها معاي... وأنا بس قررت أكمل العشرة أيام المخصومة دي إجازة...
طلعت من الشركة و طوالي على البيت كنت ناوي أرقد أنووم لكن من دخلت لقيت هدى قااشرة و شفعها ملمعين ، ولمن شافتني ولاااا سألتني جيت بدري مالك ولااا قالت لي في شنو و مباشرة قالت :
- بررركة الجيت أرح وصلنا ماشين مقيلين عند نسابتي
- أها ولو ماجيت كنتو مشيتو بشنو
شالت تلفونها و قالت وهي مركزة فيهو :
- كنت طالبة ترحال لكن أها لغيت الطلب ، أرح... خليني أوفر قروشي تنفعني
زهجت شديد وقلت :
- أطلعو طيب ، بسرعة لكن لأني جعان و تعبان
طلعو مشيت وصلتهم و مجرد ما وقفت قدام بيت نسابتها جات عربية نزل منها واحد من أولاد البيت شايل كيس عيش و اضطريت أنزل أسلم عليهو و لمن بقيت ماشي قال لي كييييف تمشي بدون ماتفطر ، و بقى يتحلف و مسكني من يدي و هدى بقت تعاين لي بقعر عينها نظام ما تكسفني ، زهجت شديييييد لكن ما كان عندي حل غير أدخل..
دخلت و جابو الفطور وبعد داك قلت أسلم على حموات هدى حتى أطلع قامو جوني كللللهم قالو يباركو لي شكلها هدى يا فرحانة شديد بالعقد ده يا بتغيظ فيني مشت نشرت الخبر جوة ، المهم أول زول لفت نظري هو آخر زول كنت أتمنى أقابلو حسي ، روااان....
....
..
أها بعد الحصل ده وبعد الخلعة الدخلت في روان لمن شافتني وعرفت إني أنا زاتي محمد أخو هدى وبعد رجعت البيت كنت متوقع ألقى الخبر وصل ميس وماعارف ردة فعلها حتكون كيف قمت فتحت النت بدون ما أدخل الواتس و بقيت ساحب الشريط من فوق و بعاين في الرسائل الجات نازلة ورااا بعض و بشوف المرسلين منو ، و فعلا جات كمييية من الرسائل من ميس ، لكن اللفت نظري أكتر رسالة ياسمين :
- محمد.. وينك
دخلت طوالي و رديت عليها :
- موجود
انتظرت شوية ما جات ردت.. قمت بقيت أفكر في الرابط بينها و بين الاسمها نونة و قلت أعمل تست صغير كده ، قمت دخلت المسنجر راسلت نونة :
- نهارك سعيد... كيفك... حبيت أقول ليك أمس تم عقد قراني عقبالك
رسلتها و انتظرت شوية لكن هي ليها كم و خمسين دقيقة ما دخلت و رسالتي أصلا ما وصلتها ، الوقت ده جاني فضول أعرف ميس قالت شنو قمت فتحت رسائلها :
- محمد ، ما حبيت أقول أي حاجة ما لم اتيقن من صحة الخبر
- محمد ، وينك
- يبدو إن الخبر صحيح
- عارف الخيانة عندها صور كتيرة و متشعبة و من أقسى صورها هي خيانة ثقة الأصدقاء لمن تعتقد إنك أقرب زول لصديقك و إنه معاك كتاب مفتوح على مصراعيه و تتفاجأ إنو بخبي عنك أهم أحداث حياته ، يااااال الصدمة
طبعا بقيت ماعارف أشرح ليها كيف قمت سجلت ليها رسالة صوتية :
- الموضوع ما زي إنتي متصورة ، كل شي تم فجأة حتى أنا ما كنت عارف و لا موافق... أنا ماقاعد أدس منك شي ، بتصل عليك بعدين و بفهمك
قرت رسالتي وماردت يعني زعلانة ، و أنا بصراحة ما عندي أخلاق حسي ، خليتها و قلت أرقد أنوم لكن جاتني رسالة في المسنجر من نونة :
- عقد قرانك ؟؟ كيف و متين و على منو
لاحظت ليها انها اتصدمت صدمة كده مااا طبيعية لكن قلت أجرجرها و أشوف :
- جا فجأة ، على بت عمتي... زولة طيوبة و أصيلة و فاهمة...
كنت متعمد أشكرها عشان أجس نبضها وهي سكتت شوية كده ،تاني كتبت :
- مبروك
بس ما تمت خمسة دقايق جاتني رسالة واتس من ياسمين بترد على رسالتي :
- موجود ؟ موجود وين يعني ؟ ما شايفاك
- قاعد بس مشغوليات
- مشغوليات في الشغل و لا البيت ولا شنو
- اممم كلو
- محمد اتكلم معاي كويس ، في شنو انت داسيهو بالضبط وأنا ماعارفاهو
- أدس شنو نحن أصلا لينا كم ما اتكلمنا مع بعض؟؟ أكيد الماعارفاهو عني كتير
- زي شنو ؟؟؟ خطبت ؟ اتزوجت؟؟؟
- ااي
- حقير جبان
رسلت الشتيمة دي و طوالي حظرتني ، اتحرقت شديييييد لدرجة بقيت ماقادر أمسك نفسي قمت بدووون تفكير رجعت لي نونة و رسلت ليها :
- لعبتك مكشوووفة يا باش مهندسة ، ما أنا البتخدع بالصورة دي
- نعم ؟؟؟
- بطلي استهبال بلا نونة بلا مجنونة معاك أنا عارفك انتي منو
بس قامت طواااالي حظرتني و كده اتأكدت إنو نونة هي ياسمين......
.....
..
رقدت نمت نومة طوييييلة صحيت منها مع المغرب على صوت الازعاج بتاع أولاد هدى شكلهم يادابهم جو راجعين ، قمت اتوضيت و صليت الصلوات الفاتتني و أثناء مابصلي تلفوني بقى يرن ، سلمت و رديت لقيتو عبدو ، قال إنو أخوهو الكبير جاتو سفرية مفاجئة و مضطرين يجونا بعد شوية بدل بكرة ، قمت بكل بساطة طلعت كلمت هدى وهديل كانو الاتنين في الصالة ، و طبعا اتخلعت من ردة فعلهم قامو يكوركو و يتجاروو زي الضارباهم كهربا و هديل بقت تقول وااااي شعري كعب و وشي مبهدل ، وهدى تقول الحوش وسخاااان و ماجهزنا شي ، أديتهم نهرة :
- هييي انتي و هي برااحة ده شنو ده ، ما زيارة عادية مالكم
هديل جرت غرفتها و هدى قالت :
- زيارة عادية شنو ديل جايين يخطبوو ، أسمع يا محمد انت تقوم تتصل عليهو تقول ليهو تعالو بكرة براحتكم ومالازم أخوهو يجي معاهم
- مستحيل أقول كده طبعا.... أمشي إنتي كلمي أبوي... وأنا بتصرف
دخلت جبت لي قروش و مشيت أديت مصطفى يجيب جاتوهات و كرواسون جاهز و دراي كيك وفواكه ، و أنا شلت لي مقشاشة وسريع سريع قشيت الحوش و أصلا ما كان وسخان ولاشي ، وهدى رتبت باقي البيت و بخرتو و ده كلو ما أخد نص ساعة ، غايتووو الحريم ديل عندهم مبالغات من يسمعو بأهل العريس جايين بتجيهم فوبيا عديل .....
....
..
الجماعة جو و كانت قعدة ظريفة و اتكلمو في الموضوع وأبوي وراهم إنو موافق و ما داير تفاصيل كتيرة بس عقد وزواج في نفس اليوم ، وبعد داك هم اختارو اليوم و كان بعد شهر ونص تقريبا ، أبوي عاين لي وقال :
- رايك شنو يا محمد
طبعا عرفتو بفكر يزوجني معاهم قمت قلت :
- الراي ليك طبعا وللعريس
- يلا على بركة الله
طلعو وهم مبسوطين و كمان حتى النسوان شكلهم متكيفااات من هدى و هديل ، ياخ هديل أنا زاتي لمن شفتها بعد مشو ماعرفتها ما التقول ياها الكانت حايمة بكعكات منكوشات و جلابية قديمة لمن لونها زاتو دايب ، ماعارف متين اتهندمت و قشرت كده سبحان الله البنات ديل مخلوقات متحولة عديل كده ....
كانت فرحاااانة و أنا زاتي لمن شفت الفرحة في عيونها لمن قلبي برد ، أخيرا همي حينزاح.... و أشوفها عروسة في بيت زوجها بعد ما طلعت روحنا بالرفض بتاعها.....
...
..
بعد داك اتفقدت تلفوني الكان جوة في الشاحن لقيت تلاتة مكالمات من قسمة و خمسة من نجوى ، قلبي أكلني وحسيت إنو في حاجة لكن رغم كده طنشت نجوى أما قسمة ماقدرت لأني حاسي تجاهها بالمسؤولية وعندها موضوعها حق المشروع ده قلت تكون راجياني بيهو... قمت اتصلت عليها و اتفاجأت إنها بتبكي شدييييد :
- مالك ياقسمة في شنووو
ماردت بس بتبكي ، اتخيلت أبوها ولا زول مات :
- إنتي كويسة ؟ أبوك كويس؟ أولادك... ياخ ردي ماتشفقيني
- كيفن عاد ببقى كويسة بعد السمعتو ده
طوااالي وقعت لي و قلت في سري : عبدو الكلب أكيد مافي غيرو هو الكلمها
- سمعتي شنو ياقسمة
- السمعتو شق قلبي النص بالنص ، لو كلمتني عديل وحات الله ما كنت بحميك تعرس لكن اسمع من برة دي حااااارة ، أنا يومداك مش قلت ليك رضيانة لو تعرسني بالسر و تشوف حياتك مع وحدة تانية ، مالك ماصارحتني
- و الكلمك ده ما وراك الموضوع تم كيف ؟؟
- ياهو في الأخير تم و البقت بقت
- طيب وقت عارفة البقت بقت بتبكي لشنو
- يااااقساوة قلبك يامحمد.... الله يسامحك
اتأثرت من كلمة الله يسامحك دي ، قلت ليها بحنية :
- وربي الخلقني وخلقك أنا ولا اخترتها و لا خطبتها ولا وافقت عليها ، كلو تم غصبا عني
- الله يسعدك يا محمد و يجبر كسري فيك
كل جملة بتقولها بتحنني عليها أكتر :
- ماتقولي كده ياخ ، وبعدين أنا معاك حأفضل زي ما أنا مافي شي اتغير ، و ياستي أنا أصلا ماخد إجازة بجيك بكرة الصباح بقعد معاك وبحكي ليك كل شي و انتي أحكمي ، و على فكرة موضوع الركشة لو باقية عليهو نمشي نتممو عشان السعر مايزيد....
- سمح
ياخ حنينة خلاص قسمة دي ، قفلت منها و رقدت نمت بدون ما أدي نفسي فرصة أفكر في كمية الأحداث المتسارعة دي....
الصباح صحيت باتصالين من نجوى ، قلت برجع ليها بعد أصحصح و أشرب لي كباية شاي لكن تاني نسيتها واتلخمت مع هدى وجوطتها ياخ جابت لي ورقة كبيرة ماعارف متين لحقت كتبتها لكن كانت مرتبة لكل شي في عرس هديل....
قريب الضهر كده فطرنا نحن التلاتة ومعانا الشفع ، أبوي في دكانو ومصطفى طافش ماعارف وين ، قمت قعدت شوية في التلفزيون ، جات هدى لاحقاني :
- محمد إنت ما ضربت لصباح ؟؟
- لشنو ؟؟
- ياخي ماتبقي دمك بارد كده ، وشالت تلفوني الكان قاعد قدامي وقالت :
- هاك أفتحو لي
- دايرة منو شنو
- أفتحو بس
- يازولة مابضرب ليها حسي
- دايرة أسجل ليك الرقم بس
صدقتها وفتحتو ليها قامت هي نقلت الرقم من عندها لتلفوني وغدرت بي و ضغطت على علامة اتصال ، وختتو في اضانها و أنا بقيت بكورك ده شنو البتسوي فيهو ده.. قامت أدتني ليهو وقالت :
- هو زاتو خارج التغطية
ومشت خلتني وأنا بقيت بقلب في القنوات لمن لقيت لي فيلم هندي مع إني بكرره الأفلام الهندية وقصصها الخيالية لكن عجبوني الممثلات بس ، و قلت أشغل نفسي عشان ما أفكر في شي ....
يلا تاااني نجوى اتصلت لكن أنا كنت اندمجت في قصة الفيلم قمت طنشت ، بعد داك قامت رسلت لي رسالة :
- لو مارديت أقسم بالله أجيك في الشغل حسي دي
خفت المجنونة دي تعملها و تمشي هناك تسبب لي فضيحة ، قمت طوالي رجعت ليها :
- حسسسي كنتي في بالي و داير أرجع لكن.....
- لكن شنو بالله كفاية كذب ونفاق
- كذب ونفاق ؟؟؟ بتقولي لي أنا الكلام ده ؟؟؟؟
- أصلا من يوم شفت وشك ده و أنا مامرتاحة ليك و عارفة إنك زيك زي أي واحد منافق
- عايني أنا مابسمح ليك تـ.....
قاطعتني وقالت :
- تسمح ولا ما تسمح أنا أصلا متصلة أبلغك تجي بكرة الشركة تستلم ورقك لأنو العقد ملغي و السبب عدم كفاءة المندوب
طبعا ده الكلام الحيتكتب لو هي عملت كده و دي حاجة ممكن تنتهي مني طبعا ، قمت قلت أحنكها شوية :
- ما اتوقعت منك ده يا نوجا ، يااااه على صدمتي فيك و أنا الكنت قايل إني ممكن أقرب منك أكتر و أعرفك وتعرفيني ، تجي تشتميني كده .. أنا مابهمني عقد ولا غيرو أصلا اختلفت مع مديري و موقف شغل و لو مامصدقة أمشي و أسألي هناك.. أنا كل المزعلني كيف تقولي لي كده بدون سبب
بدت تلين شوية وقالت :
- منو قال بدون سبب ؟
- اها لشنو طيب؟
- ماعارفة لكن قلبي مقبووض من ناحيتك
- دي شنو الأوهام دي بس ، و كيف لمجرد إنو قلبك مقبوض تقولي لي كلام بالشكل ده؟؟
- محمد انت ما متزوج صاح ؟؟؟
- ده شنو السؤال ده؟
- عشان فجأة اتذكرت خطيبي الأول و حسيت إنك ممكن تكون عملت معاي زيو ، و أنا مابعرف عنك شي يعني عادي تكون داسي مني أي شي
- ده شنو الكلام البزعل ده
في اللحظة دي مابعرف هدى مالا بقت تزغرد بصوت عااااالي و أنا جريت قفلت الباب و نجوى بتقول :
- دي شنو الزغاريد دي؟؟
- دي هديل أختي أمس خطبوها والعرس بعد شهر ونص
- خطبوها أمس و ياداب بزغردو الليلة ؟؟ مااا وقعت لي
بيني و بين نفسي بصراحة أنا زاتي ماوقعت لي لكن ما عندي تفسير تاني وماعارف هدى مالا ، لكن فجأة كده الباب اتفتح و هدى جاتني ليك زي الطوفاااان وقفت أدتني زغرودة عالية فوق راسي و قالت :
- قوم ياعريييس نسابتك جو من البلد ، أعمامك و عماتك و رجالهم و أولادهم ، جو يباركو لهديل... و عروووسك زااااااتها جااااات أيووووووووووي
طبعا ده كلو والتلفون لسه في أضاني و أنا اتشليت عديل من الصدمة ، و ما فقت إلا على صوت نجوى و هي بتكرر :
- عريس ؟؟ إنت ؟؟ نسابتك ؟؟؟ و العروس جات كمان ؟؟؟؟؟؟
.
.
أنا بس بقيت داير أضحك ولا ماعارف أعمل شنو في الصدفة الخلت البنات الخمسة يعرفو بالسرعة دي 😥 طبعا ده بافتراض إنها صدفة غريبة و موقف حرج اتختيت فيهو ، لكن...... 😟😞
(لكن) دي نخليها لمن نتلاقى و تعرفو كل شي😣😣
.
.
مع تحياتي ❤💖 رحمات صالح
