عبدو في اللحظه ديك ما سألني لكن طول القعدة كان ساكت ساي ، و جابو الأقاشي لكن ما كان عندي نفس آكل بس بقيت بهبش ساااي ، وبعد داك خليتهم قاعدين وطلعت بصراحه كنت زهجان وكمان ما داير اواجه عبدو، ركبت العربية و مشيت البيت والمرة دي من باب الشارع سامع جوطة هديل ومصطفى كترووها شديد و لازم أحسمهم بعد ده
- كمان بقيتو تسمعو الجيران صوتكم؟
مصطفى كورك وقال :
- يازول إنت ماعارف شي ماتتكلم ساي
- لو ماعارف وريني ، لكن ماتقعد تكورك كده
- أوريك شنو ياخ ؟ هو إنت فاضي ولا جايب خبر ، اليوم كلو حايم
ما اتوقعت إنو ده مصطفى ممكن يتكلم معاي بالأسلوب ده ، اختصرت النقاش ودخلت جوة و ياريتني مادخلت وياريت لو كنت اهتميت أعرف الحاصل في لحظتها....
حسيت اني جعان وندمت إني خليت الأقاشي.. مشيت المطبخ فتحت الحلة لقيت فيها بامية و الحلة التانية محشي ، قفلتهم و طلعت بدون ما اكل مع إني بحبهم..
لقيت مصطفى قاعد في البرندة و خالف رجلو وبهز فيها بقلق و صاااري وشو قلت أقعد معاهو و أشوف موضوعو شنو يمكن يتكلم ، سألتو :
- أخبارك شنو
عاين لي بطرف عينو وتاني رجع عاين بعيد و ما رد ، قلت أضغط على كرامتي حبة :
- يا مصطفى ياخوي أنا تهمني مصلحتك ، لو في مشكلة في الشغل نقعد سوى نشوف الحل شنو
- مافي أي مشكلة يا محمد ماتشيل همي
- و بالنسبة للشغل؟
- زي ما كلمتك ، الشغل خلاص ماراجع ليهو تاني
- طيب يعني الأسباب شنو و لو فـ...
قاطعني وقال :
- مافي أسباب
- خلاص ، نشوف شغل غيرو
- إن شاءالله
زهجت منو لأنو كان بختصرني و زهجان من كلامي قمت خليتو و مشيت رقدت كنت تعبااان ، بس أول ماختيت راسي كده جاتني مكالمة من رقم ما مسجل عندي وظهر لي مع التروكولر باسم مريومة ، افتكرتها وحدة من المزز حقاتي :
- ألوو ، محمد معاك مريم أم نجوى
دي دايرة شنو كمان في الليل ده :
- أهليين ياخالتي كيفك وكيف نجوى
بس من سألتها طوالي انفجرت بالبكى وأنا قلت خلاص نجوى ماتت :
- ألحقني يا ولدي محتاجة ليك
نطيت من سريري و لبست جلابية فوق التريننق اللابسو و لبست اقرب سفنجة و جري على أمدرمان... دخلت المستشفى و أنا متوقع ألقى جثمان و ناس بتبكي و كده ، دخلت الغرفة لقيت نجوى راااقدة في سريرها و مغمضة ماعارف حية و لا ميتة و أمها قاعدة جنبها و تبكي و تتلولح يمين و شمال :
- في شنو ياسااتر ، نجوى مالها
- نجوى مالاقية اليرفعها معاي ، براااي و يدي وحدة ، لا عندي ولد يسندني لا راجل يقيف معاي
- في شنو يعني مافاهم
رجعت تبكي تاني وقالت :
- نجوى من قبيل دايرة تتقلب بالجهة التانية و أنا غلبني أرفعها براي لمن قلبي اتقطع عليها
قلت وأنا حأنفجر من الغيظ ومامنتبه لكلامي :
- يعني جايباني من الخرطوم لأمدرمان عشان أقلبها ليك بالجهة التانية؟؟؟
زعلت ووشها اتغير و أنا انتبهت لنفسي وحاولت أصلحها :
- أنا بس قصدي إني اتخلعت شديد و قلقت عليها و كده
هنا طلع صوت نجوى وقالت بزعل :
- خلاص يامحمد نحن بخير ممكن تمشي
- لا.. ما كده.. أنا.. أنا بس.. يعني أطمن عليك بعد داك أمشي
أمها قالت لي :
- كدي تعال نصلحها عشان الرقدة دي تعبتها
قمت معاها و برااحة شلناها قلبناها الجهة التانية و أنا بيني و بين نفسي عندي أسئلة كتيرة ، ديل لا عندهم خال لا عم لا جار لا زول يقيف معاهم ؟ و مالها أمها دي مركزة معاي كده زي كأنها مصدقة إني عندي شي بربطني بيها ؟ ياربي نجوى دي قالت لأمها شنو؟ ولا تكون أمها لايوقة وسلباطة زيها
..
..
- صباح الخير محمد ، شكرا لعدم الرد وتاني ما حأزعجك ، أوك؟؟؟
دي كانت رسالة صباحية من ياسمين ، بصراحة ماقادر أنساها رغم إني متضايق منها قمت قلت يا محمد أخزي الشيطان و أنسى الحصل و أرجع ليها وفعلا اتصلت عليها و أنا في الطريق ماشي على الشغل و اتكلمنا و اتصافينا وقررنا ننسى الحصل و ارتحت كتيير ووصلت الشغل و أنا مزاجي رايق...
ما كان في شغل يقولو عليهو ، عملت الممكن اعملو و خلفت رجلي و فتحت تلفوني دخلت الفيس لقيت طلب صداقة باسم : noona almajnoona وعاملة ليها صورة بت كده منكوشة بشعر برتقالي مبروم كلو ، ضحكت و أنا متخيل إنو شكل البت ياهو زي صورة الكرتون دي دخلت صفحتها لقيتها كلها منشورات من نوعية أنا أنثى لا يهز كبريائي ألف رجل ، و قد أبدو لك مغرورة لكني في الحقيقة مغرورة جدا و كلام كتير زي ده ، بسس قلت الليلة أشوف الكبرياء ده كيف ... قمت قبلت الطلب ورسلت ليها رسالة :
- نهارك سعيد مجنونتنا
- مين معايا؟
- اممم أنا المفروض أسأل
- مشان شووو إنت اللي مفروض تسأل
كنت داير أقول ليها عشان إنتي الرسلتي الطلب لكن لمن قعدت تتحنكش وتتدلع قلت أكمل ليها فهمها وأشوف نهايتها :
- مشان أتعرف ع القمر اللي نزل م السما ع صفحتي ونورها لي
- هههههه شكلك كتير مهضوم وحباب ، ماقلت لي ميين
- أنا حباب شديد فعلا ههههه معاك محمد بشير ، وانتي
- نونة
- من وين يا نونة
- من كافوري
بيني وبين نفسي قلت كافوري ف عينك ههههه غايتو أنا النوعية دي بعرفها كويييس العاملة فيها دلوعة وتتكلم لبناني وتتعاور دي أكيد ساكنة في.... ولا مافي داعي كلنا ناس على قدر حالنا لكن ماقاعدين نتعولق كده..
- ماشاءالله حباب ناس كافوري منورين والله..
اتونست معاها مسااافة كنت مستمتع مع إني عارفها سايقاني بالخلا هههههه لكن شعور حلو تكون عارف الزول طالع بيك العالي و عامل نفسك مصدق ، وبالمناسبة ماتفتكرو إنو دي هي الست السادسة لاااا حتعرفووو قدام ...
المهم كملت ونستي عاينت للساعة لقيت وقت دوامي انتهى قلت أطلع و كنت رااايق قلت أمشي أشوف البنية المنفسنة ديك بقت كيف..
مشيت المستشفى وقبل ما أدخل لاقيت الزول داك الصدم نجوى كان طالع ، سلمت عليهو و لقيتها فرصة أسألو من كلامو القالو :
- بالله بس داير أستفسر منك يعني إنت وقت قلت لي نجوى خطيبتك و كده ، جبت المعلومة دي من وين
ضحك وقال :
- في الحقيقة لمن كانت مبنجة وبين واعية وماواعية الزول الكان ركب وجا معانا داك ناداني يا محمد ، وهي افتكرتني محمد انت وبقت تقول محمد ما دايرة أموت قبل مانعرس وقعدت تتكلم كتييير ههههههه شي مفهوم وشي مامفهوم لكن العرفتو إنكم مخطوبين
طبعا بعد صدمني ربت على كتفي وقال :
- ظاهر عليها بتحبك أبقى عليها عشرة ، الله يسعدكم
قربت أديهو بنية ف وشو لكن ابتسمت ليهو ابتسامة صفراء و أنا ماقادر أجاملو و أقول آمين ..
دخلت جوة لقيت نجوى نااايمة و أمها بتصلي في العصر ، عاينت ليها من قريب وهي مغمضة و هادئة ، أول مرة أشوفها كويس.. ما كانت شينة بالعكس ملامحها رقيقة لكن هي عشان دايما معصبة مابتديك فرصة تشوف شكلها الحقيقي ، سرحت فيها كتير و بقيت بفكر ليه وحدة زي دي ماليها حظ في الرجال والزواج ، و أثناء ماسرحان فيها فجأة فتحت لي عيونها كبييرة و أنا نطيت لي ورا بس إحساس أفلام الرعب لمن يجيبو ليك زومبي مغمض وفجأة طق يفتح ليك عيونو...
- مالك بتعاين لي كده؟
- لا بس بتطمن عليك ، إنتي كويسة؟؟
ابتسمت بخجل وقالت :
- كويسة أكيد
طبعا شكلها قربت تقول لي كويسة عشان انت معاي ، لكن تكون خجلت ساي...
بادلتها الابتسامة وقلت :
- إن شاءالله دايما كويسة وماتشوفي شر ، يلا مدام لقيتك بخير أستأذن أنا
وقبل ما أتحرك أسمع ليك أمها بصوت عالي بتكمل في التشهد :
- إنك حميييد مجيييد... السلاااااام عليكم ورحمة الله السلااااام عليكم ورحمة الله
عرفت إنها رفعت صوتها عشان توقفني قبل ما أطلع نفس حركات أمي الله يرحمها، وفعلا قامت بسرعة ولمت مصلايتها و سلمت علي وقالت :
- وقت جيت عليك الله أقعد لي معاها شوية أمشي أشرب لي كباية شاي وأجي
عرفتوو ليك ده شرك ، قلت أزوغ :
- خليك ياخالتي أنا بمشي أجيبو ليك
- لا لا لا أنا زاتي اتخنقت من الكتمة دي ، أمشي أشم لي هوا.. مابتأخر عليكم يلا سلام
طبعا على قدر ما شميتها على قدر ما راعيت إنها أم موجوعة على بتها و دايرة زول يدخل حياتها و يسعدها... لكن أنا ذنبي شنووو ياااناس!!!!
- محمد أقعد
عاينت لنجوى بغيظ وقلت :
- ماقاعد ، أنا كده مرتاح
- ومالك بتتزهج فيني
- لا لا العفو
انفعلت و كانت حتكورك ، و نست روحها و حركت يدها ، وصرخت من الألم :
- اااااخ
جيت عليها بقلق وقلت :
- براحة ياخ
- مابراحة ، ولو زهجان و متضايق مني امشي و يدي دي خليها توجعني ماليك دعوة بيها
- معقولة يا نوجا ، أتضايق منك إنتي؟
قالت بجدية:
- محمد إنت بالجد واقف معاي ليه؟ شفقة و لا صادق في الكلام القلتو
- الكلام ياتو ؟؟
- شايف ؟؟ ولا حتى متذكروو ، معناتا كنت بتكذب علي لمن قلت إنك حتثبت لي إنك غير عنهم
طبعا لقيت نفسي بقول :
- و أنا عمري ماقلت كلمة و أخلفتها ، و حأثبت ليك و حأكون معاك وجنبك دايما
أنا زاتي ماعارف قلت كده ليه لكن زي ماعارفين أنا زول متعود على البنات وقريب منهن و مابقدر أكسر خاطر وحدة...
نجوى دي قلبها بقى يدق لمن قربت أسمع صوتو ، وخجلت خجل و شكلها كده اتبسطت ، و أنا زودتها زيادة وقلت :
- يلا شدي حيلك عشان تطلعي لينا بالسلامة
في اللحظة دي تلفوني رن كانت قسمة ، رديت عليها بكل تلقائية وماعارف إنو نجوى مركزة معاي كده :
- ألووو... كيفك.. أنا في المستشفى بزور زول صحبي عامل حادث.... قلتي شنوووو... متين ده ؟... و مالك ماكلمتيني أنا مش قلت ليكي ماتتصرفي بدون ماترجعي لي؟؟... خليك مكانك أنا جاييك حسي.... يازولة شنو راجعة البيت انتظري بسس... ياااخ العيال مابتجيهم حاجة مش قاعدين في البيت و أبوك قاعد معاهم ؟؟؟ انتظريني مسافة الطريق و أكون معاك
قفلت الخط و أنا ما متوقع إنو الشماعة بتاعت الدرب حتجيني واقعة في راسي و معاها صرخة :
- ياكذااااااب طلعت زيوووو.... متزوووج وكماااان عندك عيااااال...
حاولت أشرح ليها لكن هي ما مدياني فرصة و خفتها تأذي يدها المكسورة و هي معصبة كده :
- يابت الناس ماا....
- أصلا كنت حاسة.. أصلا من يومي مامرتاحة ليك
- ياااخي أنا لو متزوج ودي مرتي أكيد ما حأكلمها قدامك
ماعارف لشنو بقيت ببرر ليها وهي شوية اقتنعت بالجملة الاخيرة وقالت :
- اها دي منو
يلا هنا اتورطت الورطة الحقيقية ، وقلت :
- ياستي بحكي ليك كل شي ، بس حسي الموضوع طارئ و مستعجل... يلا سلام و أنا بعد أطلع بتصل لأمك تجيك
- محممممد أقييييف.. وقسسسما تمشي أعمل في يدي دي حاجة
- مجنونة انتي؟؟؟؟
- اااااي مجنونة وماحتمشي قبل ما أفهم
- يازولة ماشي و الدايرة تسوي سوي ، تكسري يدك تكسري رقبتك بطريقتك
وفعلا كنت طالع لكن اشوف ليك البت المجنونة دايرة تقوم و ماقادرة وبقت تعافر لمن وقعت في السرير على يدها المكسورة وصرخت صرخة ألم هزت قلبي من جووووة...
...
.
مش قلت ليكم أصعب حالة مرت علي 😩🤦🏻♀
يلا لمن نشوف البحصل
.
مع حبي 💖💕 رحمات صالح
