عبدو ده دخلني في حتة ضيقة خلاص و بقيت ساكت سااااي ماعارف أقول شنو ، قام هو قال لي :
- والله يا محمد أنا ماقصدت الا الخير و لو كنت داير أتونس و لا أبرمج كان شفت بت غير أختك لكن أنا دايرها بالحلال و في الأخير الراي رايك ومهما يكون ردك خوتنا في مكانها ما بتتأثر.....
و فتح باب العربية نزل و قال :
- فكر و أديني ردك
.
.
مشيت البيت و أنا راسي ضاااارب لقيت هدى راقدة محننة قمت قلت اخد رايها مع إني عارفها مرات مهترشة وجواطة لكن برضو عندها آراء بتعجبني :
- خير يا محمد يا أخوي
- في موضوع داير رايك فيهو
- أيوووووي أخييرا قررت تعرس ، مع إني كنت مختارة ليك عروسة لكن وقت اخترت براك برضو خير وبركة
- لا لا الموضوع ما كده
- اها خير
- في زول متقدم لهديل
هدى دي صرت وشها وقالت :
- ما هو كل يوم في زول بتقدم لهديل ، نحن مشكلتنا مافي العريس مشكلتنا إنو هديل مابية العرس كلو كلو ، أنا زاتي قاعدة أفكر أوديها لشيخ يقرا ليها عشان مـ.....
قاطعتها بنهرة :
- ياخ إنتي مابتخلي الواحد يكمل كلامو
هنا دخل علينا مصطفى و هو زهجان و صاري وشو و شكلو سمع طرف الكلام :
- أختكم دي مالاقية زول يخلي بالو منها ، لمن أنا جيت من السفر قبضتها كم مرة بتكلم زول و دايما بتناقش معاها وبشاكلها لكن انت يا أستاذ مافاضي تشوف أختك بتسوي في شنو ، و تقريبا ده المخليها رافضة كل العرسان لأنو الزول البتكلمو ده غاشيها و ماكل راسها....
- أنا مابسمح ليك تتكلم بالأسلوب ده معاي و لا عن هديل انت فاهم
- ياشيخنا أنا لا داير أتكلم معاك ولا أتكلم عنها أنا بنورك بس عشان انت نايم على أضانك
- أنا ما نايم على أضاني و لعلمك أنا موضوع هديل ده عارفو فلو إنت ماعندك أسلوب كويس أحسن تطلع منها
هدى اتدخلت وقالت :
- في شنو فهموني ، و ده منو البتتكلمو عنو ده
مصطفى طلع و رزع الباب ، و هدى دي بقت تتململ عرفتها الشمار حرقها و منتظرة الحنة تنشف عشان تمشي تسأل هديل :
- بتفكري تسأليها صح؟؟؟
- لا لا خلاص
- يلا أنا زاتي خليتك من الموضوع الكنت حأكلمك بيهو ، لكن أوع أعرف إنك جبتي ليها سيرة عن أي شي..
و قمت داير أمشي و أنا بقول الحمدلله إني ما حكيت ليها.....
نادتني و حلفتني أكمل ليها و أنا حلفت مابقول ، قامت قالت :
- خلاص أسمع مني الكلام ده ، ويمكن الفرحة تبقى فرحتين
- شنو
- منى أخت صلاح راجلي
- مالا
- الليلة عازمانا عشا
- تمااام ، عشان كده اتحننتي
بعد داك استوعبت وقلت :
- لكن قصدك شنو بالفرحة تبقى فرحتين
- حلفتك يا محمد ماتقول ولا كلمة ، بعد نمشي وتشوف بتها ولو ماعجبتك خلاص
- أنا ماماشي ولا في زول عزمني
- ضربو لأبوي و قالو ليهو يكلمكم... و عشان خاطري ما تقول لا
- طيب لمن نشوف نهايتك
...
دخلت غرفتي و ضربت لنجوى لأني لقيت منها مكالمة ، و قالت لي إنها خلاص نازلة الشغل بكرة و قالت أجيها عشان نشوف موضوع العقد الزماااان داك :
- لكن يا نجوى العقد ده طول و أنا ماعارف الشركة حتقبل بيهو و لا لا
- إنت تعال ، و خلي الباقي علي
- حتعملي شنو يعني
- حأضيف بنود جديدة و حتكون لصالح شركتكم ، و حأقنع مديرنا بطريقتي الخاصة
- تقنعيهو كيف ، أنا متأكد إنو ما حيتفاوض في أي بند جديد
- لاااا أنا مديري مابرفض لي كلمة
- نعم ؟؟؟؟ و ده ليه إن شاءالله ؟؟!!!
- مالك زعلت
- ما زعلت ، خلاص
- هههههه لاا ماخلاص شكلنا كده... بـ نـ غـ يـ ر
قالتها حرف حرف و أنا زاتي انتبهت و ماعارف شنو الخلاني أتضايق :
- من حقي
- طبعا من حقك.. و من حقك كمان أنجز ليك شغلك
- الله يخليك
- امممم.... شنو الله يخليك دي
- لي .... الله يخليك لي
- محمد ممكن سؤال
- أسألي
- البت اللاقيناها في المطعم ديك
- الذكرك ليها شنو بعد الزمن ده كلو
- مانسيتها أصلا ، وكل مرة بكون دايرة أسألك هي منو وعلاقتك بيها شنو
- ياستي عشان أكون صريح معاك البت دي كنت بعرفها قبلك و اختلفنا و سبنا بعض و ماعندي ليها أي شي حاليا
- متأكد؟؟
- زي ما أنا متأكد إني بتكلم معاك ياجميل
طبعا ماعارف روحي الليلة مالي بشاغل و أتغزل ، لكن بعد كلامنا ده اتأكدت إنو نجوى فعلا بدت تتغير و الدليل على كده إنها ماعصبت و انفعلت و سألتني بهدوء و اتقبلت جوابي بهدوء... ياسلااام ياخ حاسي إني أنجزت بالجد......
..
..
بالمساء كلنا طلعنا ماعدا مصطفى أبى يمشي معانا ، أنا سايق و أبوي جنبي و ورا هديل وهدى والشفع ، طبعا دوشة و جوطة يحاولو يفتحو الشباك و هدى تضرب و تنهر و واحد فجأة يجي ناطي من ورا لقدام و التاني يبكي يقول هو داير يجي قدام و بالحالة دي لغاية ما وصلنا بيت نسابة هدى...
استقبلونا استقبال ظريف و بعد داك أنا وأبوي دخلونا الصالون و هدى وهديل دخلو جوة ، و شربنا العصير و قعدنا شوية كده قالو لينا اتفضلو العشا.. مشينا جوة لقينا بوفيه طويييل عريض و وقت أنا داخل كان في بت جات شايلة صحون فاضية ختتهم في أول الصفرة و مشت بسرعة ، أنا لمحتها سرييع كده لكن حفظتها كويس... بت جميلة بمعنى الكلمة و بعدين أنيقة و حتى مشيتها ما مشية عادية ، زي الممثلات وعارضات الأزياء وتحس بيها كده واثقة في روحها ، طبعا اتكيفت قلت ياسلاااام دي ياها بت حماة هدى القاصداها لي مع إني ما ناوي أتزوج بالطريقة دي و كمان لسه ماقنعت من ياسمين و لو فكرت في الزواج حأفكر فيها هي ، لكن الفكرة عجبتني كونو هدى تختار لي وحدة سمحة كده ......
بعد اتعشينا وخلاص بقينا طالعين طلعو أخواتي ومعاهم نسوان البيت طبعا مافارز غير منى أخت صلاح لكن تاني ماعرفت زول و كان في زي تلاتة بنات كده لكن ما ركزت فيهم ، وكمان زولتي القبيل ما كانت معاهم عشان كده ما اهتميت ...
طووول السكة هدى تشيييل و تشكر في نسابتها لدرجة هديل قعدت تضحك و علقت :
- إنتي ياهدى مش ديل ياهم نسابتك القلتي بتدخلو ليك و بحرشو راجلك و بشيل مصاريفكم يرسلها ليهم و السنة كلها تشكي منهم مااالك الليلة حاباهم كده و تشكري فيهم
- يختي الناس ماقصرو معانا و أكرمونا ، ولاشنو يا محمد
- اي اي صح
وأبوي اتدخل في الكلام و قعد يقول عنهم كلام كويس و أنا شايف هدى بالمرايا تغمز لهديل و تلكز فيها و هديل تقول بصوت عالي :
- مالك مالك
أنا فهمتها طبعا خافت أولادها يوصلو كلام هديل لأبوهم و تحصل مشكلة عشان كده قلت ألطف الجو :
- لكن ماشاءالله ناس تمام ، راقيين و كريمين ، و سمحين
- شفت بت منى ؟
عملت روحي مامركز و قلت :
- مااا انتبهت شديد
- الكانت لابسة أبيض بأسود
طبعا الشفتها أنا كانت لابسة بنفسجي ، عشان كده سكتا سااااي...
...
..
أول ما دخلنا البيت طوالي هدى جرتني على جنبة و بقت تحقق معاي و أنا حلفت ليها إني ماشفتها ، زعلت مني شديد وقالت إنها مخصوص خلتهم يطلعو معاهم عشان أنا أشوفها ، و أنا دخلت كلامها بجاي وطلعتو بهناك لكن سألتها :
- والكانت لابسة بنفسجي دي منو؟؟
قعدت تلولو في خشمها وتقول :
- دي بت مجدي ولد عم صلاح ، بت فقر خلاص طالعة لأمها و مفترية و شايفة روحها ، لكن شفتها وين دي ماطلعت معانا الثقيلة
- شفتها و خلاص... ياخ لكن ليها حق تفتري
هدى دي اتغاظت مني غيظ و بقت تنبذ فيها هي و أمها و أنا زهجت و قلت ليها :
- هوي خلاص أنا ماعندي شغلة في نسابتك ديل و لا داير أعرس زاتي....
وقفلت الموضوع كلو على كده لكن القدر ليهو كلمتو و بعد فترة حصلت معاي أغرب صدفة...... زي ماحتشوفو
...
..
قبل ما أدخل أنوم مديت راسي في غرفة هديل لقيتها قاعدة بهدومها الجات بيها من برة و سرحاااانة ، و وراها واحد من أولاد هدى متشعلق في رقبتها وهي ما جايبة ليهو خبر ، دخلت و قلت ليهو يطلع و قفلت الباب ، و قلت ليها مباشرة بدون لف و دوران :
- لو عبدو اتقدم ليك رايك حيكون شنو ؟؟
أول شي فرحت و الفرحة بانت في عيونها و تاني حاولت تداري ابتسامتها و قالت بجدية مصطنعة :
- رايي حيكون بعد رايك إنت و أبوي
وتاني قالت :
- يعني هو قال كده ؟؟
- ايوة
- و إنت رايك شنو ؟
- أكون معاك صريح ياهديل ، عبدو صحبي و فيهو صفات كويسة ، لكن أنا داير ليك أحسن من كده
- يامحمد هو عشان صحبك إنت بتكون عارف و شايف منو كل شي السمح والشين بدون تزييف ، لكن ممكن يجي غيرو و انت تشوفو أحسن زول لأنك ما احتكيت بيهو ، و عبدو زااتو في نظر ناس تانيين مابعرفوهو كويس ممكن يكون زول مثالي....
صراحة عجبني منطقها و كمان عرفتها قدر شنو دايراهو و بتدافع عنو رغم انو خلاها و كسرها......
قلت باختصار :
- يحصل خير....
.
.
مرت أيام و ما اتكلمت في الموضوع مع هديل و لا مع عبدو ، أصلا كنت مشغووول و عندي شغل مهم شغال فيهو ، ومن ضمن الحاجات اني أخيييرا وقعت العقد مع نجوى و انتهيت من البرنامج ده.....
يوم كده كنت بتونس مع ميس في الواتس و بنتناقش في حاجة و بقيت مافاهمها قمت اتصلت عليها ، حسيت بيها ماقادرة تتكلم كويس و كمان ما بتجيب اسمي... سألتها :
- جنبك زول ؟
- اايوة
- إنتي وين ؟ في صوت هوا وعربات
- في كافي
- معاك منو ؟
- أصحابي
- طيب ما أشغلك منهم يلا لبعدين
شكلها قايلاني اتضايقت إنها طلعت مع أصحابها قامت زحت منهم وقالت :
- محمد نحن في كافي اسمو..... لو فاضي تعال
- ما أظن ، يلا استمتعي بوقتك
وبعد قفلت منها ماعارف شنو خلاني أغير رايي ، يمكن ياهو القدر ، أو الصدفة العجيبة فرضت نفسها علي... قمت رجعت ليها برسالة و قلت ليها إني جاي عليهم.....
...
..
وصلت و من بعيد لمحت ميس ، كانت هي الوحيدة المواجهاني و معاها بتين و ولد ، قلت السلام عليكم ، و مديت يدي أسلم... سلمت على ميس أول لأنها وقفت لي ، و تاني على الولد ، و على البت الأولى ، و لمن جيت أمد يدي للبت التانية بس حسيت بي صاقعة وقعت في راسي ، وبقيت مخلوع و منطط عيوني و هي زاتها لمن استغربت و بقت صارة و مافاهماني مالي......
ميس كانت قايلاني عرفتها ، قالت :
- محمد دي روان صحبتي.... روان ده محمد بشير
طبعا هنا صدمتي اتضاعفت أضعاااااف ، مستحيل مستحيل.. روان... روان البت ديك بتاعت القروب... تطلع ياها زااااتها... بت مجدي قريب صلاح راجل هدى...... ياااااه على الصدفة ، لكن أحسن حاجة أعمل رايح و ما أوريها إني أخو هدى لأنها يومداك ما شافتني أصلا.....
.
.
يلا لمن نشوف الحصل مع روان 😱 و مع باقي الستات ، و مع الست السادسة الحتظهر ظهور خاااص و حتكسح كل شي 😩... و حنشوف هديل و عبدو حيحصل معاهم شنو...
في أمان الله 😘
.
.
مع خالص ودي 💖❤ رحمات صالح
