- أهدي يا نجوى
قلت اسمها مخصوص و أنا بعاين جوة عيونها عشان أربكها ، وفعلا نزلت عينها و نزلت القلم الكانت رافعاهو في وشي.. و قالت :
- خلاص يا أستاذ ، شيل ورقك و مع السلامة
- ياخي حريقة في العقد و في الشغل كلووو ، أنا ماداير أشوفك كده... مع إني مابعرفك لكن حسيت إنك قريبة مني و حسيت إني فاهمك من أول نظرة....
سكتا شوية قلت أشوف ردة فعلها ، لقيتها مستكينة و شكلها متجاوبة قمت واصلت :
- يا نجوى تاني الكلمة دي ماتقوليها
قالت :
- ياتو كلمة؟؟
- كلمة كلكم زي بعض ، ربنا خلق الناس بالمليارات حصل شفتي زول نسخة طبق الأصل من التاني ؟ لا لا حتى التوأم بتلقي ولو فرق بسيط في الملامح... ف أكيد الناس في الطباع و الأخلاق برضو بتختلف
رجعت عصبت تاني ووشها قرب ينفجر :
- في دي لا ، كلكم وااااحد... عروقكم ده جارية خيانة وكذب ، منافقين الله ياخدكم راجل ورا التاني
قلت في نفسي (كده كتير ، لكن طول بالك يامحمد) :
- ممكن أسألك سؤال؟؟
ما ردت ، قمت سألت طوالي :
- إنتي جربتي كل رجال الكون ؟؟ ولا حبيتي واحد وخذلك ؟؟
عيونها دمعت و قالت :
- واحد لكن كان بالنسبة لي كلهم
- يازولة ده مايستحق منك ذرة ندم و لادمعة واحدة تنزل عليهو ، و بتلقي غيرو يهتم بيك و يخاف عليك و مايرضيهو زعلك
- واحد ؟ واحد منو أنا كرهتهم كلهم
- الواحد ده ممكن يكون قدامك
- إنت نسيت نفسك ولاشنو ، وبعدين أنا بعرفك من وين عشان تقعد تتكلم معاي في حاجات خاصة كده؟
- مش يمكن ربنا ختاني في طريقك مخصوص ؟ عشان أثبت ليك إنو ما كل الناس واحد... إنتي بس أديني فرصة أثبت ليك
سكتت ماردت ، كررت ليها :
- هاا ، حتديني الفرصة دي؟؟؟
شالت القلم ورفعتو تاني و قالت :
- وقسما تطلع بتتلاعب بي أندمك على اليوم الشفت فيهو وشي
و كسرت القلم على اتنين و رمتو بعيد وقالت :
- وخلاص بالله لأني جد ما طايقة زول
ده شنو أنا مافاهم دي مالا ، يعني وافقت ولا ماوافقت و لا طارداني ولاشنو ؟؟ دي مجنونة رسمي
.
قمت لململت باقي كرامي و طلعت ، كانت الساعة ٢ طوالي من دربي ده و على شارع الستين ، كنت رايق و نجوى دي ما أثرت معاي بشي و أصلا من طلعت نسيتها طوالي ، شغلت الراديو لقيت الحوت شغال اتكيفت شديد..
وصلت الموقع الشغالة فيهو ياسمين ، مشيت على الكونتينر الأبيض العاملنو زي مكتب للمهندسين لقيتو فااضي ، قلت أتصل عليها لكن قمت لمحتها طالعة فووق و معاها العمال.. المنظر ده استفزاني شديد أشرت ليها تنزل ، أشرت لي بمعنى انتظر شوية... بقيت واقف تحت متابعها و هي في نص العمال و كمان لابسة بنطلون ، قربت أطلع ليها فوق لكن بس بقيت ماسك نفسي و بقول ده شغلها طبيعتو كده وفي نفس الوقت ماقادر أتجاهل غيرتي من المنظر ده....
بعد خلصت نزلت و جاتني وهي فرحانة بشوفتي :
- محمد كيفك
مزاجي كان معكر شديد و ماداير أتكلم معاها في الموضوع لأني عارف إنو الكلام ماحيغير شي و لا هي حتخلي الشغل و لا أنا بقدر أمنعها :
- تمام
صرت وشها و قالت :
- تمام دي شنو كمان ؟ مالك
- مالي ؟ مافي شي
- شكلك متضايق
- يابتنا مالك دايرة تجننيني يعني أتضايق ليك بالقوة عشان ترتاحي؟؟؟
دي كانت أول مرة أنهرها ، و ندمت لأنها زولة حساسة ما اتحملت.. وطوالي دموعها جرت ما تقول دي نفس البت الكانت متشعلقة فوق و عاملة فيها راجل ، و أنا نقطة ضعفي أشوف دموع في عيون بت بالذات وحدة قريبة مني زي ياسمين دي :
- خلاص اسف بس شوية مشاكل في الشغل مزهجاني
- كلنا بتواجهنا مشاكل وصعوبات لكن ما بنجي نتزهج في الناس
- خلاص يابت ، و أرح عشان الشمس دي ما تحرقك علي
ماعارف كلامي عمل فيها شنو لكن حسيت قلبها دق شديد و بقت تتبسم ، شكلها عجبتها (تحرقك علي) وحبيت أربكها زيادة وقلت :
- ماداير شي يأذي ياسمينتي
دخلت يدينها في جيوبها بتفتش في شنو ماعارف ، لكن شكلها حركة لا إرادية من التوتر والخجل :
- هههههه يابت بتفتشي في شنو
ضحكت معاي :
- هههههه ما بفتش في حاجة ، لخبطتني ياخي
- ياحلاوتك و إنتي متلخبطة
ضحكنا وكل واحد فينا نسى زعلو ، ومشينا مطعم اتغدينا و اتونسنا كتيير ، كنت مبسوط من جواي و حاسي إني أخيرا لقيت الروح البرتاح جنبها و فعلا دي الداير أكمل معاها.... لكن طبعا ده حال البنات الوحدة لو ماخربتها مابترتاح
- محمد
- نعمين
- في موضوع كده قلت أكلمك بيهو
قلبي أكلني من الجملة دي :
- أها خير
دنقرت و قالت :
- في واحد كده زميلي في الشركة
قبل ماتكمل كلامها أنا خلااص اتنرفزت لكن سكتا ساي وبقيت بسمع فيها :
- اتقدم لي
- أيوااه ، و إنتي رايك شنو؟؟
عاينت لي وهي صارة و قالت :
- رايي؟؟؟
- أيوة رايك ، مش قلتي اتقدم ليك يعني بكون منتظر منك رد
- إنت رايك شنو؟
في اللحظة دي أنا كنت وصلت آخري و أساسا أنا مابحب حنك اتقدم لي زول ده و هي زاتها بقت حركة قديمة و مكشوفة
- محمد ، مالك ساكت
- شوفي يابت الناس إنتي زولة كبيرة وواعية و عارفة مصلحتك وين ، البتشوفي مناسب أعملي
ياسمين دي اتضايقت شديد و قالت :
- يعني أوافق؟؟
- أنا ماقلت وافقي ولا ماتوافقي قلت ليك براحتك
- كنت متوقعة إنك حتقول كده
- حسي أنا قلت شنو
- محمد إنت لو جادي معاي ردك ما بكون كده ، لكن كنت حاسة إنك حتخذلني
- يا بتنا أخذلك في شنو أنا حصل وعدتك بي حاجة؟
طوالي قامت و شالت شنطتها و طلعت و أنا ختيت يدي في راسي و قلت :
- ااااااخ ، من البنات و تفكيرهم و تسرعهم
.
.
بنتقابل إن شاءالله وبوريكم الحصل
وحتعرفو شوية شوية باقي الستات منو و الورطة الدخلوني فيها
.
.
مع حبي 💕 رحمات
