وجدتكي ملجئي💜

part21

Part21
عند سارة قرت النتيجه نزلو دموعها وحست بوجع في قلبها قعدت شادة الورقه تقرا فيهامرتين وثلاثه والف فكرة في راسها:كيف هكا شن ذنبه يعيش هالسنين بدون بوه شن ذنبه ينحرم منه بدون اي سبب كيف تحمل الله يسامحك يابابا كيف بنواجه خوتي ونقلهم هدا خونا كيف بنقولها لماما ياربي ساعدني بس قعدت تبكي لين رن هاتفها وكان ايمن ماردتش عاود تاني فتحت الخط وصوتها تبكي
ايمن:اهدي بس كله ينحل وخيتي💔
وبالكلمة هدي سارة زاد وجع قلبها اكثر:اسفه😔
ايمن:علاش
سارة:لانك انحرمت منه طول عالوقت
ايمن:معليشي نصيب الحمد لله عاكل شي
سارة:ممكن نشوفك
ايمن:اكيد بس مش في العيادة انا كثرت جيات وحسيت الممرضات يتكلمو مانبيش نسببلك مشاكل
سارة:تمام وين نتلاقو
ايمن:تمام تو نبعتلك عنوان وتعالي
سارة:تمام وطلعت
عند انور واريج انفتح الباب وياحزركم من كان🤔🤔
"اكيد كلكم متوقعينه عاصم ولا 🤯 غلط هدا ابراهيم غفير العمارة جايب حجات موصيه عليها انور😁"
ابراهيم:السلام عليكم صباح الخير ياولدي
انور:اوو عم ابراهيم كيف حالك
ابراهيم:الحمد لله ياولدي تفضل هادو طلباتك
انور:منور عمي تفظل خش
ابراهيم:لا والله وسامحني خشيت طول غير قلت اكيد راقد قاعد فتحت وخشيت
انور:تي لالا عادي الحوش حوشك
"طبعا اريج اول ماسمعت الباب طول هربت للمطبخ"
انور خش يضحك:وينك ياخوافه
اريج:قريب متت تعرف نحسابه عاصم
انور يقرب منها:اممم واهو طلع مش عاصم
اريج توخر:انور خلاص اصلا تأخرت بنمشي وجت بتهرب شدها
انور:مهو مااجتمع اثنان الا الشيطان ثالثهما وحصل عليها بعد شوية جتها صاحبتها وروحت
عند عاصم في الشركه خشله مروان:عاصم فاضي شوي
عاصم:اها تعالا شن فيه
مروان:ماقتليش شن ندير في الفرخ اللي قاعد عندنا
عاصم:نسيته تعرف معقولة ماسأل عليه حد
مروان:شوره عيلته ماصدقة افتكو منه عليك هم هوا
عاصم:بلا خليه ايام تانيه يتربى هيا تسايرني عندي اجتماع في مطعم
مروان:هيا وطلعو
سارة وصلت للمكان اللي وصفهولها ايمن وخشت قبالها طول
ايمن سلم عليها:كيفك
سارة:الحمد لله وانت
ايمن:كويس رايك في المكان
سارة:جميل وهادي
ايمن:انا شريك فيه وعندي سلسله في اكثر من مدينه
سارة:حلو ربي يعاونك قعمزو في مكان بعيد عالدوشة
ايمن:سارة انا
سارة:لازم يعرفوا
ايمن:انا مش مستعجل عاشي براحتك كيف تبي انتي
سارة شدت ايده:انت عشت شنين بدون اب وخوت وتوا خلاص جي الوقت نعوضوك
ايمن شد ايدها بيديه الزوز:اخيرا صدقتيني
سارة:ابتسمت😊
ايمن يبي يغيرلها جوها:محلاك يابنت طالعه طرف زيني
سارة ضحكت "ويافرحه ماتمت😩 شدلها يدها وبعدها على ايمن قامت راسها وكان عاصم للاسف
سارة:عاصم
عاصم:اها ايه راجلك منو هدا وليش شاد ايدك
ايمن:اهلين تفظل قعمز
عاصم بعصبيه:خليك ساكت افضل لاني شاد روحي عليك نبيش نقتلك في ارضك
ايمن شاف لسارة وسكت
سارة بخوف:عاصم حبيبي مش زي ماتفكر رهو
عاصم:اه مالا كيف بنفكر قولي انتي ماحكيتيلي شي وكل مانسألك تقولي مانبيش نحكي ونشوفك مسيبه عيادتك ومقعمزة مع واحد شنو سارة شنو
سارة تبكي:عاصم ارجوك ماديرش هكا
عاصم بعياط:شن ندير ها كيف تبيني ندير نجي نسلم عليك ونمشي ولا نتعرف عليه
جي مروان يبي يدارك الموضوع:عاصم مش هكا الكلام بعدين تفاهمو في حوشكم
عاصم شافلها بعتب وحزن وطلع
سارة قعمزت تبكي ونادمه انها ماحكتلاش من البداية
ايمن:خلاص اسكتي انتي ديما دموعك واتيه
سارة:ايمن هدا راجلي رهو وشافني في موقف زي هدا كيف حايكون موقفي قدامه وانا مش حاكيتله شي
ايمن:بسيطه لما تحكيله الحقيقة ممكن يلومك انك ماحكيتيش من الاول بس
سارة:ياربي
ايمن:لو تبي نجي معاك
سارة:لالا تو نتفاهم معاه بروحي وتوا لازم نمشي
ايمن:تمام ديري بالك على روحك
سارة بابتسامه:حاضر وانت وطلعت روحت خشت للحوش مالقتش عاصم دارت غذا ودوشت وقعمزت تستنا فيه بعد ساعتين فتح الباب وخش ماشافلها بكل وركب للغرفة غير ونزل 
عاصم ببرود:جعان مافيش غدا
سارة:حبيبي
عاصم:جعان انا وقعمز عاطاولة الاكل
سارة:تمام وخشت للمطبخ وتحاول ماتبكيش
عاصم ياكل بدون مايحكي ويشوف لهاتفه
سارة تتفرج عليه وساكته تستنى فيه يكمل بتحكي معاه كمل غذاه وغسل ايديه ركب طول
سارة:عاصم🙁
عاصم:بنرقد تعبان اطفي الضو
سارة هنا خلاص معاش تحملت وبدت تبكي:عاصم ارجوك ماتتصرفش معاي هكا انا محتاجاتك محتاجه حضنك وامانك💜اللي مالقيته عند حد لو بتعاملني هكا نموت انا😭😭💔
عاصم حن قلبه وخداها في حضنه:بهي اسكتي خلاص اهو حضني اقعدي فيه لامتي ماتبي
خش للسرير وهيا قعدا حاضناته ويلعب بشعرها لين رقدت
عاصن في خاطره:شن قصتك ياسارة ومن اللي كنتي معاه الصبح مانبيش نضغط عليك اكثر بس بنموت لما شفتك معاه كان لقيت نقتله اوووف😤
ثاني يوم كان عطله فاقت سارة مالقتش عاصم جنبها نزلت تجري لقاته في المطبخ داير الفطور
عاصم:خيرك نازلة تجري
سارة باساته وحضناته:نحبك عاصم انا نحبك موت
عاصم:ياروح عاصم انتي قعمزي افطري هي
سارة:نركب نغسل ونجي
بعد وقت عاصم:حبيبي مش لازم نحكو
سارة:نلا نبي نقعد مرتاحه معاك نبيش نبكي
عاصم:لامتى
سارة:نحكيلك بعدين بهي
عاصم:اممم معناها نبي ضريبه😁
سارة ضحكت بدلع:وشن هيا الضريبه
عاصم:تعالي نقولك قص عليهم الجرس يرن
سارة تضحك
عاصم:عليك حظ🤦 اضحكي انتي عاجبك وناض فتح الباب
احمد ياكل في شكلاته:نبي ماما جبتلها سكلاته
عاصم:الناس تقول كيف حالك ياحمار
احمد:مش حمار ونبي ماما
عاصم:مهناش ماما انقلع هي
طلعت سارة:حمودي وقاماته
عاصم بيموت منه خش قعمز جنبهم
سارة تلعب هيا واحمد ويعطي فيها شكلاته:ختيسلمه وليدي
احمد يضحك:ختيسلمها ماما الحلوة😍
عاصم:بهي مش شفتها توا نوض روح هي
احمد:لا بنقعد مع ماما انت برا روح
عاصم طارتله:تي نوض يافرخ خير مانعجنك
احمد يبكي
سارة:حبيبي مش هكا خيرك وتسكت في احمد
عاصم:ايح علينا الواحد في حوشه ومشاركينه وطلع يدخن في الجنان
سارة تضحك واحمد يلعب بشرعها
ثاني يوم الصبح في الشركه خش انور لعاصم:صباحك انا☺️
عاصم:انت علاش محسسني انك سارة
انور:تي انا خوك مفروض تحبني اكثر منها
عاصم:بهي خش في الموضوع طول
انور:كيف
عاصم:مربيك انا رهو😏
قعمز انور:اسمع انا بنخشلك في الموضوع طول واللي بيصير يصير معاش قادر نسكت
عاصم:اها خش هي
انور:انا نحب اختك ونبي نتزوجها
عاصم ببرود ويشوف في الاوراق قدامه:طيب فيك قررت تتكلم
انور صدمة شلت جميع اطرافه😱😱:نعم انت كيف و
عاصم ضحك وناض قعمز جنبه:ياخوي راك ولدي مش خوي بس النفس قبل طلعه انا نعرفك كيف بطلعه نعرف وعندي علم من يوم خديت رقمها من هاتفي وعلاقتك بيها بس انا مطمن لانك عارفك لما تحب رح تتزوج
انور:بهي شن رايك
عاصم:والله نسألو عليك ونشوفو سمعتك ونردو عليكم
انور:انا توقعتك ترفض
عاصم:وعلاش نرفض لاني نعرف ماضيك المشرف يعني
انور:حاجه زي هكا
عاصم:تعرف لما حسيت انك متعلق بيها خفت عليك انت ياانور لانك لما تحب رح تعطي كل مشاعرك وخايف تجرحك اريج لانها صغيرة وطايشه
انور قعد يفكر:لالا ان شالله خير
عاصم:يارب المهم انت شد اعصابك معاها مانوصيكش
انور:تمام وطلع
""ولهنا يا متابعيني الحلوين سارة وعاصم الابطال رقم 1خذو نصيبهم من الفراق وتوا نشوفو انور واريج ابطال رقم2الموقف اللي بيفرقهم وهل بيكون حبهم قوي ويرجعو لبعض او بتكون نهاية حبهم""
فاتت فترة وانور ارتبطو وبيديرو خطبه بس هيا ملاحظه انه معادش مهتم ومايحكوش هلبا
عاصم وسارة في الحوش معاهم انور
عاصم:كيف خوك هكا فجأه
سارة:ايه حبيبي وهدي ورقه التحليل
عاصم:عليك قصه وبوك علاش الفترة هدي كلها لافكر فيه ولا دوره
سارة:مش عارفه عاصم بس لازم نحكيلهم
عاصم:اكيد ياقلبي وانا معاك سارة ردي بالك تظلميه طالما خوك يعني انتي من اليوم لازم تكوني جنبه
سارة:ان شالله بس
انور:مابسش هوا صح الموقف قوي شويه بس الراجل مظلوم وتوا بتعوضوه
سارة:بهي يصير خير
انور وقف بيروح:سارة تعالي شويه بنكلمك بعد اذن الاخ طبعا
عاصم:ماصح وجهك
سارة:حبيبي
عاصم:بهي بري هي طلعو يحكو قدام الحوش شافتهم اريج من روشن غرفتها نزلت تجري ومش ناوية طيب
سارة تضحك:ماشالله فكرة روعه الحق
جت اريج وقفت قدامهم وشافتلهم بقرف:شنو كملتو تمعشيق
سارة:خيرك اريج بلا برادة
اريج:لا مش برادة هدا الحق فايتني انا وواقف تضحك معاها شوره حلي في عينك بعد ضمنتي خوه
انور قدم ووقف قدامها و.... يتبع
تفاعلاتكم 😍😍❤