هوس أركي (مكتملة )

البارت الرابع

بقا جاي لجهتي بشوية وكيطلع فيااا وكيهبط ،الصرااحة المشية ديااااالو مشية  ملكية كل عفطة كيعرف كيف يعفطها  في الأرض وكيدير ليها ألف حساب وكل خطوة كتشبه الخطوة لخرة قول قاري عليهم حتا وصل لعندي شاف فيا ورجع شاف في القشقاشة لي كانت مبندرة وريا ضحك بلا ضحك كيقول في خاطرو هادي راه لواحد گعما يمحن معها راسو باش يصوبها غير يمشي يحرگها  باينة غير من الشوفة لي شاف فيها وضحك بالأستهزااء تاام ،ورجع شاف فيا

الشخص : الصراحة أنا مكنفهمش في هاد الشي ديال الميكانيك ولاكن مني بغيتي المساعدة غادي نساعدك ، غادي نعيط ليك على الميكانيكي ديال العائلة باش يصوبها ليك

شفت فيه وطلعتو من رجليه حتا لراسو وبديت كنعوج في فمي حيت معرفت منقول وخا السيارة مصيبة حاولت مبينيش بلي غير كدبت عليه وقلت سيارة خاصرة  هاد الشي علاش قلت ليه

أنا : (بالأستسلام )صافي وخا لي بغيتي وشكرااا حيت غاادي تسااعدني

جبد التيليفون لي حتا هوا كان أخر موديل بحال مولاه  من جيب ديال السروال بكل شياكة وأناقة  ودوز لخط و مشا بعد مني شي شوية وبدا كيهدر معا شي حد يمكن الميكانيكي لي قال ليا ،مني كمل رجع لعندي لبلاصة لي بقيت واقفة فيها بحال الثيمتال  كنفكر في شي حل نطيح فيه هاد خينا قبل ميعيق بيا ونصدق في خبر كان  ويذرب ليا هاد تمارة كاملة قي زيرو ،حتا وقف عليا تاني وقال

الشخص : ها هوا غادي يجي لعندك الميكانيكي ديالنا  تقريبا شي قسم ويكون عندك يالله بسلامة خاصني نمشي دبا (شاف في الساعة ديال أيدو وقال )عندي الأجتماع مهم يالله  خليتك على خير

غير قالها وتم غادي بلا مقديمات بلا مؤخرات حيت كان كيبان زربان ومعندوش ليا الوقت كيفما شفتو  وأنا نقول ليه بزربة باش نتير الأنتباه ديالو ونخليه معايا كتر لعلا وعسا يطيح ليا شي بلان في راسي

أنا : ولاكن غادي تمشي وتخليني غير بحدي  ،الصرااحة أنا كنخاف في هاد لخلا وسمح لياا الى برزطتط

الشخص :( بعدم فهم )كيفاااااش ؟؟ولاكن مناش غادي تخافي ؟

شوية سكت وبدا كيفكر ورجع قال ليا

الشخص :  (بتساؤل )ياك قبل منجي كنتي غير بحدك ولا كدبت ، بلاتي بلاتي ولاكن نتي أش جيتي كديري هنا ؟؟  يعني أش كديري غير بحدك في هاد لخلا لي خايفة منو ؟؟

الصراحة صدمني ولد لكلب معرفتش باش غادي نجاوبو فمي تلقوى عليا وليت غير كندور في عينيا وصط راسي

كان كيتصحاب ليا غادي نلعب عليه هاد الساعة مطيور معا راسو وفايت التطويرة لهيه تلفني وعرف كيف تلفني وليت كنقلب ليه على جواب مقنع باش نخرج راسي ولاكن حتا كدبا مطاحت عليا قول گاع تحرميات وتشيطين لي كان فيا تبخر في دقة ،

وااااااااااااالو قول شي فكرة مقنعة نقولها ليه دبا  ملقيت  هاد الشي علاش حاولت نخرج من الدور ديال الكدوب ونمشي لدور ديال لتمتيل لعلا وعسا ينفعني