هوس أركي (مكتملة )

البارت 17

غير ركبنا وضيمرا داك الوحش السيارة ورجع الصمت هوا سيد المكان أنا ذورت وجهي لجاج وبقيت كنشوف في الطريق لي كانت بعيدة على لمدينة  تقريبا شي ساعة و15 لدقيقة

جلست وحسنت في بلاصتي وبقيت  متجاهلة نشوف لقدام باش منلاقيش عينيا معا عينيه داك الوحش حيت كيوتروني كتر من أنا موترة دبا

أما دوك الخوت بانو ليا  منساجمين معا بعضياتهم لي يشوفهم ميقولش غير الصباح نودو قربالة حتا الدار كانت غادي تريب فوق راسنا ،بقيت مرة مرة كنتصنت ليهم وهوما كيهدرو على شي تخربيق وعلى وض الخدمة والمنقصات وعلى وض لبورصة واش طالعة ولا هابطة  وعلى أسهم ديال الشريكات وعلى الأقتصاد الأسود والأقتصاد الخام  ،جاني راسي غير بحالي كنتفرج في داك البرنامج لي كيجي من بعد الأخبار ديال المسائية ،الصراحة شي فهمتو وشي مفهمت فيه والو وحسن ليا منفهمش حيت مغادين ينفعوني بوالو

باش نقتل الملال جريت صاكي لعندي جبدت منو الهاتف ديالي ودخلت الوتساب وبقيت كنشوف في الميسجات لقدام ديالي معا خويا  يوسف فاش كان مزال كيقرى مزال حتا لدبا محتافضة بيهم ممسحتهومش ومغداش نمسحهم باتاتا ،الصراحة  نساوني فيهم بقيت كنقرى فيهم كانو كلهم  غير ميسجات على أيام الماضي وعلى الزبايل ديالنا وعلى لفعايل لي كنا كنديرو بقيت كنقرى  ومرة مرة كنبدا نتبسم غير بحدي وگعما شفت دوك العينين لي غادين يكلوني من لمريا  وأنا في دار غفلون گعما في هاد العلام

المهم معرفتش شحال ديال الوقت داز عليا وحنا راكبين ،هزيت راسي بان ليا وصلنا لمدينة لي كانت جميع المنازل ديالها عالية ومصنوعين من  الجاج وكانت كلها كتشعل بالأضواء بجميع الألوان وفيها شاشات تلفاز كبيرة عامرين بالأشهارات ،الصراحة هاد لمدينة كتحسك بلي نتا في عالم أخر ماشي في بريطاانياا  ،كان الفرق بين مدينتهم ومدينتا فرق كبير بزاااااف بقيت مخرجة عينا وكنشوف في الطرقان وفي النضام لي ماشين عليه هاد ليهود بالحق بان ليا حنا لي ليهوووود واااااه كولشي مقااااد وكلشي في بلاصتو حتا حاجة ممعوجة كلشي مقاد ومتول

وقفو حدا واحد لمبنى كبير بزااااف وفخم وأنيق هبط الوحش هوا لول وهوا كيتبونبا على البشار ،كيشوف غير لفوق غير وقف ورسم على وجهو البروود كيف ديما خشا أيديه في الجيب ديال سروال وبدا يعطي في الأومر ،أما هوما  غير شافوه كلشي بدا جاي لعندو شي كيرحب بيه وشي كياخد من عندو الصاروت باش يبلاصي ليه السيارة في بلاصتها وشي غادي مستقبلو لداخل قول مالك وغادي ماشي هوا

أما راجلي حبيبي هبط غير بشوية عليه وبكل الأحترام جا لعندي حل عليا الباب وهوا واتق من نفسو يعني بدون تكبر ولا عجرفة هاد الشي لي كيعجبني فيه وهاد الشي علاش وليت كنكن ليه المشاعر ديال الحب يمكن
ماط ليا أيدو بكل رقة وتواضع وهبطني وهوا كيبتسم ليا في وجهي وفرحان حيت كاين معايا
الصراحة الضحكة عندو كتخاليك دووووووب دوووووب بحال الزبدة ،سنينات مصتفين ومقادين في بلاصتهن وبيضين وعينين مشفرين ومخلودين شعر كحل وكتيف  ومصفف مزيان أيديه الرطبين ودافين وكتافو لعراذ ومفورمين عاد الملابس لي كان. لابس كانو  كيبانوه أنيق  بزاف بقيت كنشوف فيه وصهيت على راسي حتا سمعتو قال ليا