قصص دينيه وعبره (1)

حبيبنا محمد

- يصرخ سيدنا أبو هريره في المسجد.. فالناس يفتكروا إنه عنده صرع, وهما ميعرفوش إن عِزة نفسه مبتخلهوش يقول إنه بيصرخ من الجوع, ومحدش كان بيحس بيه ويأكله هو وأمه.. غير واحد بس.. النبي ﷺ
- يكون الصحابه معزومين عند صحابي منهم ويجي العزومه شخص فقير محدش دعاه.. جسمه فيه جُدري وهدومه مرقعة.. فيخافوا يقربوا منه أحسن يعديهم.. مفيش غير واحد إتزحزح وقعده جنبه وأكل معاه في نفس الطبق، وخلاه يروَّح مجبور الخاطر.. كان النبي ﷺ!.
- مكانش حد يطيق يخلف بنت.. وبيحسوا إن خلفتهم عار.. جالهم النبي وقال: إن اللي يخلف 3 بنات ويعلمهم ويجوزهم ويرحمهم يدخل الجنه, واحد من الناس قاله: انا عندي 2 بس! رد النبي: ابو البنتين يدخل الجنه, التالت رد وهو زعلان: انا معنديش غير بنت واحده!.. يبتسم النبي ويقول: ابو البنت من أهل الجنه, ويغير مفاهيم الناس عن خلفة البنت ويخليهم يتنافسوا ببناتهم اللي بالنسبالهم بقت أسهل وأقرب سكة لدخول الجنه!.
- يخرج مع اصحابه في رحله.. يجوعوا.. منهم اللي قال:أنا هدبح الجدي، والتاني: أنا هسلخه, والتالت: أنا هطبخه, ويرد النبي: أنا هجمع الحطب اللي هتولعوا بيه النار!.. لا مينفعش يارسول الله إحنا هنسد.. يرفض النبي ويقول: ولكني أكره أن أتميز عليكم، فإن الله يكره من عبده أن يراه متميزا بين أصحابه!.
- من حنانه.. زوجته صفية قصيره, نيموا الجمل علشان تطلع عليه, ولكن مش عارفه تطوله.. يقعد النبي علي الأرض ويقولها تقف علي رجله, وفعلاً وقفت عليها وركبت الجمل بسهولة.
- عاوزين يوسعوا المسجد.. الناس كترت, والمسجد بقي ضيق عليهم, بس وسط المسجد كان في جزع نخله النبي كان بيسند عليه وهو بيخطب.. ولكن علشان عملية التوسعة تتم كان لازم الجزع يتقطع!.. يحس النبي إن الجزع بيتحرك من الزعل.. بالبلدي بيعيط.. صعبان عليه إنه مش هسيند عليه تاني.. يطبطب النبي علي الجزع, ويقوله: إسكن "متعيطش" أنت رفيقي في الجنه!.
-إصطادوا فرخه.. لقي النبي الكتاكيت بيصوصوا من الزعل علي امهم.. يأمر النبي اصحابه يرجعوا الفرخه لأولادها وميوجعوش قلوبهم عليها.
- يموت طير كان بيونس طفل يتيم.. يروح النبي للطفل ويعزيه في الطير, ويصلي ركعتين في بيت الطفل.. ويدعي ربنا يصبر قلبه علي فراق طيره.
- يتجرح في خده, ويتكسر أسنانه, والدم بينزل منه زي الحنفية في غزوة أُحد.. يرفع إيده للسماء.. الصحابه يبرقوا ويقولوا النبي هيدعي علي الكفار!.. يخيب النبي ظنونهم ويدعي للي جرحوه بالهدايه، ويقول: اللهم إهدي قومي فإنهم لا يعلمون.. "إعذرهم علي جهلهم وإرشدهم للحق يارب" .
أقول إيه ولا إيه.. عاوزين كتب وملفات الدنيا كلها تتفرغ.. وياريت وقتها تكفي لما نملاها بجزء من صفاتك وأخلاقك ومواقفك يا رسول الله.. مقصرين في حقك وتطبيق سُنتك.. بس إنت حبيبنا وشفيعنا.. وإنت اللي ربنا بعتلك مع سيدنا جبريل وقالك: ولسوف يعطيك ربك فترضي, وعارفين إنك مش هترضي بإن واحد مننا يفضل في النار, وهتشفعلنا وتطلب السماح, وهتعرفنا من صلاتنا عليك لأنك قولت: أنا في روضتي حي, أسمع كل من يصلي عليّ.
صلوات ربي وسلامه عليك ياسيدي وياحبيبي يارسول الله❤️