نهوه عباس(عشقي نهوتي)

ج٢-البارت السابع

اماني-ياسر
نهوه عباس(عشقي نهوتي)
مساء القداح ياحلوين 💐

اغلب البنات گالوا شدعوها غزل بسرعة انطت مجال لمنير
وبسرعة تفاعلت ويا ومن هالحچي..واني وياكم تصرفها غلط
بعيداً عن القصة وخبال غزل وعباس ..
ككاتبة واريد اوصل رسالة من خلال قصصي..
هنا رسالة من هواي رسائل..وهيه الأجبار والغصب والتحكم وتقليل
من قدر المرأة تحت مسمى(العادات والتقاليد) يولد حاله مثل حالة
غزل، الكتم بداخلها واجبارها على اشياء غير مقتنعة بيها راح
يجبرها بعدين تتصرف بهالطريقة مثل منگول ماشايف وشاف
لا راح تعرف تصرف ولا توزن افعالها ولا تميز بين الخطاء
والصح..ياريت نبطل نخاف من كلام الناس اكثر من كلام الله
وبدال ما نمشي ورا العادت  نمشي حسب قوانين وشرع
رب العالمين...بس الحچي ضايع مع الاسف 💔

.....
هآ گلبي منهم ما تبت
مو كآفي كسرو خآطرك
عايش تِحب ألـ ماوفـو
متگلي ياهو ألجابرك ..
.....

عبرتهن وفتت صارت گدامي عمتي وياها بنية شابه
لابسة عباية خليجيه ومخلية الشال على راسها شافتني
وگفت ..

البنية غريبة اول مرة اشوفها..حسيت عقلي عرف منو هيه
بس كرامتي ما سمحتلي اعترف بهذا الشي تجاهلتها ومشيت
سلمت على عمتي دخلت امي وفرح سلمن وگعدن ظلت هيه
واگفه تباوعلي سويت نفسي ماشفتها وگعدت ..

گالت عمتي
-شلونچ ليش هيچ ضعفانه
الحمدلله عمه وانتي،اي شسوي مسويه دايت علمود الكلية
-ياا تسودنتي شمالچ انتي ضعيفة من الله

گالت امي
-خيه ام عباس ماعرفتينا على الخطار

-اي خيه ذول خطار عباس جايين من بغداد
ام لينا وابوهاا وهاي لينا..

تحچي وتباوعلي واني ماگدرت ادير عيني عليهم ..
گامت المرة وسلمت على امي والرجال سلم وطلع برا گالت البنية

شلونچ خالة
باوعتلها امي صفح
-هلا شلونچ انتي
الحمدلله بخير رجعت باوعتلي غزل شلونچ

رفعت حاجبي وباوعت بعيونها تمام منين تعرفيني؟!

ابتسمت
لينا-مسولفيلي عنچ هواي، اكيد ذولة فضل وعشق مو؟!

اي
لينا-فدوه يخبلون الله يحفظهم الچ ولأبوهم
تسلمين

فرح تأشرلي بحواجبها عليها عود هاي هيه حبيبتة واني
اباوعلها وبدي اگوم املخها لفرح خلتني بموقف غبي
اشرتلها صبريلي..

الجو صار يخنگ وناس مستغربه لناس ردت اگلها لأمي يلة نرجع
مااحس اله گامت البنيه من عمتي وگعدت يمي..

درت وجهي منهااا
گالت..
لينا-مستحيل افوت هالفرصة وما اتعرف عليچ
حاچيتها بنبره جافه..وشنو السبب

لينا-هواي سامعه عنچ گالولي حلوة بس متوقعت هيچ

باوعتلهاا بنفاذ صبر ياربي شسويلها؟؟
اضربها واعوج وجها هاي شبيها