مشاعر💔 ( روايات ليبية )

حلقة 8🔥

رواية #مشاعر 🌷
( خيال ممزوج بلواقع )
للكاتبة : #حنو
الرواية بلهجة الليبية
حلقة  8🔥
.
.
عمته..والله مارتحتلها اني لكن يالله تو يبانلها
سكتت امل وماحبتش ادير مشاكل وفاتتها
طلعت الام من المطبخ اسمها سميرة
سميرة..يا امولة اني راكبة لمرت خوك وجاية بنعطيها شوية حجات
أمل..باهي ماما اركبي
ركبت سميرة لي وسن وطقت عليها الباب وخشتلها
وسن ابتسمت..اهلين عميمة واخيرا زرتي حوش ولدك😊
سميرة..مش حوش ولدي بس هدا حويشك حتى انتِ يا غالية
وسن..تسلمي يارب
سميرة..هدم حلويات بكري جابتهم أمل وقسمتهم وجبتلك منهم وحتى أسيد غاليين عليه الحجات هدي
وسن..ليش متعبة روحك ياعميمة عادي ره عندي والله
سميرة..لا تعب ولا شي خاطري نهدرز عليك بروحنا وجبتلك حويجة معاي😊
وسن..تفضلي قعمزي هي خلي نحطهم في مطبخ
قعمزت سميرة وقعدت تتفقد في كل تركينة بعيونها وحست براحة ونظافة مرت ولدها
خشت وسن كانت موتية سفرة فيها كيسان وشكلاتة باش وقت يجيها حد تصب عصير طول وتحطه صبت العصير وطلعت من مطبخ وهي مبتسمة وشعرها الي يطاير مع مشيتها السريعة وابتسامتها الي مبينة غمازاتها وحطت العصير والشكلاتة..تفضلي ياعميمة هي😊
سميرة..سلمها يا وخيتي علاش ماه شاربين لوطة
وسن..مايجيش عاد انت اول مرة تجي ولازم منه
سميرة..كبر مقدارك وعلي من شانك يابنتي
وسن..سلمك
سميرة..اي كيف حال وخياتك واميمتك
وسن..كويسين الحمدلله تنشد عليك الصحة
سميرة..مرات نحس فيك متربية عند حناك
وسن..ههههههه علاش
سميرة..كلامك كلام بنية عاقلة و زي ناس زمان
وسن..مش شرط بس حناي ديما عندها احني بحكم انها جنبنا ومكبدين ع حناي اكتر من امي
سميرة..لاحظتك ديما تدوي عليها ربي يحفظها يابنيتي
وسن..امين يارب ويحفظك لينا حسيته أسيد متعلق بيك هلبا حتى مرات في الحوش يغلط وينادي فيك ههههههههه
سميرة شربت من العصير وحطاته وضحكت..بالله عليك 😂
وسن..والله😂😂
سميرة..عطيهاله هالولد هدا 😂😂
وسن..ايه بنسئلك عميمة علاش عمت أسيد تكرهني يعني شفتي كلامها مبكري كيف
سميرة تنهدت..اااااه يابنيتي هدي كانت دايرتلي زي مادايرتلك توا بس اني بحكم ان عاصية شوية ماقدرتنيش وقدرتها وتخاف مني شوي المهم بالمختصر تبي بنتها لي أسيد بس اني مابيتش وهيا أغلب الوقت عندنا وحتى أسيد يحبها عمته الحق مش مقصرة اصلا مع صغاري لكن كانت طامعة في أسيد ياخد بنتها
وسن..اهااا هدي ماريا الي لوطة؟
سميرة..لالا اختها ماجتش
وسن..اممم به وعلاش رفضتي!؟
سميرة..ماكانتش عاجبتني بكل زي طبعها زي أسلوبها المهم ماتمشيش معاي ولا مع ولدي نتمناله وحدة تفهمه وهاادية زيه و حليوة زيه واهو الحمدلله خداك انتِ وجيتي هويدية وقنوشة و صغيرة نربيك اني ووالله زي اميمتك اني ماتخافيش بكل ويوم تزعلي منه لوطة هوا حوش اهلك يابنيتي ونعرفه أسيد مش عصبي يعني مش حيزعلك لكن اتضحكو فيا مرات نسمع في عراكم تقول صغيرين كيف تقلدو في بعض😂نقعد نضحك اني وامل والله دايرين بيكم جو
وسن ضحكت..كيف تسمعو فينا😂😂حي حي
سميرة..انتم تخلو في رواشنكم مفتوحة كله ينسمع يابنيتي ره لكن والله اضحكو حتى عراكم مش زي ناس
وسن ابتمست للحظة وقعدت سارحة في الايام االي معاها أسيد كيف صايرلها وكيف تغيرت حياتها
سميرة..لهدرجة تحبيه
وسن فاقت من سرحانها..كيف!؟
سميرة..عيونك تلمع لمع وقت نحكو عليه
وسن تحشمت..اااه هههه عادي الحق
سميرة..خيرك تحشمتي راجلك حتى هوا واكيد تحبيه يعني
وسن بضحكة صفراء..هههههه ايه بس مش زي حبك ليه
سميرة..الام بروحها والزوجة بروحها
وسن..اي والله😊
وقعدو يهدرزو ويضحكو ووسن حبت سميرة هلبا ولقت فيها الحنية الي ادور فيها
شوية وخش عليهم أسيد
أسيد من الباب..وسسن وينك ياباردة
وسن ضحكت هيا وسميرة
أسيد..اووووووه الميمة اهنني
سميرة ضحكت..ايه كيف قلت خلي انوض ننزل
أسيد..تي لا عاد جيت اني بتنزلي انتِ مايصيرش
وسن..خليك عميمة
سميرة..لا والله خلاص ماعاد نقدر نقعد وعمتك بروحها خليتها يا أسيد تو ترفع خشمها وتوصلها لبوك
وسن..عادي انتِ جاية تهدرزي في حوش ولدك تمشي تملح🙂
أسيد فنص فيها..ياسر عمتي هدي ره
وسن..يااي به هاه سكتت
سميرة..وخيرك انت مش راضي فيها شي عمتك
أسيد..امالا شنو عميمتي
سميرة تفكر وبعدين شافتله..من في لوطة
أسيد..باقي البنات جو سلمت عليهم وركبت
سميرة..واني نقول علاش عميمتي وجو هوا ترا يا وسن جيبيلي ميا هدا بيشيط ريقي
وسن..اوك
مشت وسن للمطبخ
سميرة..تعرف يا أسيد نلقاك لوطة نقصلك رجليك والا نلقاك تتكلم مع هديكا الدراه نهارك الي ادور فيه اهو قتلك شد حوشك وشد مرتك وألها بيها وانسالي المطرشقة هديكا ناقصني غير هيا اني
أسيد..باهي يام شن درت اني
سميرة..اني قتلك بس وحذرتك
جت وسن وجابت الميا
شربت سميرة وناضت..هي توا بالسلامة بنيتي
وسن..سلمك عميمة عاوديها عاد
سميرة..ان شاءالله
نزلت سميرة وسكرت وسن وراها الباب بعد ما اتأكدت انها وصلت لوطة و خشت
وسن..يا دراه انت شن تبي عشي والا نخش ندمدر
أسيد..يا نفاخة اطلعي من راسي مانبي شي
وسن..احسن ملا فكة والله 😒
خشت وسن للدار وهي تضحك عليه
خدت فونها واتصلت بي ثمارة
ثمارة..ياهلااا
وسن..هلاااا بيك يالحب
ثمارة..شن جو
وسن..باهية الحمدلله شن اخبارك
ثمارة..كويسة الحمدلله شن الحمامة زاهية عندك
وسن..ههههههه عادي جوي مليح هكي
ثمارة..شكله صار شي بينك وبين أسيد
وسن..تي لااا لااا هدا ماناقص لين نربيه قبل بعدين يصير
ثمارة..يعني بديتي تتقبلي فيه
وسن..نوعاً ما مغيرلي جوي زي الفار والقطوس😂
ثمارة..😂😂طيح سعدكم وخلاص تقولش عليكم متزوجين
وسن..عاجبني جو هكي تعرفي ناقر ونقير تقول ع روس بعض وخلاص
ثمارة..مهبلة😂ايه شن دايرة
وسن..شي كيف كانت عندنا عزوزتي تهدرز
ثمارة..شن جوها كويسة؟
وسن..عسولة الحق تهبل
ثمارة..باهي مليح الحمدلله
وسن..وانتِ شن جو سليم والحمل
ثمارة..اهو قريب الحمدلله وسليم كل يوم نافختله راسه نوض خاطري في هدي نوض نبي هدي وخلاص😂
سليم..الحمدلله الي عرفتي روحك نافخة راسي
ثمارة..ضم فمك وارقد😂
سليم لوح عليها المخدة..نقصيه لسانك
ثمارة..وووك مبردك هاني مخليتهالك وطالعة
طلعت ثمارة من دار وهي تضحك..ايوا
وسن..مهبلة صار احني تي انتم احرف
ثمارة..😂😂
وسن شافت أسيد خاش للدار..هي توتو توا بالسلامة
ثمارة..اوك تمام سلامات😘
سكرت منها وولت لقت سليم راقد خشت جنبه وخداها طول في حضنه ورقدو❤
.
.
عندي انـي🙈
قعدت نشوف لفوني..غريبة ماتصلش لتوا
حناي..من
اني..اااه منو
حناي..ماتصلش مل يناري تقول عاطيينه حيط منغير قلب ومشاعر🙄
اني..ووووه ياحناي خيرك
حناي..حني ع الولد وحبيه وخليه يحبك
اني..وشن تبيني ندير يعني خلي لين نوصله بعدين ساهل
حناي..ماني عارفة كيف بتفتحي حوش اني
اني..ثانكس ع رفع المعنويات😌
حناي..ولو هدا واجبي
اني..قوليلي حناي منين متعلمة هدا كله
حناي..مش جاهلة اني😊
اني..لا حشاك وحق ربي تعرفي حجات مانعرفهم اني
حناي..😎بش تعرفي بس كان الي نقولهولك اديريه راك توا منظمة امورك
اني..جو انتِ حناي 😂😂
خشيت بنتكى اذكرته وقعدت نفكر فيه لعند رقدت
روح هيثم..يما وينك
حناي..هاني مقعمزة ياوليدي
هيثم..نايضة
حناي..مايرتاحلي بال لين نشوفك خاش وقتها نقدر نغمض عيني
هيثم باس راسها..ربي يخليك لينا ويدومك فوق روسنا❤شنو وين فدوة!
حناي..خشت رقدت
هيثم..وميس؟
حناي..حتى هيا
هيثم..اها باهي شنو امورها مع محمد ماحكتلك شي
حناي..بنت خوك هدي دماغ مسكر قتلي مانيش رادة عليه
هيثم..علاش
حناي..تسكر في راسها قتلي ماخاطريش
هيثم..بيني وبينك احسن وهدا صح خلي تو توصله وبعدها تتعود عليه اما هكي بتبدا المشاكل وهما زوز اعند من بعض لكن يمشو مع بعض
حناي..ديرو شغلكم 😊
هيثم..اااخ بنرقد اني
حناي..وين كنت
هيثم..خدمة يام وين يعني
حناي..ربي يفتحها قدامك سلم وليدي
هيثم..امين يارب
خش هيثم دوش ورقد 💤
.
.
.
تاني يوم عند ميسم
ناضت صبح دوشت وبدلت وطلعت للمطبخ دارت فطورها هيا وصغارها ونوضتهم فطرتهم
خالد..صباح خير خيركم مانوضتونيش
ميسم شافتله وولت شافت لبنتها وتوكل فيها..ماليناش علاقة😏دا كان زمان
خالد..استغفرالله صبح
مشي خالد للحمام دوش وبدل وطلع لي ميسم..ماتبو شي للحوش ؟
ميسم..لا
طلع خالد وقربع وراه الباب
ميسم..كان خديته معاك الباب خير😏دراه يحساب روحه بتقربيع وتكشيخ بنتأسف ونجيه هدا كان زمان يابابا
طلعت ميسم صغارها ودوشتلهم الـ3 وبدلتلهم وخلتهم يلعبو في دارهم وطلعت وقعمزت في وسط الحوش وهي تتفرج وتفكر كيف ادير وكيف تبعد عليها المراء الي جت عليها وكيف تخلي خالد يندم ع كل يوم فكر يضربها فيه وقعدت ميسم تخطط وتفكر
عند خالد طلع مشي لخدمته وبعدها روح لحوش بوه
امه..جيت يامغضوب
خالد..يما كان بتحكي في نفس الموضوع خليني نولي
امه..قلباتك قلبة شخشير هاللي ماتستحي
خالد حط يديه ع بعضهم..والمطلوب!!
امه..تاخد منها صغار والي بتجيبه واطلقها وتلوحها لي اماليها اني مستحيل نستقبلها اهني ورضي مرتك التانية وروح بيها بلا لعب مفرخ
ناض خالد..كل اللي قلتيه مرفوض والتانية بتطلق وورقتها خلال الايام هدي توصلها وغير هكي معش عندي وااه ميسم مش ميتة بش تجيك هيا واني سكنتها برا في شقة اجرتهالها وقريبا بنشريها والحوش هدا خلي واحد من ولادك يشريه مني باش نشريلي مكان برا من هني وخليك انت وبناتك الي يمحشو فيك وولادك عملتي وغلطي الاولى معش نعاودها وهدا هوا كلامي😊
امه..امالا معاد خاشلي حوش و حوشك اني نشريه منك بالثمن الي تبيه
خالد..تم معناها خليني نفكر ايام كم نبيه ونديرلك تلفون😏
وطلع خالد وهو مضايق ومتعفلق مشي للبححر وقعمز بروحه وهو يفكر في حياته كيف دار وكيف قلبها بيده
.
.
.
عند محمد💕
ناض بكري ومشي جاب خضرة وحجات لحوشهم ع خاطر بيجو لسارة كان فرحان ان صاحبه بيناسبه وبيولي راجل اخته💙
محمد..يام كل شي تمام!!
امه..سلم وليدي ياربي ان شاءالله نردوهولك في فرحك عن قريب يارب
محمد..واجبي هدا يمي
سارة ابتسمت..ماشاءالله جبت كل شي ربي يحفظك لينا💗
محمد..ويحفظك سرو موافقة انتِ؟
سارة اتحشمت وسكتت
امه..موافقة ياوليدي
محمد..يام نسئل فيها هيا راهو يا سرو مش لأنة صاحبي خلاص بتوافقي اني الحق من زيني باش هيثم يولي راجل اختي وفرحاااان بس نفس الوقت رأي الاول والاخيرر ليك انتِ لو ماتبيش مش حنزعل وعادي جدااا
سارة..لالا موافقة اني
محمد قرب وباس راسها..ربي يخليك وخيتي💜وديما رافعة راسنا ياااارب💓
سارة ابتسمت وحضناته..دام انت خوي معناها راسي مرفوع💙
ع خشة بوهم وهو جايب الشكلاطة والحلويات..كيف صار حضن منغيري
وشاف لمرته لقي دموعها ع خدها ومبتسمة
حولت سارة وشافت لبوها وحضناته..بنيتي
سارة..بابا ربي يخليك ليا
سالم..ويحفظكم ليا وديما نشوفكم زاهيين وفرحانين هكي
سارة..وراسك حي يا وبيي❣
امها..هيا ياسر دراما بكيتوني 😂 هيا سرورتي نوتو الحجات باش بعدين نرتاحو ونبدلو
سارة وقفت جنب بوها وخوها..حاضر ماما💚
طلع محمد واما بوها خش رقد
سارة..ماما لوطة بنستقبلوهم وله
امها..ايه يابنتي لوطة امالا شنو من امتى نستقبلو في ضيوف في حياشنا تعرفي حناك ديما الفرح والحزن تبيه عندها باش نقعدو ديما ملتمين💕
سارة ابتسمت..تعرفي يا ماما اكتر شي نحبه في عيلتنا لمتنا
امها ابتسمت..ربي يحفظنا ويخلينا ديما ملتمين ع الخير هي نزلي الحجات توا
سارة..به
خدت سارة الحجات وستفتهم في الاصانصير ونزلت بيهم لحوش حناها
هما طبعا عمارة وكلهم ساكنين مع بعضهم وبما ان امهم مراء كبيرة وماتقدرش تركب وتنزل كانو دايرين الاصانصير وكانو كل شقتين مقابلين بعضهم وفي بينهم مسافة وكل شقة مختلفة ع تانية مش نفس تفصيلة
.
.
وصلت سارة لوطة وجو بنات عمها وحدة شدت الاصانصير وتانية اطلع في الحجات منه
سارة..اووف متوترة
تهاني..ههههه عادي تو وقت تخشي تستريحي شوية وتاخدي ع جو واصلا مش حتعطلي بينهم دقايق وتطلعي وبعدين هما بيشوفوفك بس والا!
سارة..لالا هما شايفيني ومن قبل يبوني يبو يتمو فيا ويعطو فيا كلمة وبيحددو موعد الخطوبة طول يعني مش بيشوفوني وبس!
هبة..كيف هكي مش بتشوفيه مقابلة شرعية وتتفقو!؟
سارة..اني ماعنديش شروط يعني قرايتي ومكملتها وخدمة تعرفوني تنبالة مانبيهاش🤣 وهوا قالو بيقولو شروطه اليوم ولو وافقنا بيكملو في الموضوع فهمتي لانة الواضح ان بيديرو العرس مع محمد و ميس
تهاني..ايه فهمت عليك هي بري توا اركبي وشوية ونجيك نديرلك شعرك
سارة..نجيهم ياربي بنيات عمي😍
هبة ضحكت..هبلة والله
وركبت سارة وخدوهم بنات عمها يستفو فيهم في المطبخ
سارة..ماما اني خاشة ندوش ونبدل ساعة 3
امها..ايه بنيتي بري اهي اختك كلمتني جاية في طريق
سارة..قوليلها مافيش داعي تركب تقعد لوطة مع البنات باش تستقبل معاهم
امها..ايه قتلها
سارة..تهاني راكبة افتحيلها ماما باهي باش تجبدلي شعري
امها..بااهي غير بري بس
.
.
.
عندنا احني
حناي..باهي لبستي بنيتي
اني..باهية ياحنينة ماشاءالله عليك
كانت لابسة ردي وبلوزة وتسمالها وريحتها تفحفح ريحة العزايز هديكا😍ولوبان في فمها ومكحلة عيونها وتلبس في فراشيتها
اني..ياحنينة تو كان تلبسي عباية خير من تكركير هدا
حناي..بري بالكي الا هدي مانستغنى عليها😒
اني..هههههههه باه هاه سكتت
خش هيثم..هي شنو واتيين
حناي..اني واتية كلا مرت خوك مانندري
اني..توا نمشي نركب نشوفها ياحناي
مرت عمي..السلام عليكم واتيين؟
اني..اهي ياحناي جت وعليكم السلام ايه حناي واتية كيف بنركبلك
مرت عمي..هي امالا
ومشت حناي هيا ومرت عمي وطلعو ركبو سيارة ومشو لي سارة وصلو ونزلو استقبلوهم احسن استقبال💚 خشو وقعمزو وكانت الجدة منسجمة مع حناي هلبا وعجبها الجو اما مرت عمي كانت تهدرز مع ام محمد مع خشة اخت سارة هنادي
هنادي..انستونا😊
مرت عمي..الله يآنسك😍
وفرقت عليهم هنادي العصير وشكلاطة وقعمزت تهدرز معاهم
حناي..شنو وين العروسة😅يا فاطمة
هنادي سبقت امها وقالت..هي تو انادي عليها😊
ناضت هنادي وقامت سفرة العصير وخشت للمطبخ
سارة..متوتتترة
تهاني تواسيلها في شعرها وتشوفلها بكل حب..والله ماتخافي هي شوية وتخشي بالسفرة واقري المعوذات حيمشي التوتر❤
هنادي..سررو هيا خشي يسألو عليك
سرور..ربي معاك خشي للجبهة 😂😂
سلافة..ضمي فمكي احمارة زيدي رعشيها
سارة..تو نوريكم غير نخش ونطلع بس
قامت سارة سفرة القهوة والحلويات وخشت بيها حطتها وسلمت عليهم وتهاني فرقت عليهم القهوة والحلويات وطلعت
سارة مقعمزة جنب امها ومتحشمة بخدودها المتوردة وشعرها الي جاي ع وجهها💗
حناي..كيف حالك يا سريوة
سارة شافتلها..الحمدلله😊
مرت عمي..ماشاءالله تبارك الرحمن عليها😍
فاطمة ابتسمت..سلمك😄
الجدة..متحشمة ههههههه
سارة زادو خدودها احمرو و ركبتها حرارة
قعدو يهدرزو عليها ويسألو فيها وهي تجاوب كلمة وقص
حناي..يابنيتي طبعا هيثم متحشم وقال شايفها مع محمد قبل ومش ضروري مقابلة وحكي لي سوسن شروطه وقال كان وافقت خلاص تمو
سارة ابتسمت وسكتت
مرت عمي سوسن..قال كان تبي تخدم عادي بس بشرط لو تبي تخدم بتلبس خمار اما لو هي ماتبيش تخدم ف مش ضروري الخمار و قال سواقة لا وغير هكي ماعنداش شروط😊
سارة شبحت لأمها وابتسمتلها وناضت طول وهي متحشمة(كانت اشارة بين سارة وامها انها لو ابتسمت معناها موافقة)
فاطمة ضحكت..متحشمة هالبنت مهبلتني بحشمها هلبا المهم هيا موافقة واصلا سارة ماتبيش تخدم قداش ليها متخرجة وقالها بوها نشوفلك تعيين ولكن هيا رفضت وسواقة حتى احني ماعندناش من يسوق يعني موافقين
حناي..هدي الساعة المباركة❤
سوسن..باه هيا سارة ماعندهاش شروط؟
فاطمة..اللي نبوه مدايرينه وغيره ماعندنا مانشرطو
سوسن ابتسمت..يبقا على بركة الله😊
وقعدو يتفقو ع موعد الخطوبة والفضان
.
.
منـى مرت بـوي..اسمعي نشوف فيها اني توا من البلاكونة بروحها في جنان وزي ماقلتي مافي حد ابعتي ولدك توا😌
فدوة..اني مهناش تو نتصل بيه
منى..تم
سكرو من بعض واتصلت فدوة بي ولدها داني
فدوة..جي وقتك توا البنت بين يديك ودير اللي تبيه واهرب😏واخيرا حننتقمو
داني..مية مية😈
.
.
عندي اني مقعمزة بروحي في الحوش وعمتي كانت طالعة فجأة خش ولدها داني
نضت خشيت للمطبخ وبعدها طلعت من المطبخ لوراء الحوش وقعمزت ع الكرسي وفاتحة فوني ونشوف في المكالمات الفائتة نتع محمد الي من يومها معاش عاود اتصل قعدت نفكر فيه ونقول نتصل والا لا!
شوية ولقيت داني مقعمز في الكرسي الي جنبي وباين انه يدحنس وفي راسه موضوع
اني..انت خيرك لاحقني من مكان لتاني !!!
داني..حوش جدي نمشي فيه وين مانبي شن ليك علاقة بيا
اني..باه ماقتلكش مادير شي لكن ماتقعدش جرتي وين مانمشي😑
واني نلعب بتلفون ونشوفله ونتعارك معاه بالغلط رصيت ع اتصال لي محمد وتلفون مفتوح الخط ومانندريش عليه
داني..اسمعيني بس
اني..تي شن نسمعك خيرك انت اهبل والا تستهبل اني مخطوبة وماندويش مع حد مانعرفاش
داني..ولد عمتك اني
اني..من ايام فقط ماكنتش نعرفك
داني قرب وحط يده ع يدي..باهي ماقلتش نبيك والا بنتزوجك اني قلت هكي يعني نتعرفو ع بعضنا محلاك تعرفي
اني نضت بسرعة وضربته كف..حيوان وحقييير لو تفكر مرة تانية انك تلمس يدي نقطعهالك فاااااهم😠
داني بحركة سريعة شدني واني ندف فيه ونعيط وكان الحوش فاضي ومافيه حد
.
.
عند محمد كان في حوشهم في جنان وفرحان وجوه مليح ويهدرز مع صغار عمه ومكسد فجأة اتصل فونه
محمد..شن تبي هدي باش مابتش ترد عليا يومها😠
ولد عمه قيس..خير شن في محمد
محمد..اتصلت
قيس..مني
محمد..خطيبتي مني يعني
قيس..باش قلت يومها ماتبيش ترد عليك؟؟
محمد..ايه وقلت مش حنتصل بيها لعند الزفة
قيس..هما اماليها اهني والا خلاص رد بالك تبي حاجة البنت مرات في شي!!؟
محمد..نرد؟
قيس..تي ردددد
وفي اخر رنة فتح الخط وقبل بيتكلم سمع صوتي اني وداني
حول محمد من جنب الاولاد وركب سيارته وهو يسمع فجأة حرك سيارته وطلع طول لحوشنا وهو يجري وكل مايسمع اصواتنا تتعالى كل مايزيد يسرع ويجري وصل لحوشنا
ركب فوق السور نقز ويتبع في صوتي
.
.
اني..حول ياكلب حول
داني..شوية بس والله مدامني حصلت عليك ماني مخليك
اني..😭😭😭يااااانااااااس ايوووووب تعاااالى يا ايوووووب😭😭😭حوووول
داني..اسكتتي اسكتتتي
اني ندف فيه..حول ياحقير يا قذر
داني..تو نوريك الحقير القذر منو
اني نعيط بأعلى صوتي ونحاول نخليه مايلمسنيش
داني..تعبتيني راك وقفي ضرب
اني..حول ياكلب ياحقييير حووول😭😭😭
تلفتت وراي لقيت لوحة شديتها وبنضربه بيها لكن شدني وضربني كف
اني..اااااه 😭😭ياااا هييييثم وييييينككك
ونشوف في شخص جاي يجري وشد داني وطيحه وطاح فيه ضرب
محمد..ياكلب يا:#&#-#&@
اني خديت نفسي وقعمزت في تركينة وضميت رجليا ليا ونبكي بهستيريا نبكي ونشوف فيه كيف يضرب فيه لين صاخ من ضرب وجاني يجري
محمد..ميس ميس فيييك شي ميسس شن دارلك الحيوان
حضنته ع طول وقعدت نبكي بأعلى صوت عندي
محمد لف عليا يديه وقامني ودخلني من باب المطبخ وحطني في داري وبيطلع شديته
محمد..ميس خليني نطلع وجودي اهني غلط
اني..حيرجعلي من جددديد
محمد..ماتخافيش اني قاعد برا لين يجي هيثم
اني هزيت راسي بي به
غطاني محمد واني تلفيت بالغطاء ونبكي
سكر محمد الباب وطلع و شد داني وربطه وحطه في سيارة واتصل بهيثم
.
.
.
منى..زودددي ولدددك مشييي فيهااا
فدوة..شن تقووولي
منى..تي توا ريته خطيب الحيوانة هدي شده وضربه عطاه طريحة مشعارفة منين طلعلنا الكلب هدا انقضهااا
فدوة تضرب بيدها ع الدومان..تيييي كييييف هكككي كيف جيييي😠
.
.
هيثم..ايوا
محمد..شن جو
هيثم..مية مية كيف مروح للحوش بناخد حاجة وبنطلع بناخد اماليا من حوشكم
محمد..هيا نستنى فيك في حوشكم
هيثم..شن في!!
محمد..ماشي
سكر عليه وشوية ووصل هيثم وهو مش فاهم شي نزل من سيارة ويشوف لمحمد..شن في ياراجل رعشتني راك
محمد..تعالى
خشو للحوش وللمربوعة
محمد..كيف تخلو بنت في عمارة بروحها فهمهالي هدي!!!
هيثم..تي شن في ياراجل!!
محمد..تي ميس بروحها في العمارة كاملة
هيثم..شن صارلها شن صاير فهمني وعلاش فمك دم
محمد..(وحكاله كل شي)
هيثم..وينها وينها!!
محمد..حطيتها في دارها
طلع يجري من المربوعة وخش للحوش وللدار طول
لقاني تحت اليارغان ونبكي حط يده عليا رعشت مع بعضي وقعدت نبكي
اني..منووو منوو انت محممد وينككك😭😭
هيثم دمعو عيونه نحالي اليارغان وقت شفته حضنته طول وقعدت نبكي
هيثم..اششش خلاص معش تبكي خلاص
اني..لولا محمد راه صار الي صار😭😭
هيثم..اشش خلاص الحمدلله تم الموضوع على خير بس مانبيش حد يعرف واني خليني نتصرف
اني هزيت راسي بي به وسكتت
هيثم..هي نوضي غيري حوايجك هيا وولي ارقدي وتو نديرلك نعناع يهديلك اعصابك
اني..ببه😢
طلع هيثم وخلاني نبدل وكل مانتفكر نبكي طول
هيثم..محمد ارفعه واني تو نلحقك
محمد..مية مية بس كيف حالها توا
هيثم..تشغلش بالك كويسة توا
محمد..تمام
طلع محمد ومشي
طلع هيثم فونه واتصل بي ولد خوه باش يروح بيهم
وخش للمطبخ دارلي نعناع وجابهولي
هيثم..هي ميس نوضي خودي
اني نرعش..بببه
هيثم..سامحيني الغلط مني مفروض ماخليتكش بروحك ومشيتي معاهم
اني ساكتة ودموعي ينزلو
شوية وروحو حناي ومرت عمي مشت لحقت بناتها لحوش بوها
حناي..مييس بنيتي وينك
هيثم في دار يما
حناي خشت..هيي ميس بنتي خيرك
هيثم..لقيتها مريضة يام
حناي..خيرك يابنيتي خليتك مافيك شي ارفع عاينها هيثم
اني..لالا خلاص حناي عطاني هيثم نعناع
حناي..به شنو توا
اني..الحمدلله خلوني نرقد بس تو نرتاح
حناي..به تعالى هيثم نحكيلك شن صار
هيثم وقف..بعدين بعدين يام اني توا طالع لمحمد عندنا موضوع اني وياه
حناي..باهي مربوحة وليدي حتى اني خلي نتكى شوية من بكري واني مقعمزة
هيثم..ومرة مرة شوفيها باهي
حناي..باه حاضر
.
.
عند محمد نزل داني في الاستراحة وقعمزه ع الكرسي وربطه وبدي يرجع لوعيه
داني..منو انننت شن تبببي منييي
محمد وهو يلعب بي فونه..تسكت والا نكمل عليك ونقتلك ونرتاح من خليقتك
سكت داني وقعد زي الدايخ ومش مذكر غير ان في حد ضربه لين صيخه وكان مايندريش ان هدا خطيب ميس شوية ووصل هيثم
هيثم..وينه!!
محمد..هونا داخل
هيثم..مية مية صحيت تقدر تمشي تو نعرف حسابي معاه
محمد..اوك
طلع محمد ركب سيارته ومشي
.
.
عندنا حني في ليل نسمع في عمتي تدوي مع حناي
فدوة..مشعارفة يام وين مشي هالفرخ من بكري واني نتصل وهو مقفل
حناي..بالك ساهر مع حد
فدوة..مايطلعش لين يقولي
حناي..ان شاءالله خير
فدوة..وين هديكا ماليهاش صوت!
حناي..مريضة كيف رقدت
فدوة..امممم
حناي..اسمعيني نحيها من راسك خير مايبدا فيه كلام تاني فاهمة
فدوة..باه شن قلت اني ديما ظالميني
حناي..ايه حشاك مسكينة😏
خشت فدوة لدارها وهي تسحن وتفكر ولدها وين!!
شوية وسمعت صوت هيثم خاش
فدوة..هيثم
هيثم..تقلبي وجهك من قدامي والا والله نكمل باقي فيك انتِ
فدوة..دير اللي تبيه غير قولي ولدي وين والله من بكري نتصل مقفل دورهولي وراس وخيي
هيثم..من اليوم ولدك معاش ليه خشة هني
فدوة عقدت حواجبها..كيييف شن تقول انت
هيثم..زي ما سمعتي
فدوة..كيف وين بيمشي الولد يانهاري
هيثم..ينحرق في ستين داااهية اهني ماليشي خشوش بكل فاااهمة وكان تلحقيه الحقي ملا فكة
خش هيثم لداري لقاني راقدة مسح ع راسي شوية وباس ع راسي وطلع وخش لداره
حطيت راسي تحت المخدة وقعدت نبكي بقهرة ع اللي كان حيصيرلي
.
.
قيس..محمد احكي الزفت راك درهت كبدي مزطتني شن هدا سنة نترجا فيك تقول شن في واانت شي شي دخان ورا دخان
محمد..زعما نكلمها؟ باه كان ماردتش عليا😣وااااك معش فاهم شي يا وخيي
قيس..احكي باه فضفض شن صاير معاك اول مرة نشوفك متكدر هكي ياراجل ادوي
محمد..ماعندي مابندوي يا قيس مانقدرش ندوي شي
قيس..ااااه ربي يفرج وخلاص
محمد..نبي نكلمها
قيس..تي باه اتصل بيها
محمد..وكان ماردتش
قيس..ترد ترد غير اتصل بيها بالك ترتاح انت شادهالي نكد زي المرا الحرجانة من راجلها😐
شبحله محمد شبحة وطلع فونه واتصل بيا
طلعت راسي من تحت المخدة وخديت فوني لقيته يتصل بيا زدت نبكي اكتر وسكرت عليه
محمد..افففف مش حترد عارفها
عاود اتصل بيا من جديد سكرت عليه ودرته مقفل مش قادرة ندوي مع حد او نسمع صوت حد
عاود مرة تالتة لقاه مقفل خش للمربوعة
قيس..شن صار
محمد..ماردتش وسكرت تلفونها
قيس..باه احكي شنو الي صاير ملبز معاها في الكلام؟
محمد..لا بنركب نرقد اني تصبحو
ركب محمد رقد
واني رقدت وقررت ان مانحكي لحد اللي صارلي زي ماقالي هيثم لانة الكل يستنالي في غلطة وبس ويبدو يحكو بيا هكي شععب متخلللف💔
.
.
بعد اسبوع درنا فضان وخطوبة سارة وهيثم وحددنا العرس معاي وكنا في واحد ولينا في اتننين اني وهيثم وكل حاجة بنشروها ع زوز
كنت كل يوم من بعد الكلية نطلع ونشري في بتاتي ونسيت اللي صارلي ومحمد معش عاود اتصل بيا ومرات تطلع معاي ثمارة ومرات وسن ومرات ميسم وكانت وسن غالبة أسيد ببصارتها وضحكها وجوها❣
اما ميسم فكانت تحرق في خالد حرق وادوق فيه في النار الي دوقهالها🔥
اني..اوووف شن مزال عييت وحق ربي خلاص ثمارة اطلعي بروحك وخودي ع ذوقك
ثمارة تشوف للورقة في يدها وتخط ع الحجات الي خديناها وهي مقعمزة في دار معاي
ثمارة..مزالك حجات البارفانات والارواب وحوايج الحوش بسسس كل لبسات الطلعات خديناهم والمناسبات خدينالهم وكاملين بكل شي حتى من شناطيهم خدينالهم وفي من حجات تبي اوشحة خديناها يعني مزالك الحجات المهمة هدي بسسس هيا اطلعي مرات نكملوهم اليووم
اني..عيييت رجليا وحق ربي امتى بس بنهتم بنفسي ليا شهر واني خاشة طالعة الزفت خير امه مستعجل قولوله العرس تأجل خلي نشري براحتي الهمم😤
ثمارة قعدت تضحك هيا وحناي
ثمارة..وشن نقول اني حامل و في عز الوحم ونجري معاك ضمي تراه
ع طلعة البنات قمر وشمس
ثمارة..شجو وين ماشيين
قمر..طالعين بنشرو قفاطين امي قالت معاش بنفضو بعدين بنقعمزو بنديرو حلويات العرس
شمس نازلة تجري من دروج وداهشة..اووو ثمارة شن جو قممر هيا بابا يكلكس
اني..مطرشقة البنت هدي كله في جرت بعضه
قمر..هي سلامات
طلعو مع امهم وبوهم
ثمارة..اسمعي لازم نديرو طلعة بناتية ايواااه احني وبنات عمي نهيجو فيها تودعي العزوبية
اني..تي غير نلها بي روحي اني
حناي..احسن شي حجزتو في المزين و الصالة اول شي هيا والعشي والحجات بش طلعتوهم من روسكم
ثمارة..ايه تعرفي خير مانقعدو نجرو لآخر لحظة لكن شن قصة حلويات ياحناي في الحوش
حناي..مقروض وكعك حلو وكعك مالح وغريبة اني كل عرس عندي ضروري مانديرهم😅ياودي مافيه بنة العرس الا بالحجات هدي
اني..مش تعب ياحناي
حناي..لالا تو يجو جويراتي يساعدونا فيه وانتم شن اديرو يعني😂هيا نوضو كان بتطلعو باش نسهرو اني خلي نعجن المقروض اني ومرت عمكم
اني..باهي😧
لبست عباية ووشاحي وطلعت وراء ثمارة جانا سليم وركبنا وطلعنا
اني..سامحني سليمو تعبناك هلبااا
سليم..وخيتي راك مادوريش بكل
شافتله ثمارة وابتسمتله ابتسامة حب و فتحت ثمارة الاغاني
ضحكت عليهم و ع حركاتهم الي يهبلو صورتهم سناب وقعدت نشوفلهم وفرحانة بوخيتي انها متهنية..❤
وصلنا لمحلات
سليم غمز لي ثمارة..اعتبري روحك عروسة وخودي اشري😉
ثمارة تحشمت مني..اااه
اني ضحكت وخشيت للمحل
ثمارة..يابارد
سليم..شوفي هداكا الاحمر ياقلبي اني
ثمارة..انت توا تركب سيارتك وتمشي ادير دورتك وتجي وقت نتصل بيك فاهم😐
سليم ضحك..زي ماقتلك
ثمارة..تي برااا😂
خشت ثمارة للمحل وراي وبدينا ناخدو وخدت هيا ارواب
اني..شن عروسة والا كيف
ثمارة..عادي نجددو عرستنا زيكم😂
اني..سبحان الله 😂
ثمارة..تي هيا نخشو للمحل هدا
اني..هي
ومن محل لمحل لين رجليا وجعوني
ثمارة..بنزغرط وووه واخيرا كملنا
اني..ايييه
ثمارة..في مركز اهني للعناية بالبشرة تعالي نشوفوه اخت سليم يومها نسمع فيها تحكي عليه
اني..هيا
مشينا خشينا وعجبنا المكان وشكروه لينا زبائن خديت موعد وطلعنا
لقينا سليم واقف يستنى
سليم..هيا خلاص وله؟
اني..ايه تمام كملنا
سليم..باهي ان شاءالله تبيدي بالهني ومبارك عليك 😊
اني..سلمك ان شاءالله صحيت بارك الله فيك والله ماننسالك وقفتك معاي انت وثمارة
ثمارة..ضمي فمك اختك اني وهو زي وخيك وهدا واجبنا اتجاهك❤
اني..ربي يحفظكم ويبعد عليكم عين الحاسدين
ثمارة..امين يارب
سليم..كنتو في المركز هدا
ثمارة..ايه خلاص توا بتهتم بروحها سادها
سليم..كانا تبي حتى انتِ انزلي وخودي موعد
ثمارة..لالا بشرتي كويسة هيا من شمس وارهاق وتعب ولازم منه اما اني مهتمة بيها
اني..من قال ثمارة تكون هكي هههههههه لين لدرجة بديت نحسها اختي الكبيرة من كتر انها مهتمة بيا وبي روحها ومش منقصة شي
ثمارة..حتى انت هكي درتي واكتر في عرسي
اني..سلمها ياربي
سليم..نخطمو نتغدو برا!
اني..لا حناي قالت مدايرة غدي وقتلي قولي لسليم ينزل هو وثمارة
سليم..اوووه بعدك ماكلة حناكم هدي ماعنديش معاها روح خلاص معناها نروحو نتغدو ونروحو باهي ثمارة
ثمارة..ايه حاضر لاني تعبااانة تعرف
سليم..هي اهو هانت
وصلنا للحوش وخشينا لقيت ميسم عندنا وحناي مقعمزة وميسم تقرض في سلاطة باش تحط الغدي
اني..عبووودي
عبدو..ميسووو
شديته وفي غمري وقعدت نلعب فيه
حناي..كيف حالك وليدي
سليم..الحمدلله ياحناي شن اخبارك كيف حال صحتك
حناي..الحمدلله بخير ياوليدي نشكر ربي ونحمده
سليم..الحمدلله
حناي..كيف حال اميمتك ووخياتك ووخيينك
سليم..الحمدلله ماشية امورهم
حناي..باهي الحمدولله
.
.
فدوة..يعني مش حتقدر تجي اهني خلاص
داني..قتلك خلاص يام ساكن مع ولد صاحبي فكيني من مشاكل اني حوش هداكا ماعاد خاشله
فدوة..حسبي الله فيه حرمني منك
داني..هي يام تو نكلمك ماشي🙄
.
.
#يتبع ان شاءالله تناااال اعجابكم😍❤❤❤