رواية #مشاعر 🌷
( خيال ممزوج بلواقع )
للكاتبة : #حنو
الرواية بلهجة الليبية
حلقة 11🔥
.
.
اني..ءء صباح الخير محمد
وقف محمد شوية وبعدين كمل طريقه وخش
تنهدت وقعمزت نفكر كيف ندير💔
سمعت صوت الباب خديت بدلة الصلاة وطلعت بنفتح ريت الكنبة محوسة و يارغان الي متغطي بيه محمد ضميته ع سريع وحطيته في دار ومشيت طول فتحت الباب لقيتهم زوز بنات واقفات ومبتسمات
اني..اهلا صباح الخير
البنات..صباح الورد😍صباحية مباركة
اني..تسلمو تفضلو
البنات..لالا بنعطوكم فطوركم وبننزلو هدي تعليمات من الوزارة😂
اني..😂😂لكن بتتعاود تاني وبتخشو
البنات..ان شاءالله
خشو البنات دخلو الفطور وطلعو طول نزلو سكرت اني الباب وكنت مبتسمة ع هبالهم
اني..حيي نسيت نسئلهم شن اسمهم🤦 ماعلينا تو بعدين ننزلو نسئلهم
خشيت للمطبخ وحطيت الفطور الي جايبينه وطيبت قهوة ووتيت كل شي وقعدت خايفة نخش للدار ونقوله تعالى افطر خايفة ومتوترة ومشعارفة كيف بنحكي معاه بعد الي صار امس💔جرحته وكسرتله قلبه💔
واني سرحانة ونفكر طلع محمد للدار وهو لابس ومتأنق ومتعطر وريحته تنادي من بعيد🔥قلبي قعد يدق بسرعة ومش فاهمة شن صارلي
وقف محمد لما لقاني نشوفله ونبتسم
محمد..احم شن في ؟
اني..ااه لا شي هي تعالى افطر
محمد..ماعنديش نية افطري بروحك ومانبيش منك شي
اني..ءء ممحمد مش اني الي درته من لوطة جابوه
محمد تأفف وجي قعمز وقعد ياكل
قعمزت اني وقعدت نفطر معاه وبالسيف ناكل
محمد..خيرك تلعبي بالماكلة لعب!
اني..ااه لا شي مانفطرش اني ديما قهوة بس
محمد..مش باهية القهوة ع الريق كولي زين
اني ابتسمت بوجع اول مرة يهتم بيا حد هكي من بعد عبدو💔
محمد..ربي يهدي من بكري وانت توزعي في ابتساماتك
اني ضحكت وسكتت
ناض محمد بعد ماكمل وجاي بينزل
اني..ءء بتنزل؟
محمد..ايه في شي!؟
اني..مش المفروض ان ننزلو مع بعض!؟
محمد..كيف!
اني..اني نعرف ان المفروض ننزلو مع بعض ومش توا مع قريب الغدي هكي
محمد قدملي خطوتين ورفع صبعه ليا..الي متزوجين ع حق وفرحانين وعرسان حق هما هدم الي تحكي عليهم انتِ اما احني لا🙂 ماشي😒
فتح محمد الباب ونزل من دروج جري وهو وجهه احمر ودخان يطلع من ودانه
اما اني ف كنت في حالة مايعلم بيها غير ربي
قعدت نبكي ومشعارفة كيف بندير وكيف بنكمل! مش فاهمة شي في حياتي ومشعارفة شن بندير!؟
نضت قمت الماعين وغسلتهم وخشيت للدار واني دمعتي ع خدي😢 فتحت فوني لقيت ميسم متصلة بيا
اني..ايوا
ميسم..اهلا اهلا بالعروسة😍كيف حالك؟ صباحية مباركة
اني حاولت نغير نبرة صوتي..الحمدلله كيف حالكم انتم الله يسلمك
ميسم..الحمدلله بخير كيف نزلو هيثم و سارة تعرفي يا ميسو الفرحة والضحكة باينة من عيونهم وواضح عليهم عرساان عسل يا ميسو ماشاءالله عليهم ههههههه
ثمارة..ميسووو عمو هيثم العاشق الولهان بدي😂
اني ضحكت وفي نفس الوقت وجعني محمد ووجعتني روحي💔
اني..ربي يباركلهم ان شاءالله وتو بعدين نتصل بيه هيثم اني خلي توا نسكر محمد جي باش ننزلو مع بعض
ميسم..اوك مع السلامة ربي يحفظك😘
اني..سلمك ويحفظكم
سكرت منها وشفت لمحمد
محمد..من قالك بننزلو مع بعض!!؟
اني..شي بس اطريت نكدب عليها باش تسكر
محمد..كدب عندك زي صباح الخير شوره
اني سكتت وخنقتني العبرة
محمد..هيا كان بتنزلي وراي يستنو فيك لوطة والبسي حاجة باهية ولاد العيلة وعمامي لوطة لقيتهم
اني هزيت راسي بي به وسكتت
طلع محمد من دار وسكرها وراه فتحت دولاب وطلعت لبسة حلوة ومستورة ودرت وشاحي لبسته وجيت بندير برفاني ع خشة محمد شده ونزله من يدي شفتله طول😳
محمد..تؤ تؤ ممنوع هدا اطلعي هي
اني..بس كيف ضروري منه
محمد..بالله باش يشموها عليك ولاد عمي وعمامي!!؟ شن مش حاسبتيني اني والا هه نسيت انك مش حاسبة حسابي في عقلك يالله مدامك معاي وعندي بتسمعي الاوامر هدي لبين ما ربك يدير طريق هي قدامي توا والي صار بيننا امس ماينحكاش
طلع محمد وطلعت وراه واني خانقتني العبرة خلاص بنبكي ومش قادرة نشد نفسي قعدت قايمة راسي وناخد في نفس باش نهدي روحي وجاية بننزل من دروج
محمد..تعالي من هني الاصانصير
جيت وراه وركبنا فيه وكان قربه مني يخلي فيا مش قادرة نتكلم ولا ننطق حرف وقف الاصانصير في دور التالت
محمد..تعالي هكي بلكي واحد من الاولاد هدا
نفتح الاصانصير ولقيناه ولد عمه ركب معانا سلم علينا اني ومحمد وقعد يهدرز هوا ومحمد واني ساكتة وكل مانبعد من محمد شوية يقنط عليا بيده ويقرب فيا كأني بنهرب منه لعند وصلنا لوطة وطلعنا خشينا لحوش حناه وبدت زغاريط من اول ماخشينا كانو خواته المتزوجات وبنات العم والعيلة كلها🙆
خشيت اني ورا محمد وسلمت ع العيلة كلها
هبة..ميس امتى طالعين للمطار!
اني مطار! بنسافر اني؟ كيف مانعرفش! ابتسمتلها..ااه مشعارفة عليه ماقاليش امتى بزبط
مودة..وين بتسافرو
اني..والله مانعرف ع محمد الحق ماحكيناش فيه موضوع هوا😅
سرور..تي خلو البنت استلمتوها انتم 😂بلكي وخيي رومنسي مدايرها مفاجأة
اني..هههههه اي ممكن لانة ماحكاليش الحق
هبة حطت يدها ع فمها..هييي خربنا المفاجأة قصدك تندريش انك بتسافري؟
اني..لالا مانندريش تي عادي 😂😂
هبة..اي شن جوك شن تقري
مودة..حقا محمد يقري فيك؟
رحاب..حيي بالحقااا دكتورك😍اكيد لقطات جو ورومنسية وهكي😂
حلا..ياوخيييتي ع ولد عمي الرومنسي
اني قعدت مصدومة في جرت بعضهم
سلافة...ووووووه ع كنتنا مشت فيها غير خلوها تاخد نفس بس😂
اني..هههههههههههه في جرت بعضهم معش عرفت من نجاوب
وقعدنا نهدرزو ونضحكو
وغيرت جوي معاهم اني والبنات اما نساوين العم في المطبخ ومعاهم جزء من البنات والجزء التاني مقعمز جنبي
اما جيهة تانية مقابلتنا كانو العمام وولاد العم في صالون يهدرزو ويضحكو واكتر شي شادينها جرت محمد ومكسدين عليه
حبيت اللمة والاجواء والفرحة الي بينهم والحب الصافي الي في قلوبهم حسيت روحي صح في عيلة💗
.
.
.
تغدينا وكملنا واجواء عسل😌 وناداني محمد وركبنا اني وياه لشقتنا خشيت وكنت مبتسمة وجوي مليح
محمد..وتي شنطة في ليل طالعين للمطار
اني وقفت وتلفتت..ككيف
محمد..شن كيف ماتبيش تمشي !!
اني..لا بس ماكنتش نندري ان بنسافرو
محمد..المهم وتي روحك مع 8 طالعين من هني
اني..باهي
خش محمد اتكا ع سرير واني بدلت حوايجي وجيت اتكيت جنبه لكن عطاني بظهره
محمد..ورانا طريق طويلة وماقدرتش نرقد ع الكنبة امبارح وجعتني ف لوسمحتي اطفي الضي وتخشي ترقدي
اني..وااااااك وااااااك مليت اني راهو معقولة بتقعد تعاملني هكككي!!!
محمد ناض قعمز..تحسابي اللي درتيه ساااهل؟؟؟
اني..شنو درت ترا قولي شنووو!!!😭
.
.
نرجعو لي ليلة دخلتهم دخلني محمد لي الحوش وقعد يوري فيا فيه وبعدين دخلني للدار وطلع وسكرها باش نبدل براحتي قعمزت نبكي بعبرتي كنت متمنية هدا الشي مع عبدو مش معاه!!ياربي كيف بندير بس
بدلت ومسحت وجهي من الميك اب وواسيت شعري وطلعت لقيته مبدل وحاط العشي ويستنى فيا قعمزنا تعشينا عادي وبعدين شافلي قعد يهدرز عليا واني متوترة بكككل
اني..محمد ممكن نحكيلك شي
محمد..شنو
اني..اني مش جاهزة مش قادرة الحق
محمد..عادي ميوس مش مهم اليوم ره امتى ما ترتاحي عادي
اني..لا انت مفهمتنيش اني مانحبكش ومزال مانعرفكش ومزال مش متعودة عليك
محمد انصدم
اني..ايه ووافقت عليك ع خاطر هيثم وقت شفته فرحان واني قلبي قاعد مع عبدو
محمد شافلي بصدمة..مممن هدااا!!!
اني..الله يرحمه ولد جيرانة كنا نبو بعض بس في يوم ضرباته سيارة وهو طالع من جامع ومات ومن يومها اني محروقة عليه وقد مادرت ان نتعود عليك ونحبك ماقدرتش ياريت تعطيني فرصة نتعود عليك فيها وتحببني فيك😔اني حكيت معاك بصراحة باش ماتقولش مدرقة عليا
محمد بتعصيب..نوضي خشي للدار توا ومعش نبي نشوف وجهك قدامي
نضت بخوف وخشيت للدار وعرفت ان لبزت في الكلام🤦 وقعدت نبكي ليلة كاملة
ومحمد دخان ورا دخان ومارقدش بكل
.
.
.
نرجعو نكملو شن صار
محمد قعد يقرب مني لعند لصقني في الحيط حط يدي ع قلبه..نقولك شنو درتييي نقوووولك؟؟؟؟انك كسرتتتيه هددددا كسررررتييييه كسسسسرتيه بغبااااائك
وطلع وخلاني حايرة كيف بندير كيف بنصلح غلطي وخيرني اني زي المهبولة مش فاهمة روحي شن نبي مشاعري معش عارفتهم لمنو ومع منوو!!!
خشيت توضيت وصليت وقعدت ندعي ونبكي
سمعت صوته نضت وقعمزت ع سرير
خش محمد لوح مفاتيح ع الكنبة وقعمز يهز في رجليه وحط راسه بين يديه ويفكر
.
.
عند هيثم..سررو وين سوريتي سماوية
سارة..هي هي جاية نطلعهالك
جت سارة وطلعتله سورية وعطتهاله وقعمزت تتفرج عليه ومبتسمة وفرحانة بنصيبها
هيثم شافلها ورفع حاجبه..بطلي شبحات هدي تعبي فيا بيهم
سارة ابتسمت توردو خدودها..مش قصدي😀
هيثم..قصدك جمالي لا يقاوم لهدرجة هدي بش تعرفي بس راجلك ممن يكون
سارة تضحك ع تفتريش الكلام اللي يقول فيه..😂😂
هيثم..المهم ماعلينا بتمشي توا حوشكم باش صبح بنمشو مطار طول
سارة..ايه ياريت
هيثم..هي امالا بدلي ونطلعو
سارة..اوك
.
.
.
فاطمة..ريتي يا سلافة نحس ان خوك مش متهني معاها
سلافة..يام ماتركزيش عاد قصدي ماحسيتش بشي اني يضحكو هما زوز وجوهم مليح
فاطمة..انتِ ماتعرفيش اني قلبي هكي يقول وهدا ولدي ونحس بيه
سلافة..ماديريش في بالك يام والله ميس كويسة
فاطمة..عارفتها بنت الناس مافيها عيب وولدي حتى هوا لكن مشعارفة مش مطمنة اني واضح خوك مش فرحان
سلافة..والله انت يام تركزي راك خلاص والله الا واضح امورهم كويسة
سرور..صح كلام امك حتى اني حسيت ان في شي صاير وامبكري شوية نسمع فيهم يتعاركو
سلافة فنصت في اختها..يعني لازم تقولي وتشغليها!!
فاطمة..يعني صح كلامي اني
سلافة..اي وحتى مش قايللها ع سفرة لين حني قلنالها وواضح انصدمت ورقعتها ان قلنا ممكن دايرها مفاجأة وهي سكتت وقالت اي ممكن
سرور..وحتى لما نزل بروحه وبعدين نشبح في قيس شاده وركبه وشوية نزل هوا ومرته وواضح بالسيف يجامل
فاطمة حطت يدها ع قلبها..كان ماتكون البنت فيها حاجة
سرور..هيييي يماااا شن كلام هدا حرام علينا بنت الناس مانضلموهاش مرات ماتفاهموش في بداية بس اكيد حياخدو ع بعض تعرفيه ولدك في عناد وتسكير راس
فاطمة..ربي يهنيهم ياااااارب وتهديلهم بالهم
سلافة..امين يارب يام ماتاخديش في بالك في اللي هكي في بداية يرتاحوش وبعدين تنحل الامور
فاطمة..ان شاءالله يارب
وكملو شرب شاهي ويهدرزو وسلافة تغير في جو امها
.
.
.
بـعـد سـاعـات
بدلت اني ومحمد وولا كلمة ساكتين وبس وقعد محمد يطلع في شناطي وحطهم في الاصانصير ورص ع الدور الارضي واتصل
محمد..ايوا هونا شناطي بعتتهم لوطة تو يوصلوك حطهملي بالله عليك في سيارة اني بنخش لأمي شوية
قيس..مية مية هي طالع تو ناخدهم ونطلعهم
محمد..صحيت والله وقفتك معاي ماننساها
قيس..تي ضم عليا فمك تراه وانت دورا دورا صحيت نفختهم راه كيف متحملاتك المرا
محمد ضحك..تي ماشي يافرخ تشاو
سكر عليه واني قاعدة واقفة خشينا لحوش بوه
محمد..افرديها قدام العيلة
اني شفتله وعطيته بظهري خشيت قبله..السلام عليكم😍 ان شاءالله ديما مجتمعين😍
فاطمة.. وعليكم السلام سلمك بنيتي كيف حالكم
سلافة..مسرع ستاحشتونا 😂😂
محمد عطاها عنفقة..شن قصدك اااه قووولي
سلافة..نبصر نبصرر 😂
محمد..باه باه شن جو
سلافة..مليح
محمد..وين سرور
سلافة..كيف توا خشت للدار يا سرررووور تعاااالي اي ميوس شن جو
اني..الحمدلله بخير شن اخباركم
فاطمة..الحمدلله
محمد..يما احني مانقدروش نعطلو جايين بنسلمو عليكم وبنطلعو بنمشو حوش امالي ميس وبنمشو لي المطار طول
فاطمة..اهاا باهي طريقكم زينة ياوليدي ربي يوصلكم سالمين يارب😊
سرور..اوووووو مرت خوي عندنا
اني..هلا هلا شن جو
سرور..هلا بيك الحمدلله تمام شنو خلاص بتسافرو
محمد..ايه
فاطمة..قداش قاعدين!
محمد..شهر
فاطمة..ربي يوصلكم سالمين ان شاءالله يازليدي ويفتحها عليكم وربي يهنيكمم
محمد..ان شاءالله
سرور..اي وين ماشيين؟
اني سكتت وشفتله
محمد..لي باريس
اني قمت راسي ع طول ولمعو عيوني م الفرحة
محمد شافلي ونزل راسه
سرور..اااااه😍😍يااااربي بااااريس
سلافة..وراس وخيي ارفعنا معاكم😂مانديروش شطانة
فاطمة فنصت فيهم..اسكتو مصح وجهكم وخلاص شن ارفعنا هدي
محمد..والله جيتو في وقت بنسافر تكلمتو من قبل كنهدا احلى شهر في باريس لي عيونكم
سلافة..ههههههه خلاص نعاودوها مرة تانية مع بعض المرة هدي استمتعو انتم
اني ابتسمتلها
سرور..ياااااارب ارزقني بزوج زي خوي جمال وطول وهيبة وباااااااريس😭
اني..😂😂😂 هبلة
سلافة..طقة هدي ماتعدليش عليها
اني..عادي عندي حتى اختي وسن هكي جوها😂
سرور..هااا سمعتو يعني مش اني بروحي😂😂😂
فاطمة..اختك وسن المتزوحة والا!
اني..ايه هدي الصغيرة
كلهم متزوجات خواتي
فاطمة..ايه ربي يحفظهملك ان شاءالله نعرف عزوزتها وسن اني
اني..الله كويسة هيا ماشاءالله عليها
فاطمة..ايه سميرة كويسة بكل
اني..ايه
محمد..هيا
اني وقفت نسلم عليهم..هي بالسلامة نشوفوكم بخير ان شاءالله
فاطمة..سلمك بنيتي ربي يحفظكم ويهنيكم يارب
اني تنهدت بحزن..امين يارب💔
محمد باس ع راس امه..ديري بالك على روحك يما ووصيت عليكم قيس تبو اي حاجة كلموه هوا بس
فاطمة..ان شاءالله وليدي سلمه ياربي
وسلم ع حواته وطلعنا
لاحظت عليا عزوزتي فاطمة ومابتش تدخل سكتت وخلتنا نطلعو وسكرت سرور ورانا الباب وجت جنب امها تتفرج
فاطمة تنهدت..توا تأكدت ان في شي بينهم
سلافة..اي واضح يتصنعو قدامنا انهم فرحانين
فاطمة..بالك في هالشهر هدا يغير ربي حالهم
سلافة تقرض في فواكه..ان شاءالله
سرور..خفي يدك انتِ راهي فروطة مش رشدة امبكبكة سنة قاعدتلي فيها
سلافة..ضمي عليا فمك والا تعالي ديري بروحك واسكتي
سرور..كملي كملي مكتر نفخك
.
.
طلعنا ونزلنا طول لوطة سلمنا ع العيلة وطلعنا ركبنا سيارة مع قيس
قيس..كيف حالك
اني..الحمدلله تماام
محمد..هيا معش وقت برا بينا لي حوش اماليها وبعظها للمطار
قيس..هي بسم الله
مشينا لحوشنا نزلنا اني ومحمد وخشينا طلع هيثم سلم علينا
اني..هيثوووم😍شن جو ياعريس
هيثم..الحمدلله مية مية شن امورك
اني..كويسة الحمدلله😊وين العيلة
هيثم..داخل هونا
خشيت نجري فتحت عليهم الباب..جيييييت
ميسم..ميسسسس😍
ثمارة..ميسس ياقلبي😍
سلمت عليهم وجيت بست ع راس حناي وسلمت عليها و ع نساوين عمي
وسلمت ع عمتي فدوة دوب ما مدت صوابعها ومشت خشت دارها
اني..كيف حالكم شن اخباركم وين العروسة😍
حناي..الحمدلله يابنيتي العروسة اهي قال هيثم نازلة قال بيمشو لي حوش شبانيك بتسلم على اماليها لانه بيسافرو غدوا
اني..اهاااا
حناي..ايه خيرك جيتي انتِ
اني..بنسافرو شوية وطالعة
حناي..ماشاءالله😍
ميسم..وين مسافرين😍
اني..بااااريس
ثماارة..اووووه😍ماشاءالله
ميسم..ماشاءالله اي بري غيري جووك😍
اني..ايه
خش هيثم..ميس هيا وقت ع طيارتكم
حناي..غير خلي تاخد حتى طويسة عصير
اني..لالا صحتين ياحنينة خلاص وقت
نضت بنطلع جت شمس بسفرة العصير
اني..والله علاش متعبة روحك كيف شاربة
شمس..بلا جو ضيفة هيا خودي خير مانصبه عليك توا😂
اني..شلة وين كيمو
شمس..طالع يندريش عليك كنهدا راهو قعد
اني..خسارة سلميلي عليه هي بالسلامة عويلة
كلهم..توصلي بالسلامة
طلعت لقيت محمد واقف ع هيثم
محمد..هي ماشي توا
هيثم..في امان الله دير بالك عليها مانوصيكش حميدا
محمد..في عيوني ماتخافش 👍🏻
هيثم..👍🏻
طلعنا اني ومحمد وركبنا مع قيس ومشينا للمطار سلمنا ع قيس وخشينا نستنو
.
.
#يتبع
ان شاءالله تنال اعجابكم يارب هيا تفاعلو والله تعبت فيها😭💔 #حنو
أنت تقرأ
مشاعر💔 ( روايات ليبية )
Storie d'amoreللكاتبة :حنو تدور الاحدات حول قصة حب بين الطرفين يتبعها الكتير من الاحدات المشوقة فما نهاية هذا الحب ?
