مشاعر💔 ( روايات ليبية )

حلقة 15🔥

رواية #مشاعر 🌷
( خيال ممزوج بلواقع )
للكاتبة : #حنو
الرواية بلهجة الليبية
حلقة  15🔥
.
.
بـعـد فـترة جتنا مرت بوي منى
محمد..ميسوو مرت بوك اسمها منى؟
اني..ايه خيرها
محمد..جت توا
اني..علاش شن في
محمد..مشعارف اهي في صالون خليتها مانبيش مشاكل مادوريهاش لين تروح خليك متأدبة معاها هدا حوشك ومانبيش يقولو مرت محمد اتلز في ضيوف
اني..باه
طلعتلها طول سلمت عليها فوق من نفس
اني..خير شن جابك
منى دارت روحها تبكي..😭😭😭سامحيني يابنيتي ارجوك تسامحيني
اني..توا!!؟؟ع شن تبي نسامحك بزبط تراه مستحيل نسامحك
منى..اسفة والله ماعارفة شن بنقولك بس طلع عندي الورم وفي ايامي الاخيرة🤕سامحيني ارجووك
اني نصدمت..ءءء لا اله الا الله وكييف مالقولكش علاج قصدددك
منى..ايه في ايامه الاخيرة للأسف هدا وين عرفت سامحيني يا ميس بالله عليك
اني تأترت بدموعها وبكل شي تقول فيه..مسامحاتك الله غالب الانسان يغلط والحمدلله المهم عرفتي غلطك ربي يسامحك ويسامحنا
منى..نبي نطلب طلب اخير ارجوك ماتقوليش لبناتي بالله عليك
اني..كيف هكي ضروري يعرفو
منى..بالله ماتقوليلهم😭 مانبيش نخرب حياتهم خليهم مرتاحين ورايقين بس انت ماقدرتش جيتك وقلت نبي نطلب منك سمااح وحتى وخيك ايوب يبيك تسامحيه عرفنا غلطنا واسفين
اني..مسامحتكم وربي كريم الحمدلله تزوجت وارتحت وربي كرمني بزوج يحبني خلاص ربي يسامحكم
منى زادو في دموعها..بالله بنيتي وين الحمام بنغسل وجهي😭
اني وقفت وجبتها وراي..اهوا الحمام😊
خشت حمام واني كلعت للمطبخ درت عصير وشكلاطة وحسيتها طولت طلعت لقيتها طالعة من داري استغربت..شن اديري اهني!؟
منى..كنت نتفرج ع حوشك ماشاءالله ربي يباركلك فيه الحمدلله تهنيتي فيه
اني ابتسمت..الحمدلله الله يبارك فيك خودي عصير
منى وهي مرتبكة..لا مستعجلة خلاص ببنننزل
اني..غير اقعدي شوية تغدي عندنا
منى..لا خلاص قتلك بننزل
اني..باهي بالسلامة
منى..بالسلامة😈
.
.
.
تـسريع للأحداث بعـد أيـام مـحمـد تغـير علـيا وبـديت نلاحـظ فـيه يشـوفلي بنـظرات غـريبة ومـرات ينوض فـيا من نـومي بتكـشيخ ومرات ـيضرب وقعدت نتحـمل ونصـبر الـى هـدا اليـوم
محـمد فتح الحوش وخش..افففف اففف شن ريحة الحوش هدي هككي شنن
اني استغربت..خيرك محمد هكي والله كيف نشفت
محمد..كدابة انت وحدة مش نظيفة كدابة
اني..محمد خيرك هكي مولي انت والله كيف منظفة ومنشفة الحوش تعبت منككك راهوو كل يوم هكي ادير
محمد قرب مني ولصقني في حيط وخنقني..شن قلت اني معش تعلي صوتك والاااا معششش تعلييييه قللللت والااااااا
اني نبكي ومعش قادرة نتحمل ونفس بينقطع عليا..حوول بنموووت
زاد محمد قنط عليا وكان باب الحوش مردود خش قيس ع عياطنا اني وياه ووقت شافنا انصدم
قيس..تي شن ادددددير انننننت
دفه مم عليا وطحت اني ع الارض ونحاول نتنفس كنت شوية ونموت قعدت نكح ووجهي والا احمر مشي قيس يجري جابلي اميا ونوضني وشربهالي
محمد..خليها تموووت خليهاااا تي كيف قادر تساعدها تي هدي زي الغووولة والله غووولة كيف خديتها اننني
قيس..تي شن تخرف انت هدي ميس اللي تقولي نحبها ونبيها ونبي نتغير ع خاطرها خيرك هكي وليت شن كلام فارغ هدا
محمد..مانحبهااااش انيييي معش نبيهاااا
قيس وقفله..معش تبيها عندها امالي ارفعها لي اماليها لكن ماتعدبش بنت الناس هكككي
محمد..مش حنرفعها اني بنخليها بنوريهااا
قيس..غير اطلع معاي بس
طلع قيس محمد واني قعمزت نبكي ضميت رجليا ليا وقعدت نبكي بحرقة ع حياتي💔
كل ماتتصلح من جيهة تخرب من جيهة
.
.
فاطمة..شن صوت الدوشة هدي يا محمد خيرك مع مرتك ياولد فهمنييي شن اللي اديير فيه في المرااا
محمد..انت قلتيها مرتي واننني حررر فيهااا شن دخلكم انتتتم شن دخلللكممم
قيس😠..ضم فمك وواطي صوتك امك ماتتكلمش معاها هكي
محمد..تي انت توا بتعلمني الادب؟؟؟
قيس..شن فيك انت خيرك ياراجل كل يوم نسمع فيك تعيط عليها كل يوم نسمع فيها تبكي وتضرب فيهااا انت محمد عمرك مامديت يدك ع وحدة من خواتك ولا حتمدها ع مرا تحبها هكي ادير تي هدي ميس قلبك هدي مرتك هدي شن بنقولك تي انت تموت فيها من قبل لا تتزوجها من زمان انت تحلم انها تكون مرتك ووتوا هكككي اديير فيييها
فاطمة..الموضوع فات عن حده معش ينسكت عليه اني مانرضاش لبنت ناس تنهان اكتر من هكي طلقها وخليها تشوف نصيبهااا مع حد يصونها ويحبها ويحترمها انت واحد ماتستاهلش ميس تكون مرتكك
وطلعت فاطمة من حوش وركبتلي
محمد..شن تقول امي هدي شن نطلقها تي والله ماني مطلقها لوكان اشبح شن اديرو فيا
قيس..امالا عاجبك تعذبها هكي نبي نفهم شن سبب بسسسس شنننن سببب
محمد..هكي اني معش نشوف فيها المرا نفسها ادير في حجات غلط تي الحوش ديما صنته زي جيفة اعععع ماكلة اخييي هيا بروحها استغفرالله افي صنتها تي كيف تبيني ندير كيييف تي زي الجن منظرها تقول مش مرتي ميس اللي نبيها مقرفة
بوه مقعمز ويشوفله
قيس..انسى ان عندك صاحب والا ولد عم اسمه قيس من اليوم في واحد يتكلم ع مرته وحوشه بشكل هذا؟؟ تي كرهتك الزفت
طلع قيس وهو شياطين ينطو فوق راسه
بوه..محمد
محمد..نعم
بوه..شن كليت انت!
محمد..كيف
بوه..واكل حاجة من حد غريب!!
محمد يفكر..مشعارف ناسي
بوه..انت قتلي ان مرت بوها جت تسامحت معاها صح!!!؟؟
محمد..ايه صح الكلام
بوه..اممممم كويس ومرت بوها جابت حاجة تاكلوها؟
محمد..مانعرفش اني ماقتليش هيا
بوه..وين خشت مرت بوها؟
محمد..ماقعدتش يابوي في الحوش اني خشت سلمت عليها وخليتهم وطلعت
بوه..باه اسمع
محمد..نعم
بوه..نوض برا معاي لمكان سايرني حتى تغير جوك
محمد..يابوي والله ماوقت تغييرة جو
بوه..نوض هيا
نوضه بوه بالسيف وطلع بيه
.
.
اني..ياعمتي معاش نبي نقعد ارجوك قولي لقيس يرفعني حوشنا والا والله نكلم عمي هيثم والا خوي أيوب😭😭😭
فاطمة..غير صلي ع النبي يابنيتي وهدي رويحتك ولكل حادثٍ حديث حرام عليك تتفارقي على راجلك تو بالك تطلعي حتى حامل هي حرام يابنيتي
اني نتكلم بهستيريا..تي ياعمتيييي اي حمممل تتتكلميييي عليييه تي اني وولدك مااااصارششش بينننا شييي انيييي وياااااه زي الخووووت
فاطمة حطت يدها ع فمها..شششنووو
اني..ايييه😭😭😭خلاص اني معش نقدر نعيش معاه
فاطمة..كيف ماحكيتيليش
اني..شن بنحكيلك قلت فترة وتمشي ونتعودو على بعض ونحبو بعض واني والله في بداية كنت خايفة شوية وكنت نبي نتعود عليه ونحبه هو بدي يعامل فيا بلطف وبدي يخلي فيا نحبه والله حبيته ياعميمة والله فجأة هكي نقلب كل شيي😭😭😭
فاطمة تغمرتني..اششش بنيتي خلاص ان شاءالله ربي يحلها بينكم ماتخافيش مستحيل نخليه يباعد عليك تو يولي هو نفسه غير بالك تغير عليه روتين والا صايرتله مشاكل في الخدمة وضغط يابنتي عليه مرات هكي راهو
اني..مستحيل محمد حفظته ياعميمة محمد مش هوا مولي شخص تاني نشوف فيه زي الغولة ياعميمة والله وقت حتى يقرب شويا مني نفز ونخاف يتغير شكله فجأة هكي كأنه شخص تاني
فاطمة عقدت حواجبها..كييف يعني!!!؟؟؟
اني..مانعرفش هكي ريحته ديما ننقرف منها قربه ليا مانبيشي بكل تي منظره مولي يخوف ياعميمة ومولي يضرب فيا زي الجني مستحيل نقدر نوصفهولك والله يخوف نبي نطلق اني خلاص مستحيل نقعد معاه
فاطمة..شوفي بنيتي احني ماعندناش مرا تطلع حوش راجلها وتمشي حرجانة بتحرجي احرجي عندي اني اميمتك يابنيتي لكن خلينا احني نخشو في الموضوع ونحلوها مابينكم
اني نرعش..المهم معش نشوفه بس😭😭
فاطمة..حاضر اللي تبيه يصير اعتبريني امك واعتبري عمك بوك والله نديرك بنيتي غير ماتطلعيش بس
اني..باه
فاطمة..خشي ارتاحي ارقدي هي
اني..نبي نقولك سر
فاطمة..شنو
اني..اني معش نرتاح ولا نقدر نرقد في الحوش هدا كرهتته عادي ننزل عندكم نرقد عندكم والله ماعاد طايقة نقعد فيه من كتر مشاكل
فاطمة تنهدت..عادي اكيد😢
لبست وشاحي ونزلت معاها خشيت للدار متع محمد ورقدت فيها كنت ع قد مامستاحشاته ع قد ماكارهاته مش فاهمة شنو اللي قاعد يصير💔
.
.
.
عند وسن
أسيد..وسوووونتي وينك ياقشطة
وسن..ووووه منك شن تبي هي
أسيد..وووووه منك يا جفاف ياقحط ياعديمة الرومنسية
وسن قدمت وحضناته..يا شباني باهي شن تبي هي
أسيد ابتسم..نحبك يافرخة
وسن..فرخة في عينك هدي
أسيد..امالا معش تقولي شباني
وسن..بنقول😛
أسيد..نقصهولك لسانك اللي تلوي فيه هدا🙄
وسن..اي شن جو خدمة
أسيد..نسيت نسئلها الخدمة تو وقت نمشي غدوا نقوللها شن جو
وسن..يادراه😒
أسيد خدي تفاحة ياكل فيها..ماشية امورها
وسن..كويس اي حقا غدوا عندي حفلة عرس صاحبتي
أسيد..من امتى الصحبة هدي
وسن..والله من وقفت قراية معش هدرزنا هلبا وفترة بعد زواجي بديت ديما نكلم فيها صاحبتي ونهدرز عليها لاني خديت راحتي اما في الحوش ايوب زي دراه مانحكيلكش عموما نبي نمشي للحفلة وانت لازم ماتاخد موشح كامل ع كل شي
أسيد..ماه نبي نعرف يعني ضروري😏وبعدين شن مقايل اني مقايل مشي للصحبات لا وله خلاص
وتلفت ماشي للدار
وسن بالموس..تي والله يا أسييييد كان ماترررفعننننيش الله المرة هدي نتش فيك النار ونطعنك بالموس سبعة طعنات ونصبغلك شعرك باش وقت يدفنوك نقوللهم هدا مش مسلم مسيحي وتقعد مافي حد يدفنك ويفوتوك ونورتك ونورت رزقك وتقعد انت ميت الله يرحمك😌
أسيد يهز في راسه يمين ويسار واذكر ان وسن مرة حارقتله صوابع رجليه خاف وتكلم طول..اجراااام وضيفتك باهي تو نرفعك يافرخة
ابتسمت وسن بخبث..اصلا هكي يمشي معاك انت الدلع مش ليك بكل🙂
.
.
.
ثمارة..سليييييييم وووووه عليا وينك يا سليييييم
سليم كان لوطة عند امه ويهدرز معاها ومايسمعش في ثمارة
ثمارة وقفت حست ببي اميا نزلت معاها..سللللليم😭😭😭😭😭بنجيييب ويييييينككك
قعدت تمشي بشوية ومنسندة ع الحيط وتمشي وتتوجع مع كل خطوة تخطيها💔
فتحت الباب وقعدت تعيط..سليييييييييييم بنجييييب ويننننك😭😭😭
امه..صوت عياط مرتك شننن في
سليم نط يجري وركب مع دروج الدجة بتلاتة وكل مايقرب قلبه يقعد يدق وكل مايقرب يسمع صوت بكاها..ثمااارة خيرررك
ثمارة..بنجيييب😭😭ااااااااه يااااااربي
امه..شن في يا سليييم
سليم..ثمارة بتجيب ياااام
اختفت امه في ثواني وهو خش جابلها عباية ووشاحها ونزلها من دروج وهيا تعيط بأعلا صوتها وكانت خايفة هلبا طلع سليم ركبها سيارة لقي امه وراه جاية وركبت معاهم وكانت ثمارة تبكي وتعيط وامه تهدي فيها
سليم يسوق بسرعة..خلاص وصلنا هي خلاص هانت ياروحي خلاص معش تعيكي بالله عليك تقطعي في قلبي هكي خلاص حبيبتي هي وصلنا
ثمارة..مش قاااادرة اااااااه ياااااربيييي ساااااعدددني😭😭😭
امه..يارب ساعدها ياااارب ياااارب
وصلو للعيادة نزلها طول وخدوها منه وخششوها للولادة طول
قعد سليم ماشي جاي وخايف ومتوتر
امه..قعمز وليدي ان شاءالله تو يطلعوها بخير ماتخافش
سليم..مانحسابش هكي يمي مانحسابهاش بتتوجع هكي خلاص معش نبي صغار تجيب هدا وخلاص يام ساد مانبيهاش تتوجع يام😔
امه..نوض بالك بلا دحول😒 هدا امر ربي وبعد ماتجيب تنسى كل شي بإذن الله تو ربي يخفف عليها ادعيلها بس توا
قعد سليم خايف ويدعي في قلبه لمرته
.
.
.
عندي اني
سلافة..يما خيرها ميس راقدة عندنا شن في؟
فاطمة..الهي في قرايتك انت ماليكش دعوة
سرور خشت من الباب..السلام عليكم وينكم ياعيلة
فاطمة..وعليكم السلام بنيتي
سرور..اااه راسي نبي نرقد مايكلمني حد
فاطمة..خشي رتاحي القايلة كلها وانت في جامعة فوق راسك
سرور..اي والله تعرفي عييت
فاطمة..معليشي كله يهون في سبيل قرايتك😘
سرور شافت لي سلافة..هي تشاوات بنبدل ونصلي ونرقد اهو قتلكم مايكلمني حد
سلافة..من بيكلمك يعني مش فاضيتلك صراحة😒
سرور..اي باه
خشت سرور للدار اما سلافة رجعت شافت لأمها..هيا يام قوليلييي😭
فاطمة..شن خرفتلك اني توا قتلك ماليكش دعوة وله!! اقلبي وجهك من عليا تراه
سلافة..تي في حاجة اني متأكدة حتى مرواح روح بيا قيس مش محمد وزيدي عليها قيس اول مرة في حياتي نشوفه شياطين يرقصو فوق راسه
فاطمة..لانه شافك هدا باش شياطين يرقصو فوق راسه اقلبي وجهك امشي ارقدي وبعدين نوضي اقري امتحانات انت والا
سلافة..لا مزال امتحاناتي ووراك وراك يا فاطمة لين نعرف
فاطمة نحت شبشبها وبتلوحه ع بنتها
سلافة ناضت تجري وخشت للدار رقدت مع اختها
اما فاطمة تفكر ومش فاهمة شن اللي صاير معانا
.
.
.
عند محمد وبوه
بوه..هي انزل معاي
محمد..وين علاش جايبني اهني انت
بوه..غير انزل في شيخ اهني صاحبي نعرفه كويس بكل يشوفك
محمد..شن تشوف فيا بوي باش تجيبني لشيخ تراه
بوه..هيا نطمن عليك بس
محمد..والله ماني نازلها
بوه..غير انزل يهديك ربي
محمد..قتلك مانيش نازل
بوه..من امتى تعصي في كلمتي انت؟؟؟
محمد..من توا باهي مانيش نازل اني
بوه..باهي باه
فتح تلفونه اتصل بيه وقاله اطلعلنا
وطلعله شيخ ومحمد مش فاهم روحه شن صاير!!
الشيخ..انزل ياولدي ونهدرزو بس شن بنديرلك اني
محمد..سامحني عندي خدمة مش فاضي
وقعدو يحاولو معاه مباش ينزل و بوه اتأكد ان ولده فيه شي والشيخ حتى هوا من نظراته زبطه
الشيخ..امالا تسهلو انتم وتو ان شاءالله الايام جايات نتلاقو
بوه..ان شاءالله خير
.
.
.
كنت راقدة ونحلم بأفعى نحاول نضربها بس ماقدرتهاش كانت اقوى مني وعضتني في رجلي قعدت نعيط لين جيت نايضة مقعمزة
فاطمة..بسم الله الرحمن الرحيم بسم الله ياربي خيرك شن حلمتي
اني..😭😭عضتني عضضتننني
فاطمة..غير اشربي اميا بس
شربت اميا وكلي عرق قعدت تمسح ع وجهي وتشوفلي..شن شفتي يابنتي احكي
اني..افعى كبييرة كانت تجري وراي😭😭كانت تجري وراي لين طحت ووقت طحت عضتني في رجلي فرغت سمها كله فيا😭😭
فاطمة حضنتني وقعدت تقرا عليا وكانو دموعها ينزلو وهس تمسح فيهم بس كنت حاسة بيها💔قعدت تقرا عليا لين رقدت عليها
فاطمة..لاحول ولا قوة الا بالله حسبي الله ونعم الوكيل فيهم من اللي دار فيكم هكي بسسس
حطتني ع سرير وطلعت لقت راجلها قدامها
فاطمة..اسمع لازم تجيب شيخ للشقتهم راهم مش مزبوطين بكككل
قعمز وقعد حاط يديه ع راسه..واضح الولد مسحور تخيلي مش متحمل يسمع اسمها !! ومرة يقول معش نبيها بنطلقها ومرة يقولي بوي خليها مانبيش نطلقها نبيها معش فهمته اني وقت رفعته للشيخ مباش ينزل بكللل عند راسه
فاطمة..لا حول ولا قوة الا بالله حسبي الله ونعم الوكيل حرام عليهم علاش هكي😭
بوه..ماتشغليش روحك بإذن الله غيمة وحتزول غير ماتحكي لحد انت وخلي نحلوها احني
فاطمة..حتى بناتك مايعرفو بشي ولازم غدوا تربطوه حتى الربط المهم يجي شيخ ويقرا عليهم
بوه..ان شاءالله ان شاءالله هي ارقدي ارتاحي والصبح يصير خير
.
.
.
عند قيس متعود وقت بيرقد يفتح ع القرآن في الحوش ويخش لدراه يرقد وكان محمد المرة هدي معاه فتح قرآن وخش لداره
محمد..ياقيييس سكره
قيس والا من دار..شن في
محمد حاط يديه ع راسه..سكر التلفزيون مش قادر نسمعه
قيس استغرب..شن مش قادر تسمعه خيرك ياراجل قرآن هدا
محمد..سكررره سكككره
قيس..والله ماني مسكره
محمد..امالا اقعد فيها هي
طلع محمد من الحوش وخش في حوشه ومن كتر الارق رقد طول
قيس..مهبول والله الا مهبول
وخش قيس رقد
.
.
.
تاني يـوم
يـوم جـديـد عـ الـكـل احـداث جـديـدة 🌸
عـند مـنى و أيوب
منى..صباااح الخيير بننتي
اني كنت كيف نايضة من نوم..صباح نور مني
منى..اني منى يابنيتي خيرك
اني..اها ايه كيف حالك
منى..الحمدلله شن اخبارك وينك مختفية نحسابك بديري يوم وتجيني تعرفي انتِ لا في من يجيني لا شي وانت الوحيدة اللي عارفة باللي صايرلي وعارفة بي مرضي💔
اني قعمزت..والله شوية ضروف بس سامحيني تو الايام جاية نحاول نجي
منى تبي تعرف..شن في ضروف شني!؟
اني ترددت نقوللها..لا شي غير لاهية بس
منى..امممم باهي امالا ديري يوم وتعاليلي
اني..حاضر
سكرت منها ومستغربة فيها وفي تصرفاتها بعدين قلت..ياروحي هي مريضة سرطان ربي يشفيها واصلا اكيد نادمة ع كل شي داراته واضح من دموعها💔ربي يصبرها ت مرضها يارب
.
.
منى..😈والله انك نية يابنت ههههههههههااااي
أيوب..شن ضحكة شريرة ع صبح هدي😅
منى..شي انت خيرك نايض بكري
أيوب..عندي موضوع بنديره
منى..اممممم
ايوب..فيش فطور
منى..خدامتك امالا🙄برا كول من برا
ايوب..ماشي اصلا
طلع ايوب وقعمزت منى تتفرج وتفكر وتخطط
.
.
.
عندنا
فاطمة..صباح الخير بنيتي
اني..صباح النور عميمة
فاطمة..هي اطلعي افطري
اني..هي اهو ندير شعري ونلبس وشاحي ونجي
فاطمة..مافي حد راه عمك طلع من صبح
انب..اها باه هي نطلعو
طلعت اني وياها لقيتها موتية الفطور فطرنا مع بعض وقعدنا نهدرزو شوية وطق الباب
فاطمة..تو نفتح خليك
ناضت فتحت الباب
فاطمة..حميدا فطرت
محمد..ايه شن في بوي بعتني ليك قال تبي حجات؟
فاطمة..ايه صح تعالى خش افطر وتو نجي
خش محمد لقاني مقعمزة ناكل شافلي بتقزز وقعمز ياكل نضت وخشيت للدار
فاطمة طلعت سكرت الباب بالمفتاح وراها
اني طلعت من دار..وين عميمة
محمد كان واقف..مشعارف شن اللي يديرو فيه هدا طلعت وسكرت الباب بالمفتاح
اني..شنننووو اني مانببييش نقعد معااك خييرهمم هككي
محمد شافلي..يعني ع اساس اني فرحان؟ ماك قرف كلك ع بعضك
اني..اطلع مانبيكش ماااانبيييش ننننشووووفك😭😭😭
محمد..تعرفي تمشي تنقبري في دار وتقلبي وجهك من عليا خير والا لا؟
خشيت للدار وجيت بنسكرها بمفتاح لكن مالقيتاش عرفتهم هما مخططين لي كل شي💔💔
قعد محمد يتصل بيهم لكن مايرد عليه حد
.
.
فاطمة..سكرت عليهم الباب بالمفتاح شن ندير
بوه..اهو وصلنا احني هي بري فوق راكب اني والشيخ
فاطمة..هي هي
ركبت فاطمة لشقتنا وقعدت اتضم فيها وتهوي فيها شوية ونسمع في الحوش انفتح
محمد..وينكم يابوي شن لعب هوا اللي اديرولنا فيه !!!
بوه..وين مرتك
محمد..خشت دار
بوه..باه خش تفضل ياعبدالله
عبدالله..السلام عليكم
محمد..وعليكم السلام
بوه..هدا صاحبي برا خششه انت للصالون تو نجي
محمد..هدا اللي مشيناله امس
بوه..ايه
محمد..وعلاش شن تبي نخشله مانيش خاش
بوه..تي خش قعمز مع راجل عازمه عندي
محمد..باهي
خش محمد وخش وراه قيس طول وسكرو الباب بالمفتاح
وعلقو على محمد😂
خش عمكم الحاج لي ميس
اني..كيف حالك عمي
عمي..الحمدلله يابنتي الحمدلله انت كيف حالك
اني..ماشي الحمدلله
عمي..البسي بدلة الصلاة يابنتي والا عباية ووشاح وتعالي وراي
اني..وين
عمي..ديري اللي قتلك عليه بس
نضت لبست بدلة الصلاة ومشيت وراه
عمي..اني جايب شيخ
اني..علاش؟؟
عمي..باش يعالجكم
اني..علاش شن فيناا؟؟
عمي..توا جاوبيني بس وقت جتكم مرت بوك شن جابت معاها؟؟
اني قعدت نتفكر..جابت بكلاوة وجابت قالت مدايرة عصبان هيا وهوا هدا تقريبا
عمي..وانتم صدقتوها و خديتو وكليتو منها
اني استغربت..كييف؟ هيا يناري مريضة سرطان يعني شن بدير وجت وجابت هدا كله باش تتصالح معانا
عمي..ومن بعد جيتها هدي انقلبت حياتكم؟ والا من قبلها
اني قعدت نفكر وعقدت حواجبي وشفتله..من بعد جيتها هدي واحني معش مشينا القدام
عمي..مزال مش فاهمة يابنتي؟تي هدي لفعة كدابة هدي تبي تفرق بينك وبين راجلك انتم واكلينه يابنتي واااكلييينه ومش غريب حتى تكون اشبح شن حاطتلكم في الحوش
ونسمعو عياط محمد
اني شديت في عمي..خيره!! شن فيي
عمي غمض عيونه..كنت حاس والله الا كنت حاس
اني..شنو صاير
عمي..ماتخافيش الشيخ يعالج فيه معاه قيس اكيد مش حيصيرله شي
اني قعدت نبكي..😭😭
عمي..يابنتي هدي نفسك بس
اني..عمي كلملي عمي هيثم ارجووك
عمي..يابنتي موضوع هدا خليناه بيننا مانبوش حد يعرف
قعدت مقعمزة نبكي وكل مانسمعه يرجع والا نسمع عياطه نقعد نبكي اكتر واكتر
.
.
وفات علينا هاليوم اني و محمد حالتنا كانت بالويل ومايعلم بيها الا ربي💔
#يتبع
.
.
شن بيصير في ميس ومحمد وهل لو تعافو بيرجعو لي بعض او حينفصلو!؟؟؟🔥🔥
ميس بعد كل الاهانات والضرب اللي خداته من محمد هل حترجعله!؟؟؟🔥
منى شن حتكون ردة فعلها لو عرفت انهم فكو السحر اللي داراته!!؟؟؟🔥
وأيوب هل حيوقف معاها او ضدها!!؟؟🔥
كله حنعرفوه في الحلقات الجاية🔥🔥
#حنو