قمر الليالي

1

علي المغارب ماشه في الشارع متالمه ما قادرة امشي قلبي مكسور ،
حزن الدنيا والعالمين فيه .. اشعر بخيبه وخزي وعار .. اعمل شنو ؟ امشي وين ؟
ما عارفه الوم نفسي ول الومه هو ول الظروف ..
صوته برن في راسي (( اطلعي بره من حياتي ..انتي كده حققتي حلمك فرقتي بيني وبينها واخدتي العايزاه  وعشتي المشتهيه تعيشيه ))
حاسه بغرسه اصابعه في يدي وهو بجرني لبره باب الشارع 😢 ورزعه باب الشقه
انا استااااهل
اني حبيته بقوه حب من طرف واحد
انا استااااهل
اني فرطت في شرفي بالسهوله دي
انا استااااهل
ميه كف موش كف واحد اني امنت ليه ..

رجعت البيت اليوم داك ما عارفه كيف 😢 الحمد لله لقيت ماما ما موجوده فتحت الباب ودخلتا الحمام طوالي .. فتحت الدش ودخلتا تحته بهدومي وببكي حسيت المويه الدافيه بتريحني انها خلتني ابكي بصوت ونحيب
قلعت ملابسي وبنضف في جسمي من وسم وعار ياريته لو بطلع بالصابون لكن للاسف ده حيكون معاي مدى حياتي
ولسه ببكي وح افضل ابكي 😭

بعد مساااافه  حتى طلعتا ملفوفه ببشكير دخلتا غرفتي واقرب ملابس لبستها ورقدتا في سريري ودخلتا تحت اللحاف حسيته لحظتها اكتر مكان آمن ولسه برجف ومرهقه وحاسه بالم
سمعت صوت حركه في البيت .. تكون ماما رجعت اقابلها كيف؟ اقول ليها شنو؟ كيف عيني تلاقي عينها ؟ انا بتها الوحيده الطلعت بيها من الدنيا بعد بابا طفش وخلاني رضيعه في يدها وفيما بعد .. بعد كم سنه سمعت انه في اوروبا عايش واتزوج وعنده عيال وبالنسبه لي وليها تحصيل حاصل انه زي الميت واحد ..
انا خذلتك يا امي سامحيني 😢😢😢😢 انا وطيت راسك
كل مجهودك وتعبك و فخرك بي راح سدى

دقت علي باب الغرفه ودخلت بحنيتها المعتاده علي تنادي فيني .. قموره يا قموره مالك مدمدمه بالغطاء كده افتحي وشك ده بتكتمي نفسك بالطريقه دي ..
مااا رديت عليها
حاولت تشد اللحاف من وشي انا كنت متمسكه بيه شدييييد ما عايزه افتح وشي كانها حتشوف فيه كل الحصل الليله 😢😭
قموره اتغديتي حبيبتي ؟ (ما رديت )
يابت مالك ردي في شنو الحركات دي ؟
قمر قمر يا قمر وتشد في اللحاف
رديت عليها قلت ليها يا ماما انا بردانه استحميت وغسلتا شعري هسه وبردانه ..
وشبعانه ما عايزه اكل
قالت لي خلاص يا بتي امشي اعمل ليك كاكاو ساااخن مع كيكه يدفيك ويسندك شويه ما دام ما عايزه تاكلي

عدت ربع ساعه كده جات شايله صينيه فيها كبايتين كاكاو وصحن فيه قطع شوكلات كيك

ماما اصرت اقوم وجرت الغطاء مني قلت ليها شعري مبلول و المكيف فاتح
قامت سدته وجات قعدت .. جرت مني الغطاء و وتحنس فيني تقول لي حاساك ما طبيعيه مالك احكي لي امكن افيدك براي ول بنصيحه قومي يا بت الكااكاو حيبرد انتي بتحبيه حار قومي

اضطريت اقوم ونزلتا شعري في وشي عشان ما تشوف اثار الكف 😣 اصابعينه مسطره علي خدي
مدت لي الكبايه اشيلها مديت يدي الكدمه الزرقاء من مسكه يده و جرة لي .. ظهرت لامي ختت الكاسه و مسكت يدي بخلعه مالك يا قمر مالك حبيبتي الحاصل عليك شنو انتي ما طبيعيه اصلك ..
قلت ليها قبيل لمن رجعتا جيت ادخل البيت اتضربتا بالباب
قالت لي دي ما ضربه باب دي مسكه يد الاصابع هدي واضحه
انا ما ح ازهجك و اضغط عليك اكتر من كده لكن لما تروقي كده تعالي احكي لي براك انا امك لو ما سمعت ليك حيسمعك منو يا عمري ..