உன் அன்பில் சுகமாய் தொலைந்தேனடி(முடிவுற்றது)

17

அன்று சற்று முகத்தில் உறைந்த புன்னகையுடன் மாறன் உள்ளே நுழைந்தவன் முதலில் தன் தம்பியிடம் சென்றான்

.ராஜா "என்ன அண்ணே இவ்ளோ சீக்ரம் வந்துட்ட அதுக்குள்ள கல்யாணம் முடுஞ்சுதா ?"என்க

மாறனோ "ஏன்டா நீ வேற "என்றவன் அங்கு நடந்த அனைத்தையும் கூற

ராஜாவோ "எது மோகன் அண்ணனா நம்பவே முடியலண்ணா "என்க

மாறனோ "என்னாலயும் நம்ப முடிலடா அண்ட் இன்னைக்கு தான் இலக்கியா மேல எவ்ளோ காதல் வச்சுருக்கேனும் புரிஞ்சது .அவங்க அவளை கல்யாணம் பண்ணிக்க சொல்லி அவ அமைதியா இருந்த ஒவ்வொரு செகண்டும் துடுச்சு போய்ட்டேன்டா. என் உயிரே என் கைல இல்ல "என்க ராஜாவோ மனதார தனது அண்ணனின் காதல் வெற்றிபெற வேண்டிக்கொண்டான் தான் அந்த காதல் வெற்றிபெற தன் வாழ்வையும் பணயம் வைப்போம் என்று அறியாமல் .

நாட்களும் சென்றது வருடங்களும் உருண்டோடியது .இலக்கியா தனது கல்லூரி படிப்பை இந்த வருடம் முடித்திருந்தாள் .தற்போது ஒரு பிரைவேட் பள்ளியில் ஆசிரியையாக பணியாற்றி வருகின்றாள் .ராமன் கலாவுடன் தனது பணியை மேற்கொள்ள சென்றுவிட்டான் .வருடம் ஒரு முறை தான் வருவான் .மாறன் இலக்கியாவின் உறவு மாறனை பொறுத்தமட்டில் வலுவான காதலாகவும் இலக்கியாவை பொறுத்தமட்டில் வலுவான நட்பாகவும் வளர்ந்து வந்தது .

இலக்கியாவின் தந்தையான சங்கரர் அவள் கல்லூரி இரண்டாம் ஆண்டு படிக்கும் பொழுது நுரை ஈரல் புற்றுநோயால் பாதிக்கப்பட்டதால் மாறன் தான் இலக்கியாவை ஏதேனும் தொலைவான பகுதிகளுக்கு அழைத்து செல்லவும் அழைத்து வரவும் என்று இருந்தான் .அவளின் பதினெட்டாவது பிறந்தநாளிற்கு தன் காதலை கூற வேண்டும் என்று நினைத்தவன் அவள் தமக்கை செய்த செயலால் அவளிடம் தன் காதலை கூறவும் இல்லை பார்வையிலும் அவளிடம் தன் காதலை உணர்த்தவும் இல்லை .

விஷ்ணுவிற்கு அவனின் தந்தை வழி அத்தையின் மகளான லட்சுமியுடன் திருமணம் முடிந்திருக்க அவள் காட்டிய அன்பிலும் காதலிலும் தனது கடந்த கால கசப்புகள் அனைத்தையும் மறந்து அவளுடன் இனிமையான இல்லற வாழ்வில் திளைத்திருந்தான் .அவனிற்கு ஹர்ஷவர்தன் என்று தற்பொழுது குழந்தையும் பிறந்திருந்தது .