وصلتى 30 ومش راضية على روحك لا نفسيا ولا عقليا ولا حتى عضليا
تحسى لحمك مدلدل ووجهك تاعب ونفسيتك نفسية عزوز ترملت سبعة مرات
لاعندك نية تاكلى وتاكلى بس باش تعبي الفراغ الى تحسي بيه
فراغ يحسسك بالوحدة حتى لو كنتى عايشة مع مليون بنى ادم
قلبك الى زى غرس جنان مافيش حد معبره الا برحمة ربي بشوية التبشبيش مطر فى الصيف
اخر طموحك انك تعيشي عشية طبيعية فى بلكونة بفنجان قهوة من غير صوت عياطات ولا صواريخ ولا اخبار موته
اخر همك شن راح يصير وكيف بيصير ومعاشك نزل او لا وشنو بتطيبي العشاء
حتى نفسك الى تهدرزى معاها طول الوقت معادش فاهماتك شن تبي
زعمة هرمونات ! 🙄
طفولتنا راحت فى الحصار مراهقتنا فاتت فى الثورة وشبابنا فى كورونا والحرب
يستر الله على باقى عمرنا هذا كان فى باقى
ربي اعطانا خيرات ورزق وجنة عالوطا بس العباد ماخلو فيها شىء قريب يحرقوها حرق تقوليش عندهم ثأر مع الكوكب
😕 صراحة لو انا ارض الى عايشين عليها راهوا قداش ليا انشقيت وبلعتهم ومرات ترجعهم من كثر قرف عمايلهم
قالك ترتاح بلاد وبيعوضونا
حتى لو عوضوا الحياش والبلاد
عمرى الى راح من بيعوضنى فيه
طموحى الى بنيته وحلمت بيه من صغرى من بيعوضنى فيه
جايينا فى الوقت الضايع وتبو تقنعونا ان تبو تصلحوا البلاد وتصلحونا
مانظنش مازال فيا شىء يتصلح
لو فى ماكينة تصوير لروح متاكدة راح يلقوها متفرتكه ومتشققه ومسوسه ومتهرية
من البلاء الى عايشينا
وتسالهم يقولك شعب طيب
والله طيب هو الى يقول هك
😒 فيش حد راح يفهم هالكلام الا الى شعوره خانقه
وحاليا فاتت مرحلة الاختناق لان شكله شعورى مات
