الحلقة اخيرة ناس كلها اتعاديت معاها والسبب ان بطلت نجامل خلى ال....... يعرفوا ارواحهم انهم ......... ومع هذا وجوهم زى الزينقوا لن تقوليها عربية
فى حياتك لازم تقابلك وحدة تعامل فيك معاملة انك اقل منها تقوليش هى من سلالة ملكية
تشبح وجهك تستفزك بالاسئلة او بالنصائح او حتى بالبصارة تدير فى روحها تخفف فى دمها
ومصيبة انك تسايري فيها بضحكة صفرا باش تسكت ولا باش يفوت نهار على خير ماتبيش تديري مشاكل لان بدير روحها ضحية وانتى متاع مشاكل او تخمم انك خايفة منها وماتعرفيش تردى
لا يا ماما لااااااااا ياماما اسمعينى جاى وفى وجهك معادش بنقوله بينى وبين روحى
عارفة فضايحك وحياتك واسلوبك ولوين تبي توصلي فبطلى هالحركات القرعة وبرى شدى نصايحك فى شلامتك واستعمليهم لاياماتك سود وخلينى انا بخيري بشرى بدراه كبدى الى مش عاجبك وحياتى مقعفزة ومقالك حد تعالى غيرينى
😂😂😂😂 يااااااه قداش ارتحت
وفى جهة تانية من حياتك تلقى الى فى قفاك ماتخلى ماتقول وهى تمشى وتدوى بيك الا ماتقوليش مخصصة حياتها ليك وناسية حياتها الى راحت فى قرمة ومصيبة مش هنا اول ماتشوفك تجيك تضبط فيك وتبوسك تقوليش مروحة من العمرة ولا بايته معاك امبارح
تعالى جااااى يا همى اغبر 😠😠😠😠 انتى بالذات نعتبرك من منافقين ايام جاهلية عالاقل الجاهلية كان عندهم اخلاق تقوليش شن صحة الوجه الى عندك زينقوووووووا زينقوووووا دام فى قفاى طايحة فيا باط باط علاش تضبطى ولاتحسابي دوة ماتوصلش حشرة 😏
ياربي 🙄 قداش ما ارتحت
وفى مكان ما من هذا الكوكب تشوفى عنصر لاتعرفيه فلزات لا جماد الى تحب تسال حتى لو ماتعرفيهاش وتلاقتى معاها صدفه خبطتى فيها فى طريق تقولك وقفى شوى حبيبه نبي نسالك 😒
تزوجتى اطلقتى تقرى جبتى ومعاها تطلب فى اجابة علل يعنى تبي شرح وتتفكر حتى جد جدك تبي تعرف شن شجرة عائلتك تقوليش شاده سجل مدنى وبتفتح منظومة
هادى مانبيش نقولها اسمعينى ولا ياماما هى كلمة حبيبة بروحها خلتنى نحس دم ركابي فى عيونى خير فيتك انتى بنى ادمه ولا العقل الى عندك منحيتيه وحاطه فى مكانه صفصفه انتى شن علاقتك بيا اصلا باش تسالينى وتقصقصى على جد جدى سكرى فمك والهى بروحك وشديلك كتاب معلومات عامه اهوا عالاقل ينفعك
يالله ارتحت 😧😧😧😧
ومن هنا وغادى يقابلك مواقف تخليك تجاملى بالسيف عليك على اساس جو اتيكيت وانتى مرارتك حاصلة فى رئيتك
اسمعى خيرك لطف سامنه نقصى ماكله
😕😕 وشن دخلك انتى ناكل بسنونك ولا تمضغيلي نسمن ولا نطربق حاجة تخصنى
خيرك العفو رايحة بتموتى 😅 شكلك تقول مريضة
🙄 انتى بالذات سكرى كراجيمك جيت عاينت عندك ولا دخت قدامك عندى هبوط تى صحتى خير من صحتك ياخايخة
😨😨 حىىىىىى سدمه انتى اختك هادى خيره اختك احلى منك انتى مش ليهم بكل
🙄🙄 انتى بالذات مفروض مانردش عليك نعطيك تيسته طول بالك يجيك ارتجاج وحالتك يصير منها تى شن تقييمى فى شكلى خالقه روحى انا حتى كفار ماقالوهاش
تقعمزى فسط مجمع تبي تهدرزى هدرزة عادية تنتخص وحدة منهم بتورى فلاحتها وبتدير حفلة عليك شن خطوبتك مطوله خطيبك شكله منتف خيره شين بتسكنى مع اماليه ولوك لوك لوك وانتى تقعدى مسهمه تشبحليها من صدمة هادى خيرها وتحاولى تردى ببصارة ومجمع كله يشبحلك شن ردة فعل
وانتى شن علاقة امك بيا دام انا بناخذه ولا غير انتى بتموتى حاطه عينك عليه ماهو هكى نوعك محسدية دامه انا راضية نقعى روحك فى اشيدوا بالك قلبك يبياض وسط ذهول متابعين😯
تلقاك مرتاحة ومقتنعه بقسمة ربي انكم عايلة فقيرة تنوض بنت بيل غيتس عاد خيره ستايلك ديمه هك شوفى بنات كلهم لبسهم ماركه فى كليه وانتى شدى فى بوك يدبرلك بسيف عليه انتى بنت وكيف بتطيحى شباب وتتزوجى وترتاحى من عيشتك
🙄🙄 ومن قالك نبي نرتاح من عيشتى انا مرتاحة وعاجبنى وضعنا ولبسى وانتى مش تلبسي وتشخلعى خلاص مش لازم كلنا نطلعوا نسخ ومرة تانية مصمصى فمك وماتتكلميش على بوى مش خير من بوك الى يخنب فى رزق العباد 😏
ويا ليلي وايليه وش بيش نشكيلك يما 😂😂😂😂 حسيت ان كتافى مرتاحة
هذا قليل من الكثير فى اشكالات تقابلنا فى حياتنا ونجاملوا فيهم ولو قلنا الى فى خاطرنا انا متاكدة مليون فى ميه راح يصير حرب عالمية رابعه او انهم يبدوا ناس يخافوا منك ويحترموك بس فى حالتين راح ترقدى مرتاحة يعنى مافيش حاجة تغل فيك وخاطرك بتقوليها وتسكتى لا قولى العمر واحد وخلى كل وحدة ال....... تعرف روحها انها ..........
