على متن مركبة تائهة
بدون مصابيح ولا حتى نجوم تدل على مكان تواجدى
على ما يبدو اننى تهت وسط الامواج
لم يكن لى خيارات عديدة سوى انه كان معى مجداف
حتى فقدته فى احدى العواصف
لعنتى حظى مرارا حتى ايقنت ان الخطا منى انا
لو تمسكت بهم جيدا وفكرت فى عواقب لما حصل كل هذا
وفى ذات الوقت لو لم افقدهم لما رايت الامواج والعواصف وما سرت عشوائيا
لمحت جزيرة صغيرة ستوب وقفوا وقفوا ✋🤔
انا بروحى مش فاهمة شى من هالخراريف تقول عليا فى مسلسل مدبلج 😒
تى كيف امالا الى شادينها وراء خواطر وكتابات العشق المفتوح واشعار
الله غالب حاولت بس الفصحى عندى متزمرة من ايام حصة العربي للى كنت نهرب منها باش نلحق على مقصف قبل ما يبدا زحمة على هاديكا لحسة التن الى احلى من ماكلة المطاعم
مش عارفة شن السر الى فيه مع ان معبي زيت 🤔
حبيت هالمره مانحكيش على شىء محدد
توا بالله زمان عنتر وقيس حبو بجديات وكتبوا اشعار ولا غير مكسدين وماعندهمش كارطة
يمكن ماكانش عندهم ضىء ونت
تى توا فيه نت وغير اتعلمي بس
ونحاول نستشعر ونالف دماغى مافيش
حتى الاجواء مرات ماتختلفش اهو حتى احنا مافيش ضى وقاعدين على شماعى
يعنى شن نلبس عمامة وهركة وناجر حصان نفوت موضوع خير 😒
باهى 😰 نيوتن خاطرى نقابله بس
تفاحة يا ظالم تفاحة على من تخطر طاحت على دمنقله وطلعله قانون
انا كان يطيح حتى ليم شفشى راه قشرتها ودرت بيها كيكة
زعمة كان جيت فى وقتهم كيف راح نكون
سرحاااااااانه نتخايل 🙄 😵
نتخيل فى روحى جيت فى ايام عنتر🙄 لالا مش مستاحشة الغزوات والحروب اهو انا فيها توا
خل نتخيل شى تان 🙄
كان جيت فى العصر الاسلامى وابن سينا والهيثم
ايام كان العرب ليهم هيبة وقيمة
بختى ونعرفه راه جيت مع مجاعة اوروبا 😥
لو فى ايام الجاهلية 🙄
لالالالا 😰😰😰 يدفنونى حية ولا بيعوا فيا جارية من كافر لكافر ويلقبونى رقاصة قريش 😭😭
ياريت حتى نعرف نرقص حتى نص درهم مايشرونيش
وزيادة نخدمهم نصب الخمر ونعزف على طرف لوحة 😥
علاش ديمة نتخايل فى الحاجة الشينة 😐
حتى فى الخيال ماننفعش ونكد على روحى
زعمة فى حد زينى ولا خل نمشى نتعالج
وين بنتعالج على اساس هنا يدوروا فى علاج النفسي
تى مايرفعوشى الا بعد يقطع وريش ومعادش يزبط الحمام من الكوجينة
ياريته حتى مستشفى قرقارش يقبل سكروه ولا داروه مول ستى سنتر 😒
