مافيش حد فى ليبيا مافكرش للحظة بالسفر لى اوروبا او الهجرة , علاش عاد هادى بروحها تبى كتاب
لان ماشاء الله من كثر ما بلادنا ماهى حلوة ومنتزهات وترفيه وقايمة بينا لن احنا فادين ونبوا نهجوا ملينا من العز نبوا التمرميد شويا باش نحسوا بالواقع تبو تصدقوا باهى ماتبوش بكيفكم
اساسا احنا شعب طماع ولايعجبنا العجب ولا صيام برجب وبدليل الاجانب بيموتوا باش يجوا لليبيا
والشاب الليبي فينا لاعبين بدماغه ومفهمينا ان اوروبا هى الحلم العربى وهوا الى يمشى يشحوروه ويحندبوله ايامه وكان حظه حلو وامه داعية عليه يحصلك وحدة اجنبية ربى عاميها ولا كيف تاخده تحن عليه ويعيش فى جرتها
وبعدين يدرهنا كبودنا عالفيس بالامبات عاد وبرتالامبة وفلاشات العرس وننعميوا احنا زى هلبا ناس وهو رايح وجها مغبر خاطمة عليه عجاجات القبلي
والليبية اهو تعاليلي هنا تحلم حتى هى كيف لا بس حلمها على داب الداب لا هروب لا بطاطا , يادوبها كان حصلت واحد بيسافر ولابيقرا ولا بيخدم بره ايييييه وين تلقيها الخشم فى سقف واللغة تقول حصلتها قبل ماتطلع
وامها قريب ديرلها اعلان تاشيرة فيزا عالنت وجيران الشرق الاوسط سمعوا
وكان وصلت صور الطلعات والعشب واهم حاجة كندرتها وخشمها فى صورة للمصداقية بس
حتى من سطول الكناسة تصورهم وتقولك كناستهم غير
فى هالهردميسة هادى كلها المواطن الليبي والليبية بعد يشبحوا الصور ويسمعوا سمع هنا يتخيلوا فى قارة اوروبا زى كنز على بابا الى مافيش حد عارف وين مكانه لتوا والخيال هو سيد موقف ............
