راح تكبر وتعرف ان هلبا حاجات زمان كنت هازى عليها وماعندهاش قيمه توا بدت اهم حاجة
راح تكبر وتعرف حقائق تصدمك وتغيرك لشخصية تانية وتبدى تغيرى فى خططك وحياتك على هلبا مبادىء جديدة
والى زمان سمعتي من جداك ولا امك ولا حد كبير وماصدقتيشي حاتبصمى بالعشرة انه كلام صح وخسرك هلبا وقت باش تفهميه وتعيشي
راح تكبري وتعرفى
ان الوقت الى راح وانتى متغششة اهم من عمرك الى جاى
راح تكبرى وتعرفى ان الصحبة ومحبة مش بالكثرة حايتغربلوا زى نهائيات كاس عالم وتخلى بس الى يستهالوا ان يكونوا معاك
راح تكبري وتعرفى ان التضحية كلام فاضى وكذب وموجود الا فى الافلام ومسلسلات
راح تعرفى ان اكثر شىء راح يفرح فى يومك يفوت وانك مصلية خمس فروض فى وقتهم وانك مادرتيش ذنب قعد فى رقبتك
راح تفهمى ان الفلوس فى حياتك باش ماتستحقيش لحد ويذلوك بيهم
مهما كليتى ومهما طيبتى ومهما تبعتى صفحات وصورتى مش راح تفرق على حد كلى خبزة يابسة وميه لان فى حالتين بطن راح تتعبي
خاطرك ونفسك لو بتبعيها راح تجرجرك بس لكبر العين والهمع والحرام لهذا القناعه قالوا كنز
مهما لبستى عالموضة ولا لبستى قديم شخصيتك هى الى تحدد منو الى يبيك على طبيعتك ومنو الى شايفك فورما ومع الوقت الفورما راح تنكسر
فيش حاجة راح تفرحك غير الى انتى اختاريها بااقتناع ومن غير ماتكونى نسخة على باقى الناس
الوقت راح يفوت زى ما الهم والنكد والحزن راح يفوتوا المسالة مسالة صبر بس
الانتقام من الى ظلمك مش راح يطفى نار قلبك مش زي لما تشوفى ربي انتقملك بطريقة تانية غير ملكنتى تتوقعيها لدرجة انك راح تنسى الموضوع
عمرك ماتبيعي حد حبك حتى لو الناس قالتلك هذا اهبل هذا درويش هذا طيب وماعنداش شخصية ويشجعوك تاخذى الى عنده فلوس ومنصب فى اخير راح تندمى وتتمنى لو انك اخترتى الاهبل
عمرك ماتجاملى حد على حساب صحتك ونفسيتك ووقتك لان فيش حد راح يقولك بيه ويطلعوك فى حالتين ماتنفعيش
عمرك ماتصدقى اى راجل عمره فوق 10 وتحت 80ّ
تعليمك وخدمتك اهم من الزواج
لبس مستور والوجه الطبيعي بلا مكياج احلى عليك حتى لو اقنعوك انتى شينة قوليلهم خلق ربي وعاجبنى والى مش عاجبه مايشبحليش
عمرك ماتفرحى بالكلمة الطيبة والضحكة وتقولى هادم اعز الناس لان احتمال مع الوقت اعز ناس نفسهم اكثر ناس راح تكرهيهم
خليك صريحة وقولى الى فى خاطرك من غير تجريح ولا زيادة دوة باش مايجيكش ضغط وسكر بكرى بكرى
عيشي يومك وماتغششى على خاطر حد لان احتمال غدوة تموتى وانتى متنكده فامفيش حد راح ينفعك
ماتخلى شى فى خاطرك على حساب حد تانى لان نفسه الحد التانى مش مدايرلك حساب
المكان الى ماتبيش تمشيله ماتمشيلاش والكلام الى ماتبيش تسمعى سكرى وذانك والى ماتبيش تشوفى ماتشوفيشي بمعنى اكسبي راحة بالك
احلامك وطموحك وانتى صغيرة ماتخليهاش تقتلك فى الكبر
لو حاسه انك بروحك ومافيش حد فى صفك ويوصلك شعور انك خلاص تبي تنتحرى تفكرى ان ربي يسمعلك فى اى وقت وحاتنصدمى بنتيجة تغيير حالك
قلبك ردى بالك تعطيه لأى حد لان احتمال كبير يدير بيه قلايا وهو واصحابه
ردى بالك تقولى نخلى روحى فى العازه على خاطر اولادى لان نلقاهم فى الكبر برى زيارة لدار العجزة وتوا يحكولك
لو شفتى شحاته او حد جاك طول يطلب منك لو عندك اعطيه ماتقوليش هذا تمثيل هادم كذابين لان مرات صدقة هادى تنجيك لبعدين من غير ماتعرفى
عمرك ماتتشمتى فى حد او تقولى هادى كيف قدرت تدير هك لان ماتندريش عادنيا مرات تنحطى فى نفس موقف وماتلقيش من يرحمك
خليك على نيتك مهم ربي عارف شن فى قلبك وان شاء الله بنيتك ربي راح يحاسبهم
وفى اخير ردى بالك تخافى من الموت لان فى حاجات تخوف اكثر منا
