تستاقضى من نوم😊 فى دار ورديه وسرير فراشه ناعم
تمشى للحمام تغسلى وجهك🤗 بمقشر صباحى وتغسلى سنونك وتاخذى دوش سخون فى بانيو🛁 فسطه معطرات وللافندر وابصر شن يسموا فيه
تكملى تجففى شعرك وتلبسي بيجاما ناعمة 😊
وتخشى للكوجينة تولعى ماكينة قهوة ☕وتاخذى فواكه وكورن فلكس بعد عشرة دقائق توتى قهوتك وتاخذيها وتقعمزى ف بلكونة 😌
وتتفرجى على الصغار يلعبوا فى حديقة العمارة وناس تعوم ف حوض سباحة وبما ان حجر صحى الطريق فاضية ومحلات مسكرة
فقررت شركات ومراكز حكومية ان نخدموا عالنت وتفعل البطاقات الالكترونية💳 وخدمات توصيل
تقعمزى تفتحى اى باد تلقى رسائل من العمل تكملى خدمتك وتشوفى اخبار البلاد 📱
قام الرئيس بزيادة المرتبات 100%💷 وتوفير خدمات صحية كاملة شاملة النقل بسبب جائحة كورونا 💊
يجى وقت الغداء تتصلى بمطعم تطلبى غداك🌮🌯 يجيك للحوش تتغدى وتحطى الصوانى ف غسالة الماعيين 😊
وتاخذى رياضة مشى على جهاز السير
يجى وقت العشية تركبي لفوق السطح تلقى garden roof او زى مايسموا فيها جردينة ونافورة وورد تقعمزى يجوك جاراتك وتهدرزوا طبعا اكيد من بعد الصلاة
تاخذوها تهدريز لى ليل وانتم فاتحين افلام نت فليكس وبوشار وتشبس وباقيها
تجى ساعة عشرة تسلموا وكل وحدة تنزل لحوشها
وتاخذى جلسة خفيفة فى ميه سخونة ف بانيو
وتحطى كريمات ترطيب وخلافه وتصلى وترقدى
🙄 يااااااااااه
تستاقضى تلقى روحك الضى هارب وتنزى عرق تتعوذى من شيطان تخشى تدوشى تلقى ميه مهناش
تفتحى النت تبي تفهمى شنو ف تشوفى خبر انهم مفجرين طوبوا من طوبات نهر الله يفجر مصارينهم
تجيبي بانقا ميه حلوة وتمصمصى بيها عمرك
تخشى للكوجينة تبي تسممى يادوب تولعى الغاز للقهوة تلقيها فضت تسالى جيران تلقيهم مهناش من فجر شنو ف طالعين قالك ف غاز فى راس جدير نمشو نعبوا
ترجعى تفتحى النت شن صار ف كورونا دام ناس ماشية تزاحم غادى تلقى زيادة حالات
والرئاسة تقرر تقليص مرتبات لنص
ومصرف مسكر لاشعار اخر
تقعمزى على بلكونة بالك تشمى هواء صدرك اطبق من اخبار عالصبح
تقابلك صنة شياط لاتعرفيهم حارقين كناسة لامفجرين بعضهم
تشوفى لوطة تلقى كنايس كداس بروحها تجيب وباء وصغار يتحاذفوا بالرشاد وطرق مدقدقه
شن بتتغدى ومحلات مسكرة ومافيهاش كيف
تاكلى خبزة بايته مع تن الحمد لله
تركبي سطح تتلاقى مع جاراتك كل وحدة تشكى وتبكى الى مرارتها فايضة ومالقتش دكتور
والى تبي تطلع وبلاد حظر والى متعاركة هى وراجلها فدت من قعاده مقابلها
والسطح رايح مقشر من شمس والطوبوات خارثة من الصداء ومنظر رشاد وسطلايت والخيوط تقوليش مركز تهريب اعضاء بشرية
يقرموا عباد ربي وقدامهم باسطى مشفط وشاهى ناقص سكر لن يجى الليل تنزلى تتدعى يارب ف ميه تلقيها مهناش والصفحة كاتبة ان مازالت الصيانه لعدم وجود طوبوات
ترقدى وتتدعى يارب طلعنى من هالبلاد بس تتفكرى ان اوروبا حالات وفيات فيها قريب مليون
الحمد لله جتنا فى البلاد ولا فى العباد
