مش عارفة شن بنكتب وكيف بنبدأ هالمرة , كيف قلت يا معين وحطيت مكاسيري على الكيبورد وبه طف , هرب الضىء , هههههه ايوة ايوة اضحكوا ماهوا كلكم نفس الحال واحتمال حد فيكم هرب عليه توا ماهوا صايرله زى خيط المصارين متبع بعضه , على حسب اقوال الشركة الموقرة , طبعا نكتب وفى خاطرى ستين دعوة نتفكر فيها من ايام حناى كانت تدعى على الطليان , شكلها من بدايتها نكد ههه مازال شن ريتوا تى لن يطلعلكم الشيب فى ودانكم كملوا كملوا ......
السؤال الى حير الليبين ؟
مشهد من مشاهد هوليود طبعا مافيش اضاءة ولا شىء اركب اتلمس تلميس فى دروج لن توصل فوق الحيط هدا كان وصلت , احتمال تتكربى فى خيوط السطالايت ولا عقاب حكاك زيت سيارات داسهم خوك , مش عارفة علاش يدوسوا فيهم تقول بيعبيهم شامنت وبيديرهم حمل اوزان .
ويوقف فوق الحيط هو يدور ويستكشف , طبعا طريقة فطرية , زى ماكانوا ايام القراصنة يستكشفوا فى السفن , فى هاديكا الشبحة تقدر تعرف ان الضى هارب على جيران ولا عليك بس ولا عالجهة ولا عالبلاد , باش تعرف على من تدعى .
المشهد التانى سيناريوا قديم بالابيض والاسود وموسيقى حزينة
وانت كيف فاتح عيونك تلقى مكالمات والرسايل , لن تحسابه فى حد مات , ووقت تتصل بيهم يقولولك الحق الحق المصرف جايب سيولة , تجرى تلبس ومرات لا , يطلع بالتوته الى ليه اسبوع صابح وماسى بيها هههههه حتى عيونه معمشات , وشعره خاش بعضه تى عادى مهم الفلوس تى شن ماشى بيستعرض , على عكس البنت لو قالوللها جدك ناض حى , ماتطلعش لن تساوى روحها , شن جدها بيطير ولا بيطير مهم الاناقة
لكن فى اخر تساوى ولا لا حاتوصل مصرف يااما تلاقى ضرب رصاص وموتى وجرحى وتنقلب مظاهرات يااما اعطوا الفلوس للمعارف , وروح انت فى طريقك شحت قدام الجامع , هدا كان مالقيتوش فى طريقكم الشعب كله يشحت
طبعا فى ناس توا مش حايعجبها الكلام , كيف الليبين نشحتوا وهك الناس تسمع الى صاير ويضحكوا علينا , تى وكان حتى ننحرقوا من بيعدل علينا على اساس العالم شاقى غير بينا , هما شوى ويديرونا ملحق مع برمودا
نقول يلا ماعلينا خل نطلعوا وحق ربي نكره الطلوع كلهم يجروا وكلهم يجتازوا معادش تعرف على شنو يجروا ولا من يجرى فى جرتهم مصارينك فى فمك من الرعايش انك حاتموت بحادث ولا حايخش فيك واحد حمار
وخليك من الطانطات الى بدت تتلقلق وهى معبية وتجتاز عادى يعنى الى بينهرس تحتها مش مهم بنى ادم
توصل لشط تبى تغير جوك وحق ربي اول ماتوقف عالشط تشم صنة الفونيا متاع المستشفى تشوف الرملة سوده قالبة قهوى وناس تعوم عادى
تتعود من الشيطان وتدعى يارب طلعنى من هالبلاد قبل لا يصير فيا شىء لان من القهرة اعصابى تعبوا
تمشى تشد حوشك وتفتح النت تقابلك اشكال ومناشير تمرض كلها تشخليع وكذب وجكترة وتخلطت معيز وضان
انا تعبت من ان نحكى فى نفس المواضيع زعمة حتى انتم تعبتم ؟؟
