حالة خوف تنفس سريع وجهك مقلوب زى لون طرمس الشاهى وتفكر كيف بتموت
بصاروخ ولا طلقة طايشة ولا قاذف يطيح فى حجرك
هاذى حالتى توا وانا شاده الحيط ونسمع فى تقربيع وكانه فيلم ثرى دى عن الحرب العالمية
ناقصنا هيروشيما ونخلصوا مشهد
العايلة مقعمزين فى جنان يسمعوا ف صوت والالوان ويترقبوا فى الاحداث مش ناقصهم الا نديرلهم طنجرة سبول وطواسى ببسى
الى خايف من الجيران طلع والى ماعنده وين يمد وجها قاعد يستنى
يا هل ترى يموت ولا يكون شاهد ماشافش حاجة
وانا نكتب فى الكلام طبعا ريقي يابس وكان يحللوا سكر يلقوه عالى
فى ناس تقولى كان ربى كاتبلك بتموتى تموتى حتى فى فراشك علاش خايفة
ايوة نوعية هادى تلقيها عمرها ماشافت حرب ولا حضراته غير تتفلسف عليا وخلاص
زيد يازايد الضى هارب
يعنى مش عارفة شن مازال طرق تعذيب ماجربوهاش فينا
لحظات هدوء وتوقف الضرب لالا طلعت غالطة هذا غير يسخنوا فى درابيكهم
زعمة لو جيت ساكنة فى اوروبا راه توا نتدهور وطالعه مع قروب
بس حظى نعرفه لو ماجيتش هنا راه توا انا فى دارفور نحضر فى حرب الصومال ونجرى عريانه مع الاسود
نظرة خاطفة على كل حيوط الحوش وانتى تتوقعى اى وحدة بيخش فيها صاروخ
مع رقصات الدار على انغام التقربيع تقول فى حفلة مريسكاوى
مغص وانا ندور بمن نتصل نسال شنو فيه
حد يفهمنا على شن يتعاركوا
بالك نلمدولهم جمعية ونعطوهم غير يفكونا
خطر عليا تقعميزتى فى مسلسل الزير سالم وهى تدور فى كوليب الى ميت عالرملة
وصوت مفرخ الى يعيط بره
حتى العصافير معادش عرفوا وين يمشوا من خلعه نشبح فيهم يخبطوا يمين يسار
مرحلة تانية صوت مولدات
ايوة تقول علينا فى معسكر تعذييب ايام هتلر
مع دخاخيين الى فوق احياش تقول حارقين قومات
يزيد عليك حفلة ابورديم
هو احنا معتبرينا بنى ادمين ولا يشوفوا فينا تابع الحيوط ماليناش قيمة
خلاص نلبس حوايجى باش حتى كان يصير شى نطلع مستورة
صهد لامته بنقعد لابسة شوره عرسهم مطول الليلة ومش راقدين
شن نوعهم هالمخلوقات فضائيين
وفى عز نكد تجينى اتصالات يسالوا فيا شن فى عندكم
يحسابونى انا مقعمزة على اربعطاش ونص تى ماهوا زينى زيكم ماده وجهى نستنى فى الخبر
ماعندى ماندير غير نشد مغرف عالاحتياط كان هدوا علينا
مافى غير الصبر يا يقتلوا بعضهم يا نموتوا احنا
