30/12/2019
هتبقى خطوبتي ع واحد بحبه جدًا وهنبقي أسعد اتنين فـ الدنيا
- أنتي مجنونة! لا بجد أكيد مجنونة!
=خبرايه يا إبراهيم مالك!
- أنتي اللي مالك! إيه اللي بتكتبيه فـ النوت دا
= بكتب إيه! تاريخ خطوبتي!
- والله! خطوبتك! أنتي مش مرتبطة يامااا أصحاااي!!!
=يابني هو أنا فاقده الذاكرة مانا عارفه إني سينجل بائس وحزين
- آمال جبتي منين تاريخ الخطوبة دا؟؟
=نفسي ياأخي، أنا عايزه أتخطب فـ التاريخ دا وياريت لو يبقي يوم سبت _أنا بحب السبت_، و ألبس فستان أزرق_أنا بحب الأزرق_ ونرقص ع عبد الحليم
-عشان بتحبي عبد الحليم!
=أيوه براڤو عليك وبعد الخطوبه نخرج فـ....
- حيلك حيلك براحه.. أنا خايف عليكي بجد أنتي كويسة طايب تفكيرك سليم لسه فاكره عنوان بيتك!!!
= شايفني هبله! يا إبراهيم أنا عاقلة، بس دي حاجات فـ نفسي وأنا بكتب كل حاجه نفسى فيها_كعادتي يعني_أنت مستغرب إني ماتكسفتش منك وكدا يعني!!
عادي يابو خليل أنا من أمتي أتكسفت منك،، أنت ذى أختي ياراجل
- أختك!
=يوه مش قصدي، أقصد إننا صحاب وأنا ماليش صحاب غيرك يا إبراهيم داحنا بنخرج فـ العيد نختار اللبس لبعض و نطقم سوي، حد بيعمل كدا غيرنا!
-الحقيقة لا
=طاب خلاص يبقي أنا هتخطب يوم 30 فـ الشهر و أنت تجهز نفسك يابو الصحاب بقي وأشتري بدله نضيفة، ماتعرنيش وتأجر بدله!!
- أنتي حالتك خطر بجد، للدرجادي الهبل يارب!!
=ياخي إدعيلي ربنا يكرمني بعريس و ألحق أتخطب
-يارب ياختي... بس لو ماتوفقتيش يعني هيحصل إيه!
=هعوض فـ الشهر اللي بعده ع طول
-نااااااااعم!!!
=والله مابهزر لو ماتخطبتش فـ ديسمير هتخطب فـ يناير
- هو دا موسم هتلحقي السيزون يعني!!
=ماهو أنا لازم أحب وأتخطب فـ الشتا
= ماتنحليش كدا أنا فعلًا عايزة أحب وأتخطب عشان ألحق موسم الشتا من أوله
- أنتي هبلة صح! قولي ماتتكسفيش
=أنا هبلة فعلاً عشان بتكلم مع واحد زيك
وقومت وسبته ومشيت جرح مشاعرى القاسي فيها إيه يعني لما أخرج الكلمتين اللي جوايا معاه، مانا ماليش غيره شئ طبيعي أتكلم براحتي معاه فـ لقيته جاي ورايا وبينادي
=عايز إيه! مش بتتريق عليا وبتقولي هبلة!
-مانتي هبلة أكذب يعني!
= أهو بوص قلة الذوق بقي اوعاااا همشي
- لا خلاص ماتزعليش بهزر والله بس الموضوع غريب يعني أول مره أسمع كدا
=بقولك اللي فـ نفسي ياأخي
- طاب خلاص تعالي نرجع ونقعد نكمل وتحكيلي إيه تاني فـ نفسك
=لا مش هقولك أنت بتتريق عليا
- أنا أقدر بردو تعالي بس
- ها قولي ياستي اشمعنا عايزه تتخطبي فـ الشتا
= أنا بحب الشتا
- طاب اشمعنا ديسمبر
= ساقع اكتر
- دا إيه علاقته بالخطوبة معلش!!
= السقعة بتزود الحب معروفة يا إبراهيم يعني!
- لحظة! أنتي من نوعية البنات اللي بتكتب محتاجة لحاف طوله 180 و بدقن!!
= لا ياخي مش للدرجادي
- أيوه أنا قولت كدا بردو
= طويل 180 كفاية 170 عشان أنا قصيرة
- وحياة أمك!
= ولد عيب!!
- خلاص خلاص نتكلم بجد أنا أتمنالك والله إنك تلاقي بني آدم يحبك ويصونك أنتي تستاهلي كل خير وأنا بعزك والله
=أنا أتحب أنا عارفه بس المشكلة مش فيا يا إبراهيم!
- آمال فمين ياعنين إبراهيم
=ولاااا أظبط بقولك
-ماحدش يعرف يهزر معاكي كدا يابوي
- خلاص قولي المشكله فمين
=فيكم أنتم
- احنا مين!
= أنتم كـ رجاله يعني، صنف كذاب أوي وشرير وملاوع ومش واضح و الواحد لما يديكم قيمة تتنفخوا عليه و تشوفوا نفسكم ومالكوش كلمه مش مظبوطين كدا
-إيه دا فيه إيه!! إيه كل السواد دا يا ماما أنتي متعقده من الرجاله!
=أيوه مابحبهمش
- مابتحبيش الرجالة و عاوزة تتخطبي!! إيه مش هتتخطبي لراجل مثلاً!!
= لراجل أكيد، بوص أفهمني أنتو كـ رجاله أنا بكرهكم بجد بأمانه ومتعقده منكم ومش بطيقكم كدا بس لو ربنا يكرمني بـ واحد ابن ناس ومحترم أنا مش هعترض يعني!
-لا لحظه كدا ومادام انتي بتكرهينا أوي كدا إيه مقعدك معايا!!
= ما أنت مش راجل يا إبراهيم!!
-بتقولي إيه ياقلب أمك!
=مش قصدي ياجدع أقصد إنك صاحبي وحد بفضفض معاه مش راجل زيهم يعني، أنت راجل حلو يا إبراهيم.. مرضي كدا!
-مرضي، بس ع فكره أنا كمان مابحبش البنات ومتعقد منهم
=ناعم!!! دانت اكتر واحد بيعاكس! أنا ماشيه إلِم وراك مشاكلك مع البنات!!
-ياشيخه دا هزار بس لو جيتي فـ الجد انتو كـ بنات مُملين وبتحبوا التفاصيل بطريقة عبيطة يعني إيه _إحكيلي أتكلمت فـ إيه مع صحابك_دانا فاكر إني مرتبط بالعافيه كمان عيزاني أفتكر كلامي مع صحابي وبعدين رغايين كدا وتاكلو الدماغ وبتحكوا كتير
= اصمله عليك ليك ربع ساعه بتحكي أساساً
- أيوه أنا أحكي ماشي لكن واحده تاكل دماغي لا
= وبعدين يا سَبع الرجال كمل
- وهايفين وتافهين ودماغكم فاضية ونكديين يعني إيه جات الساعه 12 نبدء عياط طاب وهو العياط عرف منين إننا بليل و إنها جات12!!!
=تصدق عندك حق
- أهو شوفتي
=أبو الأرتباط ياشيخ
-أيوه فعلاً
=أنا مش هتخطب يوم 30
- طاب وديسمبر
= أنا كرهت الشتا كله قوم نروح ياسيدنا
