" النهاردة عيد الحب، ياكش تحس علي دمك بقي "
- عملتي كدا بجد؟
- ماهو خلاص بقي، خلاااااااااص بقي جبت آخري
- طب يا بنتي نتـ..
- نفسي في وردة، في بوكس، في شيكولاتة، في لبان
- يا رحمة
- إن شالله يجبلي مشبك يا ستي أنا راضية
- تقومي تعمليها باك جراوند تليفونه؟
- علشان الفت انتباهه، وياريته اهتم
- لية عمل اية؟
- صحي الصبح البيه، قولت امهد الموضوع خطوة بخطوة اكيد ناسي حبيبي ومش عيب اني افكره
- عاقلة، صاحبتي عاقلة
- فحطيتله وردة علي الكوميدينو جنب المنبة، شاطها بأيده وفرك عيونه واتمطع وقام دخل الحمام
- احيه
- مسكتش، قولت عادي فكنت كاتبة علي مرايه الحمام بقلم روج أحمر " بحبك " بخط صغير، ومكنش لابس النضارة افتكر المرايه مش نضيفة فمسحها بمنديل
- يا حظك يا بنتي.
- لا ومش كدا بس، قولت أنا بس الامل في الفطار، فعملت فطار ملوكي ولا فطار العرايس ورشيت ورد مجفف علي السفرة في محاولة لنشر البهجة والسرور وستر الخيبات
- حلو اكيد بقي اتكلم وقالك تـ..
- قالي البيض ناقص ملح، وسألني علي الزيتون المخلل، ابن جواهر نفسه مفتوحة علي الطفح
- و استسلمتي؟
- انا؟ ابدا، لبست ترينج احمر، وحطيت روج احمر وتنت احمر وقربت احط لاينسيز حمرا علشان ياخد باله، ووصلته لحد باب الشقة فبصلي من تحت لفوق وقالي " انت عندك الحصبة ! " الي يتفقع مرارته ويحسبنو عليه في ميدان عام.
لا ما أنا مش هستسلم والله، مش أنا الي يحصل فيا كدا، هفضل طول عمري في وضع السنجل حتي بعد الجواز !
لا شفت مخدرات بتطير، ولا سحاب وردية، ولا دلع حنين ولا حتي مخدات ريش.. أنا عاوزة ريش!
- رحمة حطيلي الغدا بسرعة الله يكرمك لاحسن واقع من الجوع.
كنت قاعدة رابطة دماغي من صداع التفكير، ولابسه عباية سودا علي اليوم الاسود الي اتجوزته فيه.
- معملتش
كان رايح للاوضة، وقف تلت ثواني لفلي
- قولتي اية؟
هزيت كتفي ببرود - بقول معملتش، مفيش اكل.
حط أيديه في وسطه ورفع حاجب واحد
- اه ودا لية بقي؟
- تعبانه
نزل ايديه وقرب مني - الف سلامة عليكي، مالك حاسة بأية؟
- بتلج
- نعم؟
- تلج نازل علي قلبي، من برودك
- انا؟ وانا عملتك أية بس يا قلبي ؟
- لا يا حبيبي انت نسمة، لا بتهش ولا بتنش
- شفتي بقي
- لدرجة أنك اتحولت لكائن صامت، بتسال سؤال واحد كل يوم بيدور حول " الاكل " هو مفيش حاجة في الدنيا غير الاكل !
- زي اية؟
بصتله باستعطاف - يعني مثلا اهتمام بسيط، كلام حلو، مشاعر نحاول نظهرها، مواقف جميلة، لفت انتباه، انت مفيش اي حاجة لفتت انتباهك خالص؟
- لا طبعا فيه
- يا فرج الله هينطق اهو
- فيه ريحة تقليه من شقة امي، اكيد حبيبتي عاملة محشي وملوخية وحاسة بإبنها
- امك؟ ومحشي؟ طب روح كل عند امك يا روح امك بقي
انا معمولي عمل علي رجل حمارة بتعرج، يعني اعيش عمري واقول ارتباط لا، حب لا، اي حاجة بعيد عن العلاقات الشرعية لا يجوز، ولما اتجوز ويبقي حلالي ويبقي برضو لأ؟
- أنا هتطلق
- صلي علي النبي اليوم لسه فاضله ساعات
- عليه الصلاة والسلام، ماهو بصي بقي يا دنيا مدام ما افتكرش الفلانتين زي بقيه الخلق يبقي مبيحبنيش
- صح يبقي مبيحبكيش
- يبقي أطلق
- خلاص اتطلقي
- اتطلق! انتي عاوزة تخربي عليا دنيا ؟
- نهارك اسود هرموناتك هتشتغل عليا انا؟
- هرموناتي؟ يا بنت اللذينة ! ازاي مفتكرتش في الحوار دا، اقفلي بسرعة اقفلي.
قومت لبست الاسدال والطرحة وجبت طبق بسبوسة من التلاجة، ونزلت لشقة حماتي قرة عيني.
- تعالي يا رحمة
كان صوت حماتي جاي من المطبخ
- مقولتيش انك نازلة يعني؟
كان قاعد بيتفرج علي الماتش شافني فابتسم و قالي كدا مردتش عليه ودخلت المطبخ
- بصي يا طنط طبق البسبوسة القمر دا
- انتي مبترديش عليا لية؟
كتمت ابتسامتي وانا بلفله بهدوء - أنا ؟ امتي؟
- يا سلام!
- يا حبيبي تلاقيها مسمعتكش، تعالي دوق عمايل ايد مراتك، تسلميلي يا حبيبتي.
ابتسمت وسكت فقرب ومسك دراعي - بالهنا والشفا يا ماما معلش هاخد رحمة بقي ونطلع.
سبت دراعه ومسكت دراع حماتي - اطلع انت يا حبيبي انا وطنط هنتفرج علي المسلسل التركي، شفتي يا طنط الحته لما اتحبسوا في الاسانسير
- بجد؟ جات ؟ وحصل أية؟
- يوووه دا البطل السكره القمر ما صدق واقعد يصالح فيها وهئ ومئ وقلوب بتطلع وناس بتحس مش جبلاااات.
مسك دراعي وابتسم لمامته- معلش يا ماما محتاجها تعملي حاجة فوق ولو عاوزة تنزل هنزلهالك.
- بس انا
اتعصب - رحمة خلاص.
طبطبت علي ظهري وهمست في ودني - روحي ورا، انتي كدا استفزيته مش ناقص غير تكه صغيرة وانتي وشطارتك بقي.
بصيت لها بصدمة فغمزتلي بمكر.
يا اختي أمه ناصحة اومال هو طالع ابو الهول لمين ؟
- قصدك أية بكلامك تحت دا؟
- انا؟ وانا عملت أية بس يا حبيبي ؟
- رحمة، انتي عمرك ما كنتي رقيقة فمتشتغلنيش.
قتل مشاعري الحيوان
- فعلا؟ يا روحي ما انا بحاول اهو، كنت محتاج أية بقي؟
بصلي دقيقة ومش عارف يرد عليا فابتسمت ودخلت اوضة الاطفال بهدوء.
- انتي جاية هنا لية؟
- هنام
- هتنامي أية احنا لسة المغرب
- ماهو أنا بعمل بيات شتوي، فباجي علي المغرب وبفصل
- طب ما تحاولي تقعدي معايا شوية
دب الامل في قلبي - لية انت افتكرت حاجة ؟
- لا هفتكر أية ؟ قصدك أية ؟
- هتفتكر خيبتي، طفي النور يا حبيب امك وانت خارج.
يادي العيون المفنجلة، مبنامش لية أنا في الليلة السودا الي مش عاوزة تخلص دي؟ مانا بنام ب ٢٣ ساعة جات علي النهاردة وبدأ جلد الذات؟
يمكن واخدة الحوار ببساطة بس منكرش اني زعلانة، مش فكرة عيد ولا احتفال وهدايا لا، اللفتة البسيطة بتفرق، الكلمة الحلوة بتفرق، طبطبة علي الكتف بتفرق، بوسة امتنان علي كف الأيد بتفرق، اليوم بيتغير، الزعل بيقل، الود بيزيد، الفكرة مش في الأعياد الفكرة أمتي نفتكر بعض؟ أمتي نتخلي علي مسئولياتنا وهمومنا واشغالنا ونفتكر أن كل واحد ليه واجب شعوري تجاه الطرف التاني، احنا مش ملايكه علشان نقول مبنزعلش، لا بنزعل وبنغضب وبنعيط وبنتوجع، علي قد الحب العظيم علي قد قلوبنا ماهي زي العيل الصغيرة محتاجة طول الوقت اهتمام ومساسية.. هو مسايسنيش لية؟ هو انا أقل من الي بيتسايسوا ولا اية؟
- ليلتك مش هتعدي علي خير النهاردة
كان ماسك طبق لب- مالك يا بيبي
- بتاكل لب من غيري يا زين؟
- اه علشان تبقي تتخمدي وتسبيني اغني ظالموا
قعدت جنبه ورميت المخدة في وشه - مفيهاش نوم النهاردة، اديني قاعدالك ياكش البعيد يحس علي دمه.
- هو انا لية حاسس من الصبح انك عاوزة حاجة ؟
يارب خودني بقي - تفتكر هعوز اية يا حبيبي، هو انت مخليني محتاجة حاجة؟
- عارف والله اني مفيش مني اتنين بس برضو حاسس
- طب ما تشغل عقلك، بص حواليك، شوف الدنيا بص للمجمتع كدا بصه يمكن تفهم.
اتاوب - يااااه الساعه ٨ وانا عندي شغل بدري واحتمال اسافر، تصبحي علي خير يا حبيبي.
باس راسي وقام، دخل الأوضة ونام علي السرير فدخلت وقعدت جنبه كاتمة العياط - زين انت نايم ولا اية؟
- اه
- وهتروح في سابع نومه
- اكيد
- وهتاكل رز مع الملايكه؟
- دعواتك
- روح يا بعيد ربنا.. ربنا ياخدني يا زين، ربنا ياخدني.
قومت طلعت في الصالة مفيش دقيقة وكان قعد جنبي
- بتدعي علي نفسك؟ مش عارفة أنه حرام؟
- انت السبب
- طب متزعليش قومي اعملي طبق فشار وهنقعد ونسهر سوا أية رأيك.
اتنهدت وقومت عملته، عادي خلاص المهم أنه بيحبني مش لازم يعبر عن مشاعره النهاردة، مش عاوزة هدايا اصلا ولا بحب... يا لهوي!!!
- يارب تتفاجئي بقي
- زين.. فلافيلو !!
جريت مسكت الدبدوب وحضنته وانا فرحانة
- كل سنة وانتي جنبي
- يا حبيبي ربنا يخليك ليا يا حبيبي، الحمدلله منستش
- انسي! انسي أية يارحمة بس
- كنت عارفة أن حبي في قلبك عمره..
- حب اية؟ وردة علي الكوميدينو، بحبك في الحمام، ورد علي السفرة ولابسة احمر في احمر وعملتي بسبوسة زي بتاعة كل سنة.. انتي مسبتليش حتي فرصة انسي زي الناس؟
- يعني كنت بتستهبل عليا؟ وانا الي تاعبة قلبي وعاملة احط في اعذار واقول يمكن تعبان يمكن مشغول يمكن متجوز عليا
- متجوز عليكي!
- أية المفاجأة دي؟ حبيبي انت مش وفي ولا حاجة ، أنا مصعبة عليك الحوار، الفكرة مبسوط معايا.
- ماشي يا ستي أدلعي وماله اهو يوم، فين هديتي بقي؟
- هدية اية؟
- الفلانتين.
- فلانتين مين؟ أية الفلانتين دا؟ أية الكلمة المريبة دي؟
- قصدك انك مجبتيش هدية!
- لا هو انت عاوزني افكرك واعملك بسبوسة تاكلها امك وأجبلك هدية كمان ؟ يا شيخ روح حسبي الله ونعم الوكيل فيك.
نيره عباس✍🏻💙
رائيكوا..💖
