-انا كنت قاعد امبارح وبعدين جه في بالي حاجه كده
_حاجه ايه بقي؟
-هو احنا ليه مبنرتبطش ؟ ..يعني محبناش بعض ليه!
_ايه؟.. مش عارفه
-يعني انتي مش حبتيني؟
_حبيتك
-بجد؟
_وانت بتحبها
-ندى انتي بتتكلمي بجد؟
_بجد ايه ي عم انت طبعاً بهزر ..قال حبيتك قال انا ناقصه قرف ي عم
حبيته! ..طب اقوله اني بحبه من سنتين ؟
الغبي بيسألني حاجه لو جاوبت عليها بايجاب الدنيا هتبوظ وهو عارف
هو مستني اقوله اي طيب ؟
بحبك بس انت مبتحبنيش!!
هزرت وسكت وانا حاسه ان قلبي مكتوم وتكة وهينفجر
صحاب بقالنا 3سنين
هي سابته واتخطبت ..الله اعلم بظروفها سواء كانت مجبورة او بمزاجها
بس هو لحد دلوقت حزين وبيحبها ..
لما بتيجي سيرتها عيونه بتلمع ..
لما بيتكلم عنها بيتكلم وكأنها اعظم حاجه في الكون بتاعه
انا عارفه اني مميزه عنده ..حتي لو هو مقاليش
يكفي انه لما بينعزل عن العالم كله وبيهرب من الكون بيجيلي انا ..
بيهرتل بالكلام بس عارف اني هستحمله ..
بكلمه وانا عارفه انه اكيد هيرد عليا انا بس
ودي حاجه مكفياني جداً
انا عارفه انها لسه جواه وانها مسيطرة علي قلبه
لسه فيه حاجه ف قلبه ليها ،اي نعم مش زي الاول بس برضوا بيحبها ..
من سنة ونص كان كلامه عنها بيخليه طاير ف عالم تاني ،بشوفه بيتكلم عن اعظم انتصار ليه في الكون اللي هو حبه ليها
بيتكلم بنفس الطريقة اللي بيتكلم بيها عن لوحاته ورسمه ..
راسملها 90 لوحه
كنت بحسدها جداً علي رسمه ليها وكمان حبه ..ي بختها والله
احنا صحاب من 3سنين ومرسمليش واحده حتي !
اما دلوقت بعد سنة ونص
لو سيرتها جت في الكلام بيتكلم عنها بانكسار وكأن قلبه مدفون تحت سابع ارض..
الحزن بياكل في قلبه وملامحه مطفيه بطريقة كئيبة ..
ولسه محتفظ برسوماته ليها ..
كان ناوي يديهم ليها لما يتقدملها بس هي كسرته هو وحلمه ..
-ندى..
_نعم؟
-هو انا متحبش ي ندى؟!
السؤال نزل علي قلبي كأنه تلج ..ميتحبش؟
ازاي بس حد زيه ميتحبش!
لو هو متحبش مين هيتحب طيب؟
بصيتله وابتسمت
حسيته يقصد رنا بكلامه ،قلبي وجعني عليه
بعدين قولتله
_سؤالك غريب؟ ..يعني علشان رنا وكده...
-ندى..انا مبتكلمش عليها ،انا بسألك انتي ،انا متحبش صح؟
_لا..انت تتحب ي مصطفي
-اومال انتي محبتينيش ليه ؟
_ها!!..بس انت بتحبها ي مصطفي !
-صح ي ندى صح انا بحبها
مش عارفه ليه مصطفي مصمم يوجع قلبي ! ليه دايماً بيسألني اسئلة اجابتها مينفعش تتقال ..
حتي لو بحبه بس هو قلبه متعلق بيها ومش عايزه اخسره من ناحيه اننا صحاب كمان ..كفايا ان هو جمبي ومعايا
النهاردة ..بقالي شهر مشوفتش مصطفي ،ولا حتي بيرد عليا
معرفش عنه اي حاجه ولا اعرفله طريق
كنت بعيط كل يوم بسبب بعده ده
حاسه اني قلبي بيتعصر من كتر الشوق
كتبتله اكتر من 100 مسدج وقطعتهم كلهم ..
بنام بس علي صوره ..ليه طيب بعد عني بالطريقه دي
حتي معرفنيش انه هيبعد !
اختفي فجأة من غير ما يقول حاجه !
مش عارفه راح فين ولا بعد ليه ؟
حتي لو باسم صحوبيتنا كان لازم يعرفني هو رايح فين ..
مش احنا صحاب يعني !
معقول يكون ده بسبب رنا!؟
ربنا يسامحك ي رنا علي وجع قلبه ده ..
كنت بصحي علشان انام ..حاسه ان روحي منهكة ومش عايزه اتعامل ولا اكلم اي حد خالص ،مبقيتش بروح الكورنيش ولا بقيت اخرج من البيت حتي
-ندى ،إسراء بره
_إسراء ..خليها تدخل ي ماما
لما عرفت ان إسراء جت فرحت ..كنت مشتقالها اوي ومحتاجاها كمان
-الكلبة اللي مختفية ومش معبرانا
_ازيك ي إسراء ؟
-الحمدلله ي حبيبتي ،ايه ي ندى مالك بس؟
اول ما سألتني السؤال ده مقدرتش اكذب عليها حضنتها وعيطت ..عيطت جامد
اسراء عارفه اني بحب مصطفي ،وكانت بتزعقلي دايماً علي اللي بعمله في نفسي ده ..
انا عارفه ان اوحش حب هو الحب من طرف واحد ،كأنك بتروح للوجع برجلك..الوجع بيتغذي علي روحك
وكل ما حبك ده يكبر كل ما تعبك ووجع قلبك هيكبروا معاه ..
كأنك متعلق بين السما والارض
والاصعب من انك تحب حد ميحبكش
انه يكون بيحب حد تاني ،الاصعب بقي ان الحد ده ميحبهوش
هتتعذب مرتين
مره لنفسك وقلبك ومره ليه ولقلبه اللي بيتعذب قدامك وانت واقف تتفرج مش عارف تعمل ايه؟
-خلاص ي ندى اهدي ..غيري هدومك وهنخرج ..
_مش قادرة ي إسراء
-يلا ي ندى قولتلك هنخرج ..
سمعت كلامها غصب عني وخرجنا ..كنت ماشيه مسحوبة وراها ..روحي مش معايا ،جوايا كمية قهر وتعب بياكلوا في قلبي
وكل يوم بيعدي قلبي بيبهت اكتر وبيصبح بلا لون ..
وكأن حُزن العالم اتجمع جوايا ..قلبي محاوطه سواد داكن ..
-خلينا نروح الكورنيش
_الكورنيش!؟.. لا مش عايزه اروح هناك ي إسراء
-هنروح ي ندى وهتفكي بقي
مقدرتش اجادلها في حاجه ..
ع قد ما عايزه اهرب من المكان اللي حاجز ذكرياتي مع مصطفي ،علي قد ماانا مشتاقة للمكان وريحة مصطفي الثابتة فيه ..
افتكر ان معظم خروجاتنا وقعدتنا كانت هنا ،كنا دايما بنحب نيجي هنا..
*********
-صح ي مصطفي ،ليه بتحب تيجي هنا كتير ؟
_عارفه ي ندى..مش مثلاً الكاتب بيبقي عنده الهام او وحي كده للكتابه ؟
-اها
_اهو الكورنيش بقي ده وحيي والهامي بقي..لما باجي هنا بعديها ااكدلك اني برسم اجمل رسمه في تاريخي
-اي الكلام الفلسفي ده ،خلاص مش عايزه اعرف ..بعدين انت ..انت مزهقتش من التصوير ،خلاص بقي متصورنيش!
_افرضي موتي بقي ؟
ميكونش معايا صور ليكي انزلها عليها الخط الاسود بتاع الحداد ده
-يلهوي ،انت عايز تموتني ي مصطفي الله يسامحك ؟
_اموتك ازاي بس ي ندى ده انا اموت بعدك والله
-نعم!؟
-بقولك متخافيش هختار صورة حلوة من صورك لو حصل والله
_امشي ي مصطفي من وشي امشي امشي
******
-ندى ..انتي معايا ي بنتي ؟
_ها! ..معاكي ي اسراء اهو
-طب اجيبلك اي معايا؟
_هاتي قهوة ..
مشيت إسراء وسابتني واقفه مكاني .. حاسه بريحة مصطفي محاوطاني في كل مكان ..حاسه قد اي هو واحشني
-بتفكري فيا صح ؟
سمعت صوت مصطفي..اكيد هو صوته لفيت لقيته بيبصلي وهو مبتسم
ابتسمتله واتحركت علشان اروحله ..ووقفت تاني ،افتكرت قد اي تعبت بسببه
وانه مشي وسابني ،بعد عني من غير سبب
افتكرت عياطي ووجع قلبي بسببه ..
صعبت عليا نفسي فعيطت..
-بتعيطي ليه ي ندى؟
_كنت فين ي مصطفي مشيت وسبتني ليه ؟
-كان لازم امشي ي ندى ..كان في حاجه لازم اعملها ،وعملتها
_روحت لرنا صح ؟..بتحبها للدرجادي يعني؟
-خلصت من حبها ي ندى ،انا مبحبهاش ..انا كنت مدفون وانتي بتردمي عليا في كل مره تفكريني باني بحبها ..اتخلصت منه نهائي ..انا مبحبش رنا ي ندى
_انا مش فاهمه حاجه ؟..
-حرقت اللوح بتاعتها كلها ..ورسمتك مكانهم ي ستي
_ رسمتني انا ؟
-اه انتي ،مش انتي كنتي عايزاني ارسملك ولو لوحه واحدة ..؟
_واشمعنا رسمتني يعني؟
-اشمعنا ايه؟ ..مش احنا صحاب ؟!
_صحاب ؟..هو انا متحبش ي مصطفي؟
-ي لهوي! ..تتحبي ايه بس!!
_متحبش صح؟
-تتحبي بس؟، ده انتي تتحبي ونص
نيره عباس....
رائيكو...
