- رحمة هاتي الشينيور
- حاضر
- ناوليني المفك.
- حاضـ..
- وفي ايدك الشاكوش
- ثواني.
- والمسمار دا.
- يابابا.
- روحي شوفي الباب، انتي لسه هتتلخمي.
ماهو لو لاقوني وعليا هدية مجانا مش هيعملوا فيا كدا، صبي الميكانيكي أحسن مني في أية بالله؟ بقي دا منظر أنسة ياربي !
- ايوا أية صباعك لزق علي الجرس، مين انت؟
صرخت في وشه وانا شايلة الحاجات الي بابا طلبها، ورافعة شعري لفوق ديل حصان ولابسة تزينج أسود، للأسف رجل بنطلون مرفوع ورجل لا وحاجة منتهي الحزن .
- يا ساتر!!
- مين يارحمة؟
عليت صوتي علشان بابا يسمع وهو واقف فوق السلم
- واحد مفزوع يا بابا.
- اسأليه أسمك اية يا آخرة صبري.
بصيت للأمور المتنح - بيقولك أسمك أية؟
بلع ريقه وهو بيبصلي بتوتر، معرفش ماله خفيف كدا ليه هو انا ضربته بالشينيور في رقبته؟ دا انا شايلاه بس.
- زين.. زين حسين المهدي.
عليت صوتي - يا بابا بيقولك اسمه زين حـ.. أية!! انت زين؟ زين أبن عمي؟
- ابن اية؟ قصدك تقولي انك رحمة؟ يا مساء الرعب والله.
يا اختي أية القرايب الحلو دول، يا نهار قلوب مضطربة
- متضايقة لية؟
- سبيني في أحزاني يا أسماء.
- كل دا علشان الدراسة؟ يا بنتي عادي بصي احنا هنروح و..
- دراسة اية يا حمارة، مش هروح بكرا أصلا
- نعم! بكرا اول يوم
- ايوا أية يعني اول يوم، فيه توفي مثلا! اهو يوم مقندل علي دماغهم كلهم، ياكش تولع الكلية علي الي فيها.
- لا دا كدا الحوار بجد وانك زعلانة فعلا ! مالك اية الي حصل؟
- زين.
- أية زين دا دوا كحة يعني؟ يا بنتي ما تكلمي، هو اية الي زين وحطيتي وشك في الأرض!
- مش فيه حاجة اسمها حياء انثوي، اه وانتي هتعرفي المعلومات دي منين غلبانة معلش مسم.
- هقوم امشي، وخلي حيائك يا روح امك ينفعك.
- لا بالله استني، قفوشة انتي برضو، يا بنتي زفت زين دا ابن عمي تمام؟
- تمام
- وحلو حبتين فل؟
- فل
- ...
- يا بنتي ما تكملي سكتي لية؟
- ماهو الحوار خلص.
- بس كدا!
- اومال انتي فاكرة اية؟
- التفاصيل فين؟ وديتي التفاصيل فين؟ التفااااااصيل
- اوف، نعيد من الاول، يا بنتي ابن عمي زين رجع من السفر، وقعد في شقة عمي الفاضية الي فوقينا، لحد ما عمي يرجع علي أول السنة.
- طب برضو أنا لسه ممسكتش خيط المشكلة
- المشكلة أنه متجاهلني يا اسماء، أو زي ما تقولي كدا خايف مني.
- خايف منك! نيلتي أية يا هبابة وسرعتي الراجل؟
- والله.. والله الحوار كان صدفة، فتحتله الباب وانا منظري غير لائق حبتين.
- زي..
- احم، كنت ماسكة الشينيور و المفك و...
- بس بس الله يكسفك أنا شفت المنظر دا قبل كدا زمعرفتش ابص في وشك اسبوع من الخضة
- مساعدش ابويا يعني ! مش دا بر الوالدين
- بر الوالدين مقولناش حاجة، لكن تبقي دكر في نفسك لية يا ماما لية؟
- يووووووه بقي.
انا بنت وحيدة، ماما حكتلي ان بابا طول عمره نفسه في ولد، وبعد ما انا اتولدت ربنا قدر أن ماما يحصلها مشاكل في الرحم وتشيله للأسف، فأصبحت انا الوحيدة، ومقسومة نصين، نص حنين عطوف علشان يرضي ماما وميحسسهاش بالنقص، ونص شديد وخشن حبتين علشان يرضي بابا، معرفش أية ذنبي اكون وحيدة وواجب عليا اشبع رغباتهم، ومعرفش أية ذنبي أتخلي عن فطريتي قدام بابا علشان يعرف اني قوية وميتخافش عليا، مشكلتي الحقيقة اني بكدب عليهم وعلي نفسي وبمثل طول الوقت.
