- ايه ي اخ انت..انت اعمي؟
= انتي بتزعقي كدا ليه انا خبطت فيكي بالغلط اصلاً!
- مش تحاسب؟ ولا هو رَمي جتت وخلاص؟
= اتكلمي معايا عدل عن كدا انا كنت هعتذر اصلاً
- وانت فاكر اني هستني اعتذار من واحد زيك؟
= بقولك اتكلمي معايا عدل..انتي متعرفيش انا مين؟
- لا محصليش الشرف وياريت توسع من وشي كدا علشان عندي اجتماع
= دا انتي نهارك اسو...
- دا نهارك انت الي هيبقا اسود عليك وعلي دماغك..والله لو كنت فضيالك كنت عرفتَك قيمتك
مشيت وسيبته بسرعه علشان متأخرش علي اول اجتماع ليا
--
لما وصلت اوضة الاجتماعات لقيته داخل معايا ، بصيتله بقرف ودخلت قعدت
- ازيكم..انا مستر حسام المنياوي مدير الشركة الجديد..بابا حالته الصحية مش مؤهلة حالياً انه يفضل ماسك الشركات ف انا الي هكون مدير فرع الشركه دا، فرع شركه مدينه نصر هيكون إداره اخويا
= ي نهار اسود دا هو!
- مبدأياً بس الانسه الي لابسه طرحه عليها ورد دي تقوم تقف
بصيت علي طرحتي لقيت عليها ورد..بلعت ريقي
- انا؟
ابتسملي ابتسامه شريرة وقالي اه
قومت وقفت وبصيت في الارض
- اتفضلي اطلعي برا ومش مسموحلك تحضري اجتماعات تاني ومخصوملك 3 ايام
أخدت شنطتي وخرجت ، فضلت مستنياه لحد ما الاجتماع خلص ولقيته خارج
- مستر حسام
= انا نهاري هيبقا اسود عليا وعلي دماغي؟
- وانا كنت هعرف منين انك ابن مدير الشركه؟ بَشم علي ضهر ايدي؟
= اتكلمي عدل..انا طردتك من الاجتماعات..ايه حابه اني أطرُدك من الشركه كلها؟
- لا لا مش عايزه اتطرد..لو سمحت ممكن احضر الاجتماعات؟ انا بقالي 4 سنين هنا وعارفه ان أَقِلَه جداً من الموظفين المميزين مسمحلوهم يحضروا الاجتماعات ومستر فؤاد باباك كان قال لدعاء السكرتيره بتاعته اني مسموحلي احضر الاجتماعات بعد كدا ، انا لسه معملتش اي مصيبه تخليني اتطرد من الشغل ومكنتش اقصد اهينك..ق..قصدي اتطاول فالكلام لما خبطتني
= مش فاضيلِك دلوقتي..بكرا هكون في فرع المعادي ابقي تعالي اسأليني إن كان مسموحلك تحضري الاجتماعات بعد كدا ولا لأ..عن اذنك
= بس ايه الي هيوديني فرع المعادي انا هكون في شغلي هنا!
- مش مشكلتي
- اللهم طولك يا روح
= نعم؟
- لا مفيش حضرتك كنت بكُح مش اكتر..بكرا هبقا اروحلك فرع المعادي اسألك حاضر
--
لما روحتله فرع المعادي تاني يوم ملقيتهوش..سألت السكرتيره قالتلي ان مستر حسام مبيجيش فرع المعادي النهاردة ، فضلت اشتمه في سري كتير وبعدين رجعت اكمل شغلي في الفرع الي بشتغل فيه
--
لما روحت تاني يوم الشغل روحتله مكتبه
- احم..مستر حسام انا جيتلك امبارح فرع المعادي وحضرتك مكنتش موجود
= اه انا مكنتش موجود فعلاً لأني بكون في فرع شركتنا الي في التجمع
- طيب حضرتك ليه قولتلي اجيلك يوم التلات في شركه المعادي؟
= انا حر
- وهو انا جاريه عند معاليك يعني؟
= بتقولى ايه؟
- ولا حاجه كنت بسألك حضرتك بس مسموحلي احضر الاجتماعات بعد كدا؟
= لأ
- نعم؟
= ايه؟ بقولك لأ ، مش مسموحلك تحضري الاجتماعات بعد كدا
- بس انا تعبت علشان مستوايا يتحسن واقدر احضر الاجتماعات واساهم في الاقتراحات الي قادره تِعَلِي من مستوي الشركة
= مش مشكلتي..يلا اتفضلي علي شغلك
- طيب..عن ازنك
--
خرجت من مكتَبُه وانا بَجِز علي سناني وضامه صوابع ايدي جامد وكنت حاسه اني شويه وهطلع دخان من ودني، بقا انا حتت مدير شنبه شبه شنب الصرصار يهزأني كدا..منكرش ان دقنه حلوه يعني بس دا مش مبرر يخليه يهزأني!
روحت الكفتيريا لريهام وقعدت معاها
- بقا انا حد يكلمني بالاسلوب المعفن دا؟ وعلشان ايه؟ بقا انا ي ريهام يخليني اروح فرع المعادي وفالأخر يطلع في فرع التجمع..كشفت راسي ودعيت عليك يا مفتري
= ايه دا بجد كشفتي راسك ودعيتي عليه؟
- يشيخه اتوكسي هو انا عمري دعيت علي نمله قرصتني حتي..انا متغاظه منه ي ريهام ، والله نفسي اروح اجيبه من قفاه كدا واكسرله نضارته..فاكر نفسه مين دا علشان يطردني
= فاكر نفسه مين ايه ي مهره دا ابن المدير وبقا المدير يابنتي!
- منا عارفه انه النيله المدير..وانا كنت هعرف منين لما خبطني انه المدير؟ انا مكنتش اعرف ان مستر فؤاد عنده عيال حلوين كدا اصلاً
= حددي موقفك بس دلوقتي..انتي بتهزأيه ولا بتعاكسيه
- بهزءه، بس هو شكله قمر ف عادي اما اعاكسه شويه صح؟
= ارحمي امي الله يرحمك ياشيخه، بكرا اتزفتي روحي اعتذريله وهو اكيد بعد اعتذارك هيوافق يسيبك تحضري
- انا اروح اعتذر لشنب الصرصار دا؟ فداهيه الاجتماعات المهم كرامتي
--
- انا اسفه ي مستر حسام علي الموقف الي حصل لما خبطتني في اليوم بتاع اول اجتماع ليا..ممكن حضرتك تسيبني احضر الاجتماعات بعد كدا؟
= لأ
- حضرتك بتقول لأ ليه؟ معلش بس انا حقيقي مبقتش قادره امسك نفسي اكتر من كدا حتي لو هترفد..انت بتلعب بمستقبلي المهني علشان مضايق من الموقف الي حصل مني؟ هو دا مبرر يخليك تطردني من الاجتماعات ومتبقاش عايزني احضر؟ حضرتك يوم ما تقف قدام ربنا هتقوله انك طردتني من الاجتماع ليه؟ علشان هزأتك؟ قصدي علشان تطاولت عليك فالكلام شويه لما خبطتني؟
انا موظفة متميزة زي اي موظفة متميزة هنا ومن حقي احضر الاجتماعات زي باقي زمايلي
= اي الهرتله الي بتقوليها دي؟ هتتبسطي لو رفدتك يعني؟
- لأ
= يبقا يلا علي شغلك ومتجيش تقولي كلام ملهوش لزمه هنا
- ماشي..متشكرة لكرم حضرتك
--
خرجت من مكتبه ومكنتش عارفه ريهام فين علشان أروحلها ف فضلت اعيط ، لما خرج من مكتبه لقاني واقفه بعيط ف بَصلِي نظره سريعه ومشي
--
كان في النهاردة اجتماع ومقدرتش أحضره ف روحت قعدت في الكفتيريا لأني كدا كدا مطروده من الاجتماع
لما عدا وقت الاجتماع مشيت علي شغلي سمعت حد جمبي بيقولي انتي يااا
لما بصيت لقيته حسام..اتوترت شويه وبعدين بصيتله
- افندم ي مستر؟
= انتي اسمك ايه الاول اصلاً؟
- مُهرَه
= حلو..اسم جميل مش لايق عليكي ، ما علينا..تقدري بعد كدا تحضري الاجتماعات
- متشكرة بس مش هحتاج احضرها
= دا الي هو ازاي؟
- انا هقدم طلب نقل لفرع مدينه نصر الي اخو حضرتك مديره
= احسن برضو..تقدري تبقي تحضري لحد ما تتنقلي
- ماشي شكراً
--
روحت قعدت مع ريهام وقت الاستراحه في الكفتيريا
- جاي دلوقتي يقولي تبقي تقدري تحضري..كته القرف في شكله ، مستفز وبارد وقمر..يعني بيعصبني وبيهزأني ويخليني اعيط وبعد كل دا يقولي تبقى تقدري تحضري منيمنيمنيي، هو علشان شكله حلو يقعد يهزأني فالرايحه والجايه كدا؟
= حاسه اني قاعده قدام واحدة عندها انفصام شخصيه، انيواي انتي بجد هتتنقلي من الشركه؟
- اه
= خلاص يابنتي فاكس ما هو وافق انك تحضري اهو!
- وهو انا هستحمله؟ هو اه شكله قمر وأحب اشوفه كل يوم بس انا اتهزأت بما فيه الكفايه وبعدين ما هو هيفضل يرخم عليا
= علي فكره كل الموظفين بيحبوا مستر حسام وعارفين انه طيب ومبيطردش حد ولا بيخصم لحد ظلم ومش من نوع المديرين الرخمين
- لا واضح..فكك ، انا حاسه اني تعبانه ، ما علينا ، انا راحه اكمل شغلي بقا لأن معاد الاستراحه خلص
= طيب سلام خلي بالك من نفسك
- حاضر، اتمنى مروحش اتخانق معاه..او اعاكسه مش ضامنه
--
خلصت شغل وخرجت من مكتبي..وانا خارجه من مكتبي حسيت اني دايخه وكنت هقع ، مسكت نفسي ومشيت بسرعه
وانا ماشيه حسيت دماغي تقلت جامد ومحسيتش بنفسي غير وانا بَقَع
لما فوقت لقيت نفسي في مكتب مستر حسام وفي بنتين صحابي جمبي وهو قاعد بعيد شويه
- ايه هو انا مت؟
بَصلِي وقالي بسخريه في ميته تصحي تلاقي في ناس جمبها كدا؟
- بتتريق؟
= انتي مش فطرانه كويس ولا ايه يمهره؟
- مش فطرانه كويس ايه بس ي ميار دنا كان ناقص أَكُل دراع ريهام فالكفيتريا
= امال ايه الي خلاكي تقعي كدا؟
- مش عارفه..تفتكروا انا حامل؟
إيناس بصتلي بصدمه وقالتلي هو انتي متجوزه ي مهره؟
- لا طبعاً بهزر..معرفش ايه الي بهدلني كدا ، هو ايه الي جابني مكتب مستر حسام؟
= هو اول واحد شافك بتقعي ف شيلناكي وجبناكي هنا لأن مكتبه كان قريب للمكان الي وقعتي فيه
- كان شكلي حلو وانا واقعة؟ طب عرفتوا تشيلوني بسهوله ولا محتاجه اخس شويه؟ جاوبوا بصراحه علشان لو محتاجه اخس ألحق اخس قبل فرحي
- هو انتي مخطوبه وفرحك قرب ولا ايه؟
= لا بس بجهز نفسي..مش يمكن اتخطب لواحد غني ونتجوز بسرعه وادوس عليكم بفلوسي يعني
فضلوا يضحكوا وسمعته بيقول بصوت واطي يا الله يا ولي الصابرين
معرفش ليه طريقته ضحكتني ف ضحكت ، لما شافني بضحك ابتسم وضحكلي
بصيت لـ إيناس وميار وقولتلهم يلا شيلوني علشان أروَح
حسام بَصلِي وقالي نعم! يشيلوكي!
- بهزر مع زمايلي ي مستر حسام..سنديني ي ميار انتي وإيناس علشان انا لو اتأخرت عن كدا ماما هتقلق
حسام عرض عليا اروَح معاه في عربيته..موافقتش لكن هو أصَر ف إيناس وميار سندوني لحد العربيه وبعدين مشيوا
- متشكرة ان حضرتك قررت توصلني
= كويس انك بتعرفي تشكري
- وانت كمان..كويس انك بتعمل حاجه عدله في حياتك
= افندم؟
- ها؟ لا ولا حاجه
--
بعد يومين وصلت الشغل الساعه 9 الصبح وكان في اجتماع الساعه 8 ، خبطت علي الباب
- ممكن ادخل ي مستر حسام؟
= اه ادخُلـ..مهره؟
- اه ، ممكن ادخل؟
ابتسملي ابتسامه شريره وقالي لأ ، انتي وصلتي متأخر ومش مسموحلك تدخلي متأخر
خرجت وروحت قعدت في الكفيتيريا الي موجود فالشركه وفضلت اكلم نفسي
متضايقيش نفسك ي مهره..حمار وغلط..لا مش حمار..جاموسه، استحملي ، ايه يعني لما المدير يبهدلك شويه؟ مش مهم..عادي بتحصل ، خير..خير..لأ مش خير ، يارب انا تعبت ، ماهو ياتنقلني ياتنقلُه انما كدا مينفعش..يارب ليه اتبهدل بالشكل دا؟ بس ي مهره متضايقيش نفسك..مش اول وآخر مره ، عادي ، مش شنب الصرصار الي عامل نفسه مدير هو الي يعمل فيكي كدا
قاطعني صوت إيناس وهي جايه تقعد جمبي
- كنت عارفه اني هلاقيكي قاعده هنا بتاكلي
= اه اصل هقعد اعمل ايه يعني؟ الاكل بيونسني
- هو مستر حسام ليه بيعاملك كدا؟
= بيعاملني ازاي؟
- معرفش..بيعاملك بطريقه غريبه ، علي فكره مستر حسام بيسيب المتأخرين يدخلوا الاجتماعات عادي..حتي ميار جت بعدك بـ خمس دقايق وسابها دَخَلت
= يا ابن الـ... استغفر الله العظيم يارب ، كدا كتير والله يارب..اروحمهره اكيد مش بيغير وانتي من باقي اهله مثلا؟ هو اكيد عايزك تركزي فالشغل بس يبقا ركزي في شغلك
،،
تاني يوم لقيته بيفتح باب المكتب بتاعي ودخل، اتخضيت وصَوَت
- ايه في ايه شوفتي عفريت؟
= مش تخبط عالباب! خضيتني!
- أخبط ليه انا كدا كدا مديرك
= مش مبرر..إفرض انا والورق قاعدين في وضع مُخِل مثلاً!
- مهره هو انتي قاصده تجيبيلي شلل؟
= لأ ، يمكن ، مش عارفه
- حاسس بتنميل في كتفي الشمال..اتمني متكونش بوادر شلل منك
= وانا كمان اتمني كدا
- مهره هو انتي في حاجه بينك وبين مهدي؟
= انا ومهدي زمايل
- امممم..طيب هو انتي مش كنتي ناويه تنقلي فرع التجمع؟
= اه
- طيب ايه رأيك تنقلي فرع تاني؟
= فرع تاني؟ فين؟
- في بيتي
= انت قليل الأد...
- اسكتي..وَطِي صوتك يخربيتك هَتفِهِم غلط ، كان قصدي اني عايز اتجوزك
= اه اسفه فهمت غلـ..ايه؟ تتجوزني؟
- اه ، من ساعه ما جيت هنا واحنا بنتخانق وبنجيب لبعض شلل زي توم وچيري..وانا بحب توم وچيري، او يمكن بحبك انتي مش عارف، مكنتش حاسس اني بحبك غير لما مبقيتيش تيجي الشركه، حسيت ان في حاجه ناقصه..حسيت اني مفتقدك، لما شوفتك امبارح بتضحكي مع مهدي حسيت اني عايز اكسر دماغك ودماغه..لا..اكسر دماغه هو بس
بصيتله وفضلت مبتسمه، كنت مبسوطه، مش عارفه ارد اقوله ايه؟ اقوله اني بحبه طيب؟ لا عيب يامهره اتقلي ميصحش كدا، لا ماهو لو فضل باصصلي دقيقه كمان هقوله بحبك والي يحصل يحصل
- ساكته ليه؟
= انا هبقا چيرى
- بس انا مبحبش توم
= يعني انا الي بحبك؟
- ايه؟
ضحكت لما شوفت ريأكشنه
- بجد..مبتحبنيش؟
= بحب توم وچيرى..او يمكن بحبك انت مش عارفه
- نيره عباس..
رائيكوا🖤
