يا ريتني م مشيت ...💔 مشيت ولقيت منظر فظيييع منظر ابوي وهو جنازة في الواطة وملانة دم راسي لفة وحيلي مات وتاني م حسيت الا وسهى خاتة راسي في كرعيها وبتبكي فتحت عيوني وقلت ليها ابوي وين حضنتني وزادت في البكى قالت لي ابوي فات خلانا يا سمر ابووي مات وحرق قلوبنا عليهوو 💔 قلت ليها لالا ما مات انتي كذابة قبيل الصباح فات الحواشات وقال لي الليلة جاينو ناس البندر وبكرة بسوقني معاهووو..م ردت لي وبقت تبكي وتبكي شوية كدا بقيت ببكي معاها ببكي من الحالة الهي فيها وببكي على حالتي .. على الحالة الح اكون فيها من دون ابوي .. ببكي على انو أكبر سند في حياتي فات وخلاني وحيدة ... انا خلاص ح أقع من دونو 💔 بقيييت بكوركك ابووي وييين قبيل قال لي ماشي وجاي وتاني م رجع..يااخ بكييت بكى اول مرة ابكى بحرقة وبالطريقة دي والناس كلها بتبكي من الحالة الفيها انا وسهى.. شوية جو شايلين الجنازة وادنها الدفن والبيت دا بقى عبارة عن كواريك وصواريخ وجوطة سهى حيلها بقى م شايلها واغمى عليها رفعوها ودخلوها جوا وانا مشيييت بعيييد من الناس وقعدت في ركن وبقيت ببكي وبتكلم براي ..يعني خلاص ابووي فات وخلاني براي يحليلك يا ابوي خليت وراك البيت حزين يحليلك يا سندي المتين لا كليت ولا مليت مني يوم ربنا يرحمك ويثبتك عند السؤال... عدت الايام وامي دخلت الحبس وسهى قعدت معانا ٤٠ يوم هي ومنى وطبعا سعد م جا نازل السودان قال ناس الشغل ابو يدووهوو اجازة يعني اتخليو بس ابوك مات وانت م جيت عشانو دا يسمووهوو شنو والفترة دي بطن سهى ماشة في زيادة رجعت بيتها عشان تجهز وتجي للولادة وانا في الفترة دي في سؤال واحد بس دايما في بالي انو ابوي مات كيف..؟! عمي محمد قال انو ابوي كان بقطع في الشجر للحطب وعلق الساطور في الشجرة ورقد تحتها عشان يرتاح الساطور وقع في راسو الناس كلها صدقت الا انا وسهى عشان عارفين ابوي مستحيل يهمل للدرجة دي وبعدين في اليوم داك ما كان عندو تقطيع بتذكر انو قال لي ح يكون مع ناس البندر ف اكيد كلام عمي كلو كذب وم معروف الحصل شنو لانو الحصل سر وفات بيو ابوي وفي طرف تاني عارفو واكيد مهما طال الزمن ح يتكشف...بعد فترة سهى رحلت للولادة لكن امي لسة م طلعت من الحبس في يوم قاعدين انا وامي وسجى معانا عمتو مها ومروة ومنى بتونسو وسهى في الحمام فجأة سمعنا صوتها بتصرخ قمنا جاريين سريع لقيناها ماسكة بطنها وبتكورك امي قالت شكلها بتتوجع مسكوها ودخلوها جوا الغرفة وانا ومنى وسجى في الحوش عمتي مها طلعت تجيب الداية وعمتي مروة بقت بتجهز في الموية الحارة والشنطة وياها تجهيزات الولادة المعروفة شوية كدا الداية جات وسهى بتصرخ وبتتكلم قالت ليهم نادوا لي علي امي قالت ليها يا بت ها علي شنو وانتي في موت قالت ليها عشان انا في موت دايرة اشوفو وم ح الدي الا يجي هو الداية قالت ليها يا بت اسمعي الكلام بعد ربنا يحلك بالسلامة ح تشوفيو قالت ليهم لالا انا بس دايراوو يجي وبقت تبكي امي قالت ليها والله يا بتي الله يهديك سمح النرسل ينادوو ليك وفعلا امي جات قالت لي امشي نادي علي راجل اختك جريت ناديتو وجيت شوية جا لاحقني ودخلوهوو جوا سهى قالت ليهم ممكن تخلونا برانا ناس امي طلعوا وسهى قالت لي علي انا خايفة يا علي قال ليها م تخافي انا معاك ربنا يقومك بالسلامة قالت ليو لالا انا حاسة شي غريب في جواي المهم لو طلعت او لا انا ح اديك أمانة تديها لي سمر لكن ما هسا بعد تتم قرايتها يعني بعد تقرا تالت ثانوي وتنتهي وانا م لقيت زول غيرك بثق فيو عشان اديها ليو وعليك الله أمانة ما اوصيك على ولدنا او بتنا وبقت تبكي وفجأة صرخت الداية جات داخلة وقالت يجماعة كفاية ضياع الوقت البت بعدا ح تموت لازم نبدا نولدها علي أتمالك نفسو وجا طالع عيونو محمرة قعد معانا في الحوش بقينا بس سامعين صوتها شوية تصرخ شوية تسكت الوضع استمر كم ساعة وعلي دا ماشي وجاي لحدي ما فجأة عم السكوت وسمعنا صوت الطفل ببكي في الوقت دا انا الفرحة الشفتها في عيون علي لمن سمع صوت طفلو نفس الفرحة البشوفها في عيون ابوي الله يرحمو لمن يكون معاي شوية كدا الداية جات طالعة وشايلة الطفل وقفت جمب علي ومدتو ليو قالت ليو مبروك ليك البنية وربنا يرحم امها...💔 علي دا ضم عليو بتوو شدييد وببكي هو ببكي والبت بتبكي شوية كدا حتى استوعبت كلامها قلت ليها دقيقة قصدك سهى اختى ماتت..؟! قالت لي ربنا يرحمها ماتت شهيدة كلهم بقو ببكو علي طوالي طلع بي بتو قلت لالا م بصدق دخلت جوا لقيت امي جمبها بتبكي وسهى مغطينها لي وشها طوالي وقعتاا صحيت لقيت نفسي مع منى في بيت عمتي مها قلت ليها منى صحي سهى ماتت مش قبيل كانت معانا منى بقت بتبكي وسبحان الله انا دي م نزلت منى ولا دمعة لمن شفت منى بتبكي وم ردت لي طلعت مشيت بيتنا لقيتو ليك ملان ناس دخلت جوا م اشتغلت بي زول مسكت امي قلت ليها يمة صحي سهى ماتت؟! امي نفضتني منها وبتبكي شوية جا داخل علي شايل بتو وقال ليهم يا جماعة الموت حق والحياة حق وكلنا اليه راجعون سهى ماتت ربنا يرحمها لكن دي بتها قاعدة وزي ما بقولو الولد ما مات وانا هسا دي قدامكم ابو البت دي بسميها سهى علي امها ربنا يرحمها وقبل كدا قالت لي م دايرة فراش عشان كدا العزاء أنتهى وماف اي فراش وعليكم بالدعوات بس وبتي ح اربيها براي وطلع فات ...عدت الايام وامي طلعت من الحبس والمدرسة فتحت المفروض ننزل سابع بس انا نفسياتي م قادرة اتخيل حياتي ماشة من دون ابوي واختي اللي كانو اكتر من سند والله يجماعة الأب نعمة م ح تحس بقيمتها الا بعد تفقدها انا كل ركن وكل حاجة في البيت بتذكرني بيهم يعني الاجازة دي كانت أسوأ اجازة مرت علي ٤ شهور في ٤ شهور بس فقدتهم مع بعض يعني حتى م لحقت دموع وجع ابوي تنشف لحقتو سهى ...الناس نزلت وسجى زاتا نزلت الا انا م قادرة حاسة في حاجة مانعاني لكن شنو هي م عارفة عدو أسبوعين وم نزلت وسبحان الله ولا يوم امي م سالتني لي م نزلتي وتعاملها معاي زاد للاسوأ في يوم جاتنا منى واتكلمت معاي قالت لي لي م نزلتي المدرسة قلت ليها م عارفة وم قادرة والله العظيم قالت لي تفتكري لو ابوك واختك عايشين ح يخلوك تقعدي في البيت وابوك دا كان شغال لشنو مش عشانك انتي واخواتك ابوك مات في شغلو وكان همو مصلحتكم في النهاية تجي تقولي م قادرة وبقينا نبكي بعد فاتت اتذكرت كلام سهى القالتو لي مستقبلك اهم من العالم كلو وفعلا نزلت الدراسة طوالي ولحقت الفاتني كلو وطبعا بعمل كل شي في حدود عشان امي م تجوط فيني وكملت السنة دي بي قدرة قادر وحتى اخر يوم راجعة من المدرسة شفت ليك سجى من بعيد واقفة مع ولد من الحلة مشيت ليهم وقلت ليها دا منو يا سجى وعندك شنو معاهووو قالت لي معندك شغلة بي وقالت ليو يلا امجودي لي بعدين بتصل عليك وفاتت خلتني واقفة عاينت ليهوو ومشيت وصلت البيت قلت ليها عايني الليلة دي انا بحددو معاك لاني تعبت منك ومن عمايلك احسن توريني دا منو ولا بوري ليك امي قالت لي يعني امي ح تصدقك مثلا انتي عارفة انها بتسمع كلامي بس صاح دايرة تعرفي دا منو طيب بوريك دا حبيبي عندك كلام تاني يلا امشي وريها فقدت أعصابي وضربتها كف بقت تصرخ فيني فجأة سمعنا صوت عمر ود عمي محمد بكوركك لي امي جا داخل ومسكني من شعري قلت ليو فكني مالك معاي قلت ليك فكني امي جات جارية قالت لينا مالكم عمر قال ليها بتك دايرة تعمل لينا سمعة بتقيف في الشوارع مع الاولاد امي قالت وووب الليلة سجم خشمي دايرة تعملي سمعة لي ابوك بعد مات يا ما عندك ادب ووقعت فيني ضرب هي وعمر وسجى واقفة بتعاين ياخ ضربوني ضرب لمن قلت بس في النهاية عمر قال لي تاني كراعك دي توديها الشارع الا اقتلك امي قالت لي تاني المدرسة دي بي عينك م ح تشوفيها اصلا غير الهملة والانطلاقة م بتجيب حاجة وطلعو خلوني ياخ انا بكيت بكى شلت الليل كلو بكى سجى قالت لي عشان تاني م تدخلي في حاجة م بتخصك وطلعت ياخ انا في اللحظة دي غير ابوي وسهى م فقدت زول خلاص الدنيا ضاقت بي من دون مبالغة لي تلاتة يوم م طلعت من الغرفة و لا اكلت شي وعمر كل يوم بيجي يسأل مني ويطلع اما اعمامي ونسوانهم ولا حتى كلفو نفسهم يسألو مني ولا من الحصل وسجى كل يوم بتتكلم معاهوو بالتلفون وبتلاقيو كتر خير منى الكل يوم بتجي تحنسني امشي معاها بيتها ومرات بتجيب لي سهى الصغيرونة والله البت قطعة من امها سبحان الله عمرها سنة كاااملة اما حبوبة وجدو ديل اصلا م طايقننا كلنا من بعد وفاة ابوي ...
قالت لما توفى والدها
_لقد نفذ الأكسجين التي كنتُ اتنفس..💔!
ابقو عافية 🖤
