خالتو اماني لمت باقي الحجات الفي الغرفة وطلعنا اول مرة اطلع من الغرفة واشوف شكل المستشفى لونها ابيض بي اخضر كبييرة ماشة واعاين وخالتو ماسكاني السلم بتاعها غريب يعني ما فيو مدرجات كلو زحاف نزلنا تحت ووصلنا تربيزة مكتوب فيها الاستقبال كبييرة بالأسود وتحتها كلمة بالانجليزي م قدرت اقراها وقفنا جمبها وفي بت وولد قاعدين البت مدت ليها ورقة وقالت ليها اتفضلي يا مدام اماني حمد الله على السلامة وان شاء الله م تجونا راجعين تاني قالت ليها ان شاء الله تسلمي ومشينا منهم طلعنا برا حوش المستشفى كان فيها كم عربية وعربية إسعاف شفنا عمو ماهر نازل من عربية بيضاء قزازها اسود قال لينا خلاص خلصتو خالتو اماني قالت ليو اي قال ليها يلا عشان اوصلكم اتصلو علي ناس الوكالة لازم امشي ليهم واشوف الحاصل شنو قالت ليو يلا ركبنا العربية انا وخالتو اماني ورا وعمو ماهر سايق العربية خالتو اماني قالت ليو وين حسام قال ليها ورانا بي الموتر قالت ليو والله الموتر دا كعب ربنا يغطي عليو بس اعمل شنو م بسمع الكلام قال ليها انتي عارفة انو من بعد الحادث تاني بقى بكره العربات قالت ليو اي والله ربنا يحفظو بس هو الوحيد الباقي لينا قال ليها ااميين وتاني ماف زول فتح خشمو وانا بتلفت ساي زي الغبية وم عارفة ولا فاهمة شي في الطريق اول مرة اشوف مدنية بسمع بيها سمع وعند ابوي الله يرحمو بس كان طوالي بقول ماشي البندر وجاي من البندر ويوصف لي الشوارع وحتى اخر يوم قبل م يموت قال لي جاينو ناس البندر طوالي اتزكرت الحلم عيوني دمعت بس استغفرت ومسكتها بالعافية العربية وقفت وقال لينا انزلوا وصلنا فتح باب العربية ونزلنا قدام بيت سمح والبيوت الجمبو كل واحد احلى من التاني البيت كان م فيو لون مخشن ب اسمنت بس لكن حلو والباب كان ابيض خالتو اماني قالت لي حمد الله على السلامة واعتبري البيت بيتك عمو ماهر فتح البيت ودخلنا فيو حوش واسع وخاتين أربعة سراير حديد في الحوش لونهم ابيض وفيو حمام تاني فتح باب خشب دخلنا في صالة طويلة ومفروشة بي طريقة حلوة باللون البنفسجي فيها طقم كراسي بس برضو بنفسجي والتلفزيون خاتنو في الحيطة استغربت من الحتة دي وفي الصالة في غرفتين مقفلات وطبعا كل الابواب جوا خشبية لونها بنية وفي صندوق ابيض معلقنو في الحيطة برضو والواطة تحت باردة برضو لونها بنفسجي في نهاية الصالة في سلم بطلع فوق ..خالتو اماني قالت لي ارح بي هناك واشرت لي على السلم طلعنا الخطوة الأولى حسام جا داخل عمو ماهر قال ليو بركة الجيت انا اصلا مستعجل اتصلو علي ناس الوكالة لازم امشي خليك معاهم وانا ماشي خالتو اماني قالت ليو الله معاك وطلع فات حسام قال ليها طالعين فوق قالت ليو اي قال ليها يلا ارح طلعنا فوق وكان عبارة عن غرفتين فاتحات في بعض وغرفة براها الطابق الثاني لونو برتقالي ..خالتو اماني فتحت غرفة كدا من الاتنين الفاتحات في بعض قالت لي دي اعتبريها غرفتك لو دايرة حاجة انا تحت وزي ما قلت ليك اعتبري البيت بيتك قلت ليها ما قصرتو معاي وما تتعبوا نفسكم كلها يومين وح ارجع بيتنا قالت لي انتي زي بتي ف النهاية ح اخليك ترتاحي وامشي أجهز حاجة ناكلها حسام قال ليها انتي زاتك تعبانة خلي عشوش تجهز الاكل وينها هي قالت ليو فاتت السوق رسلتها تجيب لي حجات انا البجهزو م مشكلة قال ليها طيب انا بساعدك بس خليني اغير هدومي واستحم وبلحقك تحت قالت ليو خير ودخل الغرفة التانية المقابلة القاعدة فيها انا وخالتو اماني قالت لي نازلة تحت ادخلي ارتاحي قلت ليها طيب دخلت الغرفة وكانت حلوة شديد يمكن قدر غرفتنا انا واخواتي وغرفة امي وابوي وحوشنا يعني باختصار الغرفة كبييييييرة شديد وفيها سريرين الواحد فيهم بدبل سريرين ودولاب فيو ضلفتين وتربيزة فيها كتب وحاجة كدا زي الكباية فيها اقلام ومراية كبييرة في شكل قلب مدقوقة في الحيطة وشباك فيو ستارة صغيرة فيها خيط بالجمبة لو جريتو بتترفع وبرضو فيها نفس الصندوق الابيض الكان في الهول والتلفيزون المعلق في الحيطة قلت يا ربي الناس ديل مجانين ولا شنو في تلفزيون بعلقو في الحيطة الغرفة كانت باللون الاسود والوردي يعني حاجة كدا فظيعة قلت يا ربي معقولة في بيوت بالطريقة دي انا ولا في الاحلام ما شفت زي البيت دا وقفت جمب الدولاب فتحت ضلفة لقيتو ملان هدوم رفعت منهم لقيتهم هدوم بيت وكلهم قدري قلت معقولة الناس ديل اشترو الحجات دي كلها عشان انا قاعدة يومين بس فتحت الضلفة التانية لقيتها برضو ملانة هدوم لبسات وعبايات قلت الناس ديل م جادين تحت في الدولاب كان في زي درج كدا فتحتو لقيت جزم وشباشب والغريبة كلهم قدري مستحيل دي تكون صدفة اكيد في حاجة والغرفة دي م جهزوها لي اكيد كانت حقت بنوتة قدري حسيت بنفسي مسخنة افتكرت العباية اللابساها وطلعتها والعباية دي زاتها شكلها خالتو اماني جابتها لي من الدولاب دا ختيتها في طرف سرير وعيني وقعت على التربيزة الفيها كتب مشيت عليها لقيتها كلها قصص وروايات لا وكمان من النوع الأنا بحبها وكلها انا قريتها وعندي زيها في البيت لو ما كانت جديدة كان قلت حقاتي لانو حقاتي بقو قدام فتحت واحدة منهم لقيت اسم مكتوب حنين ماهر قلعت عيوني حنيين يعني كلامي كان صاح والغرفة طلعت حقت بنوتة لكن هي وين لا وكمان حنيين انا سمعت الاسم دا وين متأكدة اني سمعت بيو بااااااااس يوم ضربني حسام بي عربيتو اتصل لي امو وقال ليها قتلت حنين وبرضو يوم حلمت بي ابوي الله يرحمو و صحيت مخلوعة حسام قال لي بي لهفة حنين انتي كويسة يا ربي حنين دي منو قصتها شنو مع الجماعة ديل دقيقة دقيقة حنين ماهر وحسام اسمو حسام ماهر يعني عمو ماهر بكون ابوهم معناها حنيين دي اخت حسام يعني بتكون بتهم طيب اذا عندهم بت وينها ولي غرفتها فاضية ومقعدني فيها براي ف ان ورا القصة دي اكيد اسالهم يا ربي اقول ليهم حنين وين ولا اسكت ...لالا يا سمر اخير تسكتي انتي اصلا قاعدة يومين مالك ومال التطفل تمي ايامك وامشي للراجيك سعد واعمامك وامك وجدك وحبوبتك وعمر ومنى اكيد لو مشيتي ح تموتي ح تموتي احسن اشوف حل لنفسي ...ختيت الكتاب حسيت نفسي دايرة استحم لكن الحمام بعيد ياخ الا انزل اعمل شنو مجبورة انزل لبست العباية وفتحت الباب لاقيت حسام في وشي طالع من غرفتو غير هدومو قال لي دايرة حاجة قلت ليو ماشة الحمام قال لي م مضطرة تطلعي تحت للحمام عندك واحد جوا الغرفة قلت ليو حمام وجوا الغرفة دا كلام وين قعد يضحك وقال لي تعالي اوريك دخل الغرفة ويداب لاحظت لي الباب الكان جوا الغرفة قال لي شكلك عميانة قلت ليو بي حقي قال لي ولئيمة كمان الموهممم دا الحمام وفتحو لي قلت في نفسي يا ربي اسألو من حنين تاني قلت لا لكن م بقدر دايرة اعرفها هي وين وانا سرحانة وهو بتكلم ولا سامعاهو قال هييي قلت ليو اهااا قال لي وطرشة كمان كدا م ممكن قلت ليو هييي انت معاي انا على العموم انا اصلا ما طلبت منك توريني الحمام قال لي كتر خيري قلت ليو فعلا كتر خيرك شكرا ليك ممكن تمشي محل ماشي قال لي افهم انك طارداني قلت ليو من غير مطرود البيت بيتكم انا منو عشان اطردك على العموم شكرا ليك عاين لي مسافة وقال لي العفو قام طالع قلت ليو حسام أتلفت وبعاين لي بنظرة حنيينة وعيونو ملانة دموع قلت ليو حنين دي منو مش دي غرفتها طيب هي وين؟! م رد لي طلع وقفل الباب قلت في نفسي تستاهلي اصلو التطفل ليك شنو مالك ومالهم اها احرجوك ارتحتي احسن تستحمي حمامك دخلت الحمام وفتحت خشمي يا ناس دا شنو دا الناس ديل ولا المهندس البنى البيت دا حاسي بشنو الحمام زاتو عبارة عن ميدان كورة لونو ابيض كوولو ابيض في ابيض وفيو مراية اي مراية في الحمام وكمان مراية بي تسريحة وملانة علب رفعت واحدة مكتوب فيها شامبو واحدة زيت شعر و..... حجات كتيييرة م حصل شفتها ولا بعرفها ولا بعرف استعمالها احترمت نفسي استحميت وطلعت لبست من هدوم حنين اتمسحت وسرحت شعري وصليت المغرب باب الغرفة دق جات خالتو اماني وجابت اكل وقفت عاينت لي مسافة وقالت لي اكلي م حبيت احرجها عشان عذبت نفسها عملتو وجات طالعة بنفسها وجابتو لي قلت ليها اكلي معاي قالت لي مع اني اكلت لكن بساعدك ضحكنا وقعدت اكلت معاها قالت لي ماشة انوم شوية تعبانة قلت ليها نومي هنا قالت لي لالا غرفتي تحت عشان بعد شوية ابو حسام بيجي م يلقى زول قلت ليها طيب انا كمان ح ارقد شوية مسافة العشاء يأذن عشان اصلي وانوم قالت لي افتح ليك المكيف قلت ليها مكيف كيف ابتسمت وشالت ليها حاجة صغيرة ضغطتها على الصندوق الابيض ولع نور قالت لي ببرد ليك الأوضة قلت ليها شكرا لاني فعلا مسخنة قالت لي العفو وطلعت فاتت فعلا شوية كدا الغرفة بقت باردة لمن اتغطيت رقدت وبقيت سرحانة ناس م بتعرفك ودايرة تكسب فيك اجر وبتحبك وناس دمك ولحمك م بتحبك لي الدنيا دي كدا لي الناس دي كدا انا اسي ذنبي شنو عشان يحصل لي كدا حياتي اتدمرت انا م عافية ليهم كلهم وخصوصا حبيب سجى اختي دمرني الله يدمرو بقيت ببكي بصوت عديل فجأة باب الغرفة دق ........
ثم ماذا ؟!
ثم ان القدر دائما يفرقنا ممن نحب 😪💔
ابقو عافية 🖤
