يا ريتو ما فتح ردت لي منى بتبكي قالت لي عثمان عمل حادث وهو جاي مدني ومات انا اترملت يا سمر كل زول انا بحبو فات خلاني قفلت الخط في وشها من الصدمة بقيت ببكي بأعلى صوت جو جاريين خالتو وبناتها سألوني مالك قلت ليهم مات بسببي انا السبب في الحصل دا كلو لو ما كان جاييني ما كان مات لو ما اتصلت وقلت ليو تعال لي كان اسي مع مرتو ... اترملت بسببي بقييت ببكي وهم بواسو فيني في النهاية قلت لي خالتو انا راجعة الحلة قالت لي ارح انا بوديك قلت ليها لالا خليني بمشي براي قمت لبست عبايتي وما شلت اي شي حتى الرقم حق منى خليتو مجدوع قالت لي يا بتي الكلام دا كدا ما جاي خلي نمشي سوا قلت ليها شكرا ليكم كتيير ما قصرتو معاي ومستحيل انسى المعروف القدمتو لي بس انا من بدايتي لنهايتي مشاكل ولو مشيتي معاي حاجيب ليك مشكلة والوقت ح يتاخر ليك وانتي مسافرة بكرة خليني بمشي براي ولو لقيت فرصة برجع ليك بتلفون قالت لي والله يا بتي قلبي ما متطمن لكن اعمل شنو انتي م راضية تسمعي الكلام خلاص هاك دا حق المواصلات شلتو منها لانو ما عندي وودعتهم وطلعنا الناس ديل بكو معاي بكى كأني كنت معاهم من كم سنة زي الما كان يوم واحد وهو اصلا ما تامي يوم طلعت منهم ووقفت في الظلط عشان القى حاجة توصلني الشعبي بقيت بفكر انا لو رجعت ح يحصل لي شنو وسعد اكيد بكون في الحلة ح يقتلني ح يقتلني ما هو ود امي و بسمع كلامها لكن بالنسبة لي احسن يقتلوني انا من الناس تموت بسببي الليلة مات عثمان وم معروف بكرة منو عشان كدا احسن ارجع ..واقفة في الظلط لسة بس ماف مواصلات قلت اتقدم شوية احتمال هنا ماف شفت تقاطع من بعيد العربات ماشة فيو قلت النمشي ليو وفعلا مشيت وقفت لقيت نفسي واقفة عكس الاتجاه البودي الشعبي جيت دايرة اقطع الاتجاه المعاكس نفضتني ليك عربية طرت فوووق ودقيت في العربية بقدام ووقعت في الأرض بقيت سامعة بعييييد وشايفة طشااش طشاش نزل من العربية زول م قادرة اشوفو زي الناس بس باين انو راجل بقى بقول لي يا أخت اصحي اصحي وانا الدم مغرقني وجسمي تقييل ما قادرة اجر لا يد لا كراع الراجل بكى عديل وهو بصحى فيني وانا سامعة اصوات ناس بعييدة بتتكلم واحد قال قتلها وتاني قال دي تاني م اظن تنفع وتالت قال ربنا يلطف عليها واحد قال ليو يا زول خلي البكى والحق بت الناس وديها المستشفى وفعلا الراجل رفعني في عربيتو وطلع وهو بصحي فيني ودموعو عشرة عشرة وانا ما قادرة اركز في ملامحو طلع تلفونو وبقى بتكلم وببكي يا امي انا قتلتها والله ماتت بسببي انا قتلت حنين الحقيني في الحوادث ماشي اوديها ...وتاني ما حسيت ولا سمعت شي
نمشي لي ناس خالتو فتحية....
قاعدين كلهم في السرير ومتمحنين والتفكير ح يقتلهم خالتو فتحية قالت لي بناتها والله يا بنات قلبي ما متطمن على البت دي حاسة انو حاصلة ليها حاجة ووراها قصة كبيرة وشكلها مكسورة بتها الكبيرة قالت ليها والله يا امي انا زاتي شايفة انها زعلانة اسمها منو صحي امها قالت ليها والله زمني دا كلو م عارفة اسمها منو م قدرت اسألها حبيت اواسيها واقيف معاها مع اني م بعرفها بس حسيت انو ناقصاها الحاجة دي ف حبيت أكملها ليها بتها ردت ليها والله يا امي البت صغيرة اسي ح تكون وصلت الشعبي صحي انتي م تتصلي في رقم اخوها فعلا اتصلت بس الرقم مغلق وحاولت كتييير م خش معاها في النهاية قالت والله البت شغلت بالي ربنا يكون معاها محل متقبل....
