وفجأة تجي خالتو اماني داخلة وعيونها ملانة دموع حضنتني وزادت في البكى قالت لي يا بتي انتي عانيتي كتير انا سمعت كل شي انتي اصغر من الابتلاءات المريتي بيها بقينا نبكي التلاتة قريب ساعة وهي حاضناني ما عارفة احساس الامان الكنت حاسة بيهوو
جاني من وين والله ارتحت راحة نفسية لمن حكيت الجواي وبكيت عارفين احساس انك تلقى الحب والحنان والراحة والطمأنينة في حضن غير حضن امك 💔 عارفين احساس ترتاح في بيت غير بيتكم ..والله يجماعة الأسرة الحنينة نعمة حافظوا عليها 💕 نمت في حضنها غطتني وحسام قفل النور وطلعوا..في الممر حسام وامو بتكلموا قال ليها يا امي سمر دي م لازم ترجع بيتهم طالما ليها قريب شهر برا البيت وماف زول سأل منها خليها تقعد معانا وتبقى حنين وحتى لو رجعت ح تموت عشان كدا احسن تقعد قالت ليو انا زاتي فكرت كدا وابوك بكون موافق برضوو لكن المشكلة هي ح توافق قال ليها نختها نحن التلاتة ونتكلم معاها احسن قالت ليو ان شاء الله صباحات الله بي خيرها نخليها لي بكرة قال ليها طيب تصبحي علي خير باس راسها وهو دخل غرفتو وهي نزلت لقت عشوش في الهول قالت ليها مااامااا بااابااا جا جوا خالتو اماني قالت ليها خلاص امشي نومي لي بكرة ودخلت غرفتهم لقتو في الحمام قعدت في طرف السرير وبتهزز في كرعيها وبتفكر معقولة دي هي بتكون ياها زاتها لانو قالت أبوها مات قبل سنة ونفس العمايل الكان بقولها لي ماهر عن امها..في عز تفكيرها ماهر طلع من الحمام وشافها متوترة جا قعد جمبها وقال ليها مالك متوترة كدا قالت ليو البت الفوق ديك بتشبه ليك منو ؟! قال ليها اكييد حنيين وسبب سؤالك شنو ؟! قالت ليو غير حنين بتشبه منو ؟! سكت مسافه وقال ليها بتشبهني اماني بتفكري في شنو قالت ليو ماهر البت دي اسمها سمر وأبوها اتوفى قبل سنة وبتشبه حنين وبتشبهك يعني ما عرفتها معقولة قال ليها ما يكون الفي راسي صاح قالت ليو بالضبط كدا قال ليها الفترة دي كلها وانا ما عرفتها عيب علي وعيونو دمعت اماني بقت تواسي فيو قالت ليو يا ماهر البت منهارة ومرت بظروف كعبه أبوها مات وبعدو اختها الكبيرة ماتت بعد شهرين ولا شهرين وحاجة قال ليها سهى..💔 سهى ماتت ما بصدق قالت ليو ولسة الصدمة الجاية بسبب اختها الصغيرة اغتصبوها يا ماهر البت حياتها اتدمرت وبقت فاقدة الحياة عشان كدا قالت راجعة بيتهم ...حكت ليو السمعتو كلو... وانا من خلال كلامها طوالي عرفتها طلعت ياها زاتها..ماهر بكى من اعماقو وقال ليها دا كلو مر بيها يحليل أبوها الكان سندها وكمان اغتصبوها يحليلك يا سمر حياتك كلها كانت عذاب بس بوعدك من اللحظة دي ح اعوضك كل شي صاح ربنا شال بتي بس عوضني بيك صحي الأقدار بتجمع قالت ليو تفتكر ح توافق تقعد معانا قال ليها اكيد ح تقعد بس م لازم تعرف حاجة عن الموضوع دا احسن نخلي سر لا هي ولا حسام م يعرفو قالت ليو اكيد يلا نوم عشان بكرة نشوف لينا طريقة حل للموضوع دا ....
الصباح جا وصحيت كنت حاسة بطاقة إيجابية وكأنوا ما مريت بالوجع دا فتحت شباك الغرفة وبقيت بعاين للشارع الوقت بدري شديد خليتو فاتح عشان الأوضة تتهوا ودخلت استحميت واتسوكت واتوضيت طلعت صليت و دعيت ربنا وشكرتو 💕 و دعيت لي منى تكون كويسة وما تحصل ليها حاجة ويحفظ سهى وقمت من المصلاية قعدت في المكتبة وشلت لي كتاب بديت اقرأ باب الغرفة دق قلت اتفضل دخل عمو ماهر قفلت الكتاب وابتسمت ليو قلت ليو صباح الخير قال لي صباح الخير بقيتي كيف قلت ليو الحمد لله بعدا ممكن امشي قال لي يا بتي داير اطلب منك طلب وبتمنى ما تخذليني قلت ليو اتفضل قال لي عارفك مريتي بظروف صعبة ودي اسمها ابتلاءات ما ظروف وزي ما بقولوا ربنا بشيل منك حاجة عشان يديك حاجة تانية كأنو شال منك اغلى حاجة عندك وشال مني بتي عشان يجمعنا بي بعض ونكون عوض لي بعض ان شاء الله فهمتيني ؟ ممكن تبقي لي بت وابقى ليك اب عارف الموضوع ما بالسهولة دي بس وابوك ربنا يرحمو ويجعل مثواه الجنة ما هين وما بتقدري تدي مكانتو لي زول تاني بس عليك الله ما ترفضي طلبي ..قال لي الكلام دا وعيونو فيها دموع ..قلت ليو والله يا عمو انت ما عارف اهلي صعبين كيف وما عارف اي شي عن حياتي قاطعني قال لي م مشكلة اهلك ما ح يعرفوك وين اصلا لو كانوا دايرنك صحي كان لقوك من زمان بس ما معقولة الليلة ليك شهر عديل وما عارفين خبرك قطع كلامو صوت الباب وجا داخل حسام قال ليو بركة الجيت يا ولد كنت بقول لي حنين تقعد معانا عاينت ليو بإستغراب قال لي اي عارف اسمك سمر بس لو واصلتي بالاسم دا ح تجيك مشاكل كتيرة وأولها تمتحني كيف وما عندك مستندات وكدا ح تكوني في امان اكتر بس الكلام دا كلو بعد توافقي انا منتظر ردك اكيد ما ح تخذليني حسام قال لي وبعدين لو كان بت عمك دايراك ترجعي ما كان خلتك طلعتي وقالت ليك شوفي حياتك والمفروض تكوني رضيتي ب الكتبو ليك ربنا وماف حاجة اسمها نهاية بالعكس كل نهاية ح تكون لبداية جديدة واعتبري دي بدايتك الجديدة يلا منتظرين ردك ..سكت مسافة وعاينت في عيونهم وشفت نفس نظرة الحنية غمضت عيوني وفكرت في كلامهم ومر علي شريط حياتي كلو ولقيت كلامهم صاح نحن بنقع عشان نقوم ونواصل ماف حاجة بتستاهل اقتل نفسي عشانها وعشان نفسي بتستاهل ح اديها فرصة يمكن ربنا رسل لي الناس ديل عشان يغيروا حياتي وعشان خاطرهم ح اوافق فتحت عيوني وقلت ليهم ربنا يقدرني اكون ليكم حنين 💕.. حضنوني الاتنين يعني انا النظرة الشفتها في عيونهم اتمنيت الزمن يقيف هنا حسام قال لي بوعدك اني اكون ليك افضل اخ وعمري م ح اخيب ليك ظنك وعمو ماهر قال لي ربنا يفرحك زي ما فرحتيني يلا نحن ح نطلع نخليك تجهزي وتنزلي للفطور قلت ليهم طيب طلعوا وقفلوا الباب .. والله يجماعة حسيت نفسي مرتاحة نفسيا وقفت جمب المراية وعاينت لنفسي وبتكلم قلت حرام عليك يا سمر كنتي ح تقتلي نفسك عشان ناس ما بتستاهل صاح هم في النهاية اهلك بس برضو ما بسمح ليك انك تعملي كدا الحمد لله انو ربنا انقذك الحمد لله يا رب الحمد لله 💕 رجعت وقفت جمب الدولاب فتحت ضلفة شلت لي بيجامة كبدية سادة أكمامها طويلة فيها طاقية ودخلت استحميت تاني ولبستها مسكت شعرتي كعكتين وتاني جيت وقفت جمب المراية وعاينت لنفسي قلت من الليلة انتي حنين واسم سمر دا اجدعي من حياتك بس ح يكون في قلبك عشان ابوك السماك ليو ربنا يرحمو ويجعل مثواه الجنة واختك سهى برضو كانت بتحب الاسم دا ربنا يرحمها ويغفر لها ويسكنها فسيح جناته..من الليلة حنين ماهر ماف حاجة بتستاهل لازم تكملي مشوارك تتذكري وقت بتتكلمي مع سهى وقالت ليك لازم تعملي الشي الما عملتو انا وما شرط دكتورة المهم بس تقري الجامعة وتقري حاجة تفيدك انتي وترفعي بيها راسك ورأس ابونا من الليلة لازم تعملي كدا وحقك ما تخلي لي زول الناس اخدت حجات كتيرة من حياتك تاني م تسمحي ليهم نهائي كفاية لحدي هنا استووب✋ ويعني شنو اغتصبوك مش الحاجة دي ما بي ارادتك مش كنتي مغصوبة تعمليها يبقى ماف حاجة تخليك تخجلي وطبعا الجنس البشرى التاني الاسمو اولاد دا تاني اقرفي منو خليك بس مع هدفك وشوفي مستقبلك والبقيف ليك عقبة في طريقك شوتيييو وربنا يوفقك 💕 لبست الطاقية في راسي وطلعت برا الغرفة وانا في السلم حسام جا طالع من غرفتو قال لي خلاص ننزل قلت ليو انزل وفتحت ليو الطريق حدر لي ونزل قدامي وانا لحقتو نزلت الصالة وصادفت عمو ماهر طالع من غرفتو وكان لابس شكلو ماشي الشغل وقف مسافة عاين لي قال لي كدا ممكن اعتبرك حنين بتي القوية مد لي يدو عاينت ليو وابتسمت ومسكت يدو ما عارفة يجماعة لمن اكون معااهوو بحس بيو كأنو ابوي ودي حاجة كانت بتفرحني مشينا نهاية الهول كان في لفة كدا زي الممر لفينا بيها ووصلنا المطبخ مبالغة كل مرة بكتشف حتة جديدة مطبخهم كان بالعنابي لقينا حسام قاعد في السفرة ومنتظر وخالتو اماني بترص فيها قالت لينا صباح الخير اقعدوا قلت ليها صباح الخير قعدنا في الكراسي جات واحدة وشايلة اكياس في يدها قالت ليها ماما دي الحاجات خالتو اماني قالت ليها معليش اعفي لي يا عشوش يا بتي تعبتك من الصباح دا اقعدي ناكل وكلهم قعدوا عشوش قبل ما نبدا الاكل انتبهت لي وقالت ويييي يشبهههه هنيييين كلهم قعدوا يضحكوا😹💔 خالتو اماني قالت ليها اي من الليلة دي حنين يلا ابدوا الاكل ببرد ..سبحان الله الناس ديل طيبين طيبة كدا م عادية ربنا يهديهم العافية بس 💕 اكلنا وعمو ماهر طلع الشغل وحسام طلع غرفتو يجهز للجامعة عشوش وخالتو اماني بلمو في السفرة قعدت معاهم بعد خلصو مشينا قعدنا في الهول كدا حسام جا نازل كان لابس بنطلون بيج وقميص اسود وساعة سودا واسبورت اسود والريحة حاجة كدا ف منتهى الذوق وشايل مفتاح في يدو باس رأس امو وقال لينا نتلاقى بعدين وطلع فات خالتو اماني قالت لي عشوش يا بتي افتحي لينا الشاشة دي نحضر عشوش قامت فتحتها طرحتها وقعت شفت شعرها كانت عاملاهو بطريقة سمحة عجبتني شدييد يلا النوصفها ليكم عشوش دي اصلها حبشية لونها قمحي ومتوسطة في الطول والصحة وشعرها طويييل ما شاء الله ودايما بتكون بي طرحتها يلا شعرها بتعملو مشاط الحبش السمح داك ..قلت ليها عشوش اتلفتت قال لي نعمم قلت ليها دايرة زي دا واشرت ليها على رأسها ضحكت قالت لي اسمو بوب قلت ليها بس هو قالت لي جيب مشط وتأااال طلعت الغرفة شلت المشط ورجعت ليها عملتو لي صغار وحلو شديد انا زاتي عجبني قلت ليها شككرااا يلا برضو حقها احلى عشان شعرها اطول من حقي انا شعري مع اكتافي يعني متوسط ... مر علي اسبوع وانا كل يوم بتأقلم أسرع وبحبهم اكتر من اول وهم نفس الشي وكل يوم نفس الروتين وطبعا انا بقيت ردي ف طرف لساني مع حسام وهو برضو معاي اليوم كلو نتناقر لمن سماني الشرسة 😹💔 يوم جمعة وانا قاعدة في الغرفة كالعادة الباب دق قلت اتفضل طلع حسام....
#اقتباسههه💕
ومرات بقولو انو الحياة هي مجرد اختبارات ..بس انا عندي رأي تاني الحياة عبارة عن حياة وبس ..عبارة عن ابتلائات وكمان حاجات حلوة ❤
عبارة عن حب وكمان كره ،،عبارة عن صدق وكذب ..يعني بي اختصار دي هيا الحياة ..ح نعيشا لانو غضبا عنا مفروض نعيشا..هي بتفرض علينا حاجات ونحنا مفروض نفرض عليها حاجات
"قراراتنا ..قوتنا..حبنا .. وعدم استسلامنا .."🌏💛
ابقو عافية 🖤
