Unknown Soldiers Opinions

الرأي الثالث والعشرون

رأينا في رواية حتى تحترق النجوم

HanaAhmed8

اسمها جميل جدا ويشد والوصف جميل
الكاڤر لايق على الرواية واسمها

عجبتني جدا فكرة ان الأسماء عربي، وان السرد حلو، مش بسيط اوي ولا مبالغ فيه، مناسب تمامًا

قفلة كل فصل كانت جميلة جدا وبتخليكي متحمسة اوي عشان تشوفي الفصل اللي بعده

اللغة سليمة، ومفيش أخطاء ولا املائية ولا نحوية
ولكن كان عندي بعض الحاجات اللي شايفة انها ممكن تبقى محتاجة تعديل أو على الأقل تفسير:
فكرة ان فريدة تحب سليم وهو يحبها ومعداش أقل من شهر ديه كانت مش منطقية شوية، وسريعة اوي يعني كنت حابة نمد الفترة ديه وكده

كتبتي ان مامتها وباباها انفصلوا وهي عندها 10 سنين، وعاشت مع باباها 12 سنة لحد ما مات، وقعدت سنة مع مامتها، يعني كان المفروض عندها 23 سنة، وانت ذكرتي بعدين انها عندها 27 سنة

مفهمتش ازاي واحد مريض نفسي بدل ما يروح لدكتور ويتعالج من انه عايز ينتقم من كل بنت، أول ما يشوف فريدة يخف تلقائي كده

مفهمتش ازاي فريدة صاحبة هنا وروان ومعرفتش ان هنا كانت بتحب سليم، وان سليم ساب روان في الفرح

ولكن في المجمل الرواية رايقة

HayamMagdy

الوصف شدني جدًا وحبيت أكمل الرواية بسبب الوصف والاسم برضو كان عامل مفيد وشدني للرواية والكافر حلو  بس اعتقد انه كان محتاج شغل عليه اكتر

بالنسبة للحبكة فحسيتها محتاجة تتعدل اكتر من كده لأنها مش مضبوطة وفيه حاجات مش منطقية مثلًا تسريع سريع جدًا في الأحداث الشابتر كان بيبقى فيه حدث او اتنين بالكتير أوي، فيه حاجات بتحصل وبتكتشف ف  الاخر انها حصلت مفروض ان الكاتبة توضحها أكتر زي مثلًا ان سليم خد رقم تليفون فريدة وفيه حاجة شدت انتباهي يوم الافتتاح قالت إن صحبتها رودينا مش جاية وف نفس الوقت كانت جت وموضحش سبب انها جت، وصف المشاعر كان محتاج شغل عليه اكتر وطريقة السرد كانت محتاجة تبقى ثابتة اكتر من كده*، الرواية من النوع اللايت الخفيف اللطيف بس اتمنى الكاتبة لو كانت حبكتها احسن من كده

بالنسبة للغة فاللغة كانت من النوع البسيط الكويس اللي بيشد القارئ لأنها شدتني عمومًا ولكن كان فيه بعض الأخطاء الإملائية في الرواية وهي التفريق ما بين ال"ي" وال "ى"

وفي النهاية الرواية حلوه ومتوقعة ان للكاتبة مستقبل ف الكتابة احسن

تقيمي ٥/١٠
aaml_Mohamed98

هي عرفت تختار عنوان كويس جدًا ووصف يجبرك تدخلي تشوفي محتوى القصه جوا عامل ازاي،

الكوفر الفونت بتاعه محتاج يبقى حاجه مخيفة أكتر أو على الأقل حاجه تكون بروعة الإنترو والديسكربشن،

أعتقد إنها محبتش تكون البارت الأول بغموض الوصف ودي حاجه خليتني اطلع من الإستوري، لو هقيم القصه هيبقى بسبب إنبهاري الشديد من الوصف والعنوان هديها ٨/١٠.

محبيتش اوي فكرة ان البطل خبط في حاجة البطلة واتقابلوا صدفة

الأحداث رقيقة وجميلة، بس يمكن علشان أنا مش بقرأ رومانسي إن جينرال فمعرفتش انها رومانسي، وأسلوب السرد لطيف بس مش قوي، مفيش شرح كتير أغلبه كلام.

وتقييم القصه كأحداث هيبقى ٦/١٠

AladwyTsobaky

الرواية في المجمل جميلة

الكڨر حلو بس كان عايز شغل اكتر شوية

النبذة والعنوان جُمال وشدوني اقرأ

أحداث الرواية حلوة شدتني وأنا بقرأ، فيها مشكلة بس ان التنقل بين وجهات النظر في البارت الواحد كان كتير خلاني أتوه شوية في النص، غير كده حلوة جدًا.

gamilazayngirl

اولاً بالنسبه للغلاف : عشان الغلاف من اكتر العوامل اللي بتشد القاري انا شيفاه بسيط زياة عن اللزوم او الفونت نفسه بسيط جداً مش مناسب مع القصه او الكافر نفسه فا لو حبيتي تغيريه فا انا برشحلك التيم بتاعنا الـ Design soldiers يعملولك كافر جديد أو ممكن انتي لو عاجبك الغلاف غيري الفونت

ثانيًا بالنسبة للوصف : عجبني الصراحة بسيط بس كنت بتمنى انه يبقي أعمق من كدا أو شيّق أكتر عشان يناسب اسم القصة بس أشجعك انك تحسنيه في رواياتك الجاية

ثالثاً بالنسبه للسرد : الانترو أو الدخله أو المقدمة لطيفه جدًا وحبيتها جدًا وخليتني اتغاضي عن الغلاف والوصف وشدتني اكتر اني أقرأها

بالنسبه للمحتوي والسرد رغم اني أول مرة اقرأ فيها رواية أبطالها اسماء عربية بس عجبتني الاسماء بجد الا ان الحوارات ما بينهم بسيطة جدًا وحاسة ان فكرة سليم عن النساء في البدايه متكررة أو عنيفة شويه ؟ وشايفة انها اتعصبت زيادة عن اللزوم لما سليم خبط في المنضدة ووقع وكلامه او جملته "انتي متعرفيش انا مين " دي ضحكتني اوي الصراحة بس حاسة ان الأحداث سريعة ومستبقة شويه بس لغويًا انتي كويسة جداً وفي السليم والأسلوب الحواري حلو وحسسني اني بقرأ رواية ورقية بس علي هاتف

كنت بتمني الأحاديث والحوارات وحبكة القصة تبقى أقوى أو أفضل من كدا وأنا واثقة انك هتطوري من نفسك إلى أن تصلي إلى درجة الكاتبة المحترفة وتبقي راضية عن نفسك وبتمنالك التوفيق من كل قلبي

تقييم كُلي ٧/١٠