حب الرماد

بارت 💞1💞

صونا تيليفون صباح فطنت ناضت ميتا بالعيا غسلت ولبست حوايجها كي العادة سروال كحل وتريكو حمر ودارت شعرها كوتشيفال ولبست باسكات بيظة ولبسة جيلي كحلة كان شوية البرد خرجت من البيت لقات يماها فالكوزينة تشرب فالقهوة
ريم : صباح الخير يما
صفية : صباح النور
ريم : كيفاش راكي ريحتي شوية
صفية : لاباس بنتي حمدلله
ريم : حمدلله
شربت ريم قهوتها وباست راس يماها وخرجت تمشي وتخمم على يماها
نعرفكم بريم في عمرها 23 سنة شابة عينيها بني كلااااغ شعرها شوية قصير عند كتافها حنينة بزااف وتحب كامل الناس كملت قرايتها طب وذوك واهي تخدم ممرضة في سبيطار 😇 قد الحال ساكنة مع يماها *صفية * وباباها ميت ملي كانت صغيرا معندهاش خاوتها غير هي تخدم عليها وعلى يماها اللي مريضة بالقلب 😔💔 حالتهم يعني على قد الحال كاريين دار في حومة قديمة

💚 نكملو 💚

وصلت ريم لسبيطار راحت لبست طابلية وبدات خدمتها مع وقت لفطور هبطت للمطعم لقات صحبتها *إيمان * لتم
نعرفكم على * إيمان * و * مروة * صحابات ريم الروح بالروح من يامات الليسي كيما الخوتات ويحكو لبعضاهم كلش ميخبو والو إيمان تاني شابة طوية شوية مي مشي بزااف عينيها نوازات شعرها قصير ماغون كلاغ حلوة سكر وتدخل للقلب تم تم عندها خوها اسمو بيلال كبير عليها امبعد نعرفكم عليه وباباها ويماها باينا هههه
و مروة شعرها قصير عند الرقبة شاتان شباب قصيرة هههه وطوايشية تحب الهبال وديما تضحك تعيش مع باباها ومرت باباها مي معلبالهش كامل بيها يعني باباها يتهلا برك في ولادو لوخرين تبات برا معلبالوش بيها ومرت باباها باينا تكرهها

نولو للأحداث *_*
ريم قعدت فالطابلة ودارت يدها على خدها
إيمان : وشبيك ريمو
ريم : ااااه يا إيمان كرهت
إيمان : احي كامل مشي غير نتي مي واش كاين ني نشوف فيك عيانة
ريم : يما ياإيمان كيفاش راح ندير والله مراني قادرة نزيد نتحمل
إيمان : معليش زيدي اصبري حببتي ربي يفرج
ريم : وي سبحانو مي راني خايفة نخسرها علبالك نموت موراها منقدرش نتصور حياتي بلا ماما
إيمان : دوبلي الخدمة ريم بالاك تلحقي دبري دراهم العملية
ريم : احي ياإيمان مشكيتش مي ندير كلش على خاطرها ندوبلي الخدمة ونشالله نلحق مي واشمن خدمة راني في سمانة نحوس ووالو
إيمان : إيه خممت فيها وعندي الحل
ريم : انا وراصك سلكيني
إيمان: شوفي كاينا جارتنا لبارح جات لعندنا وسمعتها تهدر على وحد المرا لباس بيها عندها صالة تاع عراس وحفلات وعفايس هكا وهاد المرا تحوس على بنات يخدمو لتم واش رايك نهدرو معاها
ريم : مي واش نخدمو ??
إيمان : احي يانتي باينا نسربو لنسا
ريم : اممم مليحة وشحال يخلصو لنهار !?
إيمان : 3000 للوحدة ونخدمو من 5 تاع لعشية حتا 9تاع الليل ويوصلونا هوما اه واش رايك
ريم : مليحة نطبعو بيها وربي يفرج خلاص لعشيا نجوزو نهدرو مع جارتكم وتدينا لعندها
جات مروة تجري كي العادة 🙃🙃 وقعدت معاهم
مروة : واش راكم تمنشرو فيا والله سمعتك خاينين 😒😕
إيمان : بلعي كنا نهدرو على الخدمة الجديدة
مروة : انا معاكم الله يسهل 😌
ريم : نهدرو مع المرا فبل امبعد ساهل
كي كملو خدمتهم إيمان وريم جازو لجارت إيمان وهدرو معاها وقاتلهم غدوة نديكم ليها وتفاهمو معاها ومبعد ريم ولات لدار لقات يماها وجدت لعشا بسيف قعدو ياكلو
ريم : ماما انا وإيمان ومروة حا ندخلو نخدمو خدمة جديدة
صفية : وشمن خدمة علاش حبستي من السبيطار
ريم : لالا هادي خدمة زيادة باش ندبرو دراهم للعملية تاعك
صفية : إيه ووشمن خدمة هادي
ريم : نسربو في لعراس يعني فصالة تاع وحد لمرا ونخدمو من 5 حتا ل9 تاع الليل وهوما يوصلونا
صفية : اه يابنتي هادا كامل على جالي تخدمي فالنهار وتزيدي الليل بزاف عليك
ريم : تعبك راحة يما انا مهم عندي تبقاي قدامي التعب يروح ومتخميش فيا نتي برك ألتهايلي بصحتك
صفية : ربي ينور طريقك يا بنتي ويكون معاك
ريم : أاااامين 😊😊😊 ايا ماما روحي ترقدي انا نغسل لماعن
صفية : تصبحي على خير
ريم : ونتي من أهلو ❤❤

غدوة منداك صباح ناضت صباح ريم لبست كي العادة لبست تريكو غوز فية ورد كحل وسروال كحل و لبست باسكت تاعها لي من عام 1999 ههه ودارت كوتشڤال وخرجت بكري خلات يماها راقدة لحقت لسبيطار تلاقات بإيمان ومروة كملو الخدمة وخرجو بكري باش يروحو للمرا مدتلهم جارت إيمان لادريس وركبو في طاكسي وراحو لحقو قعدو مخلوعين فدارها
مروة : يادلالي ديك الدار 😮 وقعدت مشرعة فمها
إيمان : هههه أضربي دارنا في 24 ومتخرجش قد هاد الدار
ريم : هههه بلعو بلعو وهيا ندخلو
إيمان : مروة غلقي فمك فضحتينا 🙂
ودخلو لدار طبطبو خرجت ليهم خدامة
الخدامة : انعم كشما تحتاجو
ريم : نسحقو مدام ليلى يدا راهي هنا
الخدامة : انعم راهي هنا جوزو دوك نعيطلها

دخلو بين ثلاثة لدار
إيمان : شو ذاك العز ياجدك مين يجيبو قسام الدراهم هاذو
مروة : احي يانتي انا حوايج الخدامة عجبوني بلا الدار 😂
ريم : بلعو نتي وياها اهي جات لمرا
هبطت من الدروج مرا مشي كبيرا بزاف لابسا كحلا وسروال كحل وفيهم عفايس بلبيض وطالون وشعرها صفر ودايرا شوية مجوهرات
مدام ليلى : انعم قاتلي خدامة سحقيتوني شكون نتوما
إيمان : مدام حنا جينا على جال الخدمة في لاقال ديالك انا إيمان وهادي ريم ومروة
ليلى : ااااه داكوغ فهمت إيه صح راني نحوس مي تعرفو ياك وقتاش الخدمة وكيفاش
ريم : إيه علبالنا ورانا واجدين
ليلى : ايا خلاص تفاهمنا يملا تخدمو بين ثلاثة هكا
مروة : إيه يدا يساعدك
ليلى : إيه بيان سوغ نحتاجكم بين تلاتة امالا خلاص تبداو تخدمو هاد لخميس نشالله نسحقكم تكونو تما على 5 تبداو
ريم : داكوغ مدام (( وناضت )) مالا كي تفاهمنا حنا نروحو بقاي على خير
ليلى : مع السلامة

وخرجو وكل وحدة راحت لدارهم

نروحو لمكان وحدوخر كاااامل 🙃 وصلة طونوبيل قدام شركة كبيرة هبط منها راجل كلاااس لابس كوستيم ڤري (( رمادي )) وداير نواضر ويمشي وناس كااامل محترماتو طلع ف الأسونسور للطابق الفوقاني خرج منو جاز على السكرتيرا شافتو وقفت
السكرتيرا : صباح الخير سي مهدي
مهدي : صباح النور جيبيلي كامل الدوسيات لي اجلتهم لبارح وقهوتي تاع العادة
ودخل لبيرو وقعد جابتلو قهوة ومدتلو وخرجت وهو قعد يخدم

** نعرفكم على مهدي عندو 27 سنة سمر وعندو لحية خفيفة وشعرو حرير وكوغ تاعو شوية سبورتيڤ يعني مخدوم عادي يخدم مدير في الشركة تاع باباه * السي نذير * لي تقاعد وهو شد بلاصتو إنسان متكبر شوية ومعندوش التمسخير كلش في بلاصتو لازم كامل يحترموه مي مهوش حڤار * امبعد مع الاحداث تزيدو تتعرفو عليه كثر 🙃😉 *
كان يقلب فملفات مبعد عيط لسكرتيرا جات تجري
مهدي : وين راهو الدوسي لي وصيتك عليه البارح تاع الاجنبين لي جايين
السكرتيرا : مزالو فالبيرو ديالي كنت نراجع فيه دوك نجيبهولك
مهدي : روحي

نولو عند ريم كانت تخدم وعيانة باسك مرقدتش مليح لبارح سهرت مع يماها زاد عليها السطر
ريم : اه ياراسي راح يطرطڤ
مروة : اي شو هداك السيد لي راهو قاعد لهيك شحال بقلاوة كون يخليني نداويه أڤيك بليزيغ والله خخ
ريم : انا نقولك راسي ونتي تقوليلي بقلاوة يعطيك غمة
مروة دايرا يدها على خدها وتخزر فيه : تغمك نشالله ريم : ياو أغلقي برك فمك المشرع ذبان داخل خارج 😂😂
مروة : هاهاها تعي بلعي خليني نكحل
ريم : كحلي كحلي انا نروح
مروة قعدت غايسة مبعد جاليها الطبيب الرئيسي تاعها عطالها تبهديلا تحت انظار هداك البقلاوة راحت تجرييي 😂😂