يوميات عريس

يوميات عريس الحلقه 8

يوميات عريس
الحلقه 8
فتح الباب وجد ريم تحمل صينيه كبيره
افتح افتح وخد مني
ناصر :ايه ده كله الي جيباه
ريم :عشان تتغدي وتاخد اكل لعم عبده وانت رايحله ووضع الصينيه علي الترابيزه
ناصر :بس دا كتير اوي احنا هناكل ايه يعني
ريم :اللي يفيض عينه لبكره وانا كل يوم هأجز عشان اعملك اكل
ناصر :انتي مارحتيش انهارده
طب ليه يابنتي مانا كنت هجيب حاجه جاهزه وخلاص
ريم :ليه يعني وانت شايفنا قللات الاصل دي الجيران لبعضيها ياجدع وتخبطه علي كتفه
فيضع يد ع الجدارالذي تستند عليه
بس انتي مبيضه كده ليه انهارده ومحلوه علي غير العاده ومش شايف القمطه بتاعه كل يوم هو الاسود بيحلي كده
فكانت ترتدي عباءه سوداء وطرحه تضعها باهمال تظهر نصف شعرها
فتبعده عنها ايه ده ايه ده انت بتعاكسني ولا ايه
هو تعب امك خلاك لسعت
ولا هيجي فوق دماغي

ناصر :مش عارف بس تعبها فعلا خلاني افكرلو جرالها حاجه هعمل ايه وهي اللي كانت بتجبلي العرايس
ريم :وانت بترسم علي اني ادورلك علي عرايس بدالها
ناصر :طب وليه ندور وانت موجود ياجميل بدل ماامي جالها جلطه وامك هتتشل قريب منك
ريم :بعد الشر عليها تف من بؤك
انت عاوزني انا اجوزك انت
ناصر :نعااام ياختي ايه مش عاجبك انتي كنتي تحلمي اتف ف وشك حتي
داانا هعصر علي نفسي 17 كيلو لمون وربع عشان الجوازه المهببه دي
ريم :وايه لازمته الربع ده ماتخليهم 18
ناصر :لا اكتر من كده نفسي هتجزع
ريم :لا والله
بس انا عمري مافكرت فيك زوج انت اخويا ياجدع ومتربيين سوا
ناصر :وانتي لاقيه يابايره داانتي ف سني
ريم :نعااام نعاام
انا اصغر بسنه ياروح خالتك ناسي ف الثانويه عملت الزايده وعدت السنه وبقيت معايا ودخلنا سوا الكليه
يميل عليها مانتي حافظه الc.v
بتاعي صم اهو
ريم :تنظر له بخجل من نظراته
اه طبعا هي عشره يوم دا انا اتولدت لقيتك ف خلقتي علي طول
ناصر :اهو نكمل المسيره ورزقي ورزقك علي الله وربنا يقويني ويصبرني عليكي بدل مافيص منك ف النص لاني اكيد مش هستحمل للاخر
ريم:ليه يعني وانت تطول
خلاص هفكر
فيخبطها علي دماغها
قولي انتي تطولي اصلا
وايه هفكر دي
ريم :يعني انا اللي هفضل مدبسه ف ام السلم ده ماهي شقتك ف نفس الدورهنا يعني مش هطلع من ام البيت ده
لا ياخويا يفتح الله
ناصر :خلاص مش هحك جزمتي ف السلم
ريم تبرق يعني بتعملها قصد ياناصر
والله مامسمحاك علي قطمه وسطي دي
فيمسك وسطها سلامه وسطك ياجميل
ريم :لا اتلم انا ماحبش كده
ناصر بابتسامه امال تحب ابه ياجميل
ريم :ولا الاكل عندك انا ماشيه جتتي مش خالصه
فيجذبها من يدها ولا ايه ياغبيه
انتي مفكرانا لسه بنلعب ف الشارع
دانا هبقي جوزك يعني تحترمي نفسك معايا ولسانك ده مايطولش لاقصهولك
ريم :شوف بقي انا واخده علي كده عجبك عجبك مش عجبك بلاش الف من يتمناني
ناصر :لا مش عاجبني وهتتعلمي الادب من هنا ورايح ويرفع يده لاخدك علي صرصور ودنك
فتنكمش خوفا من ان يضربها
ريم :انت بتتكلم جد ياناصر
ناصر :لا ياروح امك بهزراتعدلي معايا لاعدلك
ريم :خلاص انا مش موافقه
ناصر :اعملي حسابك اما تطلع امي هنتخطب ونعملهالها مفاجاه يلا غوري
بت تحرق الدم
فخرجت ودخلت علي امها ليست علي طبيعتها
امها :في  ايه يابت اتاخرني كده ليه مالقتيش ناصر مش معاكي المفتاح
في ايه يامعدوله
ريم :مافيش حاجه ياامه بقي اسكتي شويه انا داخله اوضتي
ودخلت سارحه
معقول انا وناصر
انا عمري مافكرت فيه كده ابدا
بس هو فعلا اقرب انسان ليا
بس كنت بعتبره اخ صديق
معقول يكون حب عشان كده برفض اي حد ومابكملش اي خطوبه لاني عاوزه حد شبه ناصر كده معايا
نكلم مع بعض بدون خجل كاننا اصحاب
واقوله كل اللي نفسي فيه ماتكسفش حتي هزارنا سوا من غير تحفظات
معقوووول اخرتي مع ناصر
ولا هو عشان يرضي مامته ويسعدها قال كده مش عارفه محتاره خايفه يكون قرارغلط وخايفه يكون ده عين العقل
وايضا عند ناصر
بدا ياكل وهو يفكر انا ايه الي عملته ده اخرتي تبقي ريم داانا ماكنتش بطيقها تخش عليا المكتب حتي
بس بردو مابطقش يوم مارزلش عليها
ولا بطيق زعلها
ف نفس الوقت كنا نتخاصم ونتصالح ف ثانيه تعيط وتضحك ف ثواني ويضحك بت غريبه
هي لسانها بس اللي طويل والقمطه اللي هولع ف امها دي  اللي لبساها ليل نهار زي ماتكون علامه مميزه تقولش عصام كاريكا
بس هل فعلا بحبها بعد اللف والدوران ده وهي قصادي ومش شايفها الا دلوقت
خايف مرض امي يكون السبب واني اتسرعت
بس انا فعلا مافيش واحده هتناسبني وتستحملني وتستحمل ظروفي زي ريم بت جدعه واصيله وتقف وقفه رجاله معايا ف شدتي
يلا اللي فيه الخير يقدمه ربنا
اما اخد الاكل لابويا  واروح اشوف امي وبعدها يحلها الحلال بس هي تقوم بالسلامه
وخرج ليجدها مرتديه ثيابها
ناصر :علي فين
ريم :جايه معاك اشوف خالتي
ناصر :مالوش لزوم انتي تعبانه من الصبح ف عمايل الاكل
ريم :لا مافيش تعب ولا حاجه
انت خدت غيارات لهم عشان لو حبو يغيرو
ناصر :لا والله ماجاش ف بالي
طب هات المفتاح
ناصر :استني هفتحلك
وفتح لها
ريم :هات كيس علي مالمهم
وفعلا اتي بكيس وجاء من خلفها لتلتفت تجده علي مقربه منها فتخجل من قربه
ناصر :خلصتي
ريم :اه خلاص افتح الكيس وتضعهم فتلامس يده يدها
فتسحبها
ناصر :في ايه يابت اكهربتي
ريم :ناصر انت صحيح عاوزني
ناصر يعطي لها ظهره
والله ماعارف ياريم
ريم :انا جايه مخصوص معاك عشان بعد مانروح لمامتك نقعد نكلم ونحط النقط ع الحروف عشان انا من ساعتها متلخبطه ومش عارفه اخد قرار ودي اول مره تحصلي عمري ماكنت بفكر ف حد كنت بقطع ومايهمنيش راح هيجي غيره ف داهيه لكن معاك متلغبطه مش عارفه احدد😢😢
فيجذب راسها لصدره خلاص يابت بقي دي جوازه مش جنازه يخرب بيتك
😃😂
والله انت غتت😂😂
ناصر :يلا ياختي الواحد لا عارفلك ضحك من عياط جاتك خيبه حتي دي مش عارفه تحددي فيها تضحكي ولا تعيطي
ريم تخبطه امشي ياد ياغتت
فيستدير لها ويرفع يده هااا هااا
نسينا السعك كف يلوحك دلوقت
ريم :يوووه نسيت بقي ياناصر انا واخده علي كده
ناصر :لا اتعودي ياحبيبتي بعد كده
ريم :بجد
ناصر :هو ايه ده
ريم :انا حبيبتك
ناصر :بت اهمدي
احنا الاتنين هنا والشيطان الشاطر قاعد ع السرير بيشاورلي اهو فتلمي
وجذبها من يدها يلا ياامه مش ناقص
وخرجو سويا لامه
وجدها في تحسن
ريم :يلا بقي ياخالتي اخرجلنا بالسلامه
لحسن ناصر حالته تغم من غيرك
توحه :تسلمي حبيبتي وتاعبه نفسك وعامله ده كله ليه
ريم :وانا اتعب لاغلي منك ياخالتي
ناصر :يلا بقي يامه البيت وحش من غيرك خفي بسرعه وليكي مفاجاه هتفرحك وينظرلريم
توحه هرشت الموضوع خير يارب وهي فرحه فقد فهمت نظراتهم فهي اول مره تجد هذه النظرات المتبادله
مبروك ياولاد ربنا يتمم لكو بخير
عبده :في ايه مين هيحوز
توحه :خليك ف الاكل اللي انت فيه مالك انت
عبده :مافيش فايده ف لسانها حتي المرض مابيهدهاش
ناصر ينظر لريم انت هتقلي عندي النسخه المكرره انا بشك ان بدلونا ف الحضانه وان ريم بنت توحه
ريم :ياسلام هيبدلونا بعد سنه لما اتولدت انا
توحه :مش تربيه ايدي
ناصر :عرفتي تربي
توحه :ياما قلتلك مش بالجمال ولا الحسب والنسب ماهو انا يعني ملكه جمال وابوك اهو اجوزني وبيموت فيا
عبده :مين ده
توحه:خليك ف حالك
ناصر :له الجنه والله صبر صبر ايوب
هو اتعمي وبقي شيش بيش من شويه والله هنديله درع الصبر
توحه :امشي ياد من هنا انا تعبانه ومش ناقصه حرقه دم
ناصر :هو يلاقي زيك ياجميل انا بهزر وانت فاقسنا كده ومانعرفش نصيع عليك خالص هارش الفوله

وخرج ناصر وريم من عندهم