الفصل السابع
_________
ملامحها اتغيرت للصدمة لقت شريط..بصت علي اسم الشريط..اتخضت بفزع..حست ان رجليها مش شايلاها..قربت من كرسي التسريحة..قعدت عليه بخوف وشفايفها بتترعش وهي بتبص علي اسم الشريط..!
دا شريط ##.. شريط لدوا من الجواهر المخدرة.. بلعت ريقها بوجع..همست من غير وعي:
طب ليه؟.. ليه يعمل كدا؟.. ليه ياخد حاجه زي دي مالمسكنات مالية البلد؟.. اشمعني النوع دا؟.. طب طب بياخده من امتي؟.. يبقي.. يبقي دا نفس اللي خده ليلة فرحنا.. وهو بردو اللي خلاه ميقدرش يصلب طوله ليلة الصباحية...كملت بإبتسامة سخرية وشفايفها بتترعش.. يبقي يبقي هو دا اللي.. بكت بوجع عليه.. اللي خلاها يحلف عليا بالطلاق من أول ليلة لينا مع بعض بردو.. وياتري هو عارف ولا.. لاء ما أكيد عارف عشان كدا مرضاش يخليني أخد منه معاه !!
مسحت دموعها وهي بتحاول تقف علي رجليها.. لبست هدومها وخدت الشريط واتجهت للمستشفي..
تفكيرها كان مش فيها..!!، ١٠٠سناريو وسناريو جاي في دماغها لأثار الشريط دا عليه دلوقتي وبعدين..نزلت من التاكسي..ودخلت المستشفي وبعد التهاني والمباركات اللي خنقتها لأنها بتأخرها علي الدخول..اتجهت للمعمل علطول..خبطت علي الباب
$$:ادخل
دخلت وهي بتحاول ترسم ابتسامه:السلام عليكم
دكتور عادل وقف وابتسم:أهلاااا..ازيك يا دكتور..ألف مبروك
فرح:الله يبارك في حضرتك..الحمدلله
دكتور عادل:غريبة يعني..اجازتك لسه مخلصتش ولا أنتي قطعتيها
فرح:لاء مقطعتهاش ولا حاجة..بس كنت عايزة خدمة من حضرتك
دكتور عادل:اتفضلي طبعا
طلعت الشريط من شنطتها وادتهوله:عايزة أعرف الدوا دا فيه ايه..المواد المستخدمة فيه ممكن
دكتور عادل رفع نضارته ولبسها..ركز مع اسم الشريط:أنتي عارفة ان الدوا دا
فرح قاطعته:من الجواهر المخدرة..حابة أعرف المواد اللي فيها بالظبط..بس رجاء ميطلعش ورق بالتحليل باسم المستشفي
شرد شوية بعدها اتكلم:خلاص مفيهاش مشكلة..علي المغرب كدا ولا حاجة بإذن الله هبعتلك النتيجة
ابتسمت:شكرا لحضرتك
دكتور عادل:لاء العفو.. لا شكر علي واجب..
خرجت من المستشفى وروحت البيت
_________________
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
_________________
..لسه هتركب الأسانسير لقت عم إسماعيل بيركب مع الولاد يطلعهم..كرم اللي لمحها الأول..جري عليها..نزلت لمستواه خدته في حضنها بسرعة وهي بتضحك:حبيبيي
كرم حضنها بسرعة:وحشتينييي
ضحكت:وأنت وحشتني أكتر والله
وقفت:خلاص ياعم اسماعيل أنا هطلع بيهم أنا
عم إسماعيل ابتسم:ألف مبروك يادكتورة
فرح:الله يبارك فيك يارب..
دخلت الأسانسير وكريم واقف لوحده..نزلت لمستواه ورفعت صباعها:ايه مش هتسلم عليا
كريم: لاء
كشرت:ليه كدا احنا مش صحاب
كريم ربع ايده:الصحاب مش بيسيبو بعض..وأنتي سبتيني وسافرتي..يبقي معدناش صحاب
فرح ابتسمت:أسفة والله بس خلاص مش هكررها تاني
كريم رفع صباعه:وعد؟
لفت صباعها حاولين صباعه الصغير:وعد!..حضن كبير بقي
حضنها وهي باسته وحضنته وهي بتمسح علي ضهره بحب..
الأسانسير فتح وهي خدتهم في ايديها وضربت الجرس...أحمد فتح الباب وهو بياكل تفاح..برق بعنيه وبسرعة حضنها:فروووووح..
ضحكت وبادلته..بعد عنها ومسك ايديها:أنتي جيتي امتي..شرم حلوة هاه..عملته دايفنج ولا لاء..اشتريتي ليا من هناك ايه..لتكوني ماشترتيش أزعل والله..هو فين عمار..رنيت عليكم كتير ومحدش رد..كنتم بتعملو ايه كل دا
قاطعته بسرعة:ايه..ايه في ايه براحة..أدخل الأول وبعدين نتكلم
حك شعره:اه عندك حق
شدها لجوا وكريم دخل..أحمد حط رجله يمنع كرم انه يدخل
كرم اعترض:أله في ايه
أحمد:فين مصروفك ياض
كرم:وأنت مالك أنت
أحمد عض علي شفايفه بغيظ ورفعه من لياقته وهو بيقفل الباب:حق الشاشة اللي ادشدت دي
كرم:مش معايا..صرفته
فرح سابتهم وجريت علي المطبخ..شمت ريحة الأكل..ابتسمت..همهمت بصوت عالي:ألللله..دا ايه الحلاوة دي..سبانخ صح
امها التفتت ليها بفرحة..حضنتها بسرعة وهي بتدمع..فرح ابتسمت:سبانخ مش كدا
أمها عيونها دمعت..ضحكت ومسحت دمعتها:اه..افتكرتك امبارح فعملتها..حتي لو أخواتك مش هياكلو منها
فرح:امم..حبيبتي والله أنا فعلا نفسي فيها
أمها:متاخدنيش في دوكة..جيتو امتي..
فرح:امبارح
أمها:كداهو..امبارح ومتجيليش تاني يوم غير الضهر كدا!!
فرح ابتسمت بشرود:كنت ناوية أجيلكم الصبح بس رنو عليا في المستشفي ضروري
أمها بصت لها بشك: أنتي مش واخدة اجازة؟
فرح:لاء واخدة بس حاجة مستعجلة
أمها:امم..وأنتم عاملين ايه مع بعض
للحظة جسمها اتشنج..رسمت ابتسامة بس مكملتش، فابتسامتها ظهرت مرتبكة:كويسين الحمدلله
أمها: مش مرتحالك يابنت بطني
ضحكت:ليه يعني
أمها:بت أنتي بتمنعيه عنك
فرح نفت بخجل بسرعة:لاء طبعا..اللي بينا مش مجرد حاجة زي دي
أمها ضحكت: ومال وشك قلب كدا ليه..طب في أي مشكلة بيناتكم..لو حاجة بسيطة بينكم اسئلي ومتتكسفيش مني
فرح:لاء والله ياحبيبتي مفيش حاجة زي دي
أمها:طب غيري هدومك وهتقضي معانا النهاردة..هو جوزك فين
فرح اتنهدت بخنقة:في شغله اجازته خلصت أساسا..يلا أنا هروح أغير في شقتي
أمها:وتروحي ليه عندك أوضتك زي ماهي..هدومك فيها
ابتسمت:كل حاجة فيها ولا هدومي بس
أمها:لاء كل حاجتك فيها..أبوكي من ساعة ماتجوزتي وكل ليلة يدخل يقعد فيه بالساعة لوحده..أقوله تعالي أقعد معانا..يقولنا ملكوش فيه..ولا لما عرف ان أحمد وهنا ساعدو عمار عشان تسافرو طلع عنيهم ومنع عنهم المصروف..ضحكت..قلهم لحد ما أختكو ماترجع مفيش مصروف..دا حتي أحمد نتيجته ظهرت يومها بس سمحله ياخد فلوس..
فرح ابتسمت بفرحة:نتيجته ظهرت!..عمل ايه
أمها:لاء خليه يقولك أحسن
_________________
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
_________________
فرح خرجت بسرعة واتجهت لأوضة أحمد لقته قاعد بيبص بحسرة للاب اللي شاشته مدشدشة..جريت عليه:صحيح الكلام دا..نتيجتك ظهرت
أحمد ابتسم:اه ياستي..
فرح:عملت ايه
أحمد:٩٩.٢ ٪
حضنته بحب:مبرووووك.ألف مبروك ياحبيبي تستاهل والله.. ليك عليا الهدية اللي تطلبها
أحمد ضحك : أكيد أنتي فاكراني هستغني ولا ايه..هديتك وهدية جوزك وهديتك وهدية أبوكي وهدية امك وهدية هنا..دا أنا هخلي كل اللي يعرفني يجبلي هدية شكل
فرح ضحكت وبصت للاب:خلاص ياعم..لاب جديد عليا أنا..ابسط
قرصها من خدها:أيوا كدا أي الحلاوة دي..
فرح لسه كانت هتقوم بعدها رجعت:أه صحيح متعرفش شهندا عملت ايه
أحمد نفي بملامح جامدة :لاء معرفش
كشرت:طب خلاص أنا هعرف
قامت ولسه هتفتح الباب..
اتنهد ومسح علي وشه.. رفع صوته:جابت ٨٢.٧٪
فرح:هو فيه حاجة
أحمد:حاجة ايه
فرح قربت: هي شهندا فيها حاجة
أحمد:معرفش
فرح:خلاص مش مشكلة
خرجت من عنده..دخلت أوضتها..ابتسمت أول مادخلتها..كتبها مترتبة..سريرها متلمسش..فتحت الدولاب..لقت هدومها كلها مترتبة في مكانها..بصت لهدومها بابتسامة..قلبت فيهم واستقرت علي بيجامة واسعة حرير كانت أمها جابتهالها في الجهاز وعجبتها..يومها أصرت انها تلبسها في بيت أبوها..غيرت هدومها ولبستها براحة خصوصا ان الدايت قبل الفرح مأثر عليها جامد مع تعب الشغل فارق جدا في شكلها!!!
رفعت شعرها في لفة خفيفة جات تخرج لقت الباب اتفتح وأبوها داخل
بربش بعنيه مرة واتنين يستوعب..ضحكت وجريت عليه حضنته وهو بادلها بحب:أنتي جيتي امتي؟
فرح بعدت وايده محاوطاها من كتفها:امبارح..
أبوها كشر:امبارح ولسه فاكرة تيجي النهاردة!!
فرح:لاء والله بس امبارح كنا جايين تعبانين وعمار قاللي يمكن تكونو نايمين..والنهارده صحيت متأخربس
محمود: امم..هتتغدي معانا النهاردة ؟؟
فرح: غدا!.. هيبقي صعب الحقيقة.. بس هقضي معاكم اليوم
محمود رد باعتراض:لاء ولو علي سي عمار ياختي رني عليه..أنا قلتها خلاص وبعدين توفيق مش في طنطا أصلا..سافر دمياط يظبط ويشيك علي البضاعة اللي هياخدها
فرح:امم ربنا يوفقه..خلاص ماشي
محمود باس راسها:يلا رني عليه وتعالي أقعدي معانا..وحشتني قعدتك
فرح ابتسمت:حاضر
_________________
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
_________________
محمود خرج وابتسامتها اختفت..فتحت تليفونها ورنت عليه...سمعته بيشخط بصوت عالي:ماتنطق يلا بعدت التليفون عن ودانها.. بعدها رجعته تاني:عمار معايا!
مسح علي وشه بعنف ورمي نفسه علي الكنبة..واتكلم بزهق:ألو يافرح في ايه
فرح:أنت كنت بت
عمار:لاء بس الشغل وكدا..هو فيه حاجة؟
فرح ردت بتكشيرة : بابا عازمنا على الغدا النهاردة
عمار:اشمعني؟..غريبة!
فرح:لا غريبة ولا حاجة بس هو حابب نتغدي معاه النهاردة..في مانع؟
عمار:أنتي مالك بتتكلمي كدا ليه..ولاء ياستي مفيش مانع..حاضر هاجي
فرح اتنهدت:خلاص ماشي
_________________
الدكتورة قلعت الجوانتي وقعدت علي مكتبها..مصطفى كان قاعد على الكرسي قدامها بيبصلها بقلق..
الدكتورة ابتسمت:لاء متقلقش حضرتك..كويس انكم اعتنيتو بيها بعد الواقعة..بس هي كدا كويسة مفيش قلق بس ميمنعش بعض الراحة وتنام على ضهرها
سهيلة قامت وظبطت هدومها
الدكتورة كملت كلامها:أنا هكتبلكم علي شوية فيتامينات بس تهتمو بالأكل ونقلل الحاجات اللى مش مفيدة نهائي
سهيلة رفعت حاجبها لمصطفي وهو عمل انه مش واخد باله..
مصطفى ابتسم وخد الروشتة:شكرا لحضرتك
خرجو هما الاتنين وركبو العربية..سهيلة ركبت:سمعت..بلاش أكل مش مفيد..بيتزا وماك وفاست فود بزيادة
مصطفى: علي فكرة قالت ليكي مش ليا..محدش قالك تاكلي معايا أنا وبنتي
سهيلة:لاء ياشيخ..وبعدين أنت تجبلي الأكل لحد عندي وعايزني أقولك لاء..أكيد مش هرفض وأنت عارف اني بجوع صح ولا غلط
مصطفى:ايوا أنا ايه المطلوب مني
سهيلة:تاكل من أكل البيت ومفيش غير أكل البيت!
مصطفى بربش بعنيه وصقفلها:نااعم..لاء طبعا أكل ايه..حرام عليكي ياسهيلة
سهيلة عيطت ودموعها نزلت..صرخت فيه:قصدك ايه هاه..قصدك انا مش بعرف أعمل أكل!
مصطفى:مكدبتش عليكي علي فكرة ودي نقطة لصالحي!..بعدين أنتي بتعلي صوتك ليه دلوقتي
سهيلة:أنت كل اللي فارق معاك اني بعلي صوتي!..طب روحني يلا روحني يامصطفي
مصطفى:بت أنتي هبلة مش قلنا هنروح نجيب ألوان ليكي عشان تكملي اللوح اللي وقفت دي
سهيلة مسحت دموعها..وابتسمت:صح عندك حق..بس أنا جعانة
مصطفى بصلها بغيظ:لما نروح نبقي نتغدي
سهيلة:لاء مليش فيه..أنا عاوزة أكل دلوقتي
مصطفى ابتسم بسماجة:تحبي تاكلي ايه؟
سهيلة لعبت في صوابع ايده وبربشت بعيونها زي القطط: عايزة ماك ياصاصا
مصطفى رمي راسه علي الدريكسيون باستسلام وهو بيتحسر علي أفعالها اللي جننته دي!
___________________________________________
حسبي الله لا إله إلا هو عليه توكلت وهو رب العرش العظيم..حسبي الله لا إله إلا هو عليه توكلت وهو رب العرش العظيم..حسبي الله لا إله إلا هو عليه توكلت وهو رب العرش العظيم..
_____________________________________
____
زينب قاعدة في أوضتها حاضنة نفسها وعيونها محمرة..وبتبكي بحسرة..همست من بين دموعها وهي بتترعش: كدا يا ياسر أهون عليك..تضربني!..دا أنت عمرك ماعملتها..عمرك مامديت ايدك عليا بهزار حتي..لطمت نفسها علي وشها وهي بتصرخ:بس أنا اللي أستاهل أنا اللي أستاهل..أنا اللي عملت كدا في نفسي..أنا اللي سرقت من وراهم..
مسحت دموعها بسرعة وهي بتمسك تليفونها بالعافية..رنت عليه مرة واتنين ودا كله على أعصابها..رد عليها..اتكلمت بسرعة:عبدالله..عبدالله أنت فين ياعبدالله
عبدالله:مالك ياقلبي..أنا في شغلي
زينب:الدهب ياعبدالله..الدهب فين
عبدالله اتكلم بارتباك:ليه عايزاه ليه؟
زينب: مش أنت وعدتني انك هترجعه..عدي يومين ومعملتش حاجة
عبدالله:شوفتي أصل الراجل اللي رهنت عنده الدهب طمع فيه وقالي هكملك باقي المبلغ..أصل مراته عجبها زوقك أوي ياحبيبتي
زينب:يانهار أسود..شبكتي ياعبدالله..شبكتي هتبيعها..طب طب بص مش مشكلة..اشتري ببقية الفلوس لو حتي دبلة وغويشة
عبدالله:منين ياروح قلبي ماكله اتصرف علي الديون وتشطيب الشقة الفرح
زينب: ياسر عرف ياعبدالله..ياسر عرف وحبسني في البيت..لازم الدهب يرجع
عبدالله بلع ريقه:عرف!.عرف ازاي
زينب عيطت:ماما..ماما اكتشفت ووقعت من طولها وساعتها الكل عرف..ياسر ضربني ياعبدالله..ضربني!!
عبدالله:معلش، معلش ياحبيبتي أنا هبقي أكلمه وأتفاهم معاه..فيها يعني لما أخته تساعد جوزها..هو مش حافظ كلام ربنا وعارف كدا كويس ولا ايه
زينب: بالله عليك..تشرحله واحدة واحدة..أصله من امبارح وهو قايد نار، وايده معلمة علي وشي لحد دلوقتي!
عبدالله:خلاص يا حبي ولا تقلقي خالص أنا هاجي وأكلمه
زينب قفلت التليفون وهي لسه بتتنتفض..اتفزعت فجأة علي فتحة الباب بقوة..بلعت ريقها لقتها أمها..أمها دخلت بهدوء..وزينب حاوطت نفسها خايفة تنضرب..أمها مسكتها من شعرها فصرخت بألم..أمها اتكلمت مابين سنانها:هتحكيلي كل حاجة واحدة واحدة..ولا أسيب عليكي ياسر دا ماسك نفسه عنك بالعافية..صرخت فيها ..هتحكي ولا لاء
زينب هزت راسها بهستيرية:حاضر..حاضر
أمها زقتها مابين ايديها:انطقي
زينب اتكلمت بارتعاش:هو اللي حصل انه انه..................واتفاجئت لما شوفتك بتبصي علي الظرف
أمها ضربت علي رجلها بحسرة: ياخيبتييي..ياخبتييي معرفتش أربي..
ضربتها بالقلم مرة ورا التانية وزينب صراخها صوت ارتفع وبكاها من الوجع بيزيد..رؤية دخلت جريت عليهم تبعد حماتها..صرخت:مش كده ياخالتي..مش كدا
حماتها وهي بتضرب زينب صرخت في رؤية:سبيني..سبيني عليها الحيوانة دي..أنا هكسر رقبتها
رؤية شدتها بالعافية:براحة بس براحة..
حماتها بعدت عن زينب وتفت علي وشها وخرجت..رؤية جريت علي زينب وحضنتها..وزينب اتمسكت فيها بخوف ورعشة..رؤية عيونها دمعت من منظرها..مسحت بايديها علي دراعها..فطلعت صرخة من زينب-آه-..رؤية بصت لها بقلق:دراعك ماله؟
زينب همست من بين دموعها:بيوجعني..مش قادرة
رؤية:طب طب قومي أوديكي للمستشفي
زينب:مش هيخرجوني
رؤية:ملكيش دعوة أنتي..قومي البسي..وأنا هلبس نقابي وهاجي معاكي
رؤية طلعت شقتها.. لبست...
شاورت نفسها تكلم ياسر ولا لاء.. لاء مينفعش تخرج من غير ماتكلمه.. رنت عليه
اتكلمت بحذر: السلام عليكم
ياسر: وعليكم السلام.. فيه حاجة يارؤية؟
رؤية بلعت ريقها: ياسر أنا هروح المستشفي
ياسر اتخض: ليه في ايه مالك؟
رؤية: لاء مفيش حاجة بس.. بص متتعصبش زينب خالتي عدمتها العافية ودراعها يعيني بيوجعها فقلت هاخدها المستشفي.. أطمن علي دراعها
اتنهد بصوت مسموع: خلاص ماشي روحي.. بس قوليلها اني موافقتش.. حسسيها ان لسه لما أجيلها هيحصلها أسوأ من كدا!
رؤية:أنت هضربها ياياسر
ياسر:مش كل العقاب ضرب يارؤية..وبعدين أنا كلمت سي الباشا خطيبها..عملي نفسه ميعرفش حاجة
رؤية ابتسمت:خلاص ياحبيبي مفيش مشكلة..بس اتعامل بالعقل..احنا يهمنا مصلحة زينب فوق كل حاجة
ياسر:حاضر حاضر..يلا في حفظ الله
رؤية ابتسمت براحة ونزلت علطول..لقت زينب لابسة وبتتحامل علي نفسها انها تقف..سندتها وملقتش حماتها في البيت..حمدت ربنا..بصت لوشها لقيته فيه كدمات
رؤية انزعجت:زينب وشك كله في كدمات
زينب عيطت:معرفتش أداريها..معرفتش
رؤية سكتت شوية بعدين اتكلمت بابتسامة:خلاص أجبلك نقاب وتلبسيه..مش كان نفسك تجربيه..اهي فرصة..
زينب ابتسمت من بين دموعها..رؤية قعدتها قرب باب البيت وجابت نقاب يليق علي لون خمارها..ساعدتها في لبسه..
رؤية ابتسمت:زي القمر ماشاءالله
زينب هزت راسها..حمدت ربنا لأنه جه في وقته مش عايزة حد يشوف دموعها علي الأقل!!
________________________
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
_________________________
جبست دراعها وكشفت علي الكدمات اللي في وشها..رؤية فتحت باب البيت ولسه بيفتحو باب الشقة..سمعو صوته من جوا وهو بيردد بصدمة:أطلقها!!..أطلقها ليه
أمها ردت:زي مادخلنا بالمعروف نخرج بالمعروف..ياقادر دا أنت قوتها وشجعتها انها تجبلك حاجتك في السر
ياسر:استني بس بالله عليكي يا ماما..عبدالله أنت مش مناسب لبنتنا..غير انك ناسي انك جايب دهب بعشرة تلاف بس..واحنا متفقين علي خمستاشر علي قدك..يعني معانا شيك بخمستلاف جنيه ياترجع الدهب وتدفع الخمستلاف ياما تطلق وتاخد الشيك
عبدالله ردد من غير تردد:أطلق طبعا..بس خليك فاكر ياشيخ ياسر انك مانفذتش أوامر الله..دا نبينا قال تخدوهم فقراء يغنيكم الله..بس كويس انها لحد كدا..أختك طالق مني..طالق
الكلمة وقعت هزت كيان اللي واقفة ولابسة النقاب دي..دموعها نزلت للدرجة دي مستبيعها..ومش فارقة معاه للدرجة دي..فارق معاه الفلوس أكتر ماهي فارقة معاه!!
رؤية شددت بايديها علي كتفها تمدها بالطاقه..لانها حاسة بانتفاضتها مع بكاها حتي لو النقاب مداري..
دخلو وسمعو باقي الكلام
ياسر:تاخد حاجتك فلوس ولا هداياك
عبدالله: لاء فلوس طبعا أنا هعمل ايه بيهم
ياسر ابتسم انه أخيرا ظهر علي حقيقته وخصوصا وهو لامحها واقفة مع رؤية وهي باينة جدا انهابتعيط علي الاقل النقاب مش هيداريها علي أخوها!!
ياسر فتح محفظته وطلعله مبلغ مع ورقة فيها أسماء الحاجة اللي جابها وخروجاتهم كلها..أمها اللي كتبتها وخصوصاً انها في كل خروجة كانت تسئلها ومن حسن نيتها تقول كل حاجة كانت بتحصل..عبدالله خد الفلوس وعدها..وهو خارج لمحهم واقغينلكن مدققش..وهو معدي من جمبها قفشت علي فستانها بقوة..جه يخرج لكن سمع صوتها:استني
ياسر بصلها عايز يشوف رد فعلها..أمها جات تقرب منها ياسر منعها بايده بصمت..زينب اتجهت لعبدالله ورفعت نقابها وهي بتبصله بعيونها اللي زي الدم من حمارهم..ضربته بالقلم بكل قوتها..وهو بصلها بصدمة..حط ايده علي وشه مكان ضربتها وبصلها بغيظ..مشي من غير مايقول ولا كلمة..زينب سمعت هبدة الباب..انتفضت..ياسر ابتسم بنصر..شاف زينب وهي بتقع علي ركبها..مشي بهدوء اتجاهها..رفعها من كتفها يقومها..حست ام الرؤية انعدمت ومعندهاش طاقة انها تقف..وقعت مابين ايديه وهو رفعها وشالها علي ايديه..دخلها أوضتها..شاور لرؤية وهي قربت منها وقلعتلها نقابها وغيرت لبسها..قفلت الشبابيك وخرجت..
ياسر:ماما سيرة البني أدم متجيش في البيت نهائي من تاني..عايزة تعاقبيها عقبيها إلا الضرب..
أمه اتنهدت وأومأت براسها..
ياسر طلع فوق بسرعة ورؤيةوراه..فتح الشقة وهي دخلت وراه..قعد علي الكنبة وغمض عيونه دقايق..قعدت جمبه ومسكت ايديه وهو ابتسم..فتح عيونه،قربت منه حضنته وهو ماصدق وبادلها وهو بيتمسك بيها كأنها سكنه!!
_________________________
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
_________________________
فرح وعمار قضو الليلة مع أهلها..سابوهم بعد محايلات كتير انهم يكملو السهرة معاهم إلا ان عمار رفض..دخلت الشقة وهي وراه..قلعت إسدالها وفضلت ببجامتها الحرير..عمار قرب منها وهو بيبتسم..ابتسامته قلبت تكشيرة لما الفون بتاعها رن
فرح همست وهي بين ايديه:ثواني
عمار:طب هشرب ماية وأرجعلك..
سابها ودخل الأوضة..فتح الدولاب ودور في البدلة ملقاش حاجة..قعد يدور في الأوضة كلها..ملقاش بردو..راسه صدعت والألم بيبدأ واحدة واحدة..فرح حست بنفس ألمه لكن نفسيا وخصوصا وهي بتسمع كلام دكتور عادل:القرص دا بيتباع في السوق السودا لكن صعب انك تشتريه من غير روشتة ومش أي روشتة..فيه بيثدين ومواد مخدرة : *** ودول بيسكنو الألم ويدوا طاقة زي المنشطات اللي بيستخدمها بعض اللعيبة وغيرهم..بس دا قوي وبيسبب الإدمان
قفلت المكالمة والتليفون وقع من ايديها..سمعت دربكة في الأوضة..دخلت وراه لقته بيدور زي الأسد الهايج..رفعت الشريط قدامه:هو دا اللي بدور عليه!
عمار بصلها وكأنها نجدته..ابتسم وهو بينهج:اه هو..هاتيه بقي
فرح:طب ليه؟..دموعها نزلت علي خدودها..ليه تاخد حاجة شبه دي..صرخت فيه.. لييييه؟؟
عمار وهو بيفرك جبينه: فرح هاتي الشريط
فرح هزت راسها:لاء مفيش شريط..أنت لازم تتعالج من دا
عمار قرب:فرح هاتي الشريط
صرخت:لاء مفيش شريط
جات تخرج مسكها شدها ليه:هاتي الشريطط بقولك..مش عايز أاذيكي
فرح:لاء مفيش شريط
قرب منها وهو بينهج..حاوطها بين ايديها بحب وقرب من وشها بخفة دوبتها بين ايديه..اندمج معاه وهي حاوطته بايديها ودموعها بتنزل..شالها لحد السرير..قبضتها علي الشريط خفت ووقع من ايديها..بعد عنها وهي مغمضة عيونها..ابتسم بخفة وخد الشريط بسرعة وبلع القرص..حس بالراحة والصداع بدأ يهدي..بصلها لقاها متكومة في السرير وهي بتداري نفسها وبتبكي بحرقة ووجع عليه وعلي اللي حصل وعلى كل حاجة..جه يقرب منها بعدها بعد وضم ايديه ليه..رفص الكرسي برجليه بغضب وسابها ومشي..وهي بتبص لأثره وهي بتبكي بحرقة علي وضعه!!!
#يتبع
#عمر_بيبتدي
#FarahElDesoky
تفاعلللللللل يابشر..فقرة الأسئلة هتتنشر بليل
_________________
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
سبحان الله والحمدلله ولا حول ولا قوة إلا بالله..
_________________
