الفصل الثامن
_________
بصلها لقاها متكومة في السرير وهي بتداري نفسها وبتبكي بحرقة ووجع عليه وعلي اللي حصل وعلى كل حاجة..جه يقرب منها بعدها بعد وضم ايديه ليه..رفص الكرسي برجليه بغضب وسابها ومشي..وهي بتبص لأثره وهي بتبكي بحرقة علي وضعه!!!
خرج من الشقة.. لاء دا العمارة كلها.. ركب عربيته وهو بينهج وبيمسح علي شعره بغيظ من نفسه.. ضرب الدريكسيون بايده مرة ورا التانية بغيظ..
همس بانفعال: ايه اللي أنا هببته دا!
أماهي فحالتها متقلش عنه..موجوعة عليه وبشدة..غيبت عنه البرشام دقايق وحالته بقت كدا..أومال أومال لواختفي عنه المسكن هيعمل ايه..قامت من على السرير وهي بتتحامل علي نفسها..ظبطت هدومها وراحت تجاه الحمام تغسل وشها..سمعت صوت الجرس..نشفت وشها ودموعها اللي كانت بتختفي مع الماية..بلعت ريقها..فتحت الباب لقتها هنا..هنا جريت عليها حضنتها بفرحة:وحشتيني..وحشتيني موت موت...
فرح بادلتها وهي بتحاول ترسم ابتسامة لطيفة:تعالي ادخلي
هنا:لاء بقي هو عمار هنا؟!!
فرح شفايفها اترعشت من سيرته:لاء..لاء..
هنا باستغراب:لاء ايه..ماما قالتلي انه زمانكم نايمين
فرح:عمار..عمار جاله شغل مستعجل
هنا:امم..لاء طب كدا هغير هدومي وأجيلك هوا
فرح مرضيتش تكسفها:خلاص ماشي هستناكي
هنا:طب سلام بقي هغير وارجعلك
فرح ابتسمت وقفلت الباب..عضت علي شفايفها ودموعها بتنزل بصمت..جابت تليفونها ورنت عليه..مرة والتانيه والتالتة..وأعصابها بتفلت..الرابعة كان تليفونه اتقفل..رمت التليفون بغيظ وهي بتمسح علي شعرها..الجرس رن تاني..فتحت وكانت هنا..قضت معاها الليلة لحد نص الليل وبعدها هنا سابتها ومشيت..جربت ترن تاني عليه بس مغلق بردو..قعدت علي الكنبة...حست برعشة خفيفة خصوصا ان الجو بدأ يبرد..حضنت نفسها بايديها وهي شاردة في تفكيرها..ياتري ياعمار ايه سبب انك تلجأ لحاجة شبه كدا؟ ليه بس؟..هو مش من الشباب اللي بيحبو يكيفو عقلهم والقرف دا!..عمار واعي وفاهم!..بس فاهم ازاي..حالته النهاردة تغني عن أي سؤال!!..دا قرب منها بس عشان يقدر ياخد الشريط!!..طب لو في يوم قدرت تسيطر علي نفسها وبعدته..هل هيتجه للعنف طالما الهدوء معملش حاجة؟..فركت جبينها بهدوء..مهما يعمل المهم انه يتعالج ويبعد عن القرف دا!!!
مدريتش بنفسها غير وهي نايمة من تعب اليوم..انتفضت بفزع من نومها علي صوت الباب..هو هنا كان هنا أكيد..برفانه في الجو..قامت بسرعة وفتحت الباب ملقتش حاجة..قفلته بسرعة وجريت على البلكونة..دقايق وكان بيحط شنطته في صندوق العربية..بص لفوق لقاها واقفة وعيونها بتنزل وهي بتشاورله انه يجي..بص لعيونها بوجع وشكلها يغني عن أي حاجة..شاورلها بايده تدخل لأنها تقريبا واقفة بشعرها وببيجامتها.. مع ان التندة تقريبا مش مبيناها للي مقابلها..هز راسه بقلةحيلة،لف و ركب عربيته بسرعة وساقها و هو سايبها فوق قلبها بيتلوي علي فراقه!!
__________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
_________________________
رؤية حضرت الفطار وجهزته..شالت الأكل واتجهت بيه عشان يفطرو..نادت بعلو صوتها:يلا ياياسر بقي قوم..
خرج وهو بيكمل لبسه:حاضر جاي اهوه
راحت للبنات..لقت جوري لابسة..أما ياسمين فمتحركتش من سريرها..طبطبت بخفة علي كتف جوري :يلا ياحبيبتي اطلعي افطري مع بابا برا
البنت أومأت وخرجت..بصت لياسمين بغيظ وصرخت:بتتت ياسمين قومييي
اتقلبت بصمت ومردتش..رؤية قربت منها وشالتها..البنت انتفضت:يوووه أوف
رؤية ردت بغيظ:يووه وأوفف وحيات أمك ماشي..
ياسر ضحك:اله ماتسيبي البنت في حالها!..خليها تنام براحتها
رؤية:ياسر خليك في حالك هاه
ياسر:أله مش بنتي
رؤية: عنيا تعالي لبسها ووديها حضانتها..اثبت مكانك كدا وسبني أتعامل
كملت مشي للحمام وغسلتلها وشها بالعافية..ياسمين صرخت وهي بتعيط:لاء..عايزة أنام
رؤية:دا أنتي نايمة طول الليل..يلاا عشان ألبسك
لبستها هدومها غصب..سرحت شعرها ومسحت وشها وأنفها من البكي..ولسه بتعيط..رؤية صرخت:يلا على حضانتك
ياسمين بصت لها بغيظ وجريت على برا وهي بتعيط..ياسر نزل لمستواها وشالها:خلاص خلاص متعيطيش..خلاص
ياسر مد ايده في جيبه وطلع مصروفها..ياسمين كانت بتفرك عيونها..ضيقت عنيها وبصتله..
ياسر كتم ضحكته:هاه هنبطل عياط بقي
ياسمين بصتله:هتجبلي شيبسي
ياسر هز راسه واتنهد:هجبلك..خلاص بقي
ياسمين هزت راسها وسكتت..بينما أختها مشغولة تخلص السندوتش بتاعها..
رؤية ابتسمتواتجهت لهند لقتها بتلعب في ايديها وصاحية..باستها بخفة وشالتها وخرجت بيها..
ياسر خلص فطار..غسل ايده وظبط لبسه ونادي:رؤية أنا همشي أنا
رؤية من جوا:ياسر بالله عليك ودي البنات الحضانة..يوسف جاي النهاردة وفي حاجات كتير لسه هعملها وأظبطها
ياسر:أنتي عارفه انهم مش في طريقي
رؤية:أله يا ياسر مش بناتك دول!..ساعدني شوية
ياسر مسح على وشه:كل دا ومش بساعدك
رؤية خرجتله بالبنت:اه لسه هروح السوق..شيلهم النهاردة عشاني بس
ياسر اتنهد بيأس:حاضر خلاص ماشي.. يلا يا بنات
جه يخرج رؤية وقفته وهمستله: هتعدي على زينب تحت
خد نفس طويل: بلاش هعدي علي ماما وخلاص
رؤية بلعت ريقها: ياسر أنت ناوي على ايه
ياسر: هعمل ايه يعني يارؤية.. أنا مش فارق معايا غير حاجتين..حزنها وقهرها وهو ميستاهلش أساسا
رؤية: وايه تاني
ياسر: زينب سرقت يارؤية.. سرقت!!.. أختي أنا تسرق ودا ليه كله عشان الحيوان دا
مسحت علي كتفه بهدوء: طب.. طب براحة عليها لو شفتها هي فيها اللي مكفيها وخالتي مقصرتش الحقيقة.. دا دراعها مكسور ياعيني.. ربنا يخفف عنها وجعها!!
ياسر باس راسها وبعد : حاضر يارؤية..أنا ضد الضرب أساسا..بس وقتها معرفتش أتمالك نفسي..أنا لو مكنتش لحقت نفسي وقتها..مش عارف أنا كنت هعمل ايه فيها..يلا تعوزي حاجة
رؤية: عايزة سلامتك
ياسر مسك ايد جوري وشال ياسمين ونزل..قفلت الباب وراه..بصت لهند اللي بتعض في صوابعها
رؤية ابتسمت:جعانة ياروحي..ثواني وتاكلي..يلا الأول نستحمي بقي
________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
_________________________
مصطفى قام الصبح من النوم بص جمبه ملقاش غير ندي اللي ماسكة فيه وحضناه..بص للساعة جمبه لقاها تمانية وربع اتفزع وقام بسرعة..هز ندي بصراخ:اصحييي..اصحيي
ندي فركت عيونها:سبني أنام بقي
مصطفى:تنامي فين حضانتك يابت..قومي غيري هدومك..سهيلةة..هي فين
ندي وهي بتقوم من علي السرير:معرفش..
مصطفى قام يلبس:أنتي ايه اللي جابك هنا فى السرير
ندي:يووه. معرفش
مصطفى:ماشي ماشي..صرخ فيها..قومي البسييي
ندي خرجت من أوضتها وهي بتتأفف..مصطفى لبس نص هدومه وخرج يدور عليها..لف الشقة كلها ملقهاش..اتجه للمرسل لقاها قاعدة وبترسم وهي..وهي!
مصطفى أول ماشافها..صفر بصوت عالي وضحك:أخيرا قررتي تبقي واحدة مننا..تعالي بالحضن ياغالية
سهيلة بصتله وهي بتتاوب:هي الساعة كام..
مصطفى كأنه افتكر..اتكلم بغيظ:أنتي مصحتنيش ليييه؟..الساعة تمانية ونص
سهيلة وهي بتتاوب:طب..طب كمل لبسك وأنا هروح أنام
مصطفى قرب منها:تنامي!..ومين هيفطرني
سهيلة حست بدوخة:مصطفى وسع يامصطفي..مليش نفس أكل أساسا
مصطفى بصلها بغيظ:يعني مفيش فطار
سهيلة طبطبت علي كتفه بخفة:صرف نفسك..صرف نفسك
سابته وراحت لأوضتها..نامت علي السرير علطول من غير مقدمات..راح وراها لقاها نامت..ندي شدته انه ينتبهلها..بصلها ورفعها زي الشوال بغيظ وخرج هو بيتمتم بكلام مش مفهوم!!!
__________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
_________________________
رؤية روقت شقتها وطبخت وخلصت اللي وراها...شالت هند ونزلت تحت..لقت حماتها قاعدة بتسبح..ابتسمت:صباح الخير
حماتها:صباح النور..اتأخرتي يعني علي مانزلتي
رؤية: أصل يوسف جاي النهاردة فحبيت أستقبله عندي وشقتنا روقتهاله أول امبارح
حماتها هزت راسها:ربنا يوفقه
رؤية:هي زينب عامله ايه؟؟
حماتها كشرت:تلاقيها جوا
رؤية اتكلمت بحرج: طب ممكن بس يعني
حماتها قاطعتها:هاتي البنت مش مشكله
رؤية ابتسمت وادتلها هند وهي شالتها والبنت فضلت تتحرك مابين ايديها
رؤية دخلت لزينب لقتها بتصلي وبتبكي علي السجادة..رؤية حست برعشة خفيفة من شكلها..قعدت علي السرير بصمت لحد ما خلصت..بصت لرؤية بعيون محمرة..رؤية حضنتها والحضن دا كان القشة اللي قضمت ظهر البعير..انفجرت في العياط بحسرة وقهر..رؤية مسدت علي شعرها بهدوء..انتفضت كام مرة في حضن رؤية..
رؤية همست:خلاص بقي يازينب هتقهري نفسك لحد امتي كدا،
زينب اتكلمت من بين دموعها بحسرة : ياسر يارؤية..ياسر شايفني ازاي دلوقتي..أكيد شايفني حرامية وبسرق من ورا أهلي
رؤية:متقوليش كدا بس..هو حزين عليكي أنتي..مش متخيل ان بنته اللي رباها يكسرها حد ميستاهلش!!
زينب:كنت بحبه يارؤية..اشتريته بالغالي وباعني بالرخيص!!
رؤية شددت علي حضنها:أنتي اللي كسبانة والله..أنتي اللي كسبانة!!..ربنا نجاكي منه بدل ماكنتي تتجوزيه ولا تتبلي بطفل..كنتى هتعملي ايه وقتها..بصي للحلو في الموضوع..خلصتي من شخص أناني ومادي مبتز .. كسبتي نفسك وطلعتي من تجربة وحشة علي الأقل بدون خساير..ليكي أخ وقف في ضهرك ومعاكي..أنتي متعلمة وحافظة القران وبتشتغلي الحمدلله..يعني طلعتي بمكاسب كبيرة..احمدي ربنا
همست وهي بتمسح دموعها:الحمدلله..أنتي وراكي حاجة النهاردة
رؤية:لاء بس يوسف هيعدي عليا شوية
اتنهدت:خلاص ماشي
رؤية ابتسمت:يلا قومي اغسلي وشك وحطي المرهم علي وشك..واطلعي اقعدي مع ماما برا هي كمان أمك وعايزة مصلحتك..ولو علي اللي عملته فدا من قهرتها عليكي بس!!!
زينب هزت راسها بموافقة وحاولت ترسم ابتسامة خفيفة تنور ملامحها.
_________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
_________________________
فرح اتنفست بصعوبة وهو مش بيرد عليها حتي..طب تتصل بتوفيق؟..لاء بلاش يعرف حاجة زي دي بينهم..حست بهزة تليفونها فتحته بسرعة لقتها رسالة مابعوتالها ومحتواها•أنا في الشغل •..بصت للرسالة بلهفة..سجتله ريكورد وهي بتمنع نفسها انها تعيط:عمار بالله عليك رد..وحياتي عندك..وحشتني أوي أنا هتجنن وأنت مش هنا..هتيجي امتي هاه
الرسالة وصلتله وهو سمعها..سمعها وقلبه بيتوجع عليها..مكنش متخيل انه هيظهر قدامها بالشكل دا..عض علي شفايفه بغيظ من نفسه ونبرة صوتها كافية انها تكسره..مينفعش يظهر قدامها كدا..هيخسر نفسه قبل مايخسرها!..
خرج من تفكيره علي صوت خشن صعيدي اللهجة:يالا يا باشا الهدف ظهر جدامنا..هنهجم ولا لاء
اتنهد بصوت مسموع ورمي تليفونه في العربية وقفل الباب وهو بيتأكد من سلاحه:يلا ياعبد العظيم خليهم يثبتو مكانهم
رمت تليفونها بغيظ وهي بتتحرك في الشقة بغيظ رايحة جاية توصله ازاي دلوقتي..؟؟
رنت علي توفيق..رد عليها فاتكلمت بنبرة تبان هادية:السلام عليكم
توفيق:وعليكم السلام..ايه في ايه
فرح:اتخضيت كدا ليه متقلقش مفيش حاجة..دا..دا أنا بطمن عليك بس!
توفيق:امم هو مش بيرد عليكي ولا ايه
بلعت ريقها معقولة يكون عرف حاجة؟..اتكلمت بارتباك:لاء لاء بس هو
قاطعها:هو لما بيبقي عنده عملية ولا حاجة بيقفل تليفونه معلش..
نبرته ريحتها..معني كدا انه ميعرفش حاجة!..زفرت بهدوء:هو، هو كلمك؟
توفيق:كلمني النهاردة الصبح وقالي انه عنده شغل لوقت طويل المرادي واحتمال يسافر القاهرة عشان عنده عملية مهمة..هو مقالكيش
مسكت طرف كمها بغيظ وحاولت تتكلم بنبرة عادية: لاء لاء هو قالي بس هو مقدرتش أحدد الوقت اللي ممكن يغيبه كدا
توفيق اتنهد:معلش هو شغله صعب ومتعب بالنسبة لكلامه فتقديري من أسبوعين لتلت أسابيع كدا
شهقت بصدمة:ايه
توفيق ضحك:عذرك والله..تلاقيكي بتقولي ايه الجوازة المنيلة دي..بس دا شغله بردو..معلش هو هيعوضك أكيد لما يرجع
تهتهت بملامح جامدة:هاه ماشي..هو أنت هترجع امتي
توفيق:يومين كدا..لو حابة تقعدي عند محمود عادي مش مشكله
فرح:خلاص ماشي مفيش مشكلة..بس رن عليا يوم ماتيجي
توفيق:خلاص عيوني..سلام
همست:سلام
قعدت علي أقرب كرسي بخنقة..همست وهي بتضرب علي رجلها:يانهار أسود..يانهار أسود..تلت أسابيع..تلت أسابيع نهار أسود..دا كدا هيفضل ياخد من الزفت المسكن دا..وحالته هتبوظ أكتر..مسحت علي وشها بعنف:يخربيت كدا!
_________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
________________________
رؤية نزلت تفتح الباب بفرحة وبسرعة..فتحت الباب بتاع البيت..بصتله بابتسامة..حط شنطته على الأرض..وهي جريت على حضنه بسرعة..بادلها بفرحة وحب..مسح علي راسها بحب..سحبته في ايديها وقفلت الباب..حضنته تاني:وحشتني أوي أوي يايوسف
ظبط نضارته واتكلم:وأنتي والله..البنات فين وحشوني هما كمان
رؤية:لاء دول في حضانتهم ساعة ولا حاجة وهروح أجيبهم
يوسف: وال..والبنت الصغيرة التالتة
ابتسمت:هند..هند مع حماتي جوا..
يوسف:وهشوفها ولا
رؤية:هتشوفها طبعا..تعالى ادخل سلم عليها
يوسف: طب قوليلهم اني داخل
رؤية اومأت ودخلت بسرعة.. خرجت بعد ثواني : تعالي يلا
دخل وسلم عليهم..زينب خرجت وهي لابسة النقاب لأن الكدمات لسه في وشها بوضوح..يوسف لمحها ونظراته اتحولت للإستغراب..
زينب حاولت تتكلم بصوت يبان انه كويس:ازي حضرتك يا أبيه
يوسف:دا..دا صوت زينب
رؤية ابتسمت:اه هي زينب فعلا
يوسف كشر:ودا ليه دا..أنا كل ما بشوفك بعرف اني عجزت خلاص..ماتبانيش وأنا هنا تاني
رؤية ضحكت: اعترف انها راحت عليك خلاص..وبورت
حماتها اتكلمت بابتسامة ليها مغذي :لا بار ولا حاجة..هو في رجالة بتبور..ان شاء الله تلاقي اللي تسعدك وتهنيك
يوسف:إن شاء الله..ادعيلي بس لحسن أنا سوقي وقف باين كدا والله أعلم
زينب ضحكت بخفة..يوسف اتكلم بغيظ:اهو بكرة هيجي اليوم اللي اتجوز فيه وساعتها محدش هيبقي له عندي كلمه
رؤية:متأكد؟
يوسف عدل لياقة قميصه:ثقة في الله الواحد ان شاء الله يتلم في الكوشة..بس ادعي لأخوكي بس..يافاقدة الأهلية أنتي
رؤية ضحكت..وهو كمل وشاورلها..وهي فهمت..
رؤية:طب يلا يايوسف تعالي ارتاح فوق عندي..عشان نسيبهم علي راحتهم بقي
يوسف قام:طب هطلع فوق أنا بقي..تعوزو حاجة مني بقي
حماتها ابتسمت:لاء عايزين سلامتك
رؤية دخلت جابت هند من جوا وبعدها خرجت وطلعت هي ويوسف فوق..
ابتسامة حماتها اتلاشت بمجرد خروجها..زينب قربت منها وهمست:ماما
أمها بعدت وشها عنها واتكلمت:لا ماما ولا بتاع!..روحي شوفي وراكي ايه..
جت تمسك ايديها..أمها زقتها ورفعت نبرتها حبة:روحي..روحي ربنا يرضي عنك..روحي وسبيني في اللي أنا فيه
_________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
________________________
يوسف خرج من الحمام وهو بينشف شعره..همهم براحة..
رؤية نادتله:تعالي هنا
اتجهلها..بص للأكل وضحك:كشري!
رؤية حاولت تبتسم:عشان تشوف مين بتعمله أحلي
يوسف ساب الفوطه و حضنها وهي دمعت بخفة في حضنه..مسح دمعتها وحاول يبتسم هو كمان وهو بيمسد علي دراعها:يلا تعالي ناكل..قرصها من خدودها..عشان أدوق أكلك..وأطمن علي ياسر
ضربته بخفة:اسمها تطمن علي أختك..أله لو مكنتش أختك الصغيرة
يوسف:أنتي صغيرة!..دا أنا اللي صغير والله
ضحكت وحضنته:هاه جبتلي ايه
يوسف:مادية حقيرة..حاضر هفتح الشنط بس أنا جعان والله جعان..
رؤية ضحكت :طب يلا ناكل
___________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
____________________________
شهندا بلعت ريقها ورنت عليه..وهي مرعوبة تسمع ردة فعله: عملت ايه في التنسيق؟
اتنهد:هحقق حلمي
ابتسمت بفرحة وحماس :بجد
أحمد ابتسم بخفة علي حماسها:وأنتي
شهندا:هدخل حقوق وهبقي محامية قد الدنيا
أحمد:مبرووك
شهندا ابتسامتها تلاشت:مش من قلبك..صح
أحمد: شهندا أنا أسف علي اللي قلته أخر مرة في الأسانسير..مش هتدخل في حياتك تاني..أنا بس كنت منفعل شويه و
شهندا قاطعته: كان عندك حق.. كان لازم التفت لنفسي بقي.. السلبية منفعتنيش بحاجة.. أنت صح
ابتسم:عايزة حاجة؟
شهندا نفت بخفة:لاء شكرا..أنا بس حبيت..حبيت أشكرك انك جبتلي نتيجتي وكنت سبب في فرحتي
أحمد:علي ايه..احنا جيران بردو
شهندا همهمت بحزن :هاه..اه صح احنا جيران فعلا
________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
___________________________
ابراهيم قاعد في الصالة برا وهو بيستغفر في سره: أعرف بقي طلقت بنتي ليه
إسلام اتنهد:ملناش نصيب مع بعض ياعمي
إبراهيم:نااعم..ملكوش نصيب..دا أنتم كنتم ماصدقته تتجوزو..أنا لسه فاكر لحد دلوقتي لهفتكم علي بعض..ايه اللي غيركم كدا
إسلام ابتسم بسخرية:لأن بنتك اللي خدتها من ايدك مش هي دي داليا اللي أعرفها دلوقتى
إبراهيم:ليه بس كده يابني..أهملتك؟..أهملت عيالك؟
إسلام: ياريت!
إبراهيم ضرب كف بكف:لاء فهمني بقي..عشان مش فاهم
إسلام:بنتك معدتش بتحترم حد لا أنا..ولا أمي..صوتها علي ولسانها طول..بقت جشعة وميفرقش معاها غير المادة والفلوس..أختي خرجت مع جوزها من يومين وأنت مقعدني في البيت..مع اني مكرمها ومش مغربها أسف يعني زي أختها..قالتلي افتحلي محل فتحتهولها..نجدد البيت عملتلها اللي هي عايزاه..نبني شقق للعيال اللي كبيرهم مكملش ١١ سنة..بنيت لأجل عيونها..نشتري شقة في مطروح عشان تروح تصيف علي مزاجها..وبعد مالقرش جري في ايديها اتنططت عليا..رجعتلي حق المحل اللي اشترتهولها..وقبلت وحطيت الجزمة في بوقي..من بعدها قربي ليها ميحصلش غير لما أديها فلوس ولا أجبلها حاجة..وحاجات تانية أنا اتكسف أقولها..أنا كدا مرتاح
إبراهيم اتنهد:يعني معتش عاوزها..معتش بتحبها زي الأول
حرك عيونه بتوتر: لاء..كمل بثقة..حتي لو بحبها مفيش علاقة بدون احترام متبادل
إبراهيم:بس هي قالتلي انك تعرف ستات عليها
انتفض بفزع:محصلش..دا زنب وأنا معملوش أبدا..لاتربيتي ولا ديني حتي..أنا بس حبيت أوهمها بكدا يمكن تتعدل لكنها ساقت فيها..لحد..لحد زي مانت شايف وصلت بينا للطلاق
إبراهيم:أنت شايف ان دا أخر كلام عندك خلاص..
إسلام بلع ريقه:خلاص خلصت..أنا جبتلها ولادها اللي مخدتهمش معاها..قعدو يعيطو ملهوفين علي أمهم..كمل ببرود.. لكن هي فالله أعلم!
_________________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
_________________________
فرح قطعت اجازتها..وكملت شغل..والعلاقه بينها وبين عمار اتقلبت لرسايل...للحظة كرهته لأنه مش خايف علي نفسه..دايما تسأل نفسها..طب ليه بيبعد؟..هيستفاد ايه؟...مامسيره يرجع كان لازم يعني!..كانت بتقضي يومين عندها ويومين في شقتها...بس حالتها كانت متسرش حد..دايما سرحانة وبهتانة..وهو مش بيرد عليها..اكتشفت انه بيكلم توفيق وبيطمن عليه وعليها بس وهي مش موجودة،الكل أسئلتهم بدأت تظهر:عمار فين؟..أنتم متخانقين؟..دا أنتم لسه متجوزين؟..مالك دبلانة ليه كدا؟..طب حصل حاجة بينكم؟..قولينا واحنا نتدخل..الكل سأل ماعدا توفيق اللي احترم رغبتها واكتفي باجابتها..بيكلمني بليل وبيطمن عليا وقت ماهو فاضي.
وهي في المستشفي كانت بتشرب نسكافيه بهدوء وملل..لقت دكتورة زميلتها مقربة عليها..ضحكت:ايه دا أنتي هنا
فرح ابتسمت بذوق:هكون فين يعني..
إنجي:بس أنا شفت جوزك من شوية عند دكتور سامح
بصتلها بصدمة:بجد..عمار جوزي
انجي:اه..متهيئلي هو..خدت بالي منه من فرحكم..
فرح سابتها وجريت بسرعه علي عيادة سامح..حست بدوخة خفيفة وهي بتاخد نفسها من الجري..قربت من العيادة..خدت نفس ودخلت بسرعة وهي مبتسمة..ابتسامتها تلاشت لما لقت دكتور سامح مع مريض تاني
سامح لمحها و ابتسم:أهلا يادكتور ادخلي
فرح: لاء بس هو..هو عمار جوزي كان هنا
سامح:اه تلاقيه لسه ماشي..دا أنا حتي
مسمعتش باقي كلامه وجريت..دخلت الاوضة قلعت البالطو بتاعها وخدت شنطتها واتجهت بسرعة برا المستشفي..وقفت تاكسي بسرعة وركبته..
وصلت للبيت بعد دقايق..
جات تركب الأسانسير لقته مشغول..طلعت علي رجلها علي السلالم بسرعة وهي بتنهج..فتحت شقتها بسرعة..لمحت جزمته..ابتسمت بفرحة وجريت علي أوضتها..فتحت الباب بسرعة وهي بتنهج وبتاخد نفسها..لقته واقف بيطلع هدوم ليه من الدولاب..
عيونهم اتقابلت في نظرة طويلة..قربت بخفة منه وعينيها لمعت..قرب منها في لحظة خطفها في حضنه..للحظات استوعبت وجسمها متخشب مابين ايديه..بعدته عنها بعنف..وصرخت فيه بحرقة علي تعبها من غيره الأيام اللي فاتت:أنت ايييه..اييه معندكش دم..مبتحسش..مفيش خالص..تغيب تغيب ولا كأن في كلبة هنا مستنياك وبتتوجع من فراقك..ايه اللي أنت فيه دا مفيش احساس خالص..اييييه أنا مش مراتك يعني ليا حق فيك أكتر منك..نغزته بصباعها في صدره..ليا حق فيك..يعني متغبش وترجع علي مزاجك..مش تعمل العاملة وتهرب..اتحمل نتيجة أخطاءك مرو..ليه بتوجعني كدا..ليه..عيطت بحرقة..أنت مش عارف حالتي كانن ازاي وأنا كل دقيقة متخيلاك بتبلع القرف دا..مسكته من هدومه وهزته وهي بتصرخ فيه..أنت ايه يا أخيي..حرام عليك..أنا بحبك انت..أنا مراتك ياغبي..!
كل دا وهو ساكن..ثابت مبيتحركش.. رمت نفسها في حضنه وكأن الحضن دا دوب التلج اللي بينهم..حضنها بشوق رهيب وكل واحد فيهم بيدفن نفسه في حضن التاني..بيتحامي فيه..حست بدمعة خفيفة علي رقبتها..شددت علي حضنه وهي بتعيط..رفعها بين ايديه..حس بجسمها اتراخي بين ايديه...مبتتحركش..وقبضتها حواليه خفت..بعدها عنه وهو بيبصلها بصدمة وهي قاطعة النفس وفي دنيا غير الدنيا!!
#يتبع
#FarahElDesoky
#عمر_بيبتدي
__________________
اللهم صلي وسلم وبارك على سيدنا ونبينا محمد عدد الحركات والسكون..اللهم صلي وسلم وبارك علي سيدنا محمد بعدد كل نفس حي اللي يوم يكون لله المرجع والمستقر
__________________
