تَــهَـشُـم

البارت التاسع عشر

..

صكر ..لبسي عبايتج وتعالي وراي

استغربت منه شيريد مني هسه وين اروح وياه بهالوكت

ركضت لغرفتي اخذت العبايه وطلعت هو منتظرني بباب المطبخ

اخذني لوره البيت اكو مثل بيت صغيرون عدهم خفت وين جايبني وهذا
البيت فارغ محد بي وعدهم فاتحه ومخبوصين شنو السالفه

صكر.. دخلي راح تشوفين مفاجئه كلش راح تعجبج جوه

همسه.. مفاجئة شنو بهالوكت صكر فهمني شكو !!

صكر .. دخلي وشوفي بلا حجي زايد الوادم منتظرتنه

همسه.. فتحت الباب ودخلت بس ارجف من الخوف احسه فلم رعب ..
سمعت صوت زلم جوه راسا باوعت لصكر بمعنى منو

دخل قبلي واشرلي اجي وراه
دخلت وراه شفت صراع كاعد كبالي شويه ارتاحيت كاعدين مقابيله ٣ زلم اصواتهم من غريبه

تقربت جان اشوف خوالي مصطفى شوكت ومحمد

سلمت عليهم بس كلبي ما مرتاح اكيد عمر لو خاله حلا بيهم شي ياربي سترك

كعدت يم خالي مصطفى وسألته ع عمر ليش ما اجه وياهم

مصطفى.. وين يجي يا خالي اذا يجي خاف تصير مشكله ومالنه خلك مشاكل هسه

تفهمت الموضوع ورحت اقدم الهم شي يشربوه

رجعت شايله صينيه بيها الجاي لاحظت  اصواتهم عاليه ونقاش حاد بينهم  وسمعت اسمي بالموضوع خوالي يريدون يرجعوني وياهم ويوصلون لحل

قدمت الهم الجاي ورجعت لبيت الحجيه بس بالي يمهم اريد اعرف شنو صار

دخلت للبيت صارت رقيه بوجهي

رقيه.. وين رحتي وي صكر شعدكم
همسه .. ولي من وجهي مالي خلكج تره
رقيه .. شكد ادبسزز وما محترمه تره انتي خدامه هنا لا تشوفين روحج اكبر من هيج شي

همسه .. ابتسمت بوجها ورفعت حاجبي ورحت من يمها .. صح ضجت بس ادري هالحركه تستفز اكبر واحد وتبين الها اني ما مهتمه بحجيها

توضيت ورحت لغرفتي اصلي وادعي لربي يخلصني من هالبيت والي بي لان صدك طلعت روحي صار سنه وياهم ولهسه اسمع كلمة الفصليه والخدامه وغير الكتل الي حصلته من صكر

سجدت سجده طويله شكد جان اكو حجي بكلبي بس ما طلع ولا حرف مني ماعرف ليش كلشي  طار من راسي بس الي يريحني انو الله يعرف بكلشي بدون ما اكله

بس اني احب اكعد بالساعات احجي وياه عن كلشي يصير وياي

زينب .. همسه صكر يريدج بره
همسه .. يلا هسه اجي
زينب .. شعدكم انتم اليوم
همسه .. بعدين اكلج خلي اروحله بسرعه
طلعت لكيته واكف بالباب
صكر.. روحي يم خوالج شويه ويرحون