تَــهَـشُـم

البارت السابع عشر

..

من بعد الي صار صكر مابقه يعاملني مثل اول صحيح يضربني بين فتره وثانيه بس مو مثل اول

ثاني يوم اجت فاطمه اخت صكر حامل وبشهرها التاسع اجت ترتاح يم اهلها لحد ماتولد

صحيح ماتحجي وياي ومقلله علاقته بيه مثل الكل بهذا البيت ماعدهم اختلاط بيه ابد بس ما اذوني بشي يعني احتار بوصف مشاعرهم تجاهي مااعرف يحبوني او لا

ماطولت فاطمه غير يومين عدنه وباليوم الثالث فزيت ع صوت صريخ البيت كله كعد ع صوتها رحت اركض اله شفتها نازله من الدرج مستنده ع صكر وامها اول ما نزلوا وصتني الحجيه ام صراع ندعيلها اني وزينب ونقره قرآن الها حتى تسهل عليها ولادتها وخصوصا هذا اول طفل الها

بسرعه رحت توضيت وصعدت يم زينب اشوف اذا عدها قرآن اقره بي لان ماعندي

دكيت الباب ودخلت لكيتها تبجي وخايفه ع اختها كعدت يمها اواسيها وكتلها امج وصتني نقره الها قرآن وندعيلها راسا كامت توضت واجت طلعت الي القران وهي ضلت تصلي ..

قريت كم سورة وكمت اسوي الغده وانظف البيت لان اكيد الكل راح تجي تتحمد الها بالسلامه من تولد هنا عدنه مو بيت عيالها ..
جانن النسوان الي يشتغلن عدهم بعدهن ماجايات لان بعد وكت .. كمت اشتغل وحدي لحد مايجن

طلعت اللحم ذبيه ع النار وبلشت انظف صعدت فوك نظفت غرفة فاطمه ورتبت الاغراض وخليت بخور

صارت كدامي غرفة صكر ... صار عندي فضول ادخل بيها واشوفها
فتحت الباب وشميت عطره يبووه يخنك كد ما قوي .. الغرفه اخشاب بيضه وجبيره والفرشه نيليه طوخ ملابسه مرتبه والميز متروس عطورات اكثرهن من نفس النوع

سمعت صوت جوه .. متت خوف يمه بس لا اجه صكر وهسه يشوفني هنا

طلعت بسرعه وسديت الباب وراي
نزلت جوه كملت تنظيف البيت وعيني ع اللحم كملت كلشي واجن النسوان يساعدني هن كملن الغده عني و اني كعدت اسوي حلويات لان شاطره بيهن
يعني هلهكت من الشغل كملت كلشي صبيت غده للموجودين واخذت اكل الي ولزينب احب اكعد وياها واقوي علاقتي بيها وارجعها مثل قبل .. تغدينه وكعدت اسولف وياها عن ريم ورشا ضحكتها شوي ..

صار العصر وهم ماكو اجه صكر دخل للحمام ورجع طلع سألته ع فاطمه وكال بعدها ادعولها ..

صار الليل وماكو خبر عنهم بده النعاس يدخل لعيني غفيت واني كاعده ع القنفه

بعدني توني نايمه حسيت شي صار ع وجهي فتحت عيني شفته صكر ذاب عليه الحجاب كضني من ايدي حيل وخزرني

صكر : كومي منا ماتسمعين صوت الولد موجودين
همسه : اي. يلا كايمه .. فاطمه شصار عليها
صكر : روحي يمهم بالغرفه
همسه : تردون عشه اصبلكم
صكر :ولج روحي يم النسوان يلا